၁. အာဂန္တုကဝတ္တကထာ

1. Āgantukavattakathā

၃၅၆. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အာဂန္တုကာ ဘိက္ခူ သဥပာဟနာပိ အာရာမံ ပဝိသန္တိ, ဆတ္တပဂ္ဂဟိတာပိ အာရာမံ ပဝိသန္တိ, ဩဂုဏ္ဌိတာပိ အာရာမံ ပဝိသန္တိ, သီသေပိ စီဝရံ ကရိတ္ဝာ အာရာမံ ပဝိသန္တိ, ပာနီယေနပိ ပာဒေ ဓောဝန္တိ, ဝုဍ္ဎတရေပိ အာဝာသိကေ ဘိက္ခူ န အဘိဝာဒေန္တိ, နပိ သေနာသနံ ပုစ္ဆန္တိ။ အညတရောပိ အာဂန္တုကော ဘိက္ခု အနဇ္ဈာဝုဋ္ဌံ ဝိဟာရံ ဃဋိကံ ဥဂ္ဃာဋေတ္ဝာ ကဝာဋံ ပဏာမေတ္ဝာ သဟသာ ပာဝိသိ။ တသ္သ ဥပရိပိဋ္ဌိတော ¹ အဟိ ခန္ဓေ ပပတိ။ သော ဘီတော ဝိသ္သရမကာသိ။ ဘိက္ခူ ဥပဓာဝိတ္ဝာ တံ ဘိက္ခုံ ဧတဒဝောစုံ – ‘‘ကိသ္သ တ္ဝံ, အာဝုသော, ဝိသ္သရမကာသီ’’တိ? အထ ခော သော ဘိက္ခု ဘိက္ခူနံ ဧတမတ္ထံ အာရောစေသိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာဂန္တုကာ ဘိက္ခူ သဥပာဟနာပိ အာရာမံ ပဝိသိသ္သန္တိ, ဆတ္တပဂ္ဂဟိတာပိ အာရာမံ ပဝိသိသ္သန္တိ, ဩဂုဏ္ဌိတာပိ အာရာမံ ပဝိသိသ္သန္တိ, သီသေပိ စီဝရံ ကရိတ္ဝာ အာရာမံ ပဝိသိသ္သန္တိ, ပာနီယေနပိ ပာဒေ ဓောဝိသ္သန္တိ, ဝုဍ္ဎတရေပိ အာဝာသိကေ ဘိက္ခူ န အဘိဝာဒေသ္သန္တိ, နပိ သေနာသနံ ပုစ္ဆိသ္သန္တီ’’တိ! အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ‘‘အာဂန္တုကာ ဘိက္ခူ သဥပာဟနာပိ အာရာမံ ပဝိသန္တိ, ဆတ္တပဂ္ဂဟိတာပိ အာရာမံ ပဝိသန္တိ, ဩဂုဏ္ဌိတာပိ အာရာမံ ပဝိသန္တိ, သီသေပိ စီဝရံ ကရိတ္ဝာ အာရာမံ ပဝိသန္တိ, ပာနီယေနိပိ ပာဒေ ဓောဝန္တိ, ဝုဍ္ဎတရေပိ အာဝာသိကေ ဘိက္ခူ န အဘိဝာဒေန္တိ, နပိ သေနာသနံ ပုစ္ဆန္တီတိ။ သစ္စံ ဘဂဝာတိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ ဘိက္ခဝေ အာဂန္တုကာ ဘိက္ခူ သဥပာဟနာပိ အာရာမံ ပဝိသိသ္သန္တိ, ဆတ္တပဂ္ဂဟိတာပိ အာရာမံ ပဝိသိသ္သန္တိ, ဩဂုဏ္ဌိတာပိ အာရာမံ ပဝိသိသ္သန္တိ, သီသေပိ စီဝရံ ကရိတ္ဝာ အာရာမံ ပဝိသိသ္သန္တိ, ပာနီယေနပိ ပာဒေ ဓောဝိသ္သန္တိ, ဝုဍ္ဎတရေပိ အာဝာသိကေ ဘိက္ခူ န အဘိဝာဒေသ္သန္တိ, နပိ သေနာသနံ ပုစ္ဆိသ္သန္တိ, နေတံ ဘိက္ခဝေ အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ –

356. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āgantukā bhikkhū saupāhanāpi ārāmaṃ pavisanti, chattapaggahitāpi ārāmaṃ pavisanti, oguṇṭhitāpi ārāmaṃ pavisanti, sīsepi cīvaraṃ karitvā ārāmaṃ pavisanti, pānīyenapi pāde dhovanti, vuḍḍhatarepi āvāsike bhikkhū na abhivādenti, napi senāsanaṃ pucchanti. Aññataropi āgantuko bhikkhu anajjhāvuṭṭhaṃ vihāraṃ ghaṭikaṃ ugghāṭetvā kavāṭaṃ paṇāmetvā sahasā pāvisi. Tassa uparipiṭṭhito ² ahi khandhe papati. So bhīto vissaramakāsi. Bhikkhū upadhāvitvā taṃ bhikkhuṃ etadavocuṃ – ‘‘kissa tvaṃ, āvuso, vissaramakāsī’’ti? Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āgantukā bhikkhū saupāhanāpi ārāmaṃ pavisissanti, chattapaggahitāpi ārāmaṃ pavisissanti, oguṇṭhitāpi ārāmaṃ pavisissanti, sīsepi cīvaraṃ karitvā ārāmaṃ pavisissanti, pānīyenapi pāde dhovissanti, vuḍḍhatarepi āvāsike bhikkhū na abhivādessanti, napi senāsanaṃ pucchissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, ‘‘āgantukā bhikkhū saupāhanāpi ārāmaṃ pavisanti, chattapaggahitāpi ārāmaṃ pavisanti, oguṇṭhitāpi ārāmaṃ pavisanti, sīsepi cīvaraṃ karitvā ārāmaṃ pavisanti, pānīyenipi pāde dhovanti, vuḍḍhatarepi āvāsike bhikkhū na abhivādenti, napi senāsanaṃ pucchantīti. Saccaṃ bhagavāti. Vigarahi buddho bhagavā…pe… kathañhi nāma bhikkhave āgantukā bhikkhū saupāhanāpi ārāmaṃ pavisissanti, chattapaggahitāpi ārāmaṃ pavisissanti, oguṇṭhitāpi ārāmaṃ pavisissanti, sīsepi cīvaraṃ karitvā ārāmaṃ pavisissanti, pānīyenapi pāde dhovissanti, vuḍḍhatarepi āvāsike bhikkhū na abhivādessanti, napi senāsanaṃ pucchissanti, netaṃ bhikkhave appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –

၃၅၇. ‘‘တေန ဟိ, ဘိက္ခဝေ, အာဂန္တုကာနံ ဘိက္ခူနံ ဝတ္တံ ပညပေသ္သာမိ ယထာ အာဂန္တုကေဟိ ဘိက္ခူဟိ သမ္မာ ဝတ္တိတဗ္ဗံ။ အာဂန္တုကေန, ဘိက္ခဝေ, ဘိက္ခုနာ ‘ဣဒာနိ အာရာမံ ပဝိသိသ္သာမီ’တိ ဥပာဟနာ ဩမုဉ္စိတ္ဝာ နီစံ ကတ္ဝာ ပပ္ဖောဋေတ္ဝာ ဂဟေတ္ဝာ ဆတ္တံ အပနာမေတ္ဝာ သီသံ ဝိဝရိတ္ဝာ သီသေ စီဝရံ ³ ခန္ဓေ ကတ္ဝာ သာဓုကံ အတရမာနေန အာရာမော ပဝိသိတဗ္ဗော။ အာရာမံ ပဝိသန္တေန သလ္လက္ခေတဗ္ဗံ – ‘ကတ္ထ အာဝာသိကာ ဘိက္ခူ ပဋိက္ကမန္တီ’တိ? ယတ္ထ အာဝာသိကာ ဘိက္ခူ ပဋိက္ကမန္တိ – ဥပဋ္ဌာနသာလာယ ဝာ မဏ္ဍပေ ဝာ ရုက္ခမူလေ ဝာ – တတ္ထ ဂန္တ္ဝာ ဧကမန္တံ ပတ္တော နိက္ခိပိတဗ္ဗော; ဧကမန္တံ စီဝရံ နိက္ခိပိတဗ္ဗံ; ပတိရူပံ အာသနံ ဂဟေတ္ဝာ နိသီဒိတဗ္ဗံ; ပာနီယံ ပုစ္ဆိတဗ္ဗံ, ပရိဘောဇနီယံ ပုစ္ဆိတဗ္ဗံ – ‘ကတမံ ပာနီယံ, ကတမံ ပရိဘောဇနီယ’န္တိ? သစေ ပာနီယေန အတ္ထော ဟောတိ, ပာနီယံ ဂဟေတ္ဝာ ပာတဗ္ဗံ။ သစေ ပရိဘောဇနီယေန အတ္ထော ဟောတိ, ပရိဘောဇနီယံ ဂဟေတ္ဝာ ပာဒာ ဓောဝိတဗ္ဗာ။ ပာဒေ ဓောဝန္တေန ဧကေန ဟတ္ထေန ဥဒကံ အာသိဉ္စိတဗ္ဗံ, ဧကေန ဟတ္ထေန ပာဒာ ဓောဝိတဗ္ဗာ။ တေနေဝ ဥဒကံ အာသိဉ္စိတဗ္ဗံ ⁴ န တေနေဝ ဟတ္ထေန ပာဒာ ဓောဝိတဗ္ဗာ။ ဥပာဟနပုဉ္ဆနစောဠကံ ပုစ္ဆိတ္ဝာ ဥပာဟနာ ပုဉ္ဆိတဗ္ဗာ။ ဥပာဟနာ ပုဉ္ဆန္တေန ပဌမံ သုက္ခေန စောဠကေန ပုဉ္ဆိတဗ္ဗာ, ပစ္ဆာ အလ္လေန။ ဥပာဟနာပုဉ္ဆနစောဠကံ ဓောဝိတ္ဝာ ⁵ ဧကမန္တံ ဝိသ္သဇ္ဇေတဗ္ဗံ။

357. ‘‘Tena hi, bhikkhave, āgantukānaṃ bhikkhūnaṃ vattaṃ paññapessāmi yathā āgantukehi bhikkhūhi sammā vattitabbaṃ. Āgantukena, bhikkhave, bhikkhunā ‘idāni ārāmaṃ pavisissāmī’ti upāhanā omuñcitvā nīcaṃ katvā papphoṭetvā gahetvā chattaṃ apanāmetvā sīsaṃ vivaritvā sīse cīvaraṃ ⁶ khandhe katvā sādhukaṃ ataramānena ārāmo pavisitabbo. Ārāmaṃ pavisantena sallakkhetabbaṃ – ‘kattha āvāsikā bhikkhū paṭikkamantī’ti? Yattha āvāsikā bhikkhū paṭikkamanti – upaṭṭhānasālāya vā maṇḍape vā rukkhamūle vā – tattha gantvā ekamantaṃ patto nikkhipitabbo; ekamantaṃ cīvaraṃ nikkhipitabbaṃ; patirūpaṃ āsanaṃ gahetvā nisīditabbaṃ; pānīyaṃ pucchitabbaṃ, paribhojanīyaṃ pucchitabbaṃ – ‘katamaṃ pānīyaṃ, katamaṃ paribhojanīya’nti? Sace pānīyena attho hoti, pānīyaṃ gahetvā pātabbaṃ. Sace paribhojanīyena attho hoti, paribhojanīyaṃ gahetvā pādā dhovitabbā. Pāde dhovantena ekena hatthena udakaṃ āsiñcitabbaṃ, ekena hatthena pādā dhovitabbā. Teneva udakaṃ āsiñcitabbaṃ ⁷ na teneva hatthena pādā dhovitabbā. Upāhanapuñchanacoḷakaṃ pucchitvā upāhanā puñchitabbā. Upāhanā puñchantena paṭhamaṃ sukkhena coḷakena puñchitabbā, pacchā allena. Upāhanāpuñchanacoḷakaṃ dhovitvā ⁸ ekamantaṃ vissajjetabbaṃ.

‘‘သစေ အာဝာသိကော ဘိက္ခု ဝုဍ္ဎော ဟောတိ, အဘိဝာဒေတဗ္ဗော။ သစေ နဝကော ဟောတိ, အဘိဝာဒာပေတဗ္ဗော။ သေနာသနံ ပုစ္ဆိတဗ္ဗံ – ‘ကတမံ မေ သေနာသနံ ပာပုဏာတီ’တိ? အဇ္ဈာဝုဋ္ဌံ ဝာ အနဇ္ဈာဝုဋ္ဌံ ဝာ ပုစ္ဆိတဗ္ဗံ, ဂောစရော ပုစ္ဆိတဗ္ဗော, အဂောစရော ပုစ္ဆိတဗ္ဗော, သေက္ခသမ္မတာနိ ⁹ ကုလာနိ ပုစ္ဆိတဗ္ဗာနိ , ဝစ္စဋ္ဌာနံ ပုစ္ဆိတဗ္ဗံ, ပသ္သာဝဋ္ဌာနံ ပုစ္ဆိတဗ္ဗံ, ပာနီယံ ပုစ္ဆိတဗ္ဗံ, ပရိဘောဇနီယံ ပုစ္ဆိတဗ္ဗံ, ကတ္တရဒဏ္ဍော ပုစ္ဆိတဗ္ဗော, သင္ဃသ္သ ကတိကသဏ္ဌာနံ ပုစ္ဆိတဗ္ဗံ – ‘ကံ ကာလံ ပဝိသိတဗ္ဗံ, ကံ ကာလံ နိက္ခမိတဗ္ဗ’န္တိ? သစေ ဝိဟာရော အနဇ္ဈာဝုဋ္ဌော ဟောတိ, ကဝာဋံ အာကောဋေတ္ဝာ မုဟုတ္တံ အာဂမေတ္ဝာ ဃဋိကံ ဥဂ္ဃာဋေတ္ဝာ ကဝာဋံ ပဏာမေတ္ဝာ ဗဟိ ဌိတေန နိလ္လောကေတဗ္ဗော။

‘‘Sace āvāsiko bhikkhu vuḍḍho hoti, abhivādetabbo. Sace navako hoti, abhivādāpetabbo. Senāsanaṃ pucchitabbaṃ – ‘katamaṃ me senāsanaṃ pāpuṇātī’ti? Ajjhāvuṭṭhaṃ vā anajjhāvuṭṭhaṃ vā pucchitabbaṃ, gocaro pucchitabbo, agocaro pucchitabbo, sekkhasammatāni ¹⁰ kulāni pucchitabbāni , vaccaṭṭhānaṃ pucchitabbaṃ, passāvaṭṭhānaṃ pucchitabbaṃ, pānīyaṃ pucchitabbaṃ, paribhojanīyaṃ pucchitabbaṃ, kattaradaṇḍo pucchitabbo, saṅghassa katikasaṇṭhānaṃ pucchitabbaṃ – ‘kaṃ kālaṃ pavisitabbaṃ, kaṃ kālaṃ nikkhamitabba’nti? Sace vihāro anajjhāvuṭṭho hoti, kavāṭaṃ ākoṭetvā muhuttaṃ āgametvā ghaṭikaṃ ugghāṭetvā kavāṭaṃ paṇāmetvā bahi ṭhitena nilloketabbo.

‘‘သစေ ဝိဟာရော ဥက္လာပော ဟောတိ, မဉ္စေ ဝာ မဉ္စော အာရောပိတော ဟောတိ, ပီဌေ ဝာ ပီဌံ အာရောပိတံ ဟောတိ, သေနာသနံ ဥပရိ ပုဉ္ဇီကတံ ¹¹ ဟောတိ, သစေ ဥသ္သဟတိ, သောဓေတဗ္ဗော။ ¹² ဝိဟာရံ သောဓေန္တေန ပဌမံ ဘူမတ္ထရဏံ နီဟရိတ္ဝာ ဧကမန္တံ နိက္ခိပိတဗ္ဗံ; မဉ္စပဋိပာဒကာ နီဟရိတ္ဝာ ဧကမန္တံ နိက္ခိပိတဗ္ဗာ; ဘိသိဗိဗ္ဗောဟနံ နီဟရိတ္ဝာ ဧကမန္တံ နိက္ခိပိတဗ္ဗံ; နိသီဒနပစ္စတ္ထရဏံ နီဟရိတ္ဝာ ဧကမန္တံ နိက္ခိပိတဗ္ဗံ; မဉ္စော နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, နီဟရိတ္ဝာ ဧကမန္တံ နိက္ခိပိတဗ္ဗော; ပီဌံ နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, နီဟရိတ္ဝာ ဧကမန္တံ နိက္ခိပိတဗ္ဗံ; ခေဠမလ္လကော နီဟရိတ္ဝာ ဧကမန္တံ နိက္ခိပိတဗ္ဗော; အပသ္သေနဖလကံ နီဟရိတ္ဝာ ဧကမန္တံ နိက္ခိပိတဗ္ဗံ။ သစေ ဝိဟာရေ သန္တာနကံ ဟောတိ, ဥလ္လောကာ ပဌမံ ဩဟာရေတဗ္ဗံ, အာလောကသန္ဓိကဏ္ဏဘာဂာ ပမဇ္ဇိတဗ္ဗာ။ သစေ ဂေရုကပရိကမ္မကတာ ဘိတ္တိ ကဏ္ဏကိတာ ဟောတိ, စောဠကံ တေမေတ္ဝာ ပီဠေတ္ဝာ ပမဇ္ဇိတဗ္ဗာ။ သစေ ကာဠဝဏ္ဏကတာ ဘူမိ ကဏ္ဏကိတာ ဟောတိ, စောဠကံ တေမေတ္ဝာ ပီဠေတ္ဝာ ပမဇ္ဇိတဗ္ဗာ။ သစေ အကတာ ဟောတိ ဘူမိ, ဥဒကေန ပရိပ္ဖောသိတ္ဝာ သမ္မဇ္ဇိတဗ္ဗာ – မာ ဝိဟာရော ရဇေန ဥဟညီတိ ¹³။ သင္ကာရံ ဝိစိနိတ္ဝာ ဧကမန္တံ ဆဍ္ဍေတဗ္ဗံ။

‘‘Sace vihāro uklāpo hoti, mañce vā mañco āropito hoti, pīṭhe vā pīṭhaṃ āropitaṃ hoti, senāsanaṃ upari puñjīkataṃ ¹⁴ hoti, sace ussahati, sodhetabbo. ¹⁵ Vihāraṃ sodhentena paṭhamaṃ bhūmattharaṇaṃ nīharitvā ekamantaṃ nikkhipitabbaṃ; mañcapaṭipādakā nīharitvā ekamantaṃ nikkhipitabbā; bhisibibbohanaṃ nīharitvā ekamantaṃ nikkhipitabbaṃ; nisīdanapaccattharaṇaṃ nīharitvā ekamantaṃ nikkhipitabbaṃ; mañco nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbo; pīṭhaṃ nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbaṃ; kheḷamallako nīharitvā ekamantaṃ nikkhipitabbo; apassenaphalakaṃ nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā sammajjitabbā – mā vihāro rajena uhaññīti ¹⁶. Saṅkāraṃ vicinitvā ekamantaṃ chaḍḍetabbaṃ.

‘‘ဘူမတ္ထရဏံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာဌာနေ ¹⁷ ပညပေတဗ္ဗံ။ မဉ္စပဋိပာဒကာ ဩတာပေတ္ဝာ ပမဇ္ဇိတ္ဝာ အတိဟရိတ္ဝာ ယထာဌာနေ ¹⁸ ဌပေတဗ္ဗာ။ မဉ္စော ဩတာပေတ္ဝာ သောဓေတ္ဝာ ပပ္ဖောဋေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, အတိဟရိတ္ဝာ ယထာဌာနေ ¹⁹ ပညပေတဗ္ဗော။ ပီဌံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ နီစံ ကတ္ဝာ သာဓုကံ အပ္ပဋိဃံသန္တေန, အသင္ဃဋ္ဋေန္တေန ကဝာဋပိဋ္ဌံ, အတိဟရိတ္ဝာ ယထာဌာနေ ²⁰ ပညပေတဗ္ဗံ။ ဘိသိဗိဗ္ဗောဟနံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာဘာဂံ ပညပေတဗ္ဗံ။ နိသီဒနပစ္စတ္ထရဏံ ဩတာပေတ္ဝာ သောဓေတ္ဝာ ပပ္ဖောဋေတ္ဝာ အတိဟရိတ္ဝာ ယထာဘာဂံ ပညပေတဗ္ဗံ။ ခေဠမလ္လကော ဩတာပေတ္ဝာ ပမဇ္ဇိတ္ဝာ အတိဟရိတ္ဝာ ယထာဘာဂံ ဌပေတဗ္ဗော။ အပသ္သေနဖလကံ ဩတာပေတ္ဝာ ပမဇ္ဇိတ္ဝာ အတိဟရိတ္ဝာ ယထာဘာဂံ ဌပေတဗ္ဗံ။ ပတ္တစီဝရံ နိက္ခိပိတဗ္ဗံ။ ပတ္တံ နိက္ခိပန္တေန ဧကေန ဟတ္ထေန ပတ္တံ ဂဟေတ္ဝာ ဧကေန ဟတ္ထေန ဟေဋ္ဌာမဉ္စံ ဝာ ဟေဋ္ဌာပီဌံ ဝာ ပရာမသိတ္ဝာ ပတ္တော နိက္ခိပိတဗ္ဗော။ န စ အနန္တရဟိတာယ ဘူမိယာ ပတ္တော နိက္ခိပိတဗ္ဗော။ စီဝရံ နိက္ခိပန္တေန ဧကေန ဟတ္ထေန စီဝရံ ဂဟေတ္ဝာ ဧကေန ဟတ္ထေန စီဝရဝံသံ ဝာ စီဝရရဇ္ဇုံ ဝာ ပမဇ္ဇိတ္ဝာ ပာရတော အန္တံ ဩရတော ဘောဂံ ကတ္ဝာ စီဝရံ နိက္ခိပိတဗ္ဗံ။

‘‘Bhūmattharaṇaṃ otāpetvā sodhetvā papphoṭetvā atiharitvā yathāṭhāne ²¹ paññapetabbaṃ. Mañcapaṭipādakā otāpetvā pamajjitvā atiharitvā yathāṭhāne ²² ṭhapetabbā. Mañco otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāṭhāne ²³ paññapetabbo. Pīṭhaṃ otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāṭhāne ²⁴ paññapetabbaṃ. Bhisibibbohanaṃ otāpetvā sodhetvā papphoṭetvā atiharitvā yathābhāgaṃ paññapetabbaṃ. Nisīdanapaccattharaṇaṃ otāpetvā sodhetvā papphoṭetvā atiharitvā yathābhāgaṃ paññapetabbaṃ. Kheḷamallako otāpetvā pamajjitvā atiharitvā yathābhāgaṃ ṭhapetabbo. Apassenaphalakaṃ otāpetvā pamajjitvā atiharitvā yathābhāgaṃ ṭhapetabbaṃ. Pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo. Na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ.

‘‘သစေ ပုရတ္ထိမာ သရဇာ ဝာတာ ဝာယန္တိ, ပုရတ္ထိမာ ဝာတပာနာ ထကေတဗ္ဗာ။ သစေ ပစ္ဆိမာ သရဇာ ဝာတာ ဝာယန္တိ, ပစ္ဆိမာ ဝာတပာနာ ထကေတဗ္ဗာ။ သစေ ဥတ္တရာ သရဇာ ဝာတာ ဝာယန္တိ, ဥတ္တရာ ဝာတပာနာ ထကေတဗ္ဗာ။ သစေ ဒက္ခိဏာ သရဇာ ဝာတာ ဝာယန္တိ, ဒက္ခိဏာ ဝာတပာနာ ထကေတဗ္ဗာ ။ သစေ သီတကာလော ဟောတိ, ဒိဝာ ဝာတပာနာ ဝိဝရိတဗ္ဗာ, ရတ္တိံ ထကေတဗ္ဗာ။ သစေ ဥဏ္ဟကာလော ဟောတိ, ဒိဝာ ဝာတပာနာ ထကေတဗ္ဗာ, ရတ္တိံ ဝိဝရိတဗ္ဗာ။

‘‘Sace puratthimā sarajā vātā vāyanti, puratthimā vātapānā thaketabbā. Sace pacchimā sarajā vātā vāyanti, pacchimā vātapānā thaketabbā. Sace uttarā sarajā vātā vāyanti, uttarā vātapānā thaketabbā. Sace dakkhiṇā sarajā vātā vāyanti, dakkhiṇā vātapānā thaketabbā . Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā vātapānā thaketabbā, rattiṃ vivaritabbā.

‘‘သစေ ပရိဝေဏံ ဥက္လာပံ ဟောတိ, ပရိဝေဏံ သမ္မဇ္ဇိတဗ္ဗံ။ သစေ ကောဋ္ဌကော ဥက္လာပော ဟောတိ, ကောဋ္ဌကော သမ္မဇ္ဇိတဗ္ဗော။ သစေ ဥပဋ္ဌာနသာလာ ဥက္လာပာ ဟောတိ, ဥပဋ္ဌာနသာလာ သမ္မဇ္ဇိတဗ္ဗာ။ သစေ အဂ္ဂိသာလာ ဥက္လာပာ ဟောတိ, အဂ္ဂိသာလာ သမ္မဇ္ဇိတဗ္ဗာ။ သစေ ဝစ္စကုဋိ ဥက္လာပာ ဟောတိ, ဝစ္စကုဋိ သမ္မဇ္ဇိတဗ္ဗာ။ သစေ ပာနီယံ န ဟောတိ, ပာနီယံ ဥပဋ္ဌာပေတဗ္ဗံ။ သစေ ပရိဘောဇနီယံ န ဟောတိ, ပရိဘောဇနီယံ ဥပဋ္ဌာပေတဗ္ဗံ။ သစေ အာစမနကုမ္ဘိယာ ဥဒကံ န ဟောတိ, အာစမနကုမ္ဘိယာ ဥဒကံ အာသိဉ္စိတဗ္ဗံ။ ဣဒံ ခော, ဘိက္ခဝေ, အာဂန္တုကာနံ ဘိက္ခူနံ ဝတ္တံ ယထာ အာဂန္တုကေဟိ ဘိက္ခူဟိ သမ္မာ ဝတ္တိတဗ္ဗ’’န္တိ။

‘‘Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo. Sace upaṭṭhānasālā uklāpā hoti, upaṭṭhānasālā sammajjitabbā. Sace aggisālā uklāpā hoti, aggisālā sammajjitabbā. Sace vaccakuṭi uklāpā hoti, vaccakuṭi sammajjitabbā. Sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ. Idaṃ kho, bhikkhave, āgantukānaṃ bhikkhūnaṃ vattaṃ yathā āgantukehi bhikkhūhi sammā vattitabba’’nti.

Next: ၂. အာဝာသိကဝတ္တကထာ • 2. Āvāsikavattakathā

Footnotes:

1. ဥပရိပိဋ္ဌတော (?)

2. uparipiṭṭhato (?)

3. ဝိဝရိတ္ဝာ စီဝရံ (က.)

4. ယေန ဟတ္ထေန ဥဒကံ အာသိဉ္စိတဗ္ဗံ (သ္ယာ.)

5. ပီဠေတ္ဝာ (သ္ယာ.)

6. vivaritvā cīvaraṃ (ka.)

7. yena hatthena udakaṃ āsiñcitabbaṃ (syā.)

8. pīḷetvā (syā.)

9. သေခသမ္မတာနိ (က.)

10. sekhasammatāni (ka.)

11. ပုဉ္ဇကိတံ (က.)

12. မဟာဝ. ၆၆-၆၇ (ထောကံ ဝိသဒိသံ)

13. ဦဟညီတိ (သီ. သ္ယာ.)

14. puñjakitaṃ (ka.)

15. mahāva. 66-67 (thokaṃ visadisaṃ)

16. ūhaññīti (sī. syā.)

17. ယထာပညတ္တံ (သီ. သ္ယာ.), ယထာဘာဂံ (က.)

18. ယထာဘာဂံ (သ္ယာ. က.)

19. ယထာဘာဂံ (သ္ယာ. က.)

20. ယထာဘာဂံ (သ္ယာ. က.)

21. yathāpaññattaṃ (sī. syā.), yathābhāgaṃ (ka.)

22. yathābhāgaṃ (syā. ka.)

23. yathābhāgaṃ (syā. ka.)

24. yathābhāgaṃ (syā. ka.)

Related texts:

အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / အာဂန္တုကဝတ္တကထာ • Āgantukavattakathā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အာဂန္တုကဝတ္တကထာဝဏ္ဏနာ • Āgantukavattakathāvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အာဂန္တုကဝတ္တကထာဝဏ္ဏနာ • Āgantukavattakathāvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / အာဂန္တုကဝတ္တကထာဝဏ္ဏနာ • Āgantukavattakathāvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. အာဂန္တုကဝတ္တကထာ • 1. Āgantukavattakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact