| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
8. வத்தக்க²ந்த⁴கங்
8. Vattakkhandhakaṃ
1. ஆக³ந்துகவத்தகதா²
1. Āgantukavattakathā
356. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆக³ந்துகா பி⁴க்கூ² ஸஉபாஹனாபி ஆராமங் பவிஸந்தி, ச²த்தபக்³க³ஹிதாபி ஆராமங் பவிஸந்தி, ஓகு³ண்டி²தாபி ஆராமங் பவிஸந்தி, ஸீஸேபி சீவரங் கரித்வா ஆராமங் பவிஸந்தி, பானீயேனபி பாதே³ தோ⁴வந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதெ³ந்தி, நபி ஸேனாஸனங் புச்ச²ந்தி. அஞ்ஞதரோபி ஆக³ந்துகோ பி⁴க்கு² அனஜ்ஜா²வுட்ட²ங் விஹாரங் க⁴டிகங் உக்³கா⁴டெத்வா கவாடங் பணாமெத்வா ஸஹஸா பாவிஸி. தஸ்ஸ உபரிபிட்டி²தோ 1 அஹி க²ந்தே⁴ பபதி. ஸோ பீ⁴தோ விஸ்ஸரமகாஸி. பி⁴க்கூ² உபதா⁴வித்வா தங் பி⁴க்கு²ங் ஏதத³வோசுங் – ‘‘கிஸ்ஸ த்வங், ஆவுஸோ, விஸ்ஸரமகாஸீ’’தி? அத² கோ² ஸோ பி⁴க்கு² பி⁴க்கூ²னங் ஏதமத்த²ங் ஆரோசேஸி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆக³ந்துகா பி⁴க்கூ² ஸஉபாஹனாபி ஆராமங் பவிஸிஸ்ஸந்தி, ச²த்தபக்³க³ஹிதாபி ஆராமங் பவிஸிஸ்ஸந்தி, ஓகு³ண்டி²தாபி ஆராமங் பவிஸிஸ்ஸந்தி, ஸீஸேபி சீவரங் கரித்வா ஆராமங் பவிஸிஸ்ஸந்தி, பானீயேனபி பாதே³ தோ⁴விஸ்ஸந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதெ³ஸ்ஸந்தி, நபி ஸேனாஸனங் புச்சி²ஸ்ஸந்தீ’’தி! அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர, பி⁴க்க²வே, ‘‘ஆக³ந்துகா பி⁴க்கூ² ஸஉபாஹனாபி ஆராமங் பவிஸந்தி, ச²த்தபக்³க³ஹிதாபி ஆராமங் பவிஸந்தி, ஓகு³ண்டி²தாபி ஆராமங் பவிஸந்தி, ஸீஸேபி சீவரங் கரித்வா ஆராமங் பவிஸந்தி, பானீயேனிபி பாதே³ தோ⁴வந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதெ³ந்தி, நபி ஸேனாஸனங் புச்ச²ந்தீதி. ஸச்சங் ப⁴க³வாதி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம பி⁴க்க²வே ஆக³ந்துகா பி⁴க்கூ² ஸஉபாஹனாபி ஆராமங் பவிஸிஸ்ஸந்தி, ச²த்தபக்³க³ஹிதாபி ஆராமங் பவிஸிஸ்ஸந்தி, ஓகு³ண்டி²தாபி ஆராமங் பவிஸிஸ்ஸந்தி, ஸீஸேபி சீவரங் கரித்வா ஆராமங் பவிஸிஸ்ஸந்தி, பானீயேனபி பாதே³ தோ⁴விஸ்ஸந்தி, வுட்³ட⁴தரேபி ஆவாஸிகே பி⁴க்கூ² ந அபி⁴வாதெ³ஸ்ஸந்தி, நபி ஸேனாஸனங் புச்சி²ஸ்ஸந்தி, நேதங் பி⁴க்க²வே அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி –
356. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āgantukā bhikkhū saupāhanāpi ārāmaṃ pavisanti, chattapaggahitāpi ārāmaṃ pavisanti, oguṇṭhitāpi ārāmaṃ pavisanti, sīsepi cīvaraṃ karitvā ārāmaṃ pavisanti, pānīyenapi pāde dhovanti, vuḍḍhatarepi āvāsike bhikkhū na abhivādenti, napi senāsanaṃ pucchanti. Aññataropi āgantuko bhikkhu anajjhāvuṭṭhaṃ vihāraṃ ghaṭikaṃ ugghāṭetvā kavāṭaṃ paṇāmetvā sahasā pāvisi. Tassa uparipiṭṭhito 2 ahi khandhe papati. So bhīto vissaramakāsi. Bhikkhū upadhāvitvā taṃ bhikkhuṃ etadavocuṃ – ‘‘kissa tvaṃ, āvuso, vissaramakāsī’’ti? Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āgantukā bhikkhū saupāhanāpi ārāmaṃ pavisissanti, chattapaggahitāpi ārāmaṃ pavisissanti, oguṇṭhitāpi ārāmaṃ pavisissanti, sīsepi cīvaraṃ karitvā ārāmaṃ pavisissanti, pānīyenapi pāde dhovissanti, vuḍḍhatarepi āvāsike bhikkhū na abhivādessanti, napi senāsanaṃ pucchissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, ‘‘āgantukā bhikkhū saupāhanāpi ārāmaṃ pavisanti, chattapaggahitāpi ārāmaṃ pavisanti, oguṇṭhitāpi ārāmaṃ pavisanti, sīsepi cīvaraṃ karitvā ārāmaṃ pavisanti, pānīyenipi pāde dhovanti, vuḍḍhatarepi āvāsike bhikkhū na abhivādenti, napi senāsanaṃ pucchantīti. Saccaṃ bhagavāti. Vigarahi buddho bhagavā…pe… kathañhi nāma bhikkhave āgantukā bhikkhū saupāhanāpi ārāmaṃ pavisissanti, chattapaggahitāpi ārāmaṃ pavisissanti, oguṇṭhitāpi ārāmaṃ pavisissanti, sīsepi cīvaraṃ karitvā ārāmaṃ pavisissanti, pānīyenapi pāde dhovissanti, vuḍḍhatarepi āvāsike bhikkhū na abhivādessanti, napi senāsanaṃ pucchissanti, netaṃ bhikkhave appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
357. ‘‘தேன ஹி, பி⁴க்க²வே, ஆக³ந்துகானங் பி⁴க்கூ²னங் வத்தங் பஞ்ஞபெஸ்ஸாமி யதா² ஆக³ந்துகேஹி பி⁴க்கூ²ஹி ஸம்மா வத்திதப்³ப³ங். ஆக³ந்துகேன, பி⁴க்க²வே, பி⁴க்கு²னா ‘இதா³னி ஆராமங் பவிஸிஸ்ஸாமீ’தி உபாஹனா ஓமுஞ்சித்வா நீசங் கத்வா பப்போ²டெத்வா க³ஹெத்வா ச²த்தங் அபனாமெத்வா ஸீஸங் விவரித்வா ஸீஸே சீவரங் 3 க²ந்தே⁴ கத்வா ஸாது⁴கங் அதரமானேன ஆராமோ பவிஸிதப்³போ³. ஆராமங் பவிஸந்தேன ஸல்லக்கே²தப்³ப³ங் – ‘கத்த² ஆவாஸிகா பி⁴க்கூ² படிக்கமந்தீ’தி? யத்த² ஆவாஸிகா பி⁴க்கூ² படிக்கமந்தி – உபட்டா²னஸாலாய வா மண்ட³பே வா ருக்க²மூலே வா – தத்த² க³ந்த்வா ஏகமந்தங் பத்தோ நிக்கி²பிதப்³போ³; ஏகமந்தங் சீவரங் நிக்கி²பிதப்³ப³ங்; பதிரூபங் ஆஸனங் க³ஹெத்வா நிஸீதி³தப்³ப³ங்; பானீயங் புச்சி²தப்³ப³ங், பரிபோ⁴ஜனீயங் புச்சி²தப்³ப³ங் – ‘கதமங் பானீயங், கதமங் பரிபோ⁴ஜனீய’ந்தி? ஸசே பானீயேன அத்தோ² ஹோதி, பானீயங் க³ஹெத்வா பாதப்³ப³ங். ஸசே பரிபோ⁴ஜனீயேன அத்தோ² ஹோதி, பரிபோ⁴ஜனீயங் க³ஹெத்வா பாதா³ தோ⁴விதப்³பா³. பாதே³ தோ⁴வந்தேன ஏகேன ஹத்தே²ன உத³கங் ஆஸிஞ்சிதப்³ப³ங், ஏகேன ஹத்தே²ன பாதா³ தோ⁴விதப்³பா³. தேனேவ உத³கங் ஆஸிஞ்சிதப்³ப³ங் 4 ந தேனேவ ஹத்தே²ன பாதா³ தோ⁴விதப்³பா³. உபாஹனபுஞ்ச²னசோளகங் புச்சி²த்வா உபாஹனா புஞ்சி²தப்³பா³. உபாஹனா புஞ்ச²ந்தேன பட²மங் ஸுக்கே²ன சோளகேன புஞ்சி²தப்³பா³, பச்சா² அல்லேன. உபாஹனாபுஞ்ச²னசோளகங் தோ⁴வித்வா 5 ஏகமந்தங் விஸ்ஸஜ்ஜேதப்³ப³ங்.
357. ‘‘Tena hi, bhikkhave, āgantukānaṃ bhikkhūnaṃ vattaṃ paññapessāmi yathā āgantukehi bhikkhūhi sammā vattitabbaṃ. Āgantukena, bhikkhave, bhikkhunā ‘idāni ārāmaṃ pavisissāmī’ti upāhanā omuñcitvā nīcaṃ katvā papphoṭetvā gahetvā chattaṃ apanāmetvā sīsaṃ vivaritvā sīse cīvaraṃ 6 khandhe katvā sādhukaṃ ataramānena ārāmo pavisitabbo. Ārāmaṃ pavisantena sallakkhetabbaṃ – ‘kattha āvāsikā bhikkhū paṭikkamantī’ti? Yattha āvāsikā bhikkhū paṭikkamanti – upaṭṭhānasālāya vā maṇḍape vā rukkhamūle vā – tattha gantvā ekamantaṃ patto nikkhipitabbo; ekamantaṃ cīvaraṃ nikkhipitabbaṃ; patirūpaṃ āsanaṃ gahetvā nisīditabbaṃ; pānīyaṃ pucchitabbaṃ, paribhojanīyaṃ pucchitabbaṃ – ‘katamaṃ pānīyaṃ, katamaṃ paribhojanīya’nti? Sace pānīyena attho hoti, pānīyaṃ gahetvā pātabbaṃ. Sace paribhojanīyena attho hoti, paribhojanīyaṃ gahetvā pādā dhovitabbā. Pāde dhovantena ekena hatthena udakaṃ āsiñcitabbaṃ, ekena hatthena pādā dhovitabbā. Teneva udakaṃ āsiñcitabbaṃ 7 na teneva hatthena pādā dhovitabbā. Upāhanapuñchanacoḷakaṃ pucchitvā upāhanā puñchitabbā. Upāhanā puñchantena paṭhamaṃ sukkhena coḷakena puñchitabbā, pacchā allena. Upāhanāpuñchanacoḷakaṃ dhovitvā 8 ekamantaṃ vissajjetabbaṃ.
‘‘ஸசே ஆவாஸிகோ பி⁴க்கு² வுட்³டோ⁴ ஹோதி, அபி⁴வாதே³தப்³போ³. ஸசே நவகோ ஹோதி, அபி⁴வாதா³பேதப்³போ³. ஸேனாஸனங் புச்சி²தப்³ப³ங் – ‘கதமங் மே ஸேனாஸனங் பாபுணாதீ’தி? அஜ்ஜா²வுட்ட²ங் வா அனஜ்ஜா²வுட்ட²ங் வா புச்சி²தப்³ப³ங், கோ³சரோ புச்சி²தப்³போ³, அகோ³சரோ புச்சி²தப்³போ³, ஸெக்க²ஸம்மதானி 9 குலானி புச்சி²தப்³பா³னி , வச்சட்டா²னங் புச்சி²தப்³ப³ங், பஸ்ஸாவட்டா²னங் புச்சி²தப்³ப³ங், பானீயங் புச்சி²தப்³ப³ங், பரிபோ⁴ஜனீயங் புச்சி²தப்³ப³ங், கத்தரத³ண்டோ³ புச்சி²தப்³போ³, ஸங்க⁴ஸ்ஸ கதிகஸண்டா²னங் புச்சி²தப்³ப³ங் – ‘கங் காலங் பவிஸிதப்³ப³ங், கங் காலங் நிக்க²மிதப்³ப³’ந்தி? ஸசே விஹாரோ அனஜ்ஜா²வுட்டோ² ஹோதி, கவாடங் ஆகோடெத்வா முஹுத்தங் ஆக³மெத்வா க⁴டிகங் உக்³கா⁴டெத்வா கவாடங் பணாமெத்வா ப³ஹி டி²தேன நில்லோகேதப்³போ³.
‘‘Sace āvāsiko bhikkhu vuḍḍho hoti, abhivādetabbo. Sace navako hoti, abhivādāpetabbo. Senāsanaṃ pucchitabbaṃ – ‘katamaṃ me senāsanaṃ pāpuṇātī’ti? Ajjhāvuṭṭhaṃ vā anajjhāvuṭṭhaṃ vā pucchitabbaṃ, gocaro pucchitabbo, agocaro pucchitabbo, sekkhasammatāni 10 kulāni pucchitabbāni , vaccaṭṭhānaṃ pucchitabbaṃ, passāvaṭṭhānaṃ pucchitabbaṃ, pānīyaṃ pucchitabbaṃ, paribhojanīyaṃ pucchitabbaṃ, kattaradaṇḍo pucchitabbo, saṅghassa katikasaṇṭhānaṃ pucchitabbaṃ – ‘kaṃ kālaṃ pavisitabbaṃ, kaṃ kālaṃ nikkhamitabba’nti? Sace vihāro anajjhāvuṭṭho hoti, kavāṭaṃ ākoṭetvā muhuttaṃ āgametvā ghaṭikaṃ ugghāṭetvā kavāṭaṃ paṇāmetvā bahi ṭhitena nilloketabbo.
‘‘ஸசே விஹாரோ உக்லாபோ ஹோதி, மஞ்சே வா மஞ்சோ ஆரோபிதோ ஹோதி, பீடே² வா பீட²ங் ஆரோபிதங் ஹோதி, ஸேனாஸனங் உபரி புஞ்ஜீகதங் 11 ஹோதி, ஸசே உஸ்ஸஹதி, ஸோதே⁴தப்³போ³. 12 விஹாரங் ஸோதெ⁴ந்தேன பட²மங் பூ⁴மத்த²ரணங் நீஹரித்வா ஏகமந்தங் நிக்கி²பிதப்³ப³ங்; மஞ்சபடிபாத³கா நீஹரித்வா ஏகமந்தங் நிக்கி²பிதப்³பா³; பி⁴ஸிபி³ப்³போ³ஹனங் நீஹரித்வா ஏகமந்தங் நிக்கி²பிதப்³ப³ங்; நிஸீத³னபச்சத்த²ரணங் நீஹரித்வா ஏகமந்தங் நிக்கி²பிதப்³ப³ங்; மஞ்சோ நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், நீஹரித்வா ஏகமந்தங் நிக்கி²பிதப்³போ³; பீட²ங் நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், நீஹரித்வா ஏகமந்தங் நிக்கி²பிதப்³ப³ங்; கே²ளமல்லகோ நீஹரித்வா ஏகமந்தங் நிக்கி²பிதப்³போ³; அபஸ்ஸேனப²லகங் நீஹரித்வா ஏகமந்தங் நிக்கி²பிதப்³ப³ங். ஸசே விஹாரே ஸந்தானகங் ஹோதி, உல்லோகா பட²மங் ஓஹாரேதப்³ப³ங், ஆலோகஸந்தி⁴கண்ணபா⁴கா³ பமஜ்ஜிதப்³பா³. ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே காளவண்ணகதா பூ⁴மி கண்ணகிதா ஹோதி, சோளகங் தேமெத்வா பீளெத்வா பமஜ்ஜிதப்³பா³. ஸசே அகதா ஹோதி பூ⁴மி, உத³கேன பரிப்போ²ஸித்வா ஸம்மஜ்ஜிதப்³பா³ – மா விஹாரோ ரஜேன உஹஞ்ஞீதி 13. ஸங்காரங் விசினித்வா ஏகமந்தங் ச²ட்³டே³தப்³ப³ங்.
‘‘Sace vihāro uklāpo hoti, mañce vā mañco āropito hoti, pīṭhe vā pīṭhaṃ āropitaṃ hoti, senāsanaṃ upari puñjīkataṃ 14 hoti, sace ussahati, sodhetabbo. 15 Vihāraṃ sodhentena paṭhamaṃ bhūmattharaṇaṃ nīharitvā ekamantaṃ nikkhipitabbaṃ; mañcapaṭipādakā nīharitvā ekamantaṃ nikkhipitabbā; bhisibibbohanaṃ nīharitvā ekamantaṃ nikkhipitabbaṃ; nisīdanapaccattharaṇaṃ nīharitvā ekamantaṃ nikkhipitabbaṃ; mañco nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbo; pīṭhaṃ nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbaṃ; kheḷamallako nīharitvā ekamantaṃ nikkhipitabbo; apassenaphalakaṃ nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā sammajjitabbā – mā vihāro rajena uhaññīti 16. Saṅkāraṃ vicinitvā ekamantaṃ chaḍḍetabbaṃ.
‘‘பூ⁴மத்த²ரணங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²டா²னே 17 பஞ்ஞபேதப்³ப³ங். மஞ்சபடிபாத³கா ஓதாபெத்வா பமஜ்ஜித்வா அதிஹரித்வா யதா²டா²னே 18 ட²பேதப்³பா³. மஞ்சோ ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், அதிஹரித்வா யதா²டா²னே 19 பஞ்ஞபேதப்³போ³. பீட²ங் ஓதாபெத்வா ஸோதெ⁴த்வா பப்போ²டெத்வா நீசங் கத்வா ஸாது⁴கங் அப்படிக⁴ங்ஸந்தேன, அஸங்க⁴ட்டெந்தேன கவாடபிட்ட²ங், அதிஹரித்வா யதா²டா²னே 20 பஞ்ஞபேதப்³ப³ங். பி⁴ஸிபி³ப்³போ³ஹனங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பா⁴க³ங் பஞ்ஞபேதப்³ப³ங். நிஸீத³னபச்சத்த²ரணங் ஓதாபெத்வா ஸோதெ⁴த்வா பப்போ²டெத்வா அதிஹரித்வா யதா²பா⁴க³ங் பஞ்ஞபேதப்³ப³ங். கே²ளமல்லகோ ஓதாபெத்வா பமஜ்ஜித்வா அதிஹரித்வா யதா²பா⁴க³ங் ட²பேதப்³போ³. அபஸ்ஸேனப²லகங் ஓதாபெத்வா பமஜ்ஜித்வா அதிஹரித்வா யதா²பா⁴க³ங் ட²பேதப்³ப³ங். பத்தசீவரங் நிக்கி²பிதப்³ப³ங். பத்தங் நிக்கி²பந்தேன ஏகேன ஹத்தே²ன பத்தங் க³ஹெத்வா ஏகேன ஹத்தே²ன ஹெட்டா²மஞ்சங் வா ஹெட்டா²பீட²ங் வா பராமஸித்வா பத்தோ நிக்கி²பிதப்³போ³. ந ச அனந்தரஹிதாய பூ⁴மியா பத்தோ நிக்கி²பிதப்³போ³. சீவரங் நிக்கி²பந்தேன ஏகேன ஹத்தே²ன சீவரங் க³ஹெத்வா ஏகேன ஹத்தே²ன சீவரவங்ஸங் வா சீவரரஜ்ஜுங் வா பமஜ்ஜித்வா பாரதோ அந்தங் ஓரதோ போ⁴க³ங் கத்வா சீவரங் நிக்கி²பிதப்³ப³ங்.
‘‘Bhūmattharaṇaṃ otāpetvā sodhetvā papphoṭetvā atiharitvā yathāṭhāne 21 paññapetabbaṃ. Mañcapaṭipādakā otāpetvā pamajjitvā atiharitvā yathāṭhāne 22 ṭhapetabbā. Mañco otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāṭhāne 23 paññapetabbo. Pīṭhaṃ otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāṭhāne 24 paññapetabbaṃ. Bhisibibbohanaṃ otāpetvā sodhetvā papphoṭetvā atiharitvā yathābhāgaṃ paññapetabbaṃ. Nisīdanapaccattharaṇaṃ otāpetvā sodhetvā papphoṭetvā atiharitvā yathābhāgaṃ paññapetabbaṃ. Kheḷamallako otāpetvā pamajjitvā atiharitvā yathābhāgaṃ ṭhapetabbo. Apassenaphalakaṃ otāpetvā pamajjitvā atiharitvā yathābhāgaṃ ṭhapetabbaṃ. Pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo. Na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ.
‘‘ஸசே புரத்தி²மா ஸரஜா வாதா வாயந்தி, புரத்தி²மா வாதபானா த²கேதப்³பா³. ஸசே பச்சி²மா ஸரஜா வாதா வாயந்தி, பச்சி²மா வாதபானா த²கேதப்³பா³. ஸசே உத்தரா ஸரஜா வாதா வாயந்தி, உத்தரா வாதபானா த²கேதப்³பா³. ஸசே த³க்கி²ணா ஸரஜா வாதா வாயந்தி, த³க்கி²ணா வாதபானா த²கேதப்³பா³ . ஸசே ஸீதகாலோ ஹோதி, தி³வா வாதபானா விவரிதப்³பா³, ரத்திங் த²கேதப்³பா³. ஸசே உண்ஹகாலோ ஹோதி, தி³வா வாதபானா த²கேதப்³பா³, ரத்திங் விவரிதப்³பா³.
‘‘Sace puratthimā sarajā vātā vāyanti, puratthimā vātapānā thaketabbā. Sace pacchimā sarajā vātā vāyanti, pacchimā vātapānā thaketabbā. Sace uttarā sarajā vātā vāyanti, uttarā vātapānā thaketabbā. Sace dakkhiṇā sarajā vātā vāyanti, dakkhiṇā vātapānā thaketabbā . Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā vātapānā thaketabbā, rattiṃ vivaritabbā.
‘‘ஸசே பரிவேணங் உக்லாபங் ஹோதி, பரிவேணங் ஸம்மஜ்ஜிதப்³ப³ங். ஸசே கொட்ட²கோ உக்லாபோ ஹோதி, கொட்ட²கோ ஸம்மஜ்ஜிதப்³போ³. ஸசே உபட்டா²னஸாலா உக்லாபா ஹோதி, உபட்டா²னஸாலா ஸம்மஜ்ஜிதப்³பா³. ஸசே அக்³கி³ஸாலா உக்லாபா ஹோதி, அக்³கி³ஸாலா ஸம்மஜ்ஜிதப்³பா³. ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ஸசே பானீயங் ந ஹோதி, பானீயங் உபட்டா²பேதப்³ப³ங். ஸசே பரிபோ⁴ஜனீயங் ந ஹோதி, பரிபோ⁴ஜனீயங் உபட்டா²பேதப்³ப³ங். ஸசே ஆசமனகும்பி⁴யா உத³கங் ந ஹோதி, ஆசமனகும்பி⁴யா உத³கங் ஆஸிஞ்சிதப்³ப³ங். இத³ங் கோ², பி⁴க்க²வே, ஆக³ந்துகானங் பி⁴க்கூ²னங் வத்தங் யதா² ஆக³ந்துகேஹி பி⁴க்கூ²ஹி ஸம்மா வத்திதப்³ப³’’ந்தி.
‘‘Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo. Sace upaṭṭhānasālā uklāpā hoti, upaṭṭhānasālā sammajjitabbā. Sace aggisālā uklāpā hoti, aggisālā sammajjitabbā. Sace vaccakuṭi uklāpā hoti, vaccakuṭi sammajjitabbā. Sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ. Idaṃ kho, bhikkhave, āgantukānaṃ bhikkhūnaṃ vattaṃ yathā āgantukehi bhikkhūhi sammā vattitabba’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஆக³ந்துகவத்தகதா² • Āgantukavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆக³ந்துகவத்தகதா²வண்ணனா • Āgantukavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஆக³ந்துகவத்தகதா²வண்ணனா • Āgantukavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஆக³ந்துகவத்தகதா²வண்ணனா • Āgantukavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. ஆக³ந்துகவத்தகதா² • 1. Āgantukavattakathā
