| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༥. ཨགདངྒཔཉྷོ
5. Agadaṅgapañho
༥. ‘‘བྷནྟེ ནཱགསེན, ‘ཨགདསྶ དྭེ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི དྭེ ཨངྒཱནི གཧེཏབྦཱནཱི’’ཏི། ‘‘ཡཐཱ, མཧཱརཱཛ, ཨགདེ ཀིམཱི ན སཎྛཧནྟི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན མཱནསེ ཀིལེསཱ ན སཎྛཔེཏབྦཱ། ཨིདཾ, མཧཱརཱཛ, ཨགདསྶ པཋམཾ ཨངྒཾ གཧེཏབྦཾ།
5. ‘‘Bhante nāgasena, ‘agadassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti. ‘‘Yathā, mahārāja, agade kimī na saṇṭhahanti, evameva kho, mahārāja, yoginā yogāvacarena mānase kilesā na saṇṭhapetabbā. Idaṃ, mahārāja, agadassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, ཨགདོ དཊྛཕུཊྛདིཊྛཨསིཏཔཱིཏཁཱཡིཏསཱཡིཏཾ སབྦཾ ཝིསཾ པཊིཧནཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན རཱགདོསམོཧམཱནདིཊྛིཝིསཾ སབྦཾ པཊིཧནིཏབྦཾ། ཨིདཾ, མཧཱརཱཛ, ཨགདསྶ དུཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན –
‘‘Puna caparaṃ, mahārāja, agado daṭṭhaphuṭṭhadiṭṭhaasitapītakhāyitasāyitaṃ sabbaṃ visaṃ paṭihanati, evameva kho, mahārāja, yoginā yogāvacarena rāgadosamohamānadiṭṭhivisaṃ sabbaṃ paṭihanitabbaṃ. Idaṃ, mahārāja, agadassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘སངྑཱརཱནཾ སབྷཱཝཏྠཾ, དཊྛུཀཱམེན ཡོགིནཱ།
‘‘‘Saṅkhārānaṃ sabhāvatthaṃ, daṭṭhukāmena yoginā;
ཨགདེནེཝ ཧོཏབྦཾ, ཀིལེསཝིསནཱསནེ’’’ཏི༎
Agadeneva hotabbaṃ, kilesavisanāsane’’’ti.
ཨགདངྒཔཉྷོ པཉྩམོ།
Agadaṅgapañho pañcamo.
