| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੯. ਅਗ੍ਗਗ੍ਗਸਮਣਪਞ੍ਹੋ
9. Aggaggasamaṇapañho
੯. ‘‘ਭਨ੍ਤੇ ਨਾਗਸੇਨ, ਭਾਸਿਤਮ੍ਪੇਤਂ ਭਗવਤਾ ‘ਆਸવਾਨਂ ਖਯਾ ਸਮਣੋ ਹੋਤੀ’ਤਿ। ਪੁਨ ਚ ਭਣਿਤਂ –
9. ‘‘Bhante nāgasena, bhāsitampetaṃ bhagavatā ‘āsavānaṃ khayā samaṇo hotī’ti. Puna ca bhaṇitaṃ –
‘‘‘ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤਂ, ਤਂ વੇ ਨਰਂ ਸਮਣਂ ਆਹੁ ਲੋਕੇ’ਤਿ॥
‘‘‘Catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti.
ਤਤ੍ਰਿਮੇ ਚਤ੍ਤਾਰੋ ਧਮ੍ਮਾ ਖਨ੍ਤਿ ਅਪ੍ਪਾਹਾਰਤਾ ਰਤਿવਿਪ੍ਪਹਾਨਂ ਆਕਿਞ੍ਚਞ੍ਞਂ। ਸਬ੍ਬਾਨਿ ਪਨੇਤਾਨਿ ਅਪਰਿਕ੍ਖੀਣਾਸવਸ੍ਸ ਸਕਿਲੇਸਸ੍ਸੇવ ਹੋਨ੍ਤਿ। ਯਦਿ, ਭਨ੍ਤੇ ਨਾਗਸੇਨ, ਆਸવਾਨਂ ਖਯਾ ਸਮਣੋ ਹੋਤਿ, ਤੇਨ ਹਿ ‘ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤਂ, ਤਂ વੇ ਨਰਂ ਸਮਣਂ ਆਹੁ ਲੋਕੇ’ਤਿ ਯਂ વਚਨਂ, ਤਂ ਮਿਚ੍ਛਾ। ਯਦਿ ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤੋ ਸਮਣੋ ਹੋਤਿ, ਤੇਨ ਹਿ ‘ਆਸવਾਨਂ ਖਯਾ ਸਮਣੋ ਹੋਤੀ’ਤਿ ਤਮ੍ਪਿ વਚਨਂ ਮਿਚ੍ਛਾ, ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤવਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ।
Tatrime cattāro dhammā khanti appāhāratā rativippahānaṃ ākiñcaññaṃ. Sabbāni panetāni aparikkhīṇāsavassa sakilesasseva honti. Yadi, bhante nāgasena, āsavānaṃ khayā samaṇo hoti, tena hi ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti yaṃ vacanaṃ, taṃ micchā. Yadi catubbhi dhammehi samaṅgibhūto samaṇo hoti, tena hi ‘āsavānaṃ khayā samaṇo hotī’ti tampi vacanaṃ micchā, ayampi ubhato koṭiko pañho tavānuppatto, so tayā nibbāhitabbo’’ti.
‘‘ਭਾਸਿਤਮ੍ਪੇਤਂ, ਮਹਾਰਾਜ, ਭਗવਤਾ ‘ਆਸવਾਨਂ ਖਯਾ ਸਮਣੋ ਹੋਤੀ’ਤਿ। ਪੁਨ ਚ ਭਣਿਤਂ ‘ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤਂ, ਤਂ વੇ ਨਰਂ ਸਮਣਂ ਆਹੁ ਲੋਕੇ’ਤਿ। ਤਦਿਦਂ, ਮਹਾਰਾਜ, વਚਨਂ ਤੇਸਂ ਤੇਸਂ ਪੁਗ੍ਗਲਾਨਂ ਗੁਣવਸੇਨ ਭਣਿਤਂ ‘ਚਤੁਬ੍ਭਿ ਧਮ੍ਮੇਹਿ ਸਮਙ੍ਗਿਭੂਤਂ, ਤਂ વੇ ਨਰਂ ਸਮਣਂ ਆਹੁ ਲੋਕੇ’ਤਿ, ਇਦਂ ਪਨ ਨਿਰવਸੇਸવਚਨਂ ‘ਆਸવਾਨਂ ਖਯਾ ਸਮਣੋ ਹੋਤੀ’ਤਿ।
‘‘Bhāsitampetaṃ, mahārāja, bhagavatā ‘āsavānaṃ khayā samaṇo hotī’ti. Puna ca bhaṇitaṃ ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti. Tadidaṃ, mahārāja, vacanaṃ tesaṃ tesaṃ puggalānaṃ guṇavasena bhaṇitaṃ ‘catubbhi dhammehi samaṅgibhūtaṃ, taṃ ve naraṃ samaṇaṃ āhu loke’ti, idaṃ pana niravasesavacanaṃ ‘āsavānaṃ khayā samaṇo hotī’ti.
‘‘ਅਪਿ ਚ, ਮਹਾਰਾਜ, ਯੇ ਕੇਚਿ ਕਿਲੇਸੂਪਸਮਾਯ ਪਟਿਪਨ੍ਨਾ, ਤੇ ਸਬ੍ਬੇ ਉਪਾਦਾਯੁਪਾਦਾਯ ਸਮਣੋ ਖੀਣਾਸવੋ ਅਗ੍ਗਮਕ੍ਖਾਯਤਿ। ਯਥਾ, ਮਹਾਰਾਜ, ਯਾਨਿ ਕਾਨਿਚਿ ਜਲਜਥਲਜਪੁਪ੍ਫਾਨਿ, વਸ੍ਸਿਕਂ ਤੇਸਂ ਅਗ੍ਗਮਕ੍ਖਾਯਤਿ, ਅવਸੇਸਾਨਿ ਯਾਨਿ ਕਾਨਿਚਿ વਿવਿਧਾਨਿ ਪੁਪ੍ਫਜਾਤਾਨਿ, ਸਬ੍ਬਾਨਿ ਤਾਨਿ ਪੁਪ੍ਫਾਨਿ ਯੇવ, ਉਪਾਦਾਯੁਪਾਦਾਯ ਪਨ વਸ੍ਸਿਕਂ ਯੇવ ਪੁਪ੍ਫਂ ਜਨਸ੍ਸ ਪਤ੍ਥਿਤਂ ਪਿਹਯਿਤਂ। ਏવਮੇવ ਖੋ, ਮਹਾਰਾਜ, ਯੇ ਕੇਚਿ ਕਿਲੇਸੂਪਸਮਾਯ ਪਟਿਪਨ੍ਨਾ, ਤੇ ਸਬ੍ਬੇ ਉਪਾਦਾਯੁਪਾਦਾਯ ਸਮਣੋ ਖੀਣਾਸવੋ ਅਗ੍ਗਮਕ੍ਖਾਯਤਿ।
‘‘Api ca, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati. Yathā, mahārāja, yāni kānici jalajathalajapupphāni, vassikaṃ tesaṃ aggamakkhāyati, avasesāni yāni kānici vividhāni pupphajātāni, sabbāni tāni pupphāni yeva, upādāyupādāya pana vassikaṃ yeva pupphaṃ janassa patthitaṃ pihayitaṃ. Evameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyati.
‘‘ਯਥਾ વਾ ਪਨ, ਮਹਾਰਾਜ, ਸਬ੍ਬਧਞ੍ਞਾਨਂ ਸਾਲਿ ਅਗ੍ਗਮਕ੍ਖਾਯਤਿ, ਯਾ ਕਾਚਿ ਅવਸੇਸਾ વਿવਿਧਾ ਧਞ੍ਞਜਾਤਿਯੋ, ਤਾ ਸਬ੍ਬਾ ਉਪਾਦਾਯੁਪਾਦਾਯ ਭੋਜਨਾਨਿ ਸਰੀਰਯਾਪਨਾਯ, ਸਾਲਿ ਯੇવ ਤੇਸਂ ਅਗ੍ਗਮਕ੍ਖਾਯਤਿ। ਏવਮੇવ ਖੋ, ਮਹਾਰਾਜ, ਯੇ ਕੇਚਿ ਕਿਲੇਸੂਪਸਮਾਯ ਪਟਿਪਨ੍ਨਾ, ਤੇ ਸਬ੍ਬੇ ਉਪਾਦਾਯੁਪਾਦਾਯ ਸਮਣੋ ਖੀਣਾਸવੋ ਅਗ੍ਗਮਕ੍ਖਾਯਤੀ’’ਤਿ। ‘‘ਸਾਧੁ, ਭਨ੍ਤੇ ਨਾਗਸੇਨ, ਏવਮੇਤਂ ਤਥਾ ਸਮ੍ਪਟਿਚ੍ਛਾਮੀ’’ਤਿ।
‘‘Yathā vā pana, mahārāja, sabbadhaññānaṃ sāli aggamakkhāyati, yā kāci avasesā vividhā dhaññajātiyo, tā sabbā upādāyupādāya bhojanāni sarīrayāpanāya, sāli yeva tesaṃ aggamakkhāyati. Evameva kho, mahārāja, ye keci kilesūpasamāya paṭipannā, te sabbe upādāyupādāya samaṇo khīṇāsavo aggamakkhāyatī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ਅਗ੍ਗਗ੍ਗਸਮਣਪਞ੍ਹੋ ਨવਮੋ।
Aggaggasamaṇapañho navamo.
