| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
11. ஆக³ந்துகஸுத்தங்
11. Āgantukasuttaṃ
159. ‘‘ஸெய்யதா²பி, பி⁴க்க²வே, ஆக³ந்துகாகா³ரங். தத்த² புரத்தி²மாயபி தி³ஸாய ஆக³ந்த்வா வாஸங் கப்பெந்தி, பச்சி²மாயபி தி³ஸாய ஆக³ந்த்வா வாஸங் கப்பெந்தி, உத்தராயபி தி³ஸாய ஆக³ந்த்வா வாஸங் கப்பெந்தி, த³க்கி²ணாயபி தி³ஸாய ஆக³ந்த்வா வாஸங் கப்பெந்தி, க²த்தியாபி ஆக³ந்த்வா வாஸங் கப்பெந்தி, ப்³ராஹ்மணாபி ஆக³ந்த்வா வாஸங் கப்பெந்தி, வெஸ்ஸாபி ஆக³ந்த்வா வாஸங் கப்பெந்தி, ஸுத்³தா³பி ஆக³ந்த்வா வாஸங் கப்பெந்தி; ஏவமேவ கோ², பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் பா⁴வெந்தோ அரியங் அட்ட²ங்கி³கங் மக்³க³ங் ப³ஹுலீகரொந்தோ யே த⁴ம்மா அபி⁴ஞ்ஞா பரிஞ்ஞெய்யா, தே த⁴ம்மே அபி⁴ஞ்ஞா பரிஜானாதி , யே த⁴ம்மா அபி⁴ஞ்ஞா பஹாதப்³பா³, தே த⁴ம்மே அபி⁴ஞ்ஞா பஜஹதி, யே த⁴ம்மா அபி⁴ஞ்ஞா ஸச்சி²காதப்³பா³, தே த⁴ம்மே அபி⁴ஞ்ஞா ஸச்சி²கரோதி, யே த⁴ம்மா அபி⁴ஞ்ஞா பா⁴வேதப்³பா³, தே த⁴ம்மே அபி⁴ஞ்ஞா பா⁴வேதி.
159. ‘‘Seyyathāpi, bhikkhave, āgantukāgāraṃ. Tattha puratthimāyapi disāya āgantvā vāsaṃ kappenti, pacchimāyapi disāya āgantvā vāsaṃ kappenti, uttarāyapi disāya āgantvā vāsaṃ kappenti, dakkhiṇāyapi disāya āgantvā vāsaṃ kappenti, khattiyāpi āgantvā vāsaṃ kappenti, brāhmaṇāpi āgantvā vāsaṃ kappenti, vessāpi āgantvā vāsaṃ kappenti, suddāpi āgantvā vāsaṃ kappenti; evameva kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto ye dhammā abhiññā pariññeyyā, te dhamme abhiññā parijānāti , ye dhammā abhiññā pahātabbā, te dhamme abhiññā pajahati, ye dhammā abhiññā sacchikātabbā, te dhamme abhiññā sacchikaroti, ye dhammā abhiññā bhāvetabbā, te dhamme abhiññā bhāveti.
‘‘கதமே ச, பி⁴க்க²வே, த⁴ம்மா அபி⁴ஞ்ஞா பரிஞ்ஞெய்யா? பஞ்சுபாதா³னக்க²ந்தா⁴திஸ்ஸ வசனீயங். கதமே பஞ்ச? ஸெய்யதி²த³ங் – ரூபுபாதா³னக்க²ந்தோ⁴…பே॰… விஞ்ஞாணுபாதா³னக்க²ந்தோ⁴. இமே, பி⁴க்க²வே, த⁴ம்மா அபி⁴ஞ்ஞா பரிஞ்ஞெய்யா. கதமே ச, பி⁴க்க²வே, த⁴ம்மா அபி⁴ஞ்ஞா பஹாதப்³பா³? அவிஜ்ஜா ச ப⁴வதண்ஹா ச – இமே, பி⁴க்க²வே, த⁴ம்மா அபி⁴ஞ்ஞா பஹாதப்³பா³. கதமே ச, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³? விஜ்ஜா ச விமுத்தி ச – இமே, பி⁴க்க²வே, த⁴ம்மா அபி⁴ஞ்ஞா ஸச்சி²காதப்³பா³. கதமே ச, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³? ஸமதோ² ச விபஸ்ஸனா ச – இமே, பி⁴க்க²வே, த⁴ம்மா அபி⁴ஞ்ஞா பா⁴வேதப்³பா³. கத²ஞ்ச, பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் பா⁴வெந்தோ அரியங் அட்ட²ங்கி³கங் மக்³க³ங் ப³ஹுலீகரொந்தோ, யே த⁴ம்மா அபி⁴ஞ்ஞா பரிஞ்ஞெய்யா தே த⁴ம்மே அபி⁴ஞ்ஞா பரிஜானாதி…பே॰… யே த⁴ம்மா அபி⁴ஞ்ஞா பா⁴வேதப்³பா³, தே த⁴ம்மே அபி⁴ஞ்ஞா பா⁴வேதி? இத⁴, பி⁴க்க²வே, பி⁴க்கு² ஸம்மாதி³ட்டி²ங் பா⁴வேதி…பே॰… ஸம்மாஸமாதி⁴ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்…பே॰… ஏவங் கோ², பி⁴க்க²வே, பி⁴க்கு² அரியங் அட்ட²ங்கி³கங் மக்³க³ங் பா⁴வெந்தோ அரியங் அட்ட²ங்கி³கங் மக்³க³ங் ப³ஹுலீகரொந்தோ யே த⁴ம்மா அபி⁴ஞ்ஞா பரிஞ்ஞெய்யா, தே த⁴ம்மே அபி⁴ஞ்ஞா பரிஜானாதி, யே த⁴ம்மா அபி⁴ஞ்ஞா பஹாதப்³பா³, தே த⁴ம்மே அபி⁴ஞ்ஞா பஜஹதி, யே த⁴ம்மா அபி⁴ஞ்ஞா ஸச்சி²காதப்³பா³, தே த⁴ம்மே அபி⁴ஞ்ஞா ஸச்சி²கரோதி, யே த⁴ம்மா அபி⁴ஞ்ஞா பா⁴வேதப்³பா³, தே த⁴ம்மே அபி⁴ஞ்ஞா பா⁴வேதீ’’தி. ஏகாத³ஸமங்.
‘‘Katame ca, bhikkhave, dhammā abhiññā pariññeyyā? Pañcupādānakkhandhātissa vacanīyaṃ. Katame pañca? Seyyathidaṃ – rūpupādānakkhandho…pe… viññāṇupādānakkhandho. Ime, bhikkhave, dhammā abhiññā pariññeyyā. Katame ca, bhikkhave, dhammā abhiññā pahātabbā? Avijjā ca bhavataṇhā ca – ime, bhikkhave, dhammā abhiññā pahātabbā. Katame ca, bhikkhave, dhammā abhiññā sacchikātabbā? Vijjā ca vimutti ca – ime, bhikkhave, dhammā abhiññā sacchikātabbā. Katame ca, bhikkhave, dhammā abhiññā bhāvetabbā? Samatho ca vipassanā ca – ime, bhikkhave, dhammā abhiññā bhāvetabbā. Kathañca, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto, ye dhammā abhiññā pariññeyyā te dhamme abhiññā parijānāti…pe… ye dhammā abhiññā bhāvetabbā, te dhamme abhiññā bhāveti? Idha, bhikkhave, bhikkhu sammādiṭṭhiṃ bhāveti…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto ye dhammā abhiññā pariññeyyā, te dhamme abhiññā parijānāti, ye dhammā abhiññā pahātabbā, te dhamme abhiññā pajahati, ye dhammā abhiññā sacchikātabbā, te dhamme abhiññā sacchikaroti, ye dhammā abhiññā bhāvetabbā, te dhamme abhiññā bhāvetī’’ti. Ekādasamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 11-12. ஆக³ந்துகஸுத்தாதி³வண்ணனா • 11-12. Āgantukasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 11-12. ஆக³ந்துகஸுத்தாதி³வண்ணனா • 11-12. Āgantukasuttādivaṇṇanā
