| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༤. ཨགཱརསུཏྟཾ
4. Agārasuttaṃ
༢༦༢. ‘‘སེཡྻཐཱཔི, བྷིཀྑཝེ, ཨཱགནྟུཀཱགཱརཾ། ཏཏྠ པུརཏྠིམཱཡཔི དིསཱཡ ཨཱགནྟྭཱ ཝཱསཾ ཀཔྤེནྟི, པཙྪིམཱཡཔི དིསཱཡ ཨཱགནྟྭཱ ཝཱསཾ ཀཔྤེནྟི, ཨུཏྟརཱཡཔི དིསཱཡ ཨཱགནྟྭཱ ཝཱསཾ ཀཔྤེནྟི, དཀྑིཎཱཡཔི དིསཱཡ ཨཱགནྟྭཱ ཝཱསཾ ཀཔྤེནྟི། ཁཏྟིཡཱཔི ཨཱགནྟྭཱ ཝཱསཾ ཀཔྤེནྟི, བྲཱཧྨཎཱཔི ཨཱགནྟྭཱ ཝཱསཾ ཀཔྤེནྟི, ཝེསྶཱཔི ཨཱགནྟྭཱ ཝཱསཾ ཀཔྤེནྟི, སུདྡཱཔི ཨཱགནྟྭཱ ཝཱསཾ ཀཔྤེནྟི། ཨེཝམེཝ ཁོ, བྷིཀྑཝེ, ཨིམསྨིཾ ཀཱཡསྨིཾ ཝིཝིདྷཱ ཝེདནཱ ཨུཔྤཛྫནྟི། སུཁཱཔི ཝེདནཱ ཨུཔྤཛྫཏི, དུཀྑཱཔི ཝེདནཱ ཨུཔྤཛྫཏི, ཨདུཀྑམསུཁཱཔི ཝེདནཱ ཨུཔྤཛྫཏི། སཱམིསཱཔི སུཁཱ ཝེདནཱ ཨུཔྤཛྫཏི, སཱམིསཱཔི དུཀྑཱ ཝེདནཱ ཨུཔྤཛྫཏི, སཱམིསཱཔི ཨདུཀྑམསུཁཱ ཝེདནཱ ཨུཔྤཛྫཏི། ནིརཱམིསཱཔི སུཁཱ ཝེདནཱ ཨུཔྤཛྫཏི, ནིརཱམིསཱཔི དུཀྑཱ ཝེདནཱ ཨུཔྤཛྫཏི, ནིརཱམིསཱཔི ཨདུཀྑམསུཁཱ ཝེདནཱ ཨུཔྤཛྫཏཱི’’ཏི། ཙཏུཏྠཾ།
262. ‘‘Seyyathāpi, bhikkhave, āgantukāgāraṃ. Tattha puratthimāyapi disāya āgantvā vāsaṃ kappenti, pacchimāyapi disāya āgantvā vāsaṃ kappenti, uttarāyapi disāya āgantvā vāsaṃ kappenti, dakkhiṇāyapi disāya āgantvā vāsaṃ kappenti. Khattiyāpi āgantvā vāsaṃ kappenti, brāhmaṇāpi āgantvā vāsaṃ kappenti, vessāpi āgantvā vāsaṃ kappenti, suddāpi āgantvā vāsaṃ kappenti. Evameva kho, bhikkhave, imasmiṃ kāyasmiṃ vividhā vedanā uppajjanti. Sukhāpi vedanā uppajjati, dukkhāpi vedanā uppajjati, adukkhamasukhāpi vedanā uppajjati. Sāmisāpi sukhā vedanā uppajjati, sāmisāpi dukkhā vedanā uppajjati, sāmisāpi adukkhamasukhā vedanā uppajjati. Nirāmisāpi sukhā vedanā uppajjati, nirāmisāpi dukkhā vedanā uppajjati, nirāmisāpi adukkhamasukhā vedanā uppajjatī’’ti. Catutthaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤. ཨགཱརསུཏྟཝཎྞནཱ • 4. Agārasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༤. ཨགཱརསུཏྟཝཎྞནཱ • 4. Agārasuttavaṇṇanā
