| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༩. ཨགྒགྒསམཎཔཉྷོ
9. Aggaggasamaṇapañho
༩. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ ‘ཨཱསཝཱནཾ ཁཡཱ སམཎོ ཧོཏཱི’ཏི། པུན ཙ བྷཎིཏཾ –
9. ‘‘Bhante nāgasena, bhāsitampetaṃ bhagavatā ‘āsavānaṃ khayā samaṇo hotī’ti. Puna ca bhaṇitaṃ –
‘‘‘ཙཏུབྦྷི དྷམྨེཧི སམངྒིབྷཱུཏཾ, ཏཾ ཝེ ནརཾ སམཎཾ ཨཱཧུ ལོཀེ’ཏི༎
‘‘‘Catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti.
ཏཏྲིམེ ཙཏྟཱརོ དྷམྨཱ ཁནྟི ཨཔྤཱཧཱརཏཱ རཏིཝིཔྤཧཱནཾ ཨཱཀིཉྩཉྙཾ། སབྦཱནི པནེཏཱནི ཨཔརིཀྑཱིཎཱསཝསྶ སཀིལེསསྶེཝ ཧོནྟི། ཡདི, བྷནྟེ ནཱགསེན, ཨཱསཝཱནཾ ཁཡཱ སམཎོ ཧོཏི, ཏེན ཧི ‘ཙཏུབྦྷི དྷམྨེཧི སམངྒིབྷཱུཏཾ, ཏཾ ཝེ ནརཾ སམཎཾ ཨཱཧུ ལོཀེ’ཏི ཡཾ ཝཙནཾ, ཏཾ མིཙྪཱ། ཡདི ཙཏུབྦྷི དྷམྨེཧི སམངྒིབྷཱུཏོ སམཎོ ཧོཏི, ཏེན ཧི ‘ཨཱསཝཱནཾ ཁཡཱ སམཎོ ཧོཏཱི’ཏི ཏམྤི ཝཙནཾ མིཙྪཱ, ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
Tatrime cattāro dhammā khanti appāhāratā rativippahānaṃ ākiñcaññaṃ. Sabbāni panetāni aparikkhīṇāsavassa sakilesasseva honti. Yadi, bhante nāgasena, āsavānaṃ khayā samaṇo hoti, tena hi ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti yaṃ vacanaṃ, taṃ micchā. Yadi catubbhi dhammehi samaṅgibhūto samaṇo hoti, tena hi ‘āsavānaṃ khayā samaṇo hotī’ti tampi vacanaṃ micchā, ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ཨཱསཝཱནཾ ཁཡཱ སམཎོ ཧོཏཱི’ཏི། པུན ཙ བྷཎིཏཾ ‘ཙཏུབྦྷི དྷམྨེཧི སམངྒིབྷཱུཏཾ, ཏཾ ཝེ ནརཾ སམཎཾ ཨཱཧུ ལོཀེ’ཏི། ཏདིདཾ, མཧཱརཱཛ, ཝཙནཾ ཏེསཾ ཏེསཾ པུགྒལཱནཾ གུཎཝསེན བྷཎིཏཾ ‘ཙཏུབྦྷི དྷམྨེཧི སམངྒིབྷཱུཏཾ, ཏཾ ཝེ ནརཾ སམཎཾ ཨཱཧུ ལོཀེ’ཏི, ཨིདཾ པན ནིརཝསེསཝཙནཾ ‘ཨཱསཝཱནཾ ཁཡཱ སམཎོ ཧོཏཱི’ཏི།
‘‘Bhāsitampetaṃ, mahārāja, bhagavatā ‘āsavānaṃ khayā samaṇo hotī’ti. Puna ca bhaṇitaṃ ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti. Tadidaṃ, mahārāja, vacanaṃ tesaṃ tesaṃ puggalānaṃ guṇavasena bhaṇitaṃ ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti, idaṃ pana niravasesavacanaṃ ‘āsavānaṃ khayā samaṇo hotī’ti.
‘‘ཨཔི ཙ, མཧཱརཱཛ, ཡེ ཀེཙི ཀིལེསཱུཔསམཱཡ པཊིཔནྣཱ, ཏེ སབྦེ ཨུཔཱདཱཡུཔཱདཱཡ སམཎོ ཁཱིཎཱསཝོ ཨགྒམཀྑཱཡཏི། ཡཐཱ, མཧཱརཱཛ, ཡཱནི ཀཱནིཙི ཛལཛཐལཛཔུཔྥཱནི, ཝསྶིཀཾ ཏེསཾ ཨགྒམཀྑཱཡཏི, ཨཝསེསཱནི ཡཱནི ཀཱནིཙི ཝིཝིདྷཱནི པུཔྥཛཱཏཱནི, སབྦཱནི ཏཱནི པུཔྥཱནི ཡེཝ, ཨུཔཱདཱཡུཔཱདཱཡ པན ཝསྶིཀཾ ཡེཝ པུཔྥཾ ཛནསྶ པཏྠིཏཾ པིཧཡིཏཾ། ཨེཝམེཝ ཁོ, མཧཱརཱཛ, ཡེ ཀེཙི ཀིལེསཱུཔསམཱཡ པཊིཔནྣཱ, ཏེ སབྦེ ཨུཔཱདཱཡུཔཱདཱཡ སམཎོ ཁཱིཎཱསཝོ ཨགྒམཀྑཱཡཏི།
‘‘Api ca, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati. Yathā, mahārāja, yāni kānici jalajathalajapupphāni, vassikaṃ tesaṃ aggamakkhāyati, avasesāni yāni kānici vividhāni pupphajātāni, sabbāni tāni pupphāni yeva, upādāyupādāya pana vassikaṃ yeva pupphaṃ janassa patthitaṃ pihayitaṃ. Evameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati.
‘‘ཡཐཱ ཝཱ པན, མཧཱརཱཛ, སབྦདྷཉྙཱནཾ སཱལི ཨགྒམཀྑཱཡཏི, ཡཱ ཀཱཙི ཨཝསེསཱ ཝིཝིདྷཱ དྷཉྙཛཱཏིཡོ, ཏཱ སབྦཱ ཨུཔཱདཱཡུཔཱདཱཡ བྷོཛནཱནི སརཱིརཡཱཔནཱཡ, སཱལི ཡེཝ ཏེསཾ ཨགྒམཀྑཱཡཏི། ཨེཝམེཝ ཁོ, མཧཱརཱཛ, ཡེ ཀེཙི ཀིལེསཱུཔསམཱཡ པཊིཔནྣཱ, ཏེ སབྦེ ཨུཔཱདཱཡུཔཱདཱཡ སམཎོ ཁཱིཎཱསཝོ ཨགྒམཀྑཱཡཏཱི’’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Yathā vā pana, mahārāja, sabbadhaññānaṃ sāli aggamakkhāyati, yā kāci avasesā vividhā dhaññajātiyo, tā sabbā upādāyupādāya bhojanāni sarīrayāpanāya, sāli yeva tesaṃ aggamakkhāyati. Evameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyatī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ཨགྒགྒསམཎཔཉྷོ ནཝམོ།
Aggaggasamaṇapañho navamo.
