| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. ආගන්‌තුකසුත්‌තං
11. Āgantukasuttaṃ
159. ‘‘සෙය්‍යථාපි, භික්‌ඛවෙ, ආගන්‌තුකාගාරං. තත්‌ථ පුරත්‌ථිමායපි දිසාය ආගන්‌ත්‌වා වාසං කප්‌පෙන්‌ති, පච්‌ඡිමායපි දිසාය ආගන්‌ත්‌වා වාසං කප්‌පෙන්‌ති, උත්‌තරායපි දිසාය ආගන්‌ත්‌වා වාසං කප්‌පෙන්‌ති, දක්‌ඛිණායපි දිසාය ආගන්‌ත්‌වා වාසං කප්‌පෙන්‌ති, ඛත්‌තියාපි ආගන්‌ත්‌වා වාසං කප්‌පෙන්‌ති, බ්‍රාහ්‌මණාපි ආගන්‌ත්‌වා වාසං කප්‌පෙන්‌ති, වෙස්‌සාපි ආගන්‌ත්‌වා වාසං කප්‌පෙන්‌ති, සුද්‌දාපි ආගන්‌ත්‌වා වාසං කප්‌පෙන්‌ති; එවමෙව ඛො, භික්‌ඛවෙ, භික්‌ඛු අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො යෙ ධම්‌මා අභිඤ්‌ඤා පරිඤ්‌ඤෙය්‍යා, තෙ ධම්‌මෙ අභිඤ්‌ඤා පරිජානාති , යෙ ධම්‌මා අභිඤ්‌ඤා පහාතබ්‌බා, තෙ ධම්‌මෙ අභිඤ්‌ඤා පජහති, යෙ ධම්‌මා අභිඤ්‌ඤා සච්‌ඡිකාතබ්‌බා, තෙ ධම්‌මෙ අභිඤ්‌ඤා සච්‌ඡිකරොති, යෙ ධම්‌මා අභිඤ්‌ඤා භාවෙතබ්‌බා, තෙ ධම්‌මෙ අභිඤ්‌ඤා භාවෙති.
159. ‘‘Seyyathāpi, bhikkhave, āgantukāgāraṃ. Tattha puratthimāyapi disāya āgantvā vāsaṃ kappenti, pacchimāyapi disāya āgantvā vāsaṃ kappenti, uttarāyapi disāya āgantvā vāsaṃ kappenti, dakkhiṇāyapi disāya āgantvā vāsaṃ kappenti, khattiyāpi āgantvā vāsaṃ kappenti, brāhmaṇāpi āgantvā vāsaṃ kappenti, vessāpi āgantvā vāsaṃ kappenti, suddāpi āgantvā vāsaṃ kappenti; evameva kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto ye dhammā abhiññā pariññeyyā, te dhamme abhiññā parijānāti , ye dhammā abhiññā pahātabbā, te dhamme abhiññā pajahati, ye dhammā abhiññā sacchikātabbā, te dhamme abhiññā sacchikaroti, ye dhammā abhiññā bhāvetabbā, te dhamme abhiññā bhāveti.
‘‘කතමෙ ච, භික්‌ඛවෙ, ධම්‌මා අභිඤ්‌ඤා පරිඤ්‌ඤෙය්‍යා? පඤ්‌චුපාදානක්‌ඛන්‌ධාතිස්‌ස වචනීයං. කතමෙ පඤ්‌ච? සෙය්‍යථිදං – රූපුපාදානක්‌ඛන්‌ධො…පෙ.… විඤ්‌ඤාණුපාදානක්‌ඛන්‌ධො. ඉමෙ, භික්‌ඛවෙ, ධම්‌මා අභිඤ්‌ඤා පරිඤ්‌ඤෙය්‍යා. කතමෙ ච, භික්‌ඛවෙ, ධම්‌මා අභිඤ්‌ඤා පහාතබ්‌බා? අවිජ්‌ජා ච භවතණ්‌හා ච – ඉමෙ, භික්‌ඛවෙ, ධම්‌මා අභිඤ්‌ඤා පහාතබ්‌බා. කතමෙ ච, භික්‌ඛවෙ, ධම්‌මා අභිඤ්‌ඤා සච්‌ඡිකාතබ්‌බා? විජ්‌ජා ච විමුත්‌ති ච – ඉමෙ, භික්‌ඛවෙ, ධම්‌මා අභිඤ්‌ඤා සච්‌ඡිකාතබ්‌බා. කතමෙ ච, භික්‌ඛවෙ, ධම්‌මා අභිඤ්‌ඤා භාවෙතබ්‌බා? සමථො ච විපස්‌සනා ච – ඉමෙ, භික්‌ඛවෙ, ධම්‌මා අභිඤ්‌ඤා භාවෙතබ්‌බා. කථඤ්‌ච, භික්‌ඛවෙ, භික්‌ඛු අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො, යෙ ධම්‌මා අභිඤ්‌ඤා පරිඤ්‌ඤෙය්‍යා තෙ ධම්‌මෙ අභිඤ්‌ඤා පරිජානාති…පෙ.… යෙ ධම්‌මා අභිඤ්‌ඤා භාවෙතබ්‌බා, තෙ ධම්‌මෙ අභිඤ්‌ඤා භාවෙති? ඉධ, භික්‌ඛවෙ, භික්‌ඛු සම්‌මාදිට්‌ඨිං භාවෙති…පෙ.… සම්‌මාසමාධිං භාවෙති විවෙකනිස්‌සිතං විරාගනිස්‌සිතං නිරොධනිස්‌සිතං වොස්‌සග්‌ගපරිණාමිං…පෙ.… එවං ඛො, භික්‌ඛවෙ, භික්‌ඛු අරියං අට්‌ඨඞ්‌ගිකං මග්‌ගං භාවෙන්‌තො අරියං අට්‌ඨඞ්‌ගිකං මග්‌ගං බහුලීකරොන්‌තො යෙ ධම්‌මා අභිඤ්‌ඤා පරිඤ්‌ඤෙය්‍යා, තෙ ධම්‌මෙ අභිඤ්‌ඤා පරිජානාති, යෙ ධම්‌මා අභිඤ්‌ඤා පහාතබ්‌බා, තෙ ධම්‌මෙ අභිඤ්‌ඤා පජහති, යෙ ධම්‌මා අභිඤ්‌ඤා සච්‌ඡිකාතබ්‌බා, තෙ ධම්‌මෙ අභිඤ්‌ඤා සච්‌ඡිකරොති, යෙ ධම්‌මා අභිඤ්‌ඤා භාවෙතබ්‌බා, තෙ ධම්‌මෙ අභිඤ්‌ඤා භාවෙතී’’ති. එකාදසමං.
‘‘Katame ca, bhikkhave, dhammā abhiññā pariññeyyā? Pañcupādānakkhandhātissa vacanīyaṃ. Katame pañca? Seyyathidaṃ – rūpupādānakkhandho…pe… viññāṇupādānakkhandho. Ime, bhikkhave, dhammā abhiññā pariññeyyā. Katame ca, bhikkhave, dhammā abhiññā pahātabbā? Avijjā ca bhavataṇhā ca – ime, bhikkhave, dhammā abhiññā pahātabbā. Katame ca, bhikkhave, dhammā abhiññā sacchikātabbā? Vijjā ca vimutti ca – ime, bhikkhave, dhammā abhiññā sacchikātabbā. Katame ca, bhikkhave, dhammā abhiññā bhāvetabbā? Samatho ca vipassanā ca – ime, bhikkhave, dhammā abhiññā bhāvetabbā. Kathañca, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto, ye dhammā abhiññā pariññeyyā te dhamme abhiññā parijānāti…pe… ye dhammā abhiññā bhāvetabbā, te dhamme abhiññā bhāveti? Idha, bhikkhave, bhikkhu sammādiṭṭhiṃ bhāveti…pe… sammāsamādhiṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… evaṃ kho, bhikkhave, bhikkhu ariyaṃ aṭṭhaṅgikaṃ maggaṃ bhāvento ariyaṃ aṭṭhaṅgikaṃ maggaṃ bahulīkaronto ye dhammā abhiññā pariññeyyā, te dhamme abhiññā parijānāti, ye dhammā abhiññā pahātabbā, te dhamme abhiññā pajahati, ye dhammā abhiññā sacchikātabbā, te dhamme abhiññā sacchikaroti, ye dhammā abhiññā bhāvetabbā, te dhamme abhiññā bhāvetī’’ti. Ekādasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 11-12. ආගන්‌තුකසුත්‌තාදිවණ්‌ණනා • 11-12. Āgantukasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 11-12. ආගන්‌තුකසුත්‌තාදිවණ්‌ණනා • 11-12. Āgantukasuttādivaṇṇanā
