| Library / Tipiṭaka / တိပိဋက • Tipiṭaka / စူဠဝဂ္ဂ-အဋ္ဌကထာ • Cūḷavagga-aṭṭhakathā |
၈. ဝတ္တက္ခန္ဓကံ
8. Vattakkhandhakaṃ
အာဂန္တုကဝတ္တကထာ
Āgantukavattakathā
၃၅၇. ဝတ္တက္ခန္ဓကေ ဣဒာနိ အာရာမံ ပဝိသိသ္သာမီတိ ဣမိနာ ဥပစာရသီမသမီပံ ဒသ္သေတိ; တသ္မာ ဥပစာရသီမံ ပတ္ဝာ ဥပာဟနာဩမုဉ္စနာဒိ သဗ္ဗံ ကာတဗ္ဗံ။ ဂဟေတ္ဝာတိ ဥပာဟနဒဏ္ဍကေန ဂဟေတ္ဝာ။ ပဋိက္ကမန္တီတိ သန္နိပတန္တိ။ ဝိသ္သဇ္ဇေတဗ္ဗန္တိ ပတ္ထရိတဗ္ဗံ။ ဂောစရော ပုစ္ဆိတဗ္ဗောတိ ‘‘ဂောစရဂာမော အာသန္နေ ဥဒာဟု ဒူရေ, ကာလသ္သေဝ ပိဏ္ဍာယ စရိတဗ္ဗံ ဥဒာဟု ဒိဝာ’’တိ ဧဝံ ဘိက္ခာစာရော ပုစ္ဆိတဗ္ဗော။ အဂောစရော နာမ မိစ္ဆာဒိဋ္ဌိကာနံ ဝာ ဂာမော ပရိစ္ဆိန္နဘိက္ခော ဝာ ဂာမော; ယတ္ထ ဧကသ္သ ဝာ ဒ္ဝိန္နံ ဝာ ဘိက္ခာ ဒိယ္ယတိ, သောပိ ပုစ္ဆိတဗ္ဗော။ ပာနီယံ ပုစ္ဆိတဗ္ဗန္တိ ‘‘ကိံ ဣမိသ္သာ ပောက္ခရဏိယာ ပာနီယံယေဝ ပိဝန္တိ, နဟာနာဒိပရိဘောဂမ္ပိ ကရောန္တီ’’တိ ဧဝံ ပာနီယဉ္စေဝ ပရိဘောဇနီယဉ္စ ပုစ္ဆိတဗ္ဗံ။ ကေသုစိ ဌာနေသု ဝာဠမိဂာ ဝာ အမနုသ္သာ ဝာ ဟောန္တိ, တသ္မာ ‘‘ကံ ကာလံ ပဝိသိတဗ္ဗံ, ကံ ကာလံ နိက္ခမိတဗ္ဗ’’န္တိ ပုစ္ဆိတဗ္ဗံ။
357. Vattakkhandhake idāni ārāmaṃ pavisissāmīti iminā upacārasīmasamīpaṃ dasseti; tasmā upacārasīmaṃ patvā upāhanāomuñcanādi sabbaṃ kātabbaṃ. Gahetvāti upāhanadaṇḍakena gahetvā. Paṭikkamantīti sannipatanti. Vissajjetabbanti pattharitabbaṃ. Gocaro pucchitabboti ‘‘gocaragāmo āsanne udāhu dūre, kālasseva piṇḍāya caritabbaṃ udāhu divā’’ti evaṃ bhikkhācāro pucchitabbo. Agocaro nāma micchādiṭṭhikānaṃ vā gāmo paricchinnabhikkho vā gāmo; yattha ekassa vā dvinnaṃ vā bhikkhā diyyati, sopi pucchitabbo. Pānīyaṃ pucchitabbanti ‘‘kiṃ imissā pokkharaṇiyā pānīyaṃyeva pivanti, nahānādiparibhogampi karontī’’ti evaṃ pānīyañceva paribhojanīyañca pucchitabbaṃ. Kesuci ṭhānesu vāḷamigā vā amanussā vā honti, tasmā ‘‘kaṃ kālaṃ pavisitabbaṃ, kaṃ kālaṃ nikkhamitabba’’nti pucchitabbaṃ.
ဗဟိ ဌိတေနာတိ ဗဟိ နိက္ခမန္တသ္သ အဟိနော ဝာ အမနုသ္သသ္သ ဝာ မဂ္ဂံ ဒတ္ဝာ ဌိတေန နိလ္လောကေတဗ္ဗော။ သစေ ဥသ္သဟတိ သောဓေတဗ္ဗောတိ ယဒိ သက္ကောတိ, သဗ္ဗော ဝိဟာရော သောဓေတဗ္ဗော။ အသက္ကောန္တေန အတ္တနော ဝသနောကာသော ဇဂ္ဂိတဗ္ဗော။ သဗ္ဗံ သောဓေတုံ သက္ကောန္တသ္သ ပန ဒသ္သိတေ ဝိဟာရသောဓနဝတ္တေ ဝိနိစ္ဆယော မဟာခန္ဓကေ ဝုတ္တနယေနေဝ ဝေဒိတဗ္ဗော။
Bahi ṭhitenāti bahi nikkhamantassa ahino vā amanussassa vā maggaṃ datvā ṭhitena nilloketabbo. Sace ussahati sodhetabboti yadi sakkoti, sabbo vihāro sodhetabbo. Asakkontena attano vasanokāso jaggitabbo. Sabbaṃ sodhetuṃ sakkontassa pana dassite vihārasodhanavatte vinicchayo mahākhandhake vuttanayeneva veditabbo.
အာဂန္တုကဝတ္တကထာ နိဋ္ဌိတာ။
Āgantukavattakathā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / ၁. အာဂန္တုကဝတ္တကထာ • 1. Āgantukavattakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အာဂန္တုကဝတ္တကထာဝဏ္ဏနာ • Āgantukavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာဂန္တုကဝတ္တကထာဝဏ္ဏနာ • Āgantukavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာဂန္တုကဝတ္တကထာဝဏ္ဏနာ • Āgantukavattakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. အာဂန္တုကဝတ္တကထာ • 1. Āgantukavattakathā
