| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
අගතිඅගන්‌තබ්‌බවණ්‌ණනා
Agatiagantabbavaṇṇanā
379. බහුජනඅහිතාය පටිපන්‌නො හොතීති පාළිං විත්‌ථාරෙන්‌තො ආහ ‘‘විනයධරෙන හී’’තිආදි. තත්‌ථ විනයධරෙනාති අනුවිජ්‌ජකෙන, විනිච්‌ඡිතෙති සම්‌බන්‌ධො. ඔවාදූපජීවිනියොති භික්‌ඛූනං ඔවාදං උපනිස්‌සාය ජීවිනියො. උපාසකාපීති රතනත්‌තයං පටිස්‌සරණන්‌ති උපාසකාපි. දායකාපීති භික්‌ඛූනං පච්‌චයදායකාපි. තෙසන්‌ති උපාසකාදීනං. තථෙවාති යථා උපාසකාදයො ද්‌විධා භිජ්‌ජන්‌ති, තථෙව. තතොති ආරක්‌ඛදෙවතාහි පරන්‌ති සම්‌බන්‌ධො. තෙනාති ද්‌විධාකාරණෙන.
379.Bahujanaahitāya paṭipanno hotīti pāḷiṃ vitthārento āha ‘‘vinayadharena hī’’tiādi. Tattha vinayadharenāti anuvijjakena, vinicchiteti sambandho. Ovādūpajīviniyoti bhikkhūnaṃ ovādaṃ upanissāya jīviniyo. Upāsakāpīti ratanattayaṃ paṭissaraṇanti upāsakāpi. Dāyakāpīti bhikkhūnaṃ paccayadāyakāpi. Tesanti upāsakādīnaṃ. Tathevāti yathā upāsakādayo dvidhā bhijjanti, tatheva. Tatoti ārakkhadevatāhi paranti sambandho. Tenāti dvidhākāraṇena.
382. ගහනනිස්‌සිතොති එත්‌ථ ගහනසද්‌දො දිට්‌ඨිපරියායොති ආහ ‘‘මිච්‌ඡාදිට්‌ඨිඅන්‌තග්‌ගාහිකදිට්‌ඨිසඞ්‌ඛාතං ගහන’’න්‌ති.
382.Gahananissitoti ettha gahanasaddo diṭṭhipariyāyoti āha ‘‘micchādiṭṭhiantaggāhikadiṭṭhisaṅkhātaṃ gahana’’nti.
393. තස්‌ස අවජානන්‌තොති එත්‌ථ ‘‘තස්‌සා’’ති පදං ‘‘වචන’’න්‌ති පාඨසෙසෙන සම්‌බන්‌ධිතබ්‌බන්‌ති ආහ ‘‘තස්‌ස වචන’’න්‌ති. තස්‌සාති නවකස්‌ස. තන්‌ති නවකං.
393.Tassa avajānantoti ettha ‘‘tassā’’ti padaṃ ‘‘vacana’’nti pāṭhasesena sambandhitabbanti āha ‘‘tassa vacana’’nti. Tassāti navakassa. Tanti navakaṃ.
394. ‘‘යංඅත්‌ථායා’’ති එසො සද්‌දො සමාසොති ආහ ‘‘යදත්‌ථායා’’ති. ‘‘තං අත්‌ථ’’න්‌ති එසො සද්‌දො ලිඞ්‌ගවිපල්‌ලාසොති ආහ ‘‘සො අත්‌ථො’’ති. අත්‌ථසද්‌දො හි පුල්‌ලිඞ්‌ගො, පාළියං න පරිහාපෙතබ්‌බන්‌ති එත්‌ථාපි ලිඞ්‌ගවිපල්‌ලාසො වෙදිතබ්‌බො. සබ්‌බත්‌ථාති සබ්‌බස්‌මිං මහාසඞ්‌ගාමෙ.
394.‘‘Yaṃatthāyā’’ti eso saddo samāsoti āha ‘‘yadatthāyā’’ti. ‘‘Taṃ attha’’nti eso saddo liṅgavipallāsoti āha ‘‘so attho’’ti. Atthasaddo hi pulliṅgo, pāḷiyaṃ na parihāpetabbanti etthāpi liṅgavipallāso veditabbo. Sabbatthāti sabbasmiṃ mahāsaṅgāme.
ඉති මහාසඞ්‌ගාමවණ්‌ණනාය යොජනා සමත්‌තා.
Iti mahāsaṅgāmavaṇṇanāya yojanā samattā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / පරිවාරපාළි • Parivārapāḷi
2. අගතිඅගන්‌තබ්‌බො • 2. Agatiagantabbo
5. පරපක්‌ඛාදිඅවජානනං • 5. Parapakkhādiavajānanaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / අගතිඅගන්‌තබ්‌බවණ්‌ණනා • Agatiagantabbavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහරන්‌තෙන ජානිතබ්‌බාදිවණ්‌ණනා • Voharantena jānitabbādivaṇṇanā
