| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༨. ཝཏྟཀྑནྡྷཀཾ
8. Vattakkhandhakaṃ
༡. ཨཱགནྟུཀཝཏྟཀཐཱ
1. Āgantukavattakathā
༣༥༦. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཨཱགནྟུཀཱ བྷིཀྑཱུ སཨུཔཱཧནཱཔི ཨཱརཱམཾ པཝིསནྟི, ཚཏྟཔགྒཧིཏཱཔི ཨཱརཱམཾ པཝིསནྟི, ཨོགུཎྛིཏཱཔི ཨཱརཱམཾ པཝིསནྟི, སཱིསེཔི ཙཱིཝརཾ ཀརིཏྭཱ ཨཱརཱམཾ པཝིསནྟི, པཱནཱིཡེནཔི པཱདེ དྷོཝནྟི, ཝུཌྜྷཏརེཔི ཨཱཝཱསིཀེ བྷིཀྑཱུ ན ཨབྷིཝཱདེནྟི, ནཔི སེནཱསནཾ པུཙྪནྟི། ཨཉྙཏརོཔི ཨཱགནྟུཀོ བྷིཀྑུ ཨནཛ྄ཛྷཱཝུཊྛཾ ཝིཧཱརཾ གྷཊིཀཾ ཨུགྒྷཱཊེཏྭཱ ཀཝཱཊཾ པཎཱམེཏྭཱ སཧསཱ པཱཝིསི། ཏསྶ ཨུཔརིཔིཊྛིཏོ 1 ཨཧི ཁནྡྷེ པཔཏི། སོ བྷཱིཏོ ཝིསྶརམཀཱསི། བྷིཀྑཱུ ཨུཔདྷཱཝིཏྭཱ ཏཾ བྷིཀྑུཾ ཨེཏདཝོཙུཾ – ‘‘ཀིསྶ ཏྭཾ, ཨཱཝུསོ, ཝིསྶརམཀཱསཱི’’ཏི? ཨཐ ཁོ སོ བྷིཀྑུ བྷིཀྑཱུནཾ ཨེཏམཏྠཾ ཨཱརོཙེསི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱགནྟུཀཱ བྷིཀྑཱུ སཨུཔཱཧནཱཔི ཨཱརཱམཾ པཝིསིསྶནྟི, ཚཏྟཔགྒཧིཏཱཔི ཨཱརཱམཾ པཝིསིསྶནྟི, ཨོགུཎྛིཏཱཔི ཨཱརཱམཾ པཝིསིསྶནྟི, སཱིསེཔི ཙཱིཝརཾ ཀརིཏྭཱ ཨཱརཱམཾ པཝིསིསྶནྟི, པཱནཱིཡེནཔི པཱདེ དྷོཝིསྶནྟི, ཝུཌྜྷཏརེཔི ཨཱཝཱསིཀེ བྷིཀྑཱུ ན ཨབྷིཝཱདེསྶནྟི, ནཔི སེནཱསནཾ པུཙྪིསྶནྟཱི’’ཏི! ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ, ‘‘ཨཱགནྟུཀཱ བྷིཀྑཱུ སཨུཔཱཧནཱཔི ཨཱརཱམཾ པཝིསནྟི, ཚཏྟཔགྒཧིཏཱཔི ཨཱརཱམཾ པཝིསནྟི, ཨོགུཎྛིཏཱཔི ཨཱརཱམཾ པཝིསནྟི, སཱིསེཔི ཙཱིཝརཾ ཀརིཏྭཱ ཨཱརཱམཾ པཝིསནྟི, པཱནཱིཡེནིཔི པཱདེ དྷོཝནྟི, ཝུཌྜྷཏརེཔི ཨཱཝཱསིཀེ བྷིཀྑཱུ ན ཨབྷིཝཱདེནྟི, ནཔི སེནཱསནཾ པུཙྪནྟཱིཏི། སཙྩཾ བྷགཝཱཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ བྷིཀྑཝེ ཨཱགནྟུཀཱ བྷིཀྑཱུ སཨུཔཱཧནཱཔི ཨཱརཱམཾ པཝིསིསྶནྟི, ཚཏྟཔགྒཧིཏཱཔི ཨཱརཱམཾ པཝིསིསྶནྟི, ཨོགུཎྛིཏཱཔི ཨཱརཱམཾ པཝིསིསྶནྟི, སཱིསེཔི ཙཱིཝརཾ ཀརིཏྭཱ ཨཱརཱམཾ པཝིསིསྶནྟི, པཱནཱིཡེནཔི པཱདེ དྷོཝིསྶནྟི, ཝུཌྜྷཏརེཔི ཨཱཝཱསིཀེ བྷིཀྑཱུ ན ཨབྷིཝཱདེསྶནྟི, ནཔི སེནཱསནཾ པུཙྪིསྶནྟི, ནེཏཾ བྷིཀྑཝེ ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི –
356. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āgantukā bhikkhū saupāhanāpi ārāmaṃ pavisanti, chattapaggahitāpi ārāmaṃ pavisanti, oguṇṭhitāpi ārāmaṃ pavisanti, sīsepi cīvaraṃ karitvā ārāmaṃ pavisanti, pānīyenapi pāde dhovanti, vuḍḍhatarepi āvāsike bhikkhū na abhivādenti, napi senāsanaṃ pucchanti. Aññataropi āgantuko bhikkhu anajjhāvuṭṭhaṃ vihāraṃ ghaṭikaṃ ugghāṭetvā kavāṭaṃ paṇāmetvā sahasā pāvisi. Tassa uparipiṭṭhito 2 ahi khandhe papati. So bhīto vissaramakāsi. Bhikkhū upadhāvitvā taṃ bhikkhuṃ etadavocuṃ – ‘‘kissa tvaṃ, āvuso, vissaramakāsī’’ti? Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āgantukā bhikkhū saupāhanāpi ārāmaṃ pavisissanti, chattapaggahitāpi ārāmaṃ pavisissanti, oguṇṭhitāpi ārāmaṃ pavisissanti, sīsepi cīvaraṃ karitvā ārāmaṃ pavisissanti, pānīyenapi pāde dhovissanti, vuḍḍhatarepi āvāsike bhikkhū na abhivādessanti, napi senāsanaṃ pucchissantī’’ti! Atha kho te bhikkhū bhagavato etamatthaṃ ārocesuṃ…pe… ‘‘saccaṃ kira, bhikkhave, ‘‘āgantukā bhikkhū saupāhanāpi ārāmaṃ pavisanti, chattapaggahitāpi ārāmaṃ pavisanti, oguṇṭhitāpi ārāmaṃ pavisanti, sīsepi cīvaraṃ karitvā ārāmaṃ pavisanti, pānīyenipi pāde dhovanti, vuḍḍhatarepi āvāsike bhikkhū na abhivādenti, napi senāsanaṃ pucchantīti. Saccaṃ bhagavāti. Vigarahi buddho bhagavā…pe… kathañhi nāma bhikkhave āgantukā bhikkhū saupāhanāpi ārāmaṃ pavisissanti, chattapaggahitāpi ārāmaṃ pavisissanti, oguṇṭhitāpi ārāmaṃ pavisissanti, sīsepi cīvaraṃ karitvā ārāmaṃ pavisissanti, pānīyenapi pāde dhovissanti, vuḍḍhatarepi āvāsike bhikkhū na abhivādessanti, napi senāsanaṃ pucchissanti, netaṃ bhikkhave appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –
༣༥༧. ‘‘ཏེན ཧི, བྷིཀྑཝེ, ཨཱགནྟུཀཱནཾ བྷིཀྑཱུནཾ ཝཏྟཾ པཉྙཔེསྶཱམི ཡཐཱ ཨཱགནྟུཀེཧི བྷིཀྑཱུཧི སམྨཱ ཝཏྟིཏབྦཾ། ཨཱགནྟུཀེན, བྷིཀྑཝེ, བྷིཀྑུནཱ ‘ཨིདཱནི ཨཱརཱམཾ པཝིསིསྶཱམཱི’ཏི ཨུཔཱཧནཱ ཨོམུཉྩིཏྭཱ ནཱིཙཾ ཀཏྭཱ པཔྥོཊེཏྭཱ གཧེཏྭཱ ཚཏྟཾ ཨཔནཱམེཏྭཱ སཱིསཾ ཝིཝརིཏྭཱ སཱིསེ ཙཱིཝརཾ 3 ཁནྡྷེ ཀཏྭཱ སཱདྷུཀཾ ཨཏརམཱནེན ཨཱརཱམོ པཝིསིཏབྦོ། ཨཱརཱམཾ པཝིསནྟེན སལླཀྑེཏབྦཾ – ‘ཀཏྠ ཨཱཝཱསིཀཱ བྷིཀྑཱུ པཊིཀྐམནྟཱི’ཏི? ཡཏྠ ཨཱཝཱསིཀཱ བྷིཀྑཱུ པཊིཀྐམནྟི – ཨུཔཊྛཱནསཱལཱཡ ཝཱ མཎྜཔེ ཝཱ རུཀྑམཱུལེ ཝཱ – ཏཏྠ གནྟྭཱ ཨེཀམནྟཾ པཏྟོ ནིཀྑིཔིཏབྦོ; ཨེཀམནྟཾ ཙཱིཝརཾ ནིཀྑིཔིཏབྦཾ; པཏིརཱུཔཾ ཨཱསནཾ གཧེཏྭཱ ནིསཱིདིཏབྦཾ; པཱནཱིཡཾ པུཙྪིཏབྦཾ, པརིབྷོཛནཱིཡཾ པུཙྪིཏབྦཾ – ‘ཀཏམཾ པཱནཱིཡཾ, ཀཏམཾ པརིབྷོཛནཱིཡ’ནྟི? སཙེ པཱནཱིཡེན ཨཏྠོ ཧོཏི, པཱནཱིཡཾ གཧེཏྭཱ པཱཏབྦཾ། སཙེ པརིབྷོཛནཱིཡེན ཨཏྠོ ཧོཏི, པརིབྷོཛནཱིཡཾ གཧེཏྭཱ པཱདཱ དྷོཝིཏབྦཱ། པཱདེ དྷོཝནྟེན ཨེཀེན ཧཏྠེན ཨུདཀཾ ཨཱསིཉྩིཏབྦཾ, ཨེཀེན ཧཏྠེན པཱདཱ དྷོཝིཏབྦཱ། ཏེནེཝ ཨུདཀཾ ཨཱསིཉྩིཏབྦཾ 4 ན ཏེནེཝ ཧཏྠེན པཱདཱ དྷོཝིཏབྦཱ། ཨུཔཱཧནཔུཉྪནཙོལ༹ཀཾ པུཙྪིཏྭཱ ཨུཔཱཧནཱ པུཉྪིཏབྦཱ། ཨུཔཱཧནཱ པུཉྪནྟེན པཋམཾ སུཀྑེན ཙོལ༹ཀེན པུཉྪིཏབྦཱ, པཙྪཱ ཨལླེན། ཨུཔཱཧནཱཔུཉྪནཙོལ༹ཀཾ དྷོཝིཏྭཱ 5 ཨེཀམནྟཾ ཝིསྶཛྫེཏབྦཾ།
357. ‘‘Tena hi, bhikkhave, āgantukānaṃ bhikkhūnaṃ vattaṃ paññapessāmi yathā āgantukehi bhikkhūhi sammā vattitabbaṃ. Āgantukena, bhikkhave, bhikkhunā ‘idāni ārāmaṃ pavisissāmī’ti upāhanā omuñcitvā nīcaṃ katvā papphoṭetvā gahetvā chattaṃ apanāmetvā sīsaṃ vivaritvā sīse cīvaraṃ 6 khandhe katvā sādhukaṃ ataramānena ārāmo pavisitabbo. Ārāmaṃ pavisantena sallakkhetabbaṃ – ‘kattha āvāsikā bhikkhū paṭikkamantī’ti? Yattha āvāsikā bhikkhū paṭikkamanti – upaṭṭhānasālāya vā maṇḍape vā rukkhamūle vā – tattha gantvā ekamantaṃ patto nikkhipitabbo; ekamantaṃ cīvaraṃ nikkhipitabbaṃ; patirūpaṃ āsanaṃ gahetvā nisīditabbaṃ; pānīyaṃ pucchitabbaṃ, paribhojanīyaṃ pucchitabbaṃ – ‘katamaṃ pānīyaṃ, katamaṃ paribhojanīya’nti? Sace pānīyena attho hoti, pānīyaṃ gahetvā pātabbaṃ. Sace paribhojanīyena attho hoti, paribhojanīyaṃ gahetvā pādā dhovitabbā. Pāde dhovantena ekena hatthena udakaṃ āsiñcitabbaṃ, ekena hatthena pādā dhovitabbā. Teneva udakaṃ āsiñcitabbaṃ 7 na teneva hatthena pādā dhovitabbā. Upāhanapuñchanacoḷakaṃ pucchitvā upāhanā puñchitabbā. Upāhanā puñchantena paṭhamaṃ sukkhena coḷakena puñchitabbā, pacchā allena. Upāhanāpuñchanacoḷakaṃ dhovitvā 8 ekamantaṃ vissajjetabbaṃ.
‘‘སཙེ ཨཱཝཱསིཀོ བྷིཀྑུ ཝུཌྜྷོ ཧོཏི, ཨབྷིཝཱདེཏབྦོ། སཙེ ནཝཀོ ཧོཏི, ཨབྷིཝཱདཱཔེཏབྦོ། སེནཱསནཾ པུཙྪིཏབྦཾ – ‘ཀཏམཾ མེ སེནཱསནཾ པཱཔུཎཱཏཱི’ཏི? ཨཛ྄ཛྷཱཝུཊྛཾ ཝཱ ཨནཛ྄ཛྷཱཝུཊྛཾ ཝཱ པུཙྪིཏབྦཾ, གོཙརོ པུཙྪིཏབྦོ, ཨགོཙརོ པུཙྪིཏབྦོ, སེཀྑསམྨཏཱནི 9 ཀུལཱནི པུཙྪིཏབྦཱནི , ཝཙྩཊྛཱནཾ པུཙྪིཏབྦཾ, པསྶཱཝཊྛཱནཾ པུཙྪིཏབྦཾ, པཱནཱིཡཾ པུཙྪིཏབྦཾ, པརིབྷོཛནཱིཡཾ པུཙྪིཏབྦཾ, ཀཏྟརདཎྜོ པུཙྪིཏབྦོ, སངྒྷསྶ ཀཏིཀསཎྛཱནཾ པུཙྪིཏབྦཾ – ‘ཀཾ ཀཱལཾ པཝིསིཏབྦཾ, ཀཾ ཀཱལཾ ནིཀྑམིཏབྦ’ནྟི? སཙེ ཝིཧཱརོ ཨནཛ྄ཛྷཱཝུཊྛོ ཧོཏི, ཀཝཱཊཾ ཨཱཀོཊེཏྭཱ མུཧུཏྟཾ ཨཱགམེཏྭཱ གྷཊིཀཾ ཨུགྒྷཱཊེཏྭཱ ཀཝཱཊཾ པཎཱམེཏྭཱ བཧི ཋིཏེན ནིལློཀེཏབྦོ།
‘‘Sace āvāsiko bhikkhu vuḍḍho hoti, abhivādetabbo. Sace navako hoti, abhivādāpetabbo. Senāsanaṃ pucchitabbaṃ – ‘katamaṃ me senāsanaṃ pāpuṇātī’ti? Ajjhāvuṭṭhaṃ vā anajjhāvuṭṭhaṃ vā pucchitabbaṃ, gocaro pucchitabbo, agocaro pucchitabbo, sekkhasammatāni 10 kulāni pucchitabbāni , vaccaṭṭhānaṃ pucchitabbaṃ, passāvaṭṭhānaṃ pucchitabbaṃ, pānīyaṃ pucchitabbaṃ, paribhojanīyaṃ pucchitabbaṃ, kattaradaṇḍo pucchitabbo, saṅghassa katikasaṇṭhānaṃ pucchitabbaṃ – ‘kaṃ kālaṃ pavisitabbaṃ, kaṃ kālaṃ nikkhamitabba’nti? Sace vihāro anajjhāvuṭṭho hoti, kavāṭaṃ ākoṭetvā muhuttaṃ āgametvā ghaṭikaṃ ugghāṭetvā kavāṭaṃ paṇāmetvā bahi ṭhitena nilloketabbo.
‘‘སཙེ ཝིཧཱརོ ཨུཀླཱཔོ ཧོཏི, མཉྩེ ཝཱ མཉྩོ ཨཱརོཔིཏོ ཧོཏི, པཱིཋེ ཝཱ པཱིཋཾ ཨཱརོཔིཏཾ ཧོཏི, སེནཱསནཾ ཨུཔརི པུཉྫཱིཀཏཾ 11 ཧོཏི, སཙེ ཨུསྶཧཏི, སོདྷེཏབྦོ། 12 ཝིཧཱརཾ སོདྷེནྟེན པཋམཾ བྷཱུམཏྠརཎཾ ནཱིཧརིཏྭཱ ཨེཀམནྟཾ ནིཀྑིཔིཏབྦཾ; མཉྩཔཊིཔཱདཀཱ ནཱིཧརིཏྭཱ ཨེཀམནྟཾ ནིཀྑིཔིཏབྦཱ; བྷིསིབིབྦོཧནཾ ནཱིཧརིཏྭཱ ཨེཀམནྟཾ ནིཀྑིཔིཏབྦཾ; ནིསཱིདནཔཙྩཏྠརཎཾ ནཱིཧརིཏྭཱ ཨེཀམནྟཾ ནིཀྑིཔིཏབྦཾ; མཉྩོ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན, ཨསངྒྷཊྚེནྟེན ཀཝཱཊཔིཊྛཾ, ནཱིཧརིཏྭཱ ཨེཀམནྟཾ ནིཀྑིཔིཏབྦོ; པཱིཋཾ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན, ཨསངྒྷཊྚེནྟེན ཀཝཱཊཔིཊྛཾ, ནཱིཧརིཏྭཱ ཨེཀམནྟཾ ནིཀྑིཔིཏབྦཾ; ཁེལ༹མལླཀོ ནཱིཧརིཏྭཱ ཨེཀམནྟཾ ནིཀྑིཔིཏབྦོ; ཨཔསྶེནཕལཀཾ ནཱིཧརིཏྭཱ ཨེཀམནྟཾ ནིཀྑིཔིཏབྦཾ། སཙེ ཝིཧཱརེ སནྟཱནཀཾ ཧོཏི, ཨུལློཀཱ པཋམཾ ཨོཧཱརེཏབྦཾ, ཨཱལོཀསནྡྷིཀཎྞབྷཱགཱ པམཛྫིཏབྦཱ། སཙེ གེརུཀཔརིཀམྨཀཏཱ བྷིཏྟི ཀཎྞཀིཏཱ ཧོཏི, ཙོལ༹ཀཾ ཏེམེཏྭཱ པཱིལེ༹ཏྭཱ པམཛྫིཏབྦཱ། སཙེ ཀཱལ༹ཝཎྞཀཏཱ བྷཱུམི ཀཎྞཀིཏཱ ཧོཏི, ཙོལ༹ཀཾ ཏེམེཏྭཱ པཱིལེ༹ཏྭཱ པམཛྫིཏབྦཱ། སཙེ ཨཀཏཱ ཧོཏི བྷཱུམི, ཨུདཀེན པརིཔྥོསིཏྭཱ སམྨཛྫིཏབྦཱ – མཱ ཝིཧཱརོ རཛེན ཨུཧཉྙཱིཏི 13། སངྐཱརཾ ཝིཙིནིཏྭཱ ཨེཀམནྟཾ ཚཌྜེཏབྦཾ།
‘‘Sace vihāro uklāpo hoti, mañce vā mañco āropito hoti, pīṭhe vā pīṭhaṃ āropitaṃ hoti, senāsanaṃ upari puñjīkataṃ 14 hoti, sace ussahati, sodhetabbo. 15 Vihāraṃ sodhentena paṭhamaṃ bhūmattharaṇaṃ nīharitvā ekamantaṃ nikkhipitabbaṃ; mañcapaṭipādakā nīharitvā ekamantaṃ nikkhipitabbā; bhisibibbohanaṃ nīharitvā ekamantaṃ nikkhipitabbaṃ; nisīdanapaccattharaṇaṃ nīharitvā ekamantaṃ nikkhipitabbaṃ; mañco nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbo; pīṭhaṃ nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, nīharitvā ekamantaṃ nikkhipitabbaṃ; kheḷamallako nīharitvā ekamantaṃ nikkhipitabbo; apassenaphalakaṃ nīharitvā ekamantaṃ nikkhipitabbaṃ. Sace vihāre santānakaṃ hoti, ullokā paṭhamaṃ ohāretabbaṃ, ālokasandhikaṇṇabhāgā pamajjitabbā. Sace gerukaparikammakatā bhitti kaṇṇakitā hoti, coḷakaṃ temetvā pīḷetvā pamajjitabbā. Sace kāḷavaṇṇakatā bhūmi kaṇṇakitā hoti, coḷakaṃ temetvā pīḷetvā pamajjitabbā. Sace akatā hoti bhūmi, udakena paripphositvā sammajjitabbā – mā vihāro rajena uhaññīti 16. Saṅkāraṃ vicinitvā ekamantaṃ chaḍḍetabbaṃ.
‘‘བྷཱུམཏྠརཎཾ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱཋཱནེ 17 པཉྙཔེཏབྦཾ། མཉྩཔཊིཔཱདཀཱ ཨོཏཱཔེཏྭཱ པམཛྫིཏྭཱ ཨཏིཧརིཏྭཱ ཡཐཱཋཱནེ 18 ཋཔེཏབྦཱ། མཉྩོ ཨོཏཱཔེཏྭཱ སོདྷེཏྭཱ པཔྥོཊེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན, ཨསངྒྷཊྚེནྟེན ཀཝཱཊཔིཊྛཾ, ཨཏིཧརིཏྭཱ ཡཐཱཋཱནེ 19 པཉྙཔེཏབྦོ། པཱིཋཾ ཨོཏཱཔེཏྭཱ སོདྷེཏྭཱ པཔྥོཊེཏྭཱ ནཱིཙཾ ཀཏྭཱ སཱདྷུཀཾ ཨཔྤཊིགྷཾསནྟེན, ཨསངྒྷཊྚེནྟེན ཀཝཱཊཔིཊྛཾ, ཨཏིཧརིཏྭཱ ཡཐཱཋཱནེ 20 པཉྙཔེཏབྦཾ། བྷིསིབིབྦོཧནཾ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱབྷཱགཾ པཉྙཔེཏབྦཾ། ནིསཱིདནཔཙྩཏྠརཎཾ ཨོཏཱཔེཏྭཱ སོདྷེཏྭཱ པཔྥོཊེཏྭཱ ཨཏིཧརིཏྭཱ ཡཐཱབྷཱགཾ པཉྙཔེཏབྦཾ། ཁེལ༹མལླཀོ ཨོཏཱཔེཏྭཱ པམཛྫིཏྭཱ ཨཏིཧརིཏྭཱ ཡཐཱབྷཱགཾ ཋཔེཏབྦོ། ཨཔསྶེནཕལཀཾ ཨོཏཱཔེཏྭཱ པམཛྫིཏྭཱ ཨཏིཧརིཏྭཱ ཡཐཱབྷཱགཾ ཋཔེཏབྦཾ། པཏྟཙཱིཝརཾ ནིཀྑིཔིཏབྦཾ། པཏྟཾ ནིཀྑིཔནྟེན ཨེཀེན ཧཏྠེན པཏྟཾ གཧེཏྭཱ ཨེཀེན ཧཏྠེན ཧེཊྛཱམཉྩཾ ཝཱ ཧེཊྛཱཔཱིཋཾ ཝཱ པརཱམསིཏྭཱ པཏྟོ ནིཀྑིཔིཏབྦོ། ན ཙ ཨནནྟརཧིཏཱཡ བྷཱུམིཡཱ པཏྟོ ནིཀྑིཔིཏབྦོ། ཙཱིཝརཾ ནིཀྑིཔནྟེན ཨེཀེན ཧཏྠེན ཙཱིཝརཾ གཧེཏྭཱ ཨེཀེན ཧཏྠེན ཙཱིཝརཝཾསཾ ཝཱ ཙཱིཝརརཛྫུཾ ཝཱ པམཛྫིཏྭཱ པཱརཏོ ཨནྟཾ ཨོརཏོ བྷོགཾ ཀཏྭཱ ཙཱིཝརཾ ནིཀྑིཔིཏབྦཾ།
‘‘Bhūmattharaṇaṃ otāpetvā sodhetvā papphoṭetvā atiharitvā yathāṭhāne 21 paññapetabbaṃ. Mañcapaṭipādakā otāpetvā pamajjitvā atiharitvā yathāṭhāne 22 ṭhapetabbā. Mañco otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāṭhāne 23 paññapetabbo. Pīṭhaṃ otāpetvā sodhetvā papphoṭetvā nīcaṃ katvā sādhukaṃ appaṭighaṃsantena, asaṅghaṭṭentena kavāṭapiṭṭhaṃ, atiharitvā yathāṭhāne 24 paññapetabbaṃ. Bhisibibbohanaṃ otāpetvā sodhetvā papphoṭetvā atiharitvā yathābhāgaṃ paññapetabbaṃ. Nisīdanapaccattharaṇaṃ otāpetvā sodhetvā papphoṭetvā atiharitvā yathābhāgaṃ paññapetabbaṃ. Kheḷamallako otāpetvā pamajjitvā atiharitvā yathābhāgaṃ ṭhapetabbo. Apassenaphalakaṃ otāpetvā pamajjitvā atiharitvā yathābhāgaṃ ṭhapetabbaṃ. Pattacīvaraṃ nikkhipitabbaṃ. Pattaṃ nikkhipantena ekena hatthena pattaṃ gahetvā ekena hatthena heṭṭhāmañcaṃ vā heṭṭhāpīṭhaṃ vā parāmasitvā patto nikkhipitabbo. Na ca anantarahitāya bhūmiyā patto nikkhipitabbo. Cīvaraṃ nikkhipantena ekena hatthena cīvaraṃ gahetvā ekena hatthena cīvaravaṃsaṃ vā cīvararajjuṃ vā pamajjitvā pārato antaṃ orato bhogaṃ katvā cīvaraṃ nikkhipitabbaṃ.
‘‘སཙེ པུརཏྠིམཱ སརཛཱ ཝཱཏཱ ཝཱཡནྟི, པུརཏྠིམཱ ཝཱཏཔཱནཱ ཐཀེཏབྦཱ། སཙེ པཙྪིམཱ སརཛཱ ཝཱཏཱ ཝཱཡནྟི, པཙྪིམཱ ཝཱཏཔཱནཱ ཐཀེཏབྦཱ། སཙེ ཨུཏྟརཱ སརཛཱ ཝཱཏཱ ཝཱཡནྟི, ཨུཏྟརཱ ཝཱཏཔཱནཱ ཐཀེཏབྦཱ། སཙེ དཀྑིཎཱ སརཛཱ ཝཱཏཱ ཝཱཡནྟི, དཀྑིཎཱ ཝཱཏཔཱནཱ ཐཀེཏབྦཱ ། སཙེ སཱིཏཀཱལོ ཧོཏི, དིཝཱ ཝཱཏཔཱནཱ ཝིཝརིཏབྦཱ, རཏྟིཾ ཐཀེཏབྦཱ། སཙེ ཨུཎྷཀཱལོ ཧོཏི, དིཝཱ ཝཱཏཔཱནཱ ཐཀེཏབྦཱ, རཏྟིཾ ཝིཝརིཏབྦཱ།
‘‘Sace puratthimā sarajā vātā vāyanti, puratthimā vātapānā thaketabbā. Sace pacchimā sarajā vātā vāyanti, pacchimā vātapānā thaketabbā. Sace uttarā sarajā vātā vāyanti, uttarā vātapānā thaketabbā. Sace dakkhiṇā sarajā vātā vāyanti, dakkhiṇā vātapānā thaketabbā . Sace sītakālo hoti, divā vātapānā vivaritabbā, rattiṃ thaketabbā. Sace uṇhakālo hoti, divā vātapānā thaketabbā, rattiṃ vivaritabbā.
‘‘སཙེ པརིཝེཎཾ ཨུཀླཱཔཾ ཧོཏི, པརིཝེཎཾ སམྨཛྫིཏབྦཾ། སཙེ ཀོཊྛཀོ ཨུཀླཱཔོ ཧོཏི, ཀོཊྛཀོ སམྨཛྫིཏབྦོ། སཙེ ཨུཔཊྛཱནསཱལཱ ཨུཀླཱཔཱ ཧོཏི, ཨུཔཊྛཱནསཱལཱ སམྨཛྫིཏབྦཱ། སཙེ ཨགྒིསཱལཱ ཨུཀླཱཔཱ ཧོཏི, ཨགྒིསཱལཱ སམྨཛྫིཏབྦཱ། སཙེ ཝཙྩཀུཊི ཨུཀླཱཔཱ ཧོཏི, ཝཙྩཀུཊི སམྨཛྫིཏབྦཱ། སཙེ པཱནཱིཡཾ ན ཧོཏི, པཱནཱིཡཾ ཨུཔཊྛཱཔེཏབྦཾ། སཙེ པརིབྷོཛནཱིཡཾ ན ཧོཏི, པརིབྷོཛནཱིཡཾ ཨུཔཊྛཱཔེཏབྦཾ། སཙེ ཨཱཙམནཀུམྦྷིཡཱ ཨུདཀཾ ན ཧོཏི, ཨཱཙམནཀུམྦྷིཡཱ ཨུདཀཾ ཨཱསིཉྩིཏབྦཾ། ཨིདཾ ཁོ, བྷིཀྑཝེ, ཨཱགནྟུཀཱནཾ བྷིཀྑཱུནཾ ཝཏྟཾ ཡཐཱ ཨཱགནྟུཀེཧི བྷིཀྑཱུཧི སམྨཱ ཝཏྟིཏབྦ’’ནྟི།
‘‘Sace pariveṇaṃ uklāpaṃ hoti, pariveṇaṃ sammajjitabbaṃ. Sace koṭṭhako uklāpo hoti, koṭṭhako sammajjitabbo. Sace upaṭṭhānasālā uklāpā hoti, upaṭṭhānasālā sammajjitabbā. Sace aggisālā uklāpā hoti, aggisālā sammajjitabbā. Sace vaccakuṭi uklāpā hoti, vaccakuṭi sammajjitabbā. Sace pānīyaṃ na hoti, pānīyaṃ upaṭṭhāpetabbaṃ. Sace paribhojanīyaṃ na hoti, paribhojanīyaṃ upaṭṭhāpetabbaṃ. Sace ācamanakumbhiyā udakaṃ na hoti, ācamanakumbhiyā udakaṃ āsiñcitabbaṃ. Idaṃ kho, bhikkhave, āgantukānaṃ bhikkhūnaṃ vattaṃ yathā āgantukehi bhikkhūhi sammā vattitabba’’nti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨཱགནྟུཀཝཏྟཀཐཱ • Āgantukavattakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨཱགནྟུཀཝཏྟཀཐཱཝཎྞནཱ • Āgantukavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨཱགནྟུཀཝཏྟཀཐཱཝཎྞནཱ • Āgantukavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨཱགནྟུཀཝཏྟཀཐཱཝཎྞནཱ • Āgantukavattakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡. ཨཱགནྟུཀཝཏྟཀཐཱ • 1. Āgantukavattakathā
