| Library / Tipiṭaka / ತಿಪಿಟಕ • Tipiṭaka / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā |
೮. ವತ್ತಕ್ಖನ್ಧಕಂ
8. Vattakkhandhakaṃ
ಆಗನ್ತುಕವತ್ತಕಥಾ
Āgantukavattakathā
೩೫೭. ವತ್ತಕ್ಖನ್ಧಕೇ ಇದಾನಿ ಆರಾಮಂ ಪವಿಸಿಸ್ಸಾಮೀತಿ ಇಮಿನಾ ಉಪಚಾರಸೀಮಸಮೀಪಂ ದಸ್ಸೇತಿ; ತಸ್ಮಾ ಉಪಚಾರಸೀಮಂ ಪತ್ವಾ ಉಪಾಹನಾಓಮುಞ್ಚನಾದಿ ಸಬ್ಬಂ ಕಾತಬ್ಬಂ। ಗಹೇತ್ವಾತಿ ಉಪಾಹನದಣ್ಡಕೇನ ಗಹೇತ್ವಾ। ಪಟಿಕ್ಕಮನ್ತೀತಿ ಸನ್ನಿಪತನ್ತಿ। ವಿಸ್ಸಜ್ಜೇತಬ್ಬನ್ತಿ ಪತ್ಥರಿತಬ್ಬಂ। ಗೋಚರೋ ಪುಚ್ಛಿತಬ್ಬೋತಿ ‘‘ಗೋಚರಗಾಮೋ ಆಸನ್ನೇ ಉದಾಹು ದೂರೇ, ಕಾಲಸ್ಸೇವ ಪಿಣ್ಡಾಯ ಚರಿತಬ್ಬಂ ಉದಾಹು ದಿವಾ’’ತಿ ಏವಂ ಭಿಕ್ಖಾಚಾರೋ ಪುಚ್ಛಿತಬ್ಬೋ। ಅಗೋಚರೋ ನಾಮ ಮಿಚ್ಛಾದಿಟ್ಠಿಕಾನಂ ವಾ ಗಾಮೋ ಪರಿಚ್ಛಿನ್ನಭಿಕ್ಖೋ ವಾ ಗಾಮೋ; ಯತ್ಥ ಏಕಸ್ಸ ವಾ ದ್ವಿನ್ನಂ ವಾ ಭಿಕ್ಖಾ ದಿಯ್ಯತಿ, ಸೋಪಿ ಪುಚ್ಛಿತಬ್ಬೋ। ಪಾನೀಯಂ ಪುಚ್ಛಿತಬ್ಬನ್ತಿ ‘‘ಕಿಂ ಇಮಿಸ್ಸಾ ಪೋಕ್ಖರಣಿಯಾ ಪಾನೀಯಂಯೇವ ಪಿವನ್ತಿ, ನಹಾನಾದಿಪರಿಭೋಗಮ್ಪಿ ಕರೋನ್ತೀ’’ತಿ ಏವಂ ಪಾನೀಯಞ್ಚೇವ ಪರಿಭೋಜನೀಯಞ್ಚ ಪುಚ್ಛಿತಬ್ಬಂ। ಕೇಸುಚಿ ಠಾನೇಸು ವಾಳಮಿಗಾ ವಾ ಅಮನುಸ್ಸಾ ವಾ ಹೋನ್ತಿ, ತಸ್ಮಾ ‘‘ಕಂ ಕಾಲಂ ಪವಿಸಿತಬ್ಬಂ, ಕಂ ಕಾಲಂ ನಿಕ್ಖಮಿತಬ್ಬ’’ನ್ತಿ ಪುಚ್ಛಿತಬ್ಬಂ।
357. Vattakkhandhake idāni ārāmaṃ pavisissāmīti iminā upacārasīmasamīpaṃ dasseti; tasmā upacārasīmaṃ patvā upāhanāomuñcanādi sabbaṃ kātabbaṃ. Gahetvāti upāhanadaṇḍakena gahetvā. Paṭikkamantīti sannipatanti. Vissajjetabbanti pattharitabbaṃ. Gocaro pucchitabboti ‘‘gocaragāmo āsanne udāhu dūre, kālasseva piṇḍāya caritabbaṃ udāhu divā’’ti evaṃ bhikkhācāro pucchitabbo. Agocaro nāma micchādiṭṭhikānaṃ vā gāmo paricchinnabhikkho vā gāmo; yattha ekassa vā dvinnaṃ vā bhikkhā diyyati, sopi pucchitabbo. Pānīyaṃ pucchitabbanti ‘‘kiṃ imissā pokkharaṇiyā pānīyaṃyeva pivanti, nahānādiparibhogampi karontī’’ti evaṃ pānīyañceva paribhojanīyañca pucchitabbaṃ. Kesuci ṭhānesu vāḷamigā vā amanussā vā honti, tasmā ‘‘kaṃ kālaṃ pavisitabbaṃ, kaṃ kālaṃ nikkhamitabba’’nti pucchitabbaṃ.
ಬಹಿ ಠಿತೇನಾತಿ ಬಹಿ ನಿಕ್ಖಮನ್ತಸ್ಸ ಅಹಿನೋ ವಾ ಅಮನುಸ್ಸಸ್ಸ ವಾ ಮಗ್ಗಂ ದತ್ವಾ ಠಿತೇನ ನಿಲ್ಲೋಕೇತಬ್ಬೋ। ಸಚೇ ಉಸ್ಸಹತಿ ಸೋಧೇತಬ್ಬೋತಿ ಯದಿ ಸಕ್ಕೋತಿ, ಸಬ್ಬೋ ವಿಹಾರೋ ಸೋಧೇತಬ್ಬೋ। ಅಸಕ್ಕೋನ್ತೇನ ಅತ್ತನೋ ವಸನೋಕಾಸೋ ಜಗ್ಗಿತಬ್ಬೋ। ಸಬ್ಬಂ ಸೋಧೇತುಂ ಸಕ್ಕೋನ್ತಸ್ಸ ಪನ ದಸ್ಸಿತೇ ವಿಹಾರಸೋಧನವತ್ತೇ ವಿನಿಚ್ಛಯೋ ಮಹಾಖನ್ಧಕೇ ವುತ್ತನಯೇನೇವ ವೇದಿತಬ್ಬೋ।
Bahi ṭhitenāti bahi nikkhamantassa ahino vā amanussassa vā maggaṃ datvā ṭhitena nilloketabbo. Sace ussahati sodhetabboti yadi sakkoti, sabbo vihāro sodhetabbo. Asakkontena attano vasanokāso jaggitabbo. Sabbaṃ sodhetuṃ sakkontassa pana dassite vihārasodhanavatte vinicchayo mahākhandhake vuttanayeneva veditabbo.
ಆಗನ್ತುಕವತ್ತಕಥಾ ನಿಟ್ಠಿತಾ।
Āgantukavattakathā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೧. ಆಗನ್ತುಕವತ್ತಕಥಾ • 1. Āgantukavattakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಆಗನ್ತುಕವತ್ತಕಥಾವಣ್ಣನಾ • Āgantukavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಆಗನ್ತುಕವತ್ತಕಥಾವಣ್ಣನಾ • Āgantukavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಆಗನ್ತುಕವತ್ತಕಥಾವಣ್ಣನಾ • Āgantukavattakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧. ಆಗನ್ತುಕವತ್ತಕಥಾ • 1. Āgantukavattakathā
