| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
২. অগতিঅগন্তব্বো
2. Agatiagantabbo
৩৭৯. ন ছন্দাগতি গন্তব্বাতি ছন্দাগতিং গচ্ছন্তো কথং ছন্দাগতিং গচ্ছতি? ইধেকচ্চো – ‘‘অযং মে উপজ্ঝাযো ৰা আচরিযো ৰা সদ্ধিৰিহারিকো ৰা অন্তেৰাসিকো ৰা সমানুপজ্ঝাযকো ৰা সমানাচরিযকো ৰা সন্দিট্ঠো ৰা সম্ভত্তো ৰা ঞাতিসালোহিতো ৰা’’তি, তস্সানুকম্পায তস্সানুরক্খায অধম্মং ধম্মোতি দীপেতি, ধম্মং অধম্মোতি দীপেতি, অৰিনযং ৰিনযোতি দীপেতি, ৰিনযং অৰিনযোতি দীপেতি, অভাসিতং অলপিতং তথাগতেন ভাসিতং লপিতং তথাগতেনাতি দীপেতি, ভাসিতং লপিতং তথাগতেন অভাসিতং অলপিতং তথাগতেনাতি দীপেতি, অনাচিণ্ণং তথাগতেন আচিণ্ণং তথাগতেনাতি দীপেতি, আচিণ্ণং তথাগতেন অনাচিণ্ণং তথাগতেনাতি দীপেতি, অপঞ্ঞত্তং তথাগতেন পঞ্ঞত্তং তথাগতেনাতি দীপেতি, পঞ্ঞত্তং তথাগতেন অপঞ্ঞত্তং তথাগতেনাতি দীপেতি, অনাপত্তিং আপত্তীতি দীপেতি, আপত্তিং অনাপত্তীতি দীপেতি, লহুকং আপত্তিং গরুকা আপত্তীতি দীপেতি, গরুকং আপত্তিং লহুকা আপত্তীতি দীপেতি, সাৰসেসং আপত্তিং অনৰসেসা আপত্তীতি দীপেতি, অনৰসেসং আপত্তিং সাৰসেসা আপত্তীতি দীপেতি, দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। ইমেহি অট্ঠারসহি ৰত্থূহি ছন্দাগতিং গচ্ছন্তো বহুজনাহিতায পটিপন্নো হোতি বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। ইমেহি অট্ঠারসহি ৰত্থূহি ছন্দাগতিং গচ্ছন্তো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি। ছন্দাগতিং গচ্ছন্তো এৰং ছন্দাগতিং গচ্ছতি।
379.Na chandāgati gantabbāti chandāgatiṃ gacchanto kathaṃ chandāgatiṃ gacchati? Idhekacco – ‘‘ayaṃ me upajjhāyo vā ācariyo vā saddhivihāriko vā antevāsiko vā samānupajjhāyako vā samānācariyako vā sandiṭṭho vā sambhatto vā ñātisālohito vā’’ti, tassānukampāya tassānurakkhāya adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, abhāsitaṃ alapitaṃ tathāgatena bhāsitaṃ lapitaṃ tathāgatenāti dīpeti, bhāsitaṃ lapitaṃ tathāgatena abhāsitaṃ alapitaṃ tathāgatenāti dīpeti, anāciṇṇaṃ tathāgatena āciṇṇaṃ tathāgatenāti dīpeti, āciṇṇaṃ tathāgatena anāciṇṇaṃ tathāgatenāti dīpeti, apaññattaṃ tathāgatena paññattaṃ tathāgatenāti dīpeti, paññattaṃ tathāgatena apaññattaṃ tathāgatenāti dīpeti, anāpattiṃ āpattīti dīpeti, āpattiṃ anāpattīti dīpeti, lahukaṃ āpattiṃ garukā āpattīti dīpeti, garukaṃ āpattiṃ lahukā āpattīti dīpeti, sāvasesaṃ āpattiṃ anavasesā āpattīti dīpeti, anavasesaṃ āpattiṃ sāvasesā āpattīti dīpeti, duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi chandāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi chandāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Chandāgatiṃ gacchanto evaṃ chandāgatiṃ gacchati.
৩৮০. ন দোসাগতি গন্তব্বাতি দোসাগতিং গচ্ছন্তো কথং দোসাগতিং গচ্ছতি? ইধেকচ্চো অনত্থং মে অচরীতি আঘাতং বন্ধতি, অনত্থং মে চরতীতি আঘাতং বন্ধতি, অনত্থং মে চরিস্সতীতি আঘাতং বন্ধতি, পিযস্স মে মনাপস্স অনত্থং অচরি… অনত্থং চরতি… অনত্থং চরিস্সতীতি আঘাতং বন্ধতি, অপ্পিযস্স মে অমনাপস্স অত্থং অচরি… অত্থং চরতি… অত্থং চরিস্সতীতি আঘাতং বন্ধতি। ইমেহি নৰহি আঘাতৰত্থূহি আঘাতো পটিঘাতো কুদ্ধো কোধাভিভূতো অধম্মং ধম্মোতি দীপেতি, ধম্মং অধম্মোতি দীপেতি…পে॰… দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। ইমেহি অট্ঠারসহি ৰত্থূহি দোসাগতিং গচ্ছন্তো বহুজনাহিতায পটিপন্নো হোতি বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। ইমেহি অট্ঠারসহি ৰত্থূহি দোসাগতিং গচ্ছন্তো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং বহুঞ্চ অপুঞ্ঞং পসৰতি। দোসাগতিং গচ্ছন্তো এৰং দোসাগতিং গচ্ছতি।
380.Na dosāgati gantabbāti dosāgatiṃ gacchanto kathaṃ dosāgatiṃ gacchati? Idhekacco anatthaṃ me acarīti āghātaṃ bandhati, anatthaṃ me caratīti āghātaṃ bandhati, anatthaṃ me carissatīti āghātaṃ bandhati, piyassa me manāpassa anatthaṃ acari… anatthaṃ carati… anatthaṃ carissatīti āghātaṃ bandhati, appiyassa me amanāpassa atthaṃ acari… atthaṃ carati… atthaṃ carissatīti āghātaṃ bandhati. Imehi navahi āghātavatthūhi āghāto paṭighāto kuddho kodhābhibhūto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi dosāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi dosāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ bahuñca apuññaṃ pasavati. Dosāgatiṃ gacchanto evaṃ dosāgatiṃ gacchati.
৩৮১. ন মোহাগতি গন্তব্বাতি মোহাগতিং গচ্ছন্তো কথং মোহাগতিং গচ্ছতি? রত্তো রাগৰসেন গচ্ছতি, দুট্ঠো দোসৰসেন গচ্ছতি, মূল়্হো মোহৰসেন গচ্ছতি, পরামট্ঠো দিট্ঠিৰসেন গচ্ছতি, মূল়্হো সংমূল়্হো মোহাভিভূতো অধম্মং ধম্মোতি দীপেতি, ধম্মং অধম্মোতি দীপেতি…পে॰… দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। ইমেহি অট্ঠারসহি ৰত্থূহি মোহাগতিং গচ্ছন্তো বহুজনাহিতায পটিপন্নো হোতি বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। ইমেহি অট্ঠারসহি ৰত্থূহি মোহাগতিং গচ্ছন্তো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি। মোহাগতিং গচ্ছন্তো এৰং মোহাগতিং গচ্ছতি।
381.Na mohāgati gantabbāti mohāgatiṃ gacchanto kathaṃ mohāgatiṃ gacchati? Ratto rāgavasena gacchati, duṭṭho dosavasena gacchati, mūḷho mohavasena gacchati, parāmaṭṭho diṭṭhivasena gacchati, mūḷho saṃmūḷho mohābhibhūto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi mohāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi mohāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Mohāgatiṃ gacchanto evaṃ mohāgatiṃ gacchati.
৩৮২. ন ভযাগতি গন্তব্বাতি ভযাগতিং গচ্ছন্তো কথং ভযাগতিং গচ্ছতি? ইধেকচ্চো – ‘‘অযং ৰিসমনিস্সিতো ৰা গহননিস্সিতো ৰা বলৰনিস্সিতো ৰা কক্খল়ো ফরুসো জীৰিতন্তরাযং ৰা ব্রহ্মচরিযন্তরাযং ৰা করিস্সতী’’তি, তস্স ভযা ভীতো অধম্মং ধম্মোতি দীপেতি, ধম্মং অধম্মোতি দীপেতি, অৰিনযং ৰিনযোতি দীপেতি, ৰিনযং অৰিনযোতি দীপেতি, অভাসিতং অলপিতং তথাগতেন ভাসিতং লপিতং তথাগতেনাতি দীপেতি, ভাসিতং লপিতং তথাগতেন অভাসিতং অলপিতং তথাগতেনাতি দীপেতি, অনাচিণ্ণং তথাগতেন আচিণ্ণং তথাগতেনাতি দীপেতি, আচিণ্ণং তথাগতেন অনাচিণ্ণং তথাগতেনাতি দীপেতি, অপঞ্ঞত্তং তথাগতেন পঞ্ঞত্তং তথাগতেনাতি দীপেতি, পঞ্ঞত্তং তথাগতেন অপঞ্ঞত্তং তথাগতেনাতি দীপেতি, অনাপত্তিং আপত্তীতি দীপেতি, আপত্তিং অনাপত্তীতি দীপেতি, লহুকং আপত্তিং গরুকা আপত্তীতি দীপেতি, গরুকং আপত্তিং লহুকা আপত্তীতি দীপেতি, সাৰসেসং আপত্তিং অনৰসেসা আপত্তীতি দীপেতি, অনৰসেসং আপত্তিং সাৰসেসা আপত্তীতি দীপেতি, দুট্ঠুল্লং আপত্তিং অদুট্ঠুল্লা আপত্তীতি দীপেতি, অদুট্ঠুল্লং আপত্তিং দুট্ঠুল্লা আপত্তীতি দীপেতি। ইমেহি অট্ঠারসহি ৰত্থূহি ভযাগতিং গচ্ছন্তো বহুজনাহিতায পটিপন্নো হোতি বহুজনাসুখায বহুনো জনস্স অনত্থায অহিতায দুক্খায দেৰমনুস্সানং। ইমেহি অট্ঠারসহি ৰত্থূহি ভযাগতিং গচ্ছন্তো খতং উপহতং অত্তানং পরিহরতি, সাৰজ্জো চ হোতি সানুৰজ্জো চ ৰিঞ্ঞূনং, বহুঞ্চ অপুঞ্ঞং পসৰতি। ভযাগতিং গচ্ছন্তো এৰং ভযাগতিং গচ্ছতি।
382.Na bhayāgati gantabbāti bhayāgatiṃ gacchanto kathaṃ bhayāgatiṃ gacchati? Idhekacco – ‘‘ayaṃ visamanissito vā gahananissito vā balavanissito vā kakkhaḷo pharuso jīvitantarāyaṃ vā brahmacariyantarāyaṃ vā karissatī’’ti, tassa bhayā bhīto adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, abhāsitaṃ alapitaṃ tathāgatena bhāsitaṃ lapitaṃ tathāgatenāti dīpeti, bhāsitaṃ lapitaṃ tathāgatena abhāsitaṃ alapitaṃ tathāgatenāti dīpeti, anāciṇṇaṃ tathāgatena āciṇṇaṃ tathāgatenāti dīpeti, āciṇṇaṃ tathāgatena anāciṇṇaṃ tathāgatenāti dīpeti, apaññattaṃ tathāgatena paññattaṃ tathāgatenāti dīpeti, paññattaṃ tathāgatena apaññattaṃ tathāgatenāti dīpeti, anāpattiṃ āpattīti dīpeti, āpattiṃ anāpattīti dīpeti, lahukaṃ āpattiṃ garukā āpattīti dīpeti, garukaṃ āpattiṃ lahukā āpattīti dīpeti, sāvasesaṃ āpattiṃ anavasesā āpattīti dīpeti, anavasesaṃ āpattiṃ sāvasesā āpattīti dīpeti, duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi bhayāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi bhayāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Bhayāgatiṃ gacchanto evaṃ bhayāgatiṃ gacchati.
ছন্দা দোসা ভযা মোহা, যো ধম্মং অতিৰত্ততি।
Chandā dosā bhayā mohā, yo dhammaṃ ativattati;
নিহীযতি তস্স যসো, কাল়পক্খেৰ চন্দিমাতি॥
Nihīyati tassa yaso, kāḷapakkheva candimāti.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অগতিঅগন্তব্বৰণ্ণনা • Agatiagantabbavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰোহরন্তেন জানিতব্বাদিৰণ্ণনা • Voharantena jānitabbādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / অগতিঅগন্তব্বৰণ্ণনা • Agatiagantabbavaṇṇanā
