| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. අගතිඅගන්‌තබ්‌බො
2. Agatiagantabbo
379. න ඡන්‌දාගති ගන්‌තබ්‌බාති ඡන්‌දාගතිං ගච්‌ඡන්‌තො කථං ඡන්‌දාගතිං ගච්‌ඡති? ඉධෙකච්‌චො – ‘‘අයං මෙ උපජ්‌ඣායො වා ආචරියො වා සද්‌ධිවිහාරිකො වා අන්‌තෙවාසිකො වා සමානුපජ්‌ඣායකො වා සමානාචරියකො වා සන්‌දිට්‌ඨො වා සම්‌භත්‌තො වා ඤාතිසාලොහිතො වා’’ති, තස්‌සානුකම්‌පාය තස්‌සානුරක්‌ඛාය අධම්‌මං ධම්‌මොති දීපෙති, ධම්‌මං අධම්‌මොති දීපෙති, අවිනයං විනයොති දීපෙති, විනයං අවිනයොති දීපෙති, අභාසිතං අලපිතං තථාගතෙන භාසිතං ලපිතං තථාගතෙනාති දීපෙති, භාසිතං ලපිතං තථාගතෙන අභාසිතං අලපිතං තථාගතෙනාති දීපෙති, අනාචිණ්‌ණං තථාගතෙන ආචිණ්‌ණං තථාගතෙනාති දීපෙති, ආචිණ්‌ණං තථාගතෙන අනාචිණ්‌ණං තථාගතෙනාති දීපෙති, අපඤ්‌ඤත්‌තං තථාගතෙන පඤ්‌ඤත්‌තං තථාගතෙනාති දීපෙති, පඤ්‌ඤත්‌තං තථාගතෙන අපඤ්‌ඤත්‌තං තථාගතෙනාති දීපෙති, අනාපත්‌තිං ආපත්‌තීති දීපෙති, ආපත්‌තිං අනාපත්‌තීති දීපෙති, ලහුකං ආපත්‌තිං ගරුකා ආපත්‌තීති දීපෙති, ගරුකං ආපත්‌තිං ලහුකා ආපත්‌තීති දීපෙති, සාවසෙසං ආපත්‌තිං අනවසෙසා ආපත්‌තීති දීපෙති, අනවසෙසං ආපත්‌තිං සාවසෙසා ආපත්‌තීති දීපෙති, දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. ඉමෙහි අට්‌ඨාරසහි වත්‌ථූහි ඡන්‌දාගතිං ගච්‌ඡන්‌තො බහුජනාහිතාය පටිපන්‌නො හොති බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. ඉමෙහි අට්‌ඨාරසහි වත්‌ථූහි ඡන්‌දාගතිං ගච්‌ඡන්‌තො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවති. ඡන්‌දාගතිං ගච්‌ඡන්‌තො එවං ඡන්‌දාගතිං ගච්‌ඡති.
379.Na chandāgati gantabbāti chandāgatiṃ gacchanto kathaṃ chandāgatiṃ gacchati? Idhekacco – ‘‘ayaṃ me upajjhāyo vā ācariyo vā saddhivihāriko vā antevāsiko vā samānupajjhāyako vā samānācariyako vā sandiṭṭho vā sambhatto vā ñātisālohito vā’’ti, tassānukampāya tassānurakkhāya adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, abhāsitaṃ alapitaṃ tathāgatena bhāsitaṃ lapitaṃ tathāgatenāti dīpeti, bhāsitaṃ lapitaṃ tathāgatena abhāsitaṃ alapitaṃ tathāgatenāti dīpeti, anāciṇṇaṃ tathāgatena āciṇṇaṃ tathāgatenāti dīpeti, āciṇṇaṃ tathāgatena anāciṇṇaṃ tathāgatenāti dīpeti, apaññattaṃ tathāgatena paññattaṃ tathāgatenāti dīpeti, paññattaṃ tathāgatena apaññattaṃ tathāgatenāti dīpeti, anāpattiṃ āpattīti dīpeti, āpattiṃ anāpattīti dīpeti, lahukaṃ āpattiṃ garukā āpattīti dīpeti, garukaṃ āpattiṃ lahukā āpattīti dīpeti, sāvasesaṃ āpattiṃ anavasesā āpattīti dīpeti, anavasesaṃ āpattiṃ sāvasesā āpattīti dīpeti, duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi chandāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi chandāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Chandāgatiṃ gacchanto evaṃ chandāgatiṃ gacchati.
380. න දොසාගති ගන්‌තබ්‌බාති දොසාගතිං ගච්‌ඡන්‌තො කථං දොසාගතිං ගච්‌ඡති? ඉධෙකච්‌චො අනත්‌ථං මෙ අචරීති ආඝාතං බන්‌ධති, අනත්‌ථං මෙ චරතීති ආඝාතං බන්‌ධති, අනත්‌ථං මෙ චරිස්‌සතීති ආඝාතං බන්‌ධති, පියස්‌ස මෙ මනාපස්‌ස අනත්‌ථං අචරි… අනත්‌ථං චරති… අනත්‌ථං චරිස්‌සතීති ආඝාතං බන්‌ධති, අප්‌පියස්‌ස මෙ අමනාපස්‌ස අත්‌ථං අචරි… අත්‌ථං චරති… අත්‌ථං චරිස්‌සතීති ආඝාතං බන්‌ධති. ඉමෙහි නවහි ආඝාතවත්‌ථූහි ආඝාතො පටිඝාතො කුද්‌ධො කොධාභිභූතො අධම්‌මං ධම්‌මොති දීපෙති, ධම්‌මං අධම්‌මොති දීපෙති…පෙ.… දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. ඉමෙහි අට්‌ඨාරසහි වත්‌ථූහි දොසාගතිං ගච්‌ඡන්‌තො බහුජනාහිතාය පටිපන්‌නො හොති බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. ඉමෙහි අට්‌ඨාරසහි වත්‌ථූහි දොසාගතිං ගච්‌ඡන්‌තො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං බහුඤ්‌ච අපුඤ්‌ඤං පසවති. දොසාගතිං ගච්‌ඡන්‌තො එවං දොසාගතිං ගච්‌ඡති.
380.Na dosāgati gantabbāti dosāgatiṃ gacchanto kathaṃ dosāgatiṃ gacchati? Idhekacco anatthaṃ me acarīti āghātaṃ bandhati, anatthaṃ me caratīti āghātaṃ bandhati, anatthaṃ me carissatīti āghātaṃ bandhati, piyassa me manāpassa anatthaṃ acari… anatthaṃ carati… anatthaṃ carissatīti āghātaṃ bandhati, appiyassa me amanāpassa atthaṃ acari… atthaṃ carati… atthaṃ carissatīti āghātaṃ bandhati. Imehi navahi āghātavatthūhi āghāto paṭighāto kuddho kodhābhibhūto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi dosāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi dosāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ bahuñca apuññaṃ pasavati. Dosāgatiṃ gacchanto evaṃ dosāgatiṃ gacchati.
381. න මොහාගති ගන්‌තබ්‌බාති මොහාගතිං ගච්‌ඡන්‌තො කථං මොහාගතිං ගච්‌ඡති? රත්‌තො රාගවසෙන ගච්‌ඡති, දුට්‌ඨො දොසවසෙන ගච්‌ඡති, මූළ්‌හො මොහවසෙන ගච්‌ඡති, පරාමට්‌ඨො දිට්‌ඨිවසෙන ගච්‌ඡති, මූළ්‌හො සංමූළ්‌හො මොහාභිභූතො අධම්‌මං ධම්‌මොති දීපෙති, ධම්‌මං අධම්‌මොති දීපෙති…පෙ.… දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. ඉමෙහි අට්‌ඨාරසහි වත්‌ථූහි මොහාගතිං ගච්‌ඡන්‌තො බහුජනාහිතාය පටිපන්‌නො හොති බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. ඉමෙහි අට්‌ඨාරසහි වත්‌ථූහි මොහාගතිං ගච්‌ඡන්‌තො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවති. මොහාගතිං ගච්‌ඡන්‌තො එවං මොහාගතිං ගච්‌ඡති.
381.Na mohāgati gantabbāti mohāgatiṃ gacchanto kathaṃ mohāgatiṃ gacchati? Ratto rāgavasena gacchati, duṭṭho dosavasena gacchati, mūḷho mohavasena gacchati, parāmaṭṭho diṭṭhivasena gacchati, mūḷho saṃmūḷho mohābhibhūto adhammaṃ dhammoti dīpeti, dhammaṃ adhammoti dīpeti…pe… duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi mohāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi mohāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Mohāgatiṃ gacchanto evaṃ mohāgatiṃ gacchati.
382. න භයාගති ගන්‌තබ්‌බාති භයාගතිං ගච්‌ඡන්‌තො කථං භයාගතිං ගච්‌ඡති? ඉධෙකච්‌චො – ‘‘අයං විසමනිස්‌සිතො වා ගහනනිස්‌සිතො වා බලවනිස්‌සිතො වා කක්‌ඛළො ඵරුසො ජීවිතන්‌තරායං වා බ්‍රහ්‌මචරියන්‌තරායං වා කරිස්‌සතී’’ති, තස්‌ස භයා භීතො අධම්‌මං ධම්‌මොති දීපෙති, ධම්‌මං අධම්‌මොති දීපෙති, අවිනයං විනයොති දීපෙති, විනයං අවිනයොති දීපෙති, අභාසිතං අලපිතං තථාගතෙන භාසිතං ලපිතං තථාගතෙනාති දීපෙති, භාසිතං ලපිතං තථාගතෙන අභාසිතං අලපිතං තථාගතෙනාති දීපෙති, අනාචිණ්‌ණං තථාගතෙන ආචිණ්‌ණං තථාගතෙනාති දීපෙති, ආචිණ්‌ණං තථාගතෙන අනාචිණ්‌ණං තථාගතෙනාති දීපෙති, අපඤ්‌ඤත්‌තං තථාගතෙන පඤ්‌ඤත්‌තං තථාගතෙනාති දීපෙති, පඤ්‌ඤත්‌තං තථාගතෙන අපඤ්‌ඤත්‌තං තථාගතෙනාති දීපෙති, අනාපත්‌තිං ආපත්‌තීති දීපෙති, ආපත්‌තිං අනාපත්‌තීති දීපෙති, ලහුකං ආපත්‌තිං ගරුකා ආපත්‌තීති දීපෙති, ගරුකං ආපත්‌තිං ලහුකා ආපත්‌තීති දීපෙති, සාවසෙසං ආපත්‌තිං අනවසෙසා ආපත්‌තීති දීපෙති, අනවසෙසං ආපත්‌තිං සාවසෙසා ආපත්‌තීති දීපෙති, දුට්‌ඨුල්‌ලං ආපත්‌තිං අදුට්‌ඨුල්‌ලා ආපත්‌තීති දීපෙති, අදුට්‌ඨුල්‌ලං ආපත්‌තිං දුට්‌ඨුල්‌ලා ආපත්‌තීති දීපෙති. ඉමෙහි අට්‌ඨාරසහි වත්‌ථූහි භයාගතිං ගච්‌ඡන්‌තො බහුජනාහිතාය පටිපන්‌නො හොති බහුජනාසුඛාය බහුනො ජනස්‌ස අනත්‌ථාය අහිතාය දුක්‌ඛාය දෙවමනුස්‌සානං. ඉමෙහි අට්‌ඨාරසහි වත්‌ථූහි භයාගතිං ගච්‌ඡන්‌තො ඛතං උපහතං අත්‌තානං පරිහරති, සාවජ්‌ජො ච හොති සානුවජ්‌ජො ච විඤ්‌ඤූනං, බහුඤ්‌ච අපුඤ්‌ඤං පසවති. භයාගතිං ගච්‌ඡන්‌තො එවං භයාගතිං ගච්‌ඡති.
382.Na bhayāgati gantabbāti bhayāgatiṃ gacchanto kathaṃ bhayāgatiṃ gacchati? Idhekacco – ‘‘ayaṃ visamanissito vā gahananissito vā balavanissito vā kakkhaḷo pharuso jīvitantarāyaṃ vā brahmacariyantarāyaṃ vā karissatī’’ti, tassa bhayā bhīto adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, abhāsitaṃ alapitaṃ tathāgatena bhāsitaṃ lapitaṃ tathāgatenāti dīpeti, bhāsitaṃ lapitaṃ tathāgatena abhāsitaṃ alapitaṃ tathāgatenāti dīpeti, anāciṇṇaṃ tathāgatena āciṇṇaṃ tathāgatenāti dīpeti, āciṇṇaṃ tathāgatena anāciṇṇaṃ tathāgatenāti dīpeti, apaññattaṃ tathāgatena paññattaṃ tathāgatenāti dīpeti, paññattaṃ tathāgatena apaññattaṃ tathāgatenāti dīpeti, anāpattiṃ āpattīti dīpeti, āpattiṃ anāpattīti dīpeti, lahukaṃ āpattiṃ garukā āpattīti dīpeti, garukaṃ āpattiṃ lahukā āpattīti dīpeti, sāvasesaṃ āpattiṃ anavasesā āpattīti dīpeti, anavasesaṃ āpattiṃ sāvasesā āpattīti dīpeti, duṭṭhullaṃ āpattiṃ aduṭṭhullā āpattīti dīpeti, aduṭṭhullaṃ āpattiṃ duṭṭhullā āpattīti dīpeti. Imehi aṭṭhārasahi vatthūhi bhayāgatiṃ gacchanto bahujanāhitāya paṭipanno hoti bahujanāsukhāya bahuno janassa anatthāya ahitāya dukkhāya devamanussānaṃ. Imehi aṭṭhārasahi vatthūhi bhayāgatiṃ gacchanto khataṃ upahataṃ attānaṃ pariharati, sāvajjo ca hoti sānuvajjo ca viññūnaṃ, bahuñca apuññaṃ pasavati. Bhayāgatiṃ gacchanto evaṃ bhayāgatiṃ gacchati.
ඡන්‌දා දොසා භයා මොහා, යො ධම්‌මං අතිවත්‌තති;
Chandā dosā bhayā mohā, yo dhammaṃ ativattati;
නිහීයති තස්‌ස යසො, කාළපක්‌ඛෙව චන්‌දිමාති.
Nihīyati tassa yaso, kāḷapakkheva candimāti.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / පරිවාර-අට්‌ඨකථා • Parivāra-aṭṭhakathā / අගතිඅගන්‌තබ්‌බවණ්‌ණනා • Agatiagantabbavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වොහරන්‌තෙන ජානිතබ්‌බාදිවණ්‌ණනා • Voharantena jānitabbādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / අගතිඅගන්‌තබ්‌බවණ්‌ණනා • Agatiagantabbavaṇṇanā
