| Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā) |
༤. ཨགྒཉྙསུཏྟཝཎྞནཱ
4. Aggaññasuttavaṇṇanā
ཝཱསེཊྛབྷཱརདྭཱཛཝཎྞནཱ
Vāseṭṭhabhāradvājavaṇṇanā
༡༡༡. ཨེཏྠཱཏི ‘‘པུབྦཱརཱམེ, མིགཱརམཱཏུཔཱསཱདེ’’ཏི ཨེཏསྨིཾ པདདྭཡེ། ཀོཡཾ པུབྦཱརཱམོ, ཀཐཉྩ པུབྦཱརཱམོ, ཀཱ ཙ མིགཱརམཱཏཱ, ཀཐཉྩསྶཱ པཱསཱདོ ཨཧོསཱིཏི ཨེཏསྨིཾ ཨནྟོལཱིནེ ཨནུཡོགེ། ཨཡཾ ཨིདཱནི ཝུཙྩམཱནཱ ཨནུཔུབྦིཀཐཱ ཨཱདིཏོ པཊྛཱཡ སངྑེཔེནེཝ ཨནུཔུབྦིཀཐཱ། པདུམུཏྟརཾ བྷགཝནྟཾ ཨེཀཾ ཨུཔཱསིཀཾ ཨགྒུཔཊྛཱཡིཀཊྛཱནེ ཋཔེནྟིཾ དིསྭཱན ཏཏྠ སཉྫཱཏགཱརཝབཧུམཱནཱ ཏམེཝཏྠཾ པུརཀྑཏྭཱ བྷགཝནྟཾ ནིམནྟེཏྭཱ། མེཎྜཀཔུཏྟསྶཱཏི མེཎྜཀསེཊྛིཔུཏྟསྶ། སོཏཱཔནྣཱ ཨཧོསི ཏཐཱ ཀཏཱདྷིཀཱརཏྟཱ།
111.Etthāti ‘‘pubbārāme, migāramātupāsāde’’ti etasmiṃ padadvaye. Koyaṃ pubbārāmo, kathañca pubbārāmo, kā ca migāramātā, kathañcassā pāsādo ahosīti etasmiṃ antolīne anuyoge. Ayaṃ idāni vuccamānā anupubbikathā ādito paṭṭhāya saṅkhepeneva anupubbikathā. Padumuttaraṃ bhagavantaṃ ekaṃ upāsikaṃ aggupaṭṭhāyikaṭṭhāne ṭhapentiṃ disvāna tattha sañjātagāravabahumānā tamevatthaṃ purakkhatvā bhagavantaṃ nimantetvā. Meṇḍakaputtassāti meṇḍakaseṭṭhiputtassa. Sotāpannā ahosi tathā katādhikārattā.
མཱཏུཊྛཱནེ ཋཔེསི ཨཏྟནོ སཱིལཱཙཱརསམྤཏྟིཡཱ གརུཊྛཱནིཡཏྟཱ། ཨུཔཡོགནྟི ཏཏྠ ཏཏྠ ཨཔྤེཏབྦཊྛཱནེ ཨཔྤནཱཝསེན ཝིནིཡོགཾ ཨགམཾསུ། ཨཉྙེཧི ཙ ཝེལུ༹རིཡལོཧིཏངྐམསཱརགལླཱདཱིཧི། བྷསྶཏཱིཏི ཨོཏརཏི། སུདྡྷཔཱསཱདོཝ ན སོབྷཏཱིཏི ཀེཝལོ ཨེཀཔཱསཱདོ ཨེཝ ཝིཧཱརོ ན སོབྷཏི། ནིཡཱུཧཱནི བཧཱུནི ནཱིཧརིཏྭཱ ཀཏྟབྦསེནཱསནཱནི ‘‘དུཝཌྜྷགེཧཱནཱི’’ཏི ཝདནྟི། མཛ྄ཛྷེ གབྦྷོ སམནྟཏོ ཨནུཔརིཡཱཡཏོཏི ཨེཝཾ དྭིཀྑཏྟུཾ ཝཌྜྷེཏྭཱ ཀཏསེནཱསནཱནི དུཝཌྜྷགེཧཱནི། ཙཱུལ༹པཱསཱདཱཏི ཁུདྡཀཔཱསཱདཱ།
Mātuṭṭhāne ṭhapesi attano sīlācārasampattiyā garuṭṭhāniyattā. Upayoganti tattha tattha appetabbaṭṭhāne appanāvasena viniyogaṃ agamaṃsu. Aññehi ca veḷuriyalohitaṅkamasāragallādīhi. Bhassatīti otarati. Suddhapāsādova na sobhatīti kevalo ekapāsādo eva vihāro na sobhati. Niyūhāni bahūni nīharitvā kattabbasenāsanāni ‘‘duvaḍḍhagehānī’’ti vadanti. Majjhe gabbho samantato anupariyāyatoti evaṃ dvikkhattuṃ vaḍḍhetvā katasenāsanāni duvaḍḍhagehāni. Cūḷapāsādāti khuddakapāsādā.
ཨུཏྟརདེཝཱིཝིཧཱརོ ནཱམ ནགརསྶ པཱཙཱིནདྭཱརསམཱིཔེ ཀཏཝིཧཱརོ།
Uttaradevīvihāro nāma nagarassa pācīnadvārasamīpe katavihāro.
ཏིཏྠིཡལིངྒསྶ ཨགྒཧིཏཏྟཱ ནེཝ ཏིཏྠིཡཔརིཝཱསཾ ཝསནྟི། ཨནུཔསམྤནྣབྷཱཝཏོ ཨཱཔཏྟིཡཱ ཨཱཔནྣཱཡ ཨབྷཱཝཏོ ན ཨཱཔཏྟིཔརིཝཱསཾ ཝསནྟི། བྷིཀྑུབྷཱཝནྟི ཨུཔསམྤདཾ། ཏེཝིཛྫསུཏྟནྟི ཨིམསྨིཾ དཱིགྷནིཀཱཡེ ཏེཝིཛྫསུཏྟཾ སུཏྭཱ།
Titthiyaliṅgassa aggahitattā neva titthiyaparivāsaṃ vasanti. Anupasampannabhāvato āpattiyā āpannāya abhāvato na āpattiparivāsaṃ vasanti. Bhikkhubhāvanti upasampadaṃ. Tevijjasuttanti imasmiṃ dīghanikāye tevijjasuttaṃ sutvā.
༡༡༣. ཨནུཝཏྟམཱནཱ ཙངྐམིཾསུ ཨནནུཙངྐམནེ ཡཐཱདྷིཔྤེཏསྶ ཨཏྠསྶ པུཙྪནཱདཱིནཾ ཨསཀྐུཎེཡྻཏྟཱ། ཏེསནྟི ཏེསཾ དྭིནྣཾ། ཏེནཱཧ ‘‘པཎྜིཏཏརོ’’ཏི། ཨཏྠཱཏི བྷཝཏྠ། ཀུལསམྤནྣཱཏི སམྤནྣཀུལཱ ཨུདིཏོདིཏེ བྲཱཧྨཎཀུལེ ཨུཔྤནྣཱ། བྲཱཧྨཎཀུལཱཏི ཀེནཙི པཱརིཛུཉྙེན ཨནུཔདྡུཏཱ ཨེཝ བྲཱཧྨཎཀུལཱ། ཏེནཱཧ ‘‘བྷོགཱདིསམྤནྣ’’ནྟིཨཱདི། ཨིམེ བྲཱཧྨཎཱ ཨུཙྩཱ ཧུཏྭཱ ‘‘ཨིམཾ ཝསལཾ པབྦཛྫཾ པབྦཛིཾསཱུ’’ཏིཨཱདིནཱ ཛཱཏིཨཱདཱིནི གྷཊྚེནྟཱ ཨཀྐོསནྟི། པརིབྷཱསནྟཱིཏི པརིབྷཝིཏྭཱ བྷཱསནྟི། ཨཏྟནོ ཨནུརཱུཔཱཡཱཏི ཨཏྟནོ ཨཛ྄ཛྷཱསཡསྶ ཨནུརཱུཔཱཡ། ཨནྟརནྟརཱ ཝིཙྪིཛྫ པཝཏྟིཡམཱནཱ པརིབྷཱསཱ པརིཔུཎྞཱ ནཱམ ན ཧོཏི ཁཎྜབྷཱཝཏོ, ཏབྦིཔརིཡཱཡཏོ པརིཔུཎྞཱ ནཱམ ཧོཏཱིཏི ཨཱཧ ‘‘ཨནྟརཱ’’ཏིཨཱདི།
113.Anuvattamānācaṅkamiṃsu ananucaṅkamane yathādhippetassa atthassa pucchanādīnaṃ asakkuṇeyyattā. Tesanti tesaṃ dvinnaṃ. Tenāha ‘‘paṇḍitataro’’ti. Atthāti bhavattha. Kulasampannāti sampannakulā uditodite brāhmaṇakule uppannā. Brāhmaṇakulāti kenaci pārijuññena anupaddutā eva brāhmaṇakulā. Tenāha ‘‘bhogādisampanna’’ntiādi. Ime brāhmaṇā uccā hutvā ‘‘imaṃ vasalaṃ pabbajjaṃ pabbajiṃsū’’tiādinā jātiādīni ghaṭṭentā akkosanti. Paribhāsantīti paribhavitvā bhāsanti. Attano anurūpāyāti attano ajjhāsayassa anurūpāya. Antarantarā vicchijja pavattiyamānā paribhāsā paripuṇṇā nāma na hoti khaṇḍabhāvato, tabbipariyāyato paripuṇṇā nāma hotīti āha ‘‘antarā’’tiādi.
ཨཔྤཏིཊྛཏཱཡཱཏི ཨཔསྶཡརཧིཏཏྟཱ། ཝིབྷིནྣོཏི ཝིནཊྛོ།
Appatiṭṭhatāyāti apassayarahitattā. Vibhinnoti vinaṭṭho.
ཨིཏརེ ཏཡོ ཝཎྞཱཏི ཁཏྟིཡཱདཡོ ཝཎྞཱ ཧཱིནཱ། ནནུ ཁཏྟིཡཱཝ སེཊྛཱ ཝཎྞཱ ཡཐཱ བུདྡྷཱ ཨེཏརཧི ཁཏྟིཡཀུལེ ཨེཝ ཨུཔྤནྣཱཏི? སཙྩམེཏཾ, ཏེ པན ཨཏྟནོ མིཙྪཱབྷིམཱནེན, མིཙྪཱགཱཧེན ཙ ‘‘བྲཱཧྨཎོཝ སེཊྛོ ཝཎྞོ’’ཏི ཝདནྟི, ཏཾ ཏེསཾ ཝཙནམཏྟཾ། ‘‘སུཛ྄ཛྷནྟཱིཏི སུདྡྷཱ ཧོནྟི, ན ནིནྡཾ གརཧཾ པཱཔུཎནྟཱི’’ཏི ཝདནྟི། སུཛ྄ཛྷནྟི ཝཱ སཾསཱརཏོ སུཛ྄ཛྷནྟི, ན སེསཱ ཝཎྞཱ ཨསུཀྐཛཱཏིཀཏྟཱ, མནྟཛ྄ཛྷེནཱབྷཱཝཏོ ཙཱཏི། བྲཧྨུནོ མུཁཏོ ཛཱཏཱ ཝེདཝཙནཏོ ཛཱཏཱཏི མུཁཏོ ཛཱཏཱ། ཏཏོ ཨེཝ བྲཧྨུནོ མཧཱབྲཧྨུནོ ཝེདཝཙནཏོ ཝིཛཱཏཱཏི བྲཧྨཛཱ། ཏེན དུཝིདྷེནཱཔི ནིམྨིཏཱཏི བྲཧྨནིམྨིཏཱ། ཝེདཝེདངྒཱདིབྲཧྨདཱཡཛྫཾ ཨརཧནྟཱིཏི བྲཧྨདཱཡཱདཱ། མུཎྜཀེ སམཎཀེཏི ཨེཏྠ ཀ-ཀཱརོ གརཧཱཡནྟི ཨཱཧ ‘‘ནིནྡནྟཱ ཛིགུཙྪནྟཱ ཝདནྟཱི’’ཏི། ཨིབྦྷེཏི སུདྡེ, ཏེ པན གྷརབནྡྷནེན བདྡྷཱ ནིཧཱིནཏརཱཏི ཨཱཧ ‘‘གཧཔཏིཀེ’’ཏི། ཀཎྷེཏི ཀཎྷཛཱཏིཀེ། བནྡྷནཊྛེན བནྡྷུ, ཀསྶ པན བནྡྷཱུཏི ཨཱཧ ‘‘མཱརསྶ བནྡྷུབྷཱུཏེ’’ཏི། པཱདཱཔཙྩེཏི པཱདཏོ ཛཱཏཱཔཙྩེ། ཨཡཾ ཀིར བྲཱཧྨཎཱནཾ ལདྡྷི ‘‘བྲཱཧྨཎཱ བྲཧྨུནོ མུཁཏོ ཛཱཏཱ, ཁཏྟིཡཱ ཨུརཏོ, ཨཱུརཱུཧི ཝེསྶཱ, པཱདཏོ སུདྡཱ’’ཏི།
Itare tayo vaṇṇāti khattiyādayo vaṇṇā hīnā. Nanu khattiyāva seṭṭhā vaṇṇā yathā buddhā etarahi khattiyakule eva uppannāti? Saccametaṃ, te pana attano micchābhimānena, micchāgāhena ca ‘‘brāhmaṇova seṭṭho vaṇṇo’’ti vadanti, taṃ tesaṃ vacanamattaṃ. ‘‘Sujjhantīti suddhā honti, na nindaṃ garahaṃ pāpuṇantī’’ti vadanti. Sujjhanti vā saṃsārato sujjhanti, na sesā vaṇṇā asukkajātikattā, mantajjhenābhāvato cāti. Brahmuno mukhato jātā vedavacanato jātāti mukhato jātā. Tato eva brahmuno mahābrahmuno vedavacanato vijātāti brahmajā. Tena duvidhenāpi nimmitāti brahmanimmitā. Vedavedaṅgādibrahmadāyajjaṃ arahantīti brahmadāyādā. Muṇḍake samaṇaketi ettha ka-kāro garahāyanti āha ‘‘nindantā jigucchantā vadantī’’ti. Ibbheti sudde, te pana gharabandhanena baddhā nihīnatarāti āha ‘‘gahapatike’’ti. Kaṇheti kaṇhajātike. Bandhanaṭṭhena bandhu, kassa pana bandhūti āha ‘‘mārassa bandhubhūte’’ti. Pādāpacceti pādato jātāpacce. Ayaṃ kira brāhmaṇānaṃ laddhi ‘‘brāhmaṇā brahmuno mukhato jātā, khattiyā urato, ūrūhi vessā, pādato suddā’’ti.
༡༡༤. ཡསྨཱ པཋམཀཔྤིཀཀཱལེ ཙཏུཝཎྞཝཝཏྠཱནཾ ནཏྠི, སབྦེཝ སཏྟཱ ཨེཀསདིསཱ, ཨཔརབྷཱགེ པན ཏེསཾ པཡོགབྷེདཝསེན ཨཧོསི, ཏསྨཱ ཝུཏྟཾ ‘‘པོརཱཎཾ…པེ॰… ཨཛཱནནྟཱ’’ཏི། ལདྡྷིབྷིནྡནཏྠཱཡཱཏི ‘‘བྲཱཧྨཎཱ བྲཧྨུནོ པུཏྟཱ ཨོརསཱ མུཁཏོ ཛཱཏཱ’’ཏི ཨེཝཾ པཝཏྟཱཡ ལདྡྷིཡཱ ཝིནིཝེཋནཏྠཾ། པུཏྟཔྤཊིལཱབྷཏྠཱཡཱཏི ‘‘ཨེཝཾ མཡཾ པེཏྟིཀཾ ཨིཎཾ སོདྷེསྶཱམཱ’’ཏི ལདྡྷིཡཾ ཋཏྭཱ པུཏྟཔྤཊིལཱབྷཱཡ། ཨཡཉྷེཏྠ དྷམྨིཀཱནཾ བྲཱཧྨཎཱནཾ ཨཛ྄ཛྷཱསཡོ། སཉྫཱཏཔུཔྥཱཏི རཛསྶལཱ། ཨིཏྠཱིནཉྷི ཀུམཱརིབྷཱཝཔྤཏྟིཏོ པཊྛཱཡ པཙྪིམཝཡཏོ ཨོརཾ ཨསཏི ཝིབནྡྷེ ཨཊྛམེ ཨཊྛམེ སཏྟཱཧེ གབྦྷཱསཡསཉྙིཏེ ཏཏིཡེ ཨཱཝཏྟེ ཀཏིཔཡཱ ལོཧིཏཔཱིལ༹ཀཱ སཎྛཧིཏྭཱ ཨགྒཧིཏཔུཔྥཱ ཨེཝ བྷིཛྫནྟི, ཏཏོ ལོཧིཏཾ པགྒྷརཏི, ཏཏྠ ཨུཏུསམཉྙཱ, པུཔྥསམཉྙཱ ཙ། ནེསནྟི བྲཱཧྨཎཱནཾ། སཙྩཝཙནཾ སིཡཱཏི ‘‘བྲཧྨུནོ པུཏྟཱ’’ཏིཨཱདིཝཙནཾ སཙྩཾ ཡདི སིཡཱ, བྲཱཧྨཎཱིནཾ…པེ॰… མུཁཾ བྷཝེཡྻ, ན ཙེཏཾ ཨཏྠི།
114. Yasmā paṭhamakappikakāle catuvaṇṇavavatthānaṃ natthi, sabbeva sattā ekasadisā, aparabhāge pana tesaṃ payogabhedavasena ahosi, tasmā vuttaṃ ‘‘porāṇaṃ…pe… ajānantā’’ti. Laddhibhindanatthāyāti ‘‘brāhmaṇā brahmuno puttā orasā mukhato jātā’’ti evaṃ pavattāya laddhiyā viniveṭhanatthaṃ. Puttappaṭilābhatthāyāti ‘‘evaṃ mayaṃ pettikaṃ iṇaṃ sodhessāmā’’ti laddhiyaṃ ṭhatvā puttappaṭilābhāya. Ayañhettha dhammikānaṃ brāhmaṇānaṃ ajjhāsayo. Sañjātapupphāti rajassalā. Itthīnañhi kumāribhāvappattito paṭṭhāya pacchimavayato oraṃ asati vibandhe aṭṭhame aṭṭhame sattāhe gabbhāsayasaññite tatiye āvatte katipayā lohitapīḷakā saṇṭhahitvā aggahitapupphā eva bhijjanti, tato lohitaṃ paggharati, tattha utusamaññā, pupphasamaññā ca. Nesanti brāhmaṇānaṃ. Saccavacanaṃ siyāti ‘‘brahmuno puttā’’tiādivacanaṃ saccaṃ yadi siyā, brāhmaṇīnaṃ…pe… mukhaṃ bhaveyya, na cetaṃ atthi.
ཙཏུཝཎྞསུདྡྷིཝཎྞནཱ
Catuvaṇṇasuddhivaṇṇanā
༡༡༥. མུཁཙྪེདཀཝཱདནྟི ‘‘བྲཱཧྨཎཱ མཧཱབྲཧྨུནོ མུཁཏོ ཛཱཏཱ’’ཏི ཝཱདསྶ ཚེདཀཝཱདཾ། ཨརིཡབྷཱཝེ ཨསམཏྠཱཏི ཨནརིཡབྷཱཝཱཝཧཱ། པཀཏིཀཱལ༹ཀཱཏི སབྷཱཝེནེཝ ན སུདྡྷཱ། ཀཎྷོཏི ཀིལིཊྛོ ཨུཔཏཱཔཀོ། ཏེནཱཧ ‘‘དུཀྑོཏི ཨཏྠོ’’ཏི།
115.Mukhacchedakavādanti ‘‘brāhmaṇā mahābrahmuno mukhato jātā’’ti vādassa chedakavādaṃ. Ariyabhāve asamatthāti anariyabhāvāvahā. Pakatikāḷakāti sabhāveneva na suddhā. Kaṇhoti kiliṭṭho upatāpako. Tenāha ‘‘dukkhoti attho’’ti.
སུཀྐབྷཱཝོ ནཱམ པརིསུདྡྷཏཱཏི ཨཱཧ ‘‘ནིཀྐིལེསབྷཱཝེན པཎྜརཱ’’ཏི། སུཀྐོཏི ན ཀིལིཊྛོ ཨནུཔཏཱཔཀོཏི ཝུཏྟཾ ‘‘སུཁོཏི ཨཏྠོ’’ཏི།
Sukkabhāvo nāma parisuddhatāti āha ‘‘nikkilesabhāvena paṇḍarā’’ti. Sukkoti na kiliṭṭho anupatāpakoti vuttaṃ ‘‘sukhoti attho’’ti.
༡༡༦. ཨུབྷཡཝོཀིཎྞེཏི ཝཙནཝིཔལླཱསེན ཝུཏྟནྟི ཨཱཧ ‘‘ཨུབྷཡེསུ ཝོཀིཎྞེསཱུ’’ཏི། མིསྶཱིབྷཱུཏེསཱུཏི ‘‘ཀདཱཙི ཀཎྷཱ དྷམྨཱ, ཀདཱཙི སུཀྐཱ དྷམྨཱ’’ཏི ཨེཝཾ ཨེཀསྨིཾ སནྟཱནེ, ཨེཀསྨིཾཡེཝ ཙ ཨཏྟབྷཱཝེ པཝཏྟིཡཱ མིསྶཱིབྷཱུཏེསུ, ན པན ཨེཀཛ྄ཛྷཾ པཝཏྟིཡཱ། ཨེཏྠཱཏི ཨནནྟརཝུཏྟདྷམྨཱཝ ཨནྭཱདྷིཊྛཱཏི ཨཱཧ ‘‘ཀཎྷསུཀྐདྷམྨེསཱུ’’ཏི། ཡསྨཱ ཙ ཏེ བྲཱཧྨཎཱ ན ཙེཝ ཏེ དྷམྨེ ཨཏིཀྐནྟཱ, ཡཱཡ ཙ པཊིཔདཱཡ ཨཏིཀྐམེཡྻུཾ, སཱཔི ཏེསཾ པཊིཔདཱ ནཏྠི, ཏསྨཱ ཝུཏྟཾ ‘‘ཝཏྟམཱནཱཔཱི’’ཏི། ནཱནུཛཱནནྟི ཨཡཐཱབྷུཙྩཝཱདབྷཱཝཏོ། ཨནུཛཱནནཉྩ ནཱམ ཨབྦྷནུམོདནནྟི ཏདབྷཱཝཾ དསྶེནྟེན ‘‘ནཱནུམོདནྟི, ན པསཾསནྟཱི’’ཏི ཝུཏྟཾ། ཙཏུནྣཾ ཝཎྞཱནནྟི ནིདྡྷཱརཎེ སཱམིཝཙནཾ། ཏེསནྟི པན སམྦནྡྷེཔི ཝཱ སཱམིཝཙནཾ། ཏེ ཙ བྲཱཧྨཎཱ ན ཨེཝརཱུཔཱ ན ཨེདིསཱ, ཡཱདིསོ ཨརཧཱ ཨེཀདེསེནཱཔི ཏེན ཏེསཾ སདིསཏཱབྷཱཝཏོ, ཏསྨཱ ཏེན ཀཱརཎེན ནེསཾ བྲཱཧྨཎཱནཾ ‘‘བྲཱཧྨཎོཝ སེཊྛོ ཝཎྞོ’’ཏི ཝཱདཾ ཝིཉྙཱུ ཡཐཱབྷཱུཏཝཱདིནོ བུདྡྷཱདཡོ ཨརིཡཱ ནཱནུཛཱནནྟི།
116.Ubhayavokiṇṇeti vacanavipallāsena vuttanti āha ‘‘ubhayesu vokiṇṇesū’’ti. Missībhūtesūti ‘‘kadāci kaṇhā dhammā, kadāci sukkā dhammā’’ti evaṃ ekasmiṃ santāne, ekasmiṃyeva ca attabhāve pavattiyā missībhūtesu, na pana ekajjhaṃ pavattiyā. Etthāti anantaravuttadhammāva anvādhiṭṭhāti āha ‘‘kaṇhasukkadhammesū’’ti. Yasmā ca te brāhmaṇā na ceva te dhamme atikkantā, yāya ca paṭipadāya atikkameyyuṃ, sāpi tesaṃ paṭipadā natthi, tasmā vuttaṃ ‘‘vattamānāpī’’ti. Nānujānanti ayathābhuccavādabhāvato. Anujānanañca nāma abbhanumodananti tadabhāvaṃ dassentena ‘‘nānumodanti, na pasaṃsantī’’ti vuttaṃ. Catunnaṃ vaṇṇānanti niddhāraṇe sāmivacanaṃ. Tesanti pana sambandhepi vā sāmivacanaṃ. Te ca brāhmaṇā na evarūpā na edisā, yādiso arahā ekadesenāpi tena tesaṃ sadisatābhāvato, tasmā tena kāraṇena nesaṃ brāhmaṇānaṃ ‘‘brāhmaṇova seṭṭho vaṇṇo’’ti vādaṃ viññū yathābhūtavādino buddhādayo ariyā nānujānanti.
ཨཱརཀཏྟཱདཱིཧཱིཏི ཨེཏྠ ཀིལེསཱནཾ ཨཱརཀཏྟཱ པཧཱིནབྷཱཝཏོ དཱུརཏྟཱ ཨརཧཾ, ཀིལེསཱརཱིནཾ ཧཏཏྟཱ ཨརཧཾ, སཾསཱརཙཀྐསྶ ཨརཱནཾ ཧཏཏྟཱ ཨརཧཾ, པཙྩཡཱདཱིནཾ ཨརཧཏྟཱ ཨརཧཾ, པཱཔཀརཎེ རཧཱབྷཱཝེན ཨརཧནྟི ཨེཝམཏྠོ ཝེདིཏབྦོ། ཨཡམེཏྠ སངྑེཔོ, ཝིཏྠཱརོ པན ཝིསུདྡྷིམགྒེ (ཝིསུདྡྷི॰ ༡.༡༢༥ ཨཱདཡོ), ཏཾ སཾཝཎྞནཱསུ (ཝིསུདྡྷི॰ ཊཱི॰ ༡.༡༢༤) ཙ ཝུཏྟནཡེན ཝེདིཏབྦོ ། ཨཱསཝཱནཾ ཁཱིཎཏྟཱཏི ཙཏུནྣམྤི ཨཱསཝཱནཾ ཨནཝསེསཏོ པཧཱིནཏྟཱ། བྲཧྨཙརིཡཝཱསནྟི མགྒབྲཧྨཙརིཡཝཱསཾ། ཏསྶ ཝཱསསྶ པརིཡོསིཏཏྟཱ ཝུཏྠཝཱསོ, དསནྣམྤི ཝཱ ཨརིཡཝཱསཱནཾ ཝུཏྠཏྟཱ ཝུཏྠཝཱསོ། ཝུཏྟཉྷེཏཾ –
Ārakattādīhīti ettha kilesānaṃ ārakattā pahīnabhāvato dūrattā arahaṃ, kilesārīnaṃ hatattā arahaṃ, saṃsāracakkassa arānaṃ hatattā arahaṃ, paccayādīnaṃ arahattā arahaṃ, pāpakaraṇe rahābhāvena arahanti evamattho veditabbo. Ayamettha saṅkhepo, vitthāro pana visuddhimagge (visuddhi. 1.125 ādayo), taṃ saṃvaṇṇanāsu (visuddhi. ṭī. 1.124) ca vuttanayena veditabbo . Āsavānaṃ khīṇattāti catunnampi āsavānaṃ anavasesato pahīnattā. Brahmacariyavāsanti maggabrahmacariyavāsaṃ. Tassa vāsassa pariyositattā vutthavāso, dasannampi vā ariyavāsānaṃ vutthattā vutthavāso. Vuttañhetaṃ –
‘‘དསཡིམེ, བྷིཀྑཝེ, ཨརིཡཱཝཱསཱ, ཡདརིཡཱ ཨཱཝསིཾསུ ཝཱ ཨཱཝསནྟི ཝཱ ཨཱཝསིསྶནྟི ཝཱ། ཀཏམེ དས? ཨིདྷ, བྷིཀྑཝེ, བྷིཀྑུ པཉྩངྒཝིཔྤཧཱིནོ ཧོཏི ཚལ༹ངྒསམནྣཱགཏོ ཨེཀཱརཀྑོ ཙཏུརཱཔསྶེནོ པནུཎྞཔཙྩེཀསཙྩོ སམཝཡསཋེསནོ ཨནཱཝིལསངྐཔྤོ པསྶདྡྷཀཱཡསངྑཱརོ སུཝིམུཏྟཙིཏྟོ སུཝིམུཏྟཔཉྙོ། ཨིམེ ཁོ, བྷིཀྑཝེ, དས ཨརིཡཱཝཱསཱ’’ཏི (ཨ॰ ནི॰ ༡༠.༡༩)།
‘‘Dasayime, bhikkhave, ariyāvāsā, yadariyā āvasiṃsu vā āvasanti vā āvasissanti vā. Katame dasa? Idha, bhikkhave, bhikkhu pañcaṅgavippahīno hoti chaḷaṅgasamannāgato ekārakkho caturāpasseno panuṇṇapaccekasacco samavayasaṭhesano anāvilasaṅkappo passaddhakāyasaṅkhāro suvimuttacitto suvimuttapañño. Ime kho, bhikkhave, dasa ariyāvāsā’’ti (a. ni. 10.19).
ཝུསྶཏཱིཏི ཝཱ ཝུསིཏཾ, ཨརིཡམགྒོ, ཨརིཡཕལཉྩ, ཏཾ ཨེཏསྶ ཨཏྠཱིཏི ཨཏིསཡཝཙནིཙྪཱཝསེན ཨརཧཱ ‘‘ཝུསིཏཝཱ’’ཏི ཝུཏྟོ། ཀརཎཱིཡཾ ནཱམ པརིཉྙཱཔཧཱནསཙྪིཀིརིཡཱབྷཱཝནཱ དུཀྑསྶནྟཾ ཀཱཏུཀཱམེཧི ཨེཀནྟཏོ ཀཏྟབྦཏྟཱ, ཏཾ པན ཡསྨཱ ཙཏཱུཧི མགྒེཧི པཙྩེཀཾ ཙཏཱུསུ སཙྩེསུ ཀཱཏབྦཾ ཀཏཾ, ཏསྨཱ ཝུཏྟཾ ‘‘ཙཏཱུཧི…པེ॰… ཀཏཀརཎཱིཡོ’’ཏི། ཨོསཱིདཱཔནཊྛེན བྷཱརཱ ཝིཡཱཏི བྷཱརཱ, ཀིལེསཱ, ཁནྡྷཱ ཙ། ཝུཏྟཉྷི ‘‘བྷཱརཱ ཧཝེ པཉྩཀྑནྡྷཱ’’ཏི (སཾ॰ ནི॰ ༣.༢༢) ཨོཧཱརིཏོཏི ཨཔནཱིཏོ། སཀོ ཨཏྠོ སདཏྠོཏི ཨེཏྠ ད-ཀཱརོ པདསནྡྷིཀརོ། ཀཱམཾ དིཊྛིཨཱདཡོཔི སཾཡོཛནཱནི ཨེཝ, ཏཐཱཔི ཏཎྷཱཡ བྷཝསཾཡོཛནཊྛོ སཱཏིསཡོ། ཡཐཱཧ ‘‘ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱན’’ནྟི། (སཾ॰ ནི॰ ༢.༡༢༥, ༡༢༦, ༡༢༧, ༡༣༢, ༡༣༤, ༡༣༦, ༡༤༢; ༣.༥.༥༢༠; ཀཐཱ॰ ༧༥) ཏཏོ སཱ ཨེཝ སུཏྟེ (དཱི॰ ནི॰ ༢.༤༠༠; མ॰ ནི॰ ༡.༩༣, ༡༣༣; ༣.༣༧༣; སཾ॰ ནི॰ ༣.༡༠༨༡; པཊི॰ མ॰ ༡.༣༤ ཨཱདཡོ) སམུདཡསཙྩབྷཱཝེན ཝུཏྟཱ, ཏསྨཱ ཝུཏྟཾ ‘‘བྷཝསཾཡོཛནཾ ཝུཙྩཏི ཏཎྷཱ’’ཏི། སམྨདཉྙཱ ཝིམུཏྟོཏི སམྨཱ ཨཉྙཱཡ ཛཱནནབྷཱུཏཱཡ ཨགྒམགྒཔཉྙཱཡ སམྨཱ ཡཐཱབྷཱུཏཾ ཡཾ ཡཐཱ ཛཱནིཏབྦཾ, ཏཾ ཏཐཱ ཛཱནིཏྭཱ ཝིམུཏྟོ། ཨིམསྨིཾ ལོཀེཏི ཨིམསྨིཾ སཏྟལོཀེ། ཨིདྷཏྟབྷཱཝེཏི ཨིམསྨིཾ ཨཏྟབྷཱཝེ, པརཏྟབྷཱཝེཏི པརསྨིཾ ཨཏྟབྷཱཝེ, ཨིདྷལོཀེ, པརལོཀེ ཙཱཏི ཨཏྠོ།
Vussatīti vā vusitaṃ, ariyamaggo, ariyaphalañca, taṃ etassa atthīti atisayavacanicchāvasena arahā ‘‘vusitavā’’ti vutto. Karaṇīyaṃ nāma pariññāpahānasacchikiriyābhāvanā dukkhassantaṃ kātukāmehi ekantato kattabbattā, taṃ pana yasmā catūhi maggehi paccekaṃ catūsu saccesu kātabbaṃ kataṃ, tasmā vuttaṃ ‘‘catūhi…pe… katakaraṇīyo’’ti. Osīdāpanaṭṭhena bhārā viyāti bhārā, kilesā, khandhā ca. Vuttañhi ‘‘bhārā have pañcakkhandhā’’ti (saṃ. ni. 3.22) ohāritoti apanīto. Sako attho sadatthoti ettha da-kāro padasandhikaro. Kāmaṃ diṭṭhiādayopi saṃyojanāni eva, tathāpi taṇhāya bhavasaṃyojanaṭṭho sātisayo. Yathāha ‘‘avijjānīvaraṇānaṃ sattānaṃ taṇhāsaṃyojanāna’’nti. (Saṃ. ni. 2.125, 126, 127, 132, 134, 136, 142; 3.5.520; kathā. 75) tato sā eva sutte (dī. ni. 2.400; ma. ni. 1.93, 133; 3.373; saṃ. ni. 3.1081; paṭi. ma. 1.34 ādayo) samudayasaccabhāvena vuttā, tasmā vuttaṃ ‘‘bhavasaṃyojanaṃ vuccati taṇhā’’ti. Sammadaññā vimuttoti sammā aññāya jānanabhūtāya aggamaggapaññāya sammā yathābhūtaṃ yaṃ yathā jānitabbaṃ, taṃ tathā jānitvā vimutto. Imasmiṃ loketi imasmiṃ sattaloke. Idhattabhāveti imasmiṃ attabhāve, parattabhāveti parasmiṃ attabhāve, idhaloke, paraloke cāti attho.
༡༡༧. ཨནྟརཝིརཧིཏཱཏི ཝིབྷཱགཝིརཧིཏཱ། ཏེནཱཧ ‘‘ཨཏྟནོ ཀུལེན སདིསཱ’’ཏི། ཨནུཡནྟཱིཏི ཨནུཡནྟཱ, ཨནུཡནྟཱ ཨེཝ ཨཱནུཡནྟཱ, ཨནུཝཏྟཀཱ། ཏེནཱཧ ‘‘ཝསཝཏྟིནོ’’ཏི།
117.Antaravirahitāti vibhāgavirahitā. Tenāha ‘‘attano kulena sadisā’’ti. Anuyantīti anuyantā, anuyantā eva ānuyantā, anuvattakā. Tenāha ‘‘vasavattino’’ti.
༡༡༨. ནིཝིཊྛཱཏི སདྡྷེཡྻཝཏྠུསྨིཾ ཨནུཔཝིསནཝསེན ནིཝིཊྛཱ། ཏཏོ ཨེཝ ཏསྨིཾ ཨདྷིཀཾ ནིཝིསནཏོ ཨབྷིནིཝིཊྛཱ། ཨཙལཊྛིཏཱཏི ཨཙལབྷཱཝེ ཋིཏཱ།
118.Niviṭṭhāti saddheyyavatthusmiṃ anupavisanavasena niviṭṭhā. Tato eva tasmiṃ adhikaṃ nivisanato abhiniviṭṭhā. Acalaṭṭhitāti acalabhāve ṭhitā.
ཡནྟི ཡཾ ཀཐེཏབྦདྷམྨཾ ཨནུཔདྷཱརེཏྭཱ, ཏདཏྠཉྩ ཨཔྤཙྩཀྑཾ ཀཏྭཱ ཀཐནཾ, ཨེཏཾ ཨཊྛཱནཾ ཨཀཱརཎཾ ཏསྶ བོདྷིམཱུལེཡེཝ སམུཙྪིནྣཏྟཱ། ཝིཙྪིནྡཛནནཏྠནྟི རཏནཏྟཡསདྡྷཱཡ ཝིཙྪིནྡསྶ ཨུཔྤཱདནཏྠཾ, ཨཉྙཐཏྟཱཡཱཏི ཨཏྠོ། སོཏི མཱརོ། མུསཱཝཱདཾ ཀཱཏུཾ ནཱསཀྑཱིཏི ཨཱགཏཕལསྶ ཨརིཡསཱཝཀསྶ པུརཏོ མུསཱ ཝཏྟུཾ ན ཝིསཧི, ཏསྨཱ ཨཱམ མཱརོསྨཱིཏི པཊིཛཱནི། སིལཱཔཐཝིཡནྟི རཏནམཡསིལཱཔཐཝིཡཾ། སིནེརུཾ ཀིར པརིཝཱརེཏྭཱ ཋིཏོ བྷཱུམིཔྤདེསོ སཏྟརཏནམཡོ, ‘‘སུཝཎྞམཡོ’’ཏི ཀེཙི, སཱ ཝིཏྠཱརཏོ, ཨུབྦེདྷཏོ ཨནེཀཡོཛནསཧསྶཔརིམཱཎཱ ཨཏིཝིཡ ནིཙྩལཱ། ཀིཾ ཏྭཾ ཨེཏྠཱཏི ཀིཾ ཀཱརཎཱ ཏྭཾ ཨེཏྠ། ‘‘ཋིཏོ’’ཏི ཨཙྪརཾ པཧརི། ཋཱཏུཾ ཨསཀྐོནྟོཏི ཨརིཡསཱཝཀསྶ པུརཏོ ཋཱཏུཾ ཨསཀྐོནྟོ། ཨཡཉྷི ཨརིཡདྷམྨཱདྷིགམསྶ ཨཱནུབྷཱཝོ, ཡཾ མཱརོཔི ནཱམ མཧཱནུབྷཱཝོ ཨུཛུཀཾ པཊིཔྤརིཏུཾ ན སཀྐོཏི།
Yanti yaṃ kathetabbadhammaṃ anupadhāretvā, tadatthañca appaccakkhaṃ katvā kathanaṃ, etaṃ aṭṭhānaṃ akāraṇaṃ tassa bodhimūleyeva samucchinnattā. Vicchindajananatthanti ratanattayasaddhāya vicchindassa uppādanatthaṃ, aññathattāyāti attho. Soti māro. Musāvādaṃ kātuṃ nāsakkhīti āgataphalassa ariyasāvakassa purato musā vattuṃ na visahi, tasmā āma mārosmīti paṭijāni. Silāpathaviyanti ratanamayasilāpathaviyaṃ. Sineruṃ kira parivāretvā ṭhito bhūmippadeso sattaratanamayo, ‘‘suvaṇṇamayo’’ti keci, sā vitthārato, ubbedhato anekayojanasahassaparimāṇā ativiya niccalā. Kiṃ tvaṃ etthāti kiṃ kāraṇā tvaṃ ettha. ‘‘Ṭhito’’ti accharaṃ pahari. Ṭhātuṃ asakkontoti ariyasāvakassa purato ṭhātuṃ asakkonto. Ayañhi ariyadhammādhigamassa ānubhāvo, yaṃ māropi nāma mahānubhāvo ujukaṃ paṭipparituṃ na sakkoti.
མགྒོ ཨེཝ མཱུལཾ མགྒམཱུལཾ, ཏསྶ། སཉྫཱཏཏྟཱ ཨུཔྤནྣཏྟཱ། ཏེན མགྒམཱུལེན པཏིཊྛིཏསནྟཱནེ ལདྡྷཔཏིཊྛཱ། བྷགཝཏོ དེསནཱདྷམྨཾ ནིསྶཱཡ ཨརིཡཱཡ ཛཱཏིཡཱ ཛཱཏོ ‘‘བྷགཝནྟཾ ནིསྶཱཡ ཨརིཡབྷཱུམིཡཾ ཛཱཏོ’’ཏི ཝུཏྟོ། ‘‘ཨུརེ ཝསིཏྭཱ’’ཏི ཨིདཾ དྷམྨགྷོསསྶ ཨུརཏོ སམུཊྛཱནཏཱཡ ཝུཏྟཾ། ཨུརེ ཝཱཡཱམཛནིཏཱབྷིཛཱཏིཏཱཡ ཝཱ ཨོརསོ། མུཁཏོ ཛཱཏེན ཛཱཏོ ‘‘མུཁཏོ ཛཱཏོ’’ཏི ཝུཏྟོ། ཀཱརཎཀཱརཎེཔི ཧི ཀཱརཎེ ཝིཡ ཝོཧཱརོ ཧོཏི ‘‘ཏིཎེཧི བྷཏྟཾ སིདྡྷ’’ནྟི། ཀེཙི པན ‘‘ཝིམོཀྑམུཁསྶ ཝསེན ཛཱཏཏྟཱ མུཁཏོ ཛཱཏོ’’ཏི ཝདནྟི, ཏཏྠཱཔི ཝུཏྟནཡེནེཝ ཨཏྠོ ཝེདིཏབྦོ། པུརིམེནཏྠེན ཡོནིཛོ, སེདཛོ, མུཁཛོཏི ཏཱིསུ སམྦནྡྷེསུ མུཁཛེན སམྦནྡྷེན བྷགཝཏོ པུཏྟབྷཱཝོ ཝིབྷཱཝིཏོ། ཨཏྠདྭཡེནཱཔི དྷམྨཛབྷཱཝོཡེཝ དཱིཔིཏོ། ཨརིཡདྷམྨཔྤཏྟིཏོ ལདྡྷཝིསེསོ ཧུཏྭཱ པཝཏྟོ ཏདུཏྟརཀཱལིཀོ ཁནྡྷསནྟཱནོ ‘‘ཨརིཡདྷམྨཏོ ཛཱཏོ’’ཏི ཝེདིཏབྦོ, ཨརིཡདྷམྨཾ ཝཱ མགྒཕལཾ ནིསྶཱཡ, ཨུཔནིསྶཱཡ ཙ ཛཱཏོ སབྦོཔི དྷམྨཔྤབནྡྷོ ‘‘ཨརིཡདྷམྨཏོ ཛཱཏོ’’ཏི གཧེཏབྦོ། ཏེསཾ པན ཨརིཡདྷམྨཱནཾ ཨཔརིཡོསིཏཀིཙྩཏཱཡ ཨརིཡབྷཱཝེན ཨབྷིནིབྦཏྟིམཏྟཾ ཨུཔཱདཱཡ ‘‘ཨརིཡདྷམྨཏོ ཛཱཏཏྟཱ’’ཏི ཝུཏྟཾ། པརིཡོསིཏཀིཙྩཏཱཡ ཏཐཱ ནིབྦཏྟིཔཱརིཔཱུརིཾ ཨུཔཱདཱཡ ‘‘ནིམྨིཏཏྟཱ’’ཏི ཝུཏྟཾ, ཡཏོ ‘‘དྷམྨཛོ དྷམྨནིམྨིཏོ’’ཏི ཝུཏྟཾ། ‘‘ནཝལོཀུཏྟརདྷམྨདཱཡཾ ཨཱདིཡཏཱིཏི དྷམྨདཱཡཱདོ’’ ཏིཔི པཱཋོ། ཨསྶཱཏི ‘‘བྷགཝཏོམྷིཔུཏྟོ’’ཏིཨཱདིནཱ ཝུཏྟསྶ ཝཱཀྱསྶ། ཨཏྠཾ དསྶེནྟོཏི བྷཱཝཏྠཾ པཀཱསེནྟོ། ཏཐཱགཏསྶ ཨནཉྙསཱདྷཱརཎསཱིལཱདིདྷམྨཀྑནྡྷསྶ སམཱུཧནིཝེསཝསེན དྷམྨཀཱཡཏཱཡ ན ཀིཉྩི ཝཏྟབྦཾ ཨཏྠི, སཏྠུཊྛཱནིཡསྶ པན དྷམྨཀཱཡཏཾ དསྶེཏུཾ ‘‘ཀསྨཱ ཏཐཱགཏོ དྷམྨཀཱཡོཏི ཝུཏྟོ’’ཏི སཡམེཝ པུཙྪཾ སམུཊྛཱཔེཏྭཱ ‘‘ཏཐཱགཏོ ཧཱི’’ཏིཨཱདིནཱ ཏམཏྠཾ ཝིསྶཛྫེཏི། ཧདཡེན ཙིནྟེཏྭཱཏི ‘‘ཨིམཾ དྷམྨཾ ཨིམསྶ དེསེསྶཱམཱི’’ཏི ཏསྶ ཨུཔགཏསྶ ཝེནེཡྻཛནསྶ བོདྷནཏྠཾ ཙིཏྟེན ཙིནྟེཏྭཱ། ཝཱཙཱཡ ཨབྷིནཱིཧརཱིཏི སདྡྷམྨདེསནཱཝཱཙཱཡ ཀརཝཱིཀརུཏམཉྫུནཱ བྲཧྨསྶརེན ཝེནེཡྻསནྟཱནཱབྷིམུཁཾ ཏདཛ྄ཛྷཱསཡཱནུརཱུཔཾ ཧིཏམཏྠཾ ནཱིཧརི ཨུཔནེསི། ཏེནཱཏི ཏེན ཀཱརཎེན ཨེཝཾསདྡྷམྨཱདྷིམུཏྟིབྷཱཝེན། ཨསྶཱཏི ཏཐཱགཏསྶ། དྷམྨམཡཏྟཱཏི དྷམྨབྷཱུཏཏྟཱ། ཨིདྷཱདྷིཔྤེཏདྷམྨོ སེཊྛཊྛེན བྲཧྨབྷཱུཏོཏི ཨཱཧ ‘‘དྷམྨཀཱཡཏྟཱ ཨེཝ བྲཧྨཀཱཡོ’’ཏི། སབྦསོ ཨདྷམྨཾ པཛཧིཏྭཱ ཨནཝསེསཏོ དྷམྨོ ཨེཝ བྷཱུཏོཏི དྷམྨབྷཱུཏོ། ཏཐཱརཱུཔོ ཙ ཡསྨཱ སབྷཱཝཏོ དྷམྨོ ཨེཝཱཏི ཝཏྟབྦཏཾ ཨརཧཏཱིཏི ཨཱཧ ‘‘དྷམྨསབྷཱཝོ’’ཏི།
Maggo eva mūlaṃ maggamūlaṃ, tassa. Sañjātattā uppannattā. Tena maggamūlena patiṭṭhitasantāne laddhapatiṭṭhā. Bhagavato desanādhammaṃ nissāya ariyāya jātiyā jāto ‘‘bhagavantaṃ nissāya ariyabhūmiyaṃ jāto’’ti vutto. ‘‘Ure vasitvā’’ti idaṃ dhammaghosassa urato samuṭṭhānatāya vuttaṃ. Ure vāyāmajanitābhijātitāya vā oraso. Mukhato jātena jāto ‘‘mukhato jāto’’ti vutto. Kāraṇakāraṇepi hi kāraṇe viya vohāro hoti ‘‘tiṇehi bhattaṃ siddha’’nti. Keci pana ‘‘vimokkhamukhassa vasena jātattā mukhato jāto’’ti vadanti, tatthāpi vuttanayeneva attho veditabbo. Purimenatthena yonijo, sedajo, mukhajoti tīsu sambandhesu mukhajena sambandhena bhagavato puttabhāvo vibhāvito. Atthadvayenāpi dhammajabhāvoyeva dīpito. Ariyadhammappattito laddhaviseso hutvā pavatto taduttarakāliko khandhasantāno ‘‘ariyadhammato jāto’’ti veditabbo, ariyadhammaṃ vā maggaphalaṃ nissāya, upanissāya ca jāto sabbopi dhammappabandho ‘‘ariyadhammato jāto’’ti gahetabbo. Tesaṃ pana ariyadhammānaṃ apariyositakiccatāya ariyabhāvena abhinibbattimattaṃ upādāya ‘‘ariyadhammato jātattā’’ti vuttaṃ. Pariyositakiccatāya tathā nibbattipāripūriṃ upādāya ‘‘nimmitattā’’ti vuttaṃ, yato ‘‘dhammajo dhammanimmito’’ti vuttaṃ. ‘‘Navalokuttaradhammadāyaṃ ādiyatīti dhammadāyādo’’ tipi pāṭho. Assāti ‘‘bhagavatomhiputto’’tiādinā vuttassa vākyassa. Atthaṃ dassentoti bhāvatthaṃ pakāsento. Tathāgatassa anaññasādhāraṇasīlādidhammakkhandhassa samūhanivesavasena dhammakāyatāya na kiñci vattabbaṃ atthi, satthuṭṭhāniyassa pana dhammakāyataṃ dassetuṃ ‘‘kasmā tathāgato dhammakāyoti vutto’’ti sayameva pucchaṃ samuṭṭhāpetvā ‘‘tathāgato hī’’tiādinā tamatthaṃ vissajjeti. Hadayena cintetvāti ‘‘imaṃ dhammaṃ imassa desessāmī’’ti tassa upagatassa veneyyajanassa bodhanatthaṃ cittena cintetvā. Vācāya abhinīharīti saddhammadesanāvācāya karavīkarutamañjunā brahmassarena veneyyasantānābhimukhaṃ tadajjhāsayānurūpaṃ hitamatthaṃ nīhari upanesi. Tenāti tena kāraṇena evaṃsaddhammādhimuttibhāvena. Assāti tathāgatassa. Dhammamayattāti dhammabhūtattā. Idhādhippetadhammo seṭṭhaṭṭhena brahmabhūtoti āha ‘‘dhammakāyattā eva brahmakāyo’’ti. Sabbaso adhammaṃ pajahitvā anavasesato dhammo eva bhūtoti dhammabhūto. Tathārūpo ca yasmā sabhāvato dhammo evāti vattabbataṃ arahatīti āha ‘‘dhammasabhāvo’’ti.
༡༡༩. སེཊྛཙྪེདཀཝཱདནྟི ‘‘བྲཱཧྨཎོཝ སེཊྛོ ཝཎྞོ’’ཏི (དཱི॰ ནི॰ ༣.༡༡༦) ཨེཝཾ ཝུཏྟསེཊྛབྷཱཝཙྪེདཀཝཱདཾ། ཨཔརེནཔི ནཡེནཱཏི ཡཐཱཝུཏྟསེཊྛཙྪེདཀཝཱདཏོ ཨཔརེནཔི པོརཱཎཀལོཀུཔྤཏྟིདསྶནནཡེན། སེཊྛཙྪེད…པེ॰… དསྶེཏུནྟི སོཔི ཧི ‘‘བྲཱཧྨཎོཝ སེཊྛོ ཝཎྞོ, ཧཱིནཱ ཨཉྙེ ཝཎྞཱ’’ཏི, ‘‘བྲཱཧྨཎཱ བྲཧྨུནོ པུཏྟཱ ཨོརསཱ མུཁཏོ ཛཱཏཱ བྲཧྨཛཱ’’ཏི (དཱི॰ ནི॰ ༣.༡༡༤) ཙ ཨེཝཾ པཝཏྟཱཡ མིཙྪཱདིཊྛིཡཱ ཝིནིཝེཋནོ ཛཱཏིབྲཱཧྨཎཱནཾ སེཊྛབྷཱཝསྶ ཚེདནཏོ སེཊྛཙྪེདནཝཱདོ ནཱམ ཧོཏཱིཏི དསྶེཏུནྟི ཨཏྠོ།
119.Seṭṭhacchedakavādanti ‘‘brāhmaṇova seṭṭho vaṇṇo’’ti (dī. ni. 3.116) evaṃ vuttaseṭṭhabhāvacchedakavādaṃ. Aparenapi nayenāti yathāvuttaseṭṭhacchedakavādato aparenapi porāṇakalokuppattidassananayena. Seṭṭhaccheda…pe… dassetunti sopi hi ‘‘brāhmaṇova seṭṭho vaṇṇo, hīnā aññe vaṇṇā’’ti, ‘‘brāhmaṇā brahmuno puttā orasā mukhato jātā brahmajā’’ti (dī. ni. 3.114) ca evaṃ pavattāya micchādiṭṭhiyā viniveṭhano jātibrāhmaṇānaṃ seṭṭhabhāvassa chedanato seṭṭhacchedanavādo nāma hotīti dassetunti attho.
ཨིཏྠབྷཱཝནྟི ཨིམཾ པཀཱརཏཾ མནུསྶབྷཱཝཾ། སཱམཉྙཛོཏནཱ ཧི ཝིསེསེ ཨཝཏིཊྛཏི, པཀརཎཝསེན ཝཱ ཨཡམཏྠོ ཨཝཙྪིནྣོ དཊྛབྦོ། མནེནེཝ ནིབྦཏྟཱཏི བཱཧིརཔཙྩཡེན ཝིནཱ ཀེཝལཾ ཨུཔཙཱརཛྷཱནམནསཱཝ ནིབྦཏྟཱ། ཡཱཡ ཨུཔཙཱརཛ྄ཛྷཱནཙེཏནཱཡ ཏེ ཏཏྠ ནིབྦཏྟཱ, ནཱིཝརཎཝིཀྑམྦྷནཱདིནཱ ཨུལཱ༹རོ ཏསྶཱ པཝཏྟིཝིསེསོ, ཏསྨཱ ཛྷཱནཕལཀཔྤོ ཏསྶཱ ཕལཝིསེསོཏི ཨཱཧ ‘‘བྲཧྨལོཀེ ཝིཡཱ’’ཏིཨཱདི། ‘‘སཡཾཔབྷཱ’’ཏི པདཱནཾ ཏཏྠ སཱུརིཡཱལོཀཱདཱིཧི ཝིནཱ ཨནྡྷཀཱརཾ ཝིདྷམནྟཱ སཡམེཝ པབྷཱསནྟཱིཏི སཡཾཔབྷཱ, ཨནྟལིཀྑེ ཨཱཀཱསེ ཙརནྟཱིཏི ཨནྟལིཀྑཙརཱ, ཏདཉྙཀཱམཱཝཙརསཏྟཱནཾ ཝིཡ སརཱིརསྶ ཝིཙརཎཊྛཱནསྶ ཨསུབྷཏཱབྷཱཝཏོ སུབྷཾ, སུབྷེཝ ཏིཊྛནྟཱིཏི སུབྷཊྛཱཡིནོཏི ཨཏྠོ ཝེདིཏབྦོ།
Itthabhāvanti imaṃ pakārataṃ manussabhāvaṃ. Sāmaññajotanā hi visese avatiṭṭhati, pakaraṇavasena vā ayamattho avacchinno daṭṭhabbo. Manenevanibbattāti bāhirapaccayena vinā kevalaṃ upacārajhānamanasāva nibbattā. Yāya upacārajjhānacetanāya te tattha nibbattā, nīvaraṇavikkhambhanādinā uḷāro tassā pavattiviseso, tasmā jhānaphalakappo tassā phalavisesoti āha ‘‘brahmaloke viyā’’tiādi. ‘‘Sayaṃpabhā’’ti padānaṃ tattha sūriyālokādīhi vinā andhakāraṃ vidhamantā sayameva pabhāsantīti sayaṃpabhā, antalikkhe ākāse carantīti antalikkhacarā, tadaññakāmāvacarasattānaṃ viya sarīrassa vicaraṇaṭṭhānassa asubhatābhāvato subhaṃ, subheva tiṭṭhantīti subhaṭṭhāyinoti attho veditabbo.
རསཔཐཝིཔཱཏུབྷཱཝཝཎྞནཱ
Rasapathavipātubhāvavaṇṇanā
༡༢༠. སབྦཾ ཙཀྐཝཱལ༹ནྟི ཨནཝསེསཾ ཀོཊིསཏསཧསྶཾ ཙཀྐཝཱལ༹ཾ། སམཏནཱིཏི སཉྪཱདེནྟཱི ཝིཔྥརི, སཱ པན ཏསྨིཾ ཨུདཀེ པཏིཊྛིཏཱ ཨཧོསཱིཏི ཨཱཧ ‘‘པཏིཊྛཧཱི’’ཏི། ཝཎྞེན སམྤནྣཱཏི སམྤནྣཝཎྞཱ། མཀྑིཀཎྜཀརཧིཏནྟི མཀྑིཀཱཧི ཙ ཏཱསཾ ཨཎྜཀེཧི ཙ རཧིཏཾ།
120.Sabbaṃ cakkavāḷanti anavasesaṃ koṭisatasahassaṃ cakkavāḷaṃ. Samatanīti sañchādentī vipphari, sā pana tasmiṃ udake patiṭṭhitā ahosīti āha ‘‘patiṭṭhahī’’ti. Vaṇṇenasampannāti sampannavaṇṇā. Makkhikaṇḍakarahitanti makkhikāhi ca tāsaṃ aṇḍakehi ca rahitaṃ.
ཨཏཱིཏཱནནྟརེཔི ཀཔྤེ ལོལོཡེཝ། ཀསྨཱ? ཨེཝཾ ཙིརཔརིཙིཏལོལཏཱཝསེན སབྦཔཋམཾ ཏཐཱ ཨཀཱསཱིཏི དསྶེཏི། ཀིམེཝིདནྟི ‘‘ཝཎྞཏོ, གནྡྷཏོ ཙ ཏཱཝ ཉཱཏཾ, རསཏོ པན ཀིམེཝིདཾ བྷཝིསྶཏཱི’’ཏི སཾསཡཛཱཏོ ཝདཏི། ཏིཊྛཏཱིཏི ཨཊྛཱསི།
Atītānantarepi kappe loloyeva. Kasmā? Evaṃ ciraparicitalolatāvasena sabbapaṭhamaṃ tathā akāsīti dasseti. Kimevidanti ‘‘vaṇṇato, gandhato ca tāva ñātaṃ, rasato pana kimevidaṃ bhavissatī’’ti saṃsayajāto vadati. Tiṭṭhatīti aṭṭhāsi.
ཙནྡིམསཱུརིཡཱདིཔཱཏུབྷཱཝཝཎྞནཱ
Candimasūriyādipātubhāvavaṇṇanā
༡༢༡. ཨཱལུཔྤཀཱརཀནྟི ཨེཏྠ ཨཱལོཔཔརིཡཱཡོ ཨཱལུཔྤ-སདྡོཏི ཨཱཧ ‘‘ཨཱལོཔཾ ཀཏྭཱ’’ཏི། པཙྩཀྑབྷཱུཏཱནམྤི ཙནྡིམསཱུརིཡཱནཾ པཝཏྟིཡཾ ལོཀིཡཱནཾ སམྨོཧོ ཧོཏི, ཏཾ ཝིདྷམིཏུཾ ‘‘ཀོ པན ཏེས’’ནྟིཨཱདིནཱ ཨཊྛ པཉྷཱཝིསྶཛྫནཱནི གཧིཏཱནི། ཏཏྠ ཏེསནྟི ཙནྡིམསཱུརིཡཱནཾ། ཀསྨིནྟི ཀསྨིཾ ཋཱནེ། ‘‘ཀོ ཨུཔརཱི’’ཏི ཨེཏེནེཝ ཀོ ཧེཊྛཱཏི ཨཡམཏྠོ ཝུཏྟོཡེཝ། ཏཐཱ ‘‘ཀོ སཱིགྷཾ གཙྪཏཱི’’ཏི ཨིམིནཱ ཀོ སཎིཀཾ གཙྪཏཱིཏི ཨཡམྤི ཨཏྠོ ཝུཏྟོཡེཝ། ཝཱིཐིཡོཏི གམནཝཱིཐིཡོ། ཨེཀཏོཏི ཨེཀསྨིཾ ཁཎེ པཱཏུབྷཝནྟི། སཱུརིཡམཎྜལེ པན ཨཏྠངྒཏེ ཙནྡམཎྜལཾ པཉྙཱཡིཏྠ། ཚནྡཾ ཉཏྭཱ ཝཱཏི རུཙིཾ ཉཏྭཱ ཝིཡ།
121.Āluppakārakanti ettha ālopapariyāyo āluppa-saddoti āha ‘‘ālopaṃ katvā’’ti. Paccakkhabhūtānampi candimasūriyānaṃ pavattiyaṃ lokiyānaṃ sammoho hoti, taṃ vidhamituṃ ‘‘ko pana tesa’’ntiādinā aṭṭha pañhāvissajjanāni gahitāni. Tattha tesanti candimasūriyānaṃ. Kasminti kasmiṃ ṭhāne. ‘‘Ko uparī’’ti eteneva ko heṭṭhāti ayamattho vuttoyeva. Tathā ‘‘ko sīghaṃ gacchatī’’ti iminā ko saṇikaṃ gacchatīti ayampi attho vuttoyeva. Vīthiyoti gamanavīthiyo. Ekatoti ekasmiṃ khaṇe pātubhavanti. Sūriyamaṇḍale pana atthaṅgate candamaṇḍalaṃ paññāyittha. Chandaṃ ñatvā vāti ruciṃ ñatvā viya.
ཨུབྷཡནྟི ཨནྟོ, བཧི ཙ།
Ubhayanti anto, bahi ca.
ཨུཛུཀནྟི ཨཱཡཱམཏོ, ཝིཏྠཱརཏོ, ཨུབྦེདྷཏོ ཙ། པརིམཎྜལཏོཏི པརིཀྑེཔཏོ།
Ujukanti āyāmato, vitthārato, ubbedhato ca. Parimaṇḍalatoti parikkhepato.
ཨུཛུཀཾ སཎིཀཾ གཙྪཏི ཨམཱཝཱསིཡཾ སཱུརིཡེན སདྡྷིཾ གཙྪནྟོ དིཝསེ དིཝསེ ཐོཀཾ ཐོཀཾ ཨོཧཱིཡནྟོ པུཎྞམཱསིཡཾ ཨུཔཌྜྷམགྒམེཝ ཨོཧཱིཡནཏོ། ཏིརིཡཾ སཱིགྷཾ གཙྪཏི ཨེཀསྨིམྤི མཱསེ ཀདཱཙི དཀྑིཎཏོ, ཀདཱཙི ཨུཏྟརཏོ དསྶནཏོ། ‘‘དྭཱིསུ པསྶེསཱུ’’ཏི ཨིདཾ ཡེབྷུཡྻཝསེན ཝུཏྟཾ། ཙནྡསྶ པུརཏོ, པཙྪཏོ, སམཉྩ ཏཱརཀཱ གཙྪནྟིཡེཝ། ཨཏྟནོ ཋཱནནྟི ཨཏྟནོ གམནཊྛཱནཾ། ན ཝིཛཧནྟི ཨཏྟནོ ཝཱིཐིཡཱཝ གཙྪནཏོ། སཱུརིཡསྶ ཨུཛུཀཾ གམནསྶ སཱིགྷཏཱ ཙནྡསྶ གམནཾ ཨུཔཱདཱཡ ཝེདིཏབྦཱ། ཏིརིཡཾ གམནཾ དཀྑིཎདིསཏོ ཨུཏྟརདིསཱཡ, ཨུཏྟརདིསཏོ ཙ དཀྑིཎདིསཱཡ གམནཾ དནྡྷཾ ཚཧི ཚཧི མཱསེཧི ཨིཛ྄ཛྷནཏོ། སོཏི སཱུརིཡོ། ཀཱལ༹པཀྑཨུཔོསཐཏོཏི ཀཱལ༹པཀྑེ ཨུཔོསཐེ ཙནྡེན སཧེཝ གནྟྭཱ ཏཏོ པརཾ། པཱཊིཔདདིཝསེཏི སུཀྐཔཀྑཔཱཊིཔདདིཝསེ། ཨོཧཱཡ གཙྪཏི ཨཏྟནོ སཱིགྷགཱམིཏཱཡ, ཏསྶ ཙ དནྡྷགཱམིཏཱཡ། ལེཁཱ ཝིཡ པཉྙཱཡཏི པཙྪིམདིསཱཡཾ། ཡཱཝ ཨུཔོསཐདིཝསཱཏི ཡཱཝ སུཀྐཔཀྑཨུཔོསཐདིཝསཱ། ‘‘ཙནྡོ ཨནུཀྐམེན ཝཌྜྷིཏྭཱ’’ཏི ཨིདཾ ཨུཔརིབྷཱགཏོ པཏིཏསཱུརིཡཱལོཀཏཱཡ ཧེཊྛཏོ པཝཏྟཱཡ སཱུརིཡསྶ དཱུརབྷཱཝེན དིཝསེ དིཝསེ ཨནུཀྐམེན པརིཧཱཡམཱནཱཡ ཨཏྟནོ ཚཱཡཱཡ ཝསེན ཨནུཀྐམེན ཙནྡམཎྜལཔྤདེསསྶ ཝཌྜྷམཱནསྶ ཝིཡ དིསྶམཱནཏཱཡ ཝུཏྟཾ, ཏསྨཱ ཨནུཀྐམེན ཝཌྜྷིཏྭཱ ཝིཡ། ཨུཔོསཐདིཝསེ པུཎྞམཱཡཾ པརིཔུཎྞོ ཧོཏི, པརིཔུཎྞམཎྜལོ ཧུཏྭཱ དིསྶཏཱིཏི ཨཏྠོ། དྷཱཝིཏྭཱ གཎྷཱཏི ཙནྡསྶ དནྡྷགཏིཏཱཡ, ཨཏྟནོ ཙ སཱིགྷགཏིཏཱཡ། ཨནུཀྐམེན ཧཱཡིཏྭཱཏི ཨེཏྠ ‘‘ཨནུཀྐམེན ཝཌྜྷིཏྭཱ’’ཏི ཨེཏྠ ཝུཏྟནཡེན ཨཏྠོ ཝེདིཏབྦོ། ཏཏྠ པན ཚཱཡཱཡ ཧཱཡམཱནཏཱཡ མཎྜལཾ ཝཌྜྷམཱནཾ ཝིཡ དིསྶཏི, ཨིདྷ ཚཱཡཱཡ ཝཌྜྷམཱནཏཱཡ མཎྜལཾ ཧཱཡམཱནཾ ཝིཡ དིསྶཏི།
Ujukaṃ saṇikaṃ gacchati amāvāsiyaṃ sūriyena saddhiṃ gacchanto divase divase thokaṃ thokaṃ ohīyanto puṇṇamāsiyaṃ upaḍḍhamaggameva ohīyanato. Tiriyaṃ sīghaṃ gacchati ekasmimpi māse kadāci dakkhiṇato, kadāci uttarato dassanato. ‘‘Dvīsu passesū’’ti idaṃ yebhuyyavasena vuttaṃ. Candassa purato, pacchato, samañca tārakā gacchantiyeva. Attano ṭhānanti attano gamanaṭṭhānaṃ. Na vijahanti attano vīthiyāva gacchanato. Sūriyassa ujukaṃ gamanassa sīghatā candassa gamanaṃ upādāya veditabbā. Tiriyaṃ gamanaṃ dakkhiṇadisato uttaradisāya, uttaradisato ca dakkhiṇadisāya gamanaṃ dandhaṃ chahi chahi māsehi ijjhanato. Soti sūriyo. Kāḷapakkhauposathatoti kāḷapakkhe uposathe candena saheva gantvā tato paraṃ. Pāṭipadadivaseti sukkapakkhapāṭipadadivase. Ohāya gacchati attano sīghagāmitāya, tassa ca dandhagāmitāya. Lekhāviya paññāyati pacchimadisāyaṃ. Yāva uposathadivasāti yāva sukkapakkhauposathadivasā. ‘‘Cando anukkamena vaḍḍhitvā’’ti idaṃ uparibhāgato patitasūriyālokatāya heṭṭhato pavattāya sūriyassa dūrabhāvena divase divase anukkamena parihāyamānāya attano chāyāya vasena anukkamena candamaṇḍalappadesassa vaḍḍhamānassa viya dissamānatāya vuttaṃ, tasmā anukkamena vaḍḍhitvā viya. Uposathadivase puṇṇamāyaṃ paripuṇṇo hoti, paripuṇṇamaṇḍalo hutvā dissatīti attho. Dhāvitvā gaṇhāti candassa dandhagatitāya, attano ca sīghagatitāya. Anukkamena hāyitvāti ettha ‘‘anukkamena vaḍḍhitvā’’ti ettha vuttanayena attho veditabbo. Tattha pana chāyāya hāyamānatāya maṇḍalaṃ vaḍḍhamānaṃ viya dissati, idha chāyāya vaḍḍhamānatāya maṇḍalaṃ hāyamānaṃ viya dissati.
ཡཱཡ ཝཱིཐིཡཱ སཱུརིཡེ གཙྪནྟེ ཝསྶཝལཱཧཀཱ དེཝཔུཏྟཱ སཱུརིཡཱབྷིཏཱཔསནྟཏྟཱ ཨཏྟནོ ཝིམཱནཏོ ན ནིཀྑམནྟི, ཀཱིལཱ༹པསུཏཱ ཧུཏྭཱ ན ཝིཙརནྟི, ཏདཱ ཀིར སཱུརིཡསྶ ཝིམཱནཾ པཀཏིམགྒཏོ ཨདྷོ ཨོཏརིཏྭཱ ཝིཙརཏི, ཏསྶ ཨོརུཡ྄ཧ ཙརཎེནེཝ ཙནྡཝིམཱནམྤི ཨདྷོ ཨོརུཡ྄ཧ ཙརཏི ཏགྒཏིཀཏྟཱ, ཏསྨཱ སཱ ཝཱིཐི ཨུདཀཱབྷཱཝེན ཨཛཱནུརཱུཔཏཱཡ ‘‘ཨཛཝཱིཐཱི’’ཏི སམཉྙཾ གཏཱ། ཡཱཡ པན ཝཱིཐིཡཱ སཱུརིཡེ གཙྪནྟེ ཝསྶཝལཱཧཀཱ དེཝཔུཏྟཱ སཱུརིཡཱབྷིཏཱཔཱབྷཱཝཏོ ཨབྷིཎྷཾ ཨཏྟནོ ཝིམཱནཏོ བཧི ནིཀྑམིཏྭཱ ཀཱིལཱ༹པསུཏཱ ཨིཏོ ཙིཏོ ཙ ཝིཙརནྟི, ཏདཱ ཀིར སཱུརིཡཝིམཱནཾ པཀཏིམགྒཏོ ཨུདྡྷཾ ཨཱརུཧིཏྭཱ ཝིཙརཏི, ཏསྶ ཨུདྡྷཾ ཨཱརུཡ྄ཧ ཙརཎེནེཝ ཙནྡཝིམཱནམྤི ཨུདྡྷཾ ཨཱརུཡ྄ཧ ཙརཏི ཏགྒཏིཀཏྟཱ, ཏགྒཏིཀཏཱ ཙ སམཱནགཏིནཱ ཝཱཏམཎྜལེན ཝིམཱནསྶ ཕེལླིཏབྦཏྟཱ, ཏསྨཱ སཱ ཝཱིཐི ཨུདཀབཧུབྷཱཝེན ནཱགཱནུརཱུཔཏཱཡ ‘‘ནཱགཝཱིཐཱི’’ཏི སམཉྙཾ གཏཱ། ཡདཱ སཱུརིཡོ ཨུདྡྷམནཱརུཧནྟོ, ཨདྷོ ཙ ཨནོཏརནྟོ པཀཏིམགྒེནེཝ གཙྪཏི, ཏདཱ ཝསྶཝལཱཧཀཱ ཡཐཱཀཱལཾ, ཡཐཱརུཙི ཙ ཝིམཱནཏོ ནིཀྑམིཏྭཱ སུཁེན ཝིཙརནྟི, ཏེན ཀཱལེན ཀཱལཾ ཝསྶནཏོ ལོཀེ ཨུཏུསམཏཱ ཧོཏི, ཏཱཡ ཨུཏུསམཏཱཡ ཧེཏུབྷཱུཏཱཡ སཱ ཙནྡིམསཱུརིཡཱནཾ གཏི གཝཱནུརཱུཔཏཱཡ ‘‘གོཝཱིཐཱི’’ཏི སམཉྙཾ གཏཱ། ཏེན ཝུཏྟཾ ‘‘ཨཛཝཱིཐཱི’’ཏིཨཱདི།
Yāya vīthiyā sūriye gacchante vassavalāhakā devaputtā sūriyābhitāpasantattā attano vimānato na nikkhamanti, kīḷāpasutā hutvā na vicaranti, tadā kira sūriyassa vimānaṃ pakatimaggato adho otaritvā vicarati, tassa oruyha caraṇeneva candavimānampi adho oruyha carati taggatikattā, tasmā sā vīthi udakābhāvena ajānurūpatāya ‘‘ajavīthī’’ti samaññaṃ gatā. Yāya pana vīthiyā sūriye gacchante vassavalāhakā devaputtā sūriyābhitāpābhāvato abhiṇhaṃ attano vimānato bahi nikkhamitvā kīḷāpasutā ito cito ca vicaranti, tadā kira sūriyavimānaṃ pakatimaggato uddhaṃ āruhitvā vicarati, tassa uddhaṃ āruyha caraṇeneva candavimānampi uddhaṃ āruyha carati taggatikattā, taggatikatā ca samānagatinā vātamaṇḍalena vimānassa phellitabbattā, tasmā sā vīthi udakabahubhāvena nāgānurūpatāya ‘‘nāgavīthī’’ti samaññaṃ gatā. Yadā sūriyo uddhamanāruhanto, adho ca anotaranto pakatimaggeneva gacchati, tadā vassavalāhakā yathākālaṃ, yathāruci ca vimānato nikkhamitvā sukhena vicaranti, tena kālena kālaṃ vassanato loke utusamatā hoti, tāya utusamatāya hetubhūtāya sā candimasūriyānaṃ gati gavānurūpatāya ‘‘govīthī’’ti samaññaṃ gatā. Tena vuttaṃ ‘‘ajavīthī’’tiādi.
ཨེཝཾ ‘‘ཀཏི ནེསཾ ཝཱིཐིཡོ’’ཏི པཉྷཾ ཝིསྶཛྫེཏྭཱ ‘‘ཀཐཾ ཝིཙརནྟཱི’’ཏི པཉྷཾ ཝིསྶཛྫེཏུཾ ‘‘ཙནྡིམསཱུརིཡཱ’’ཏིཨཱདི ཝུཏྟཾ། ཏཏྠ སིནེརུཏོ བཧི ནིཀྑམནྟཱིཏི སིནེརུསམཱིཔེན ཏཾ པདཀྑིཎཾ ཀཏྭཱ གཙྪནྟཱ ཏཏོ གམནཝཱིཐིཏོ བཧི ཨཏྟནོ ཏིརིཡགམནེན ཙཀྐཝཱལཱ༹བྷིམུཁཱ ནིཀྑམནྟི། ཨནྟོ ཝིཙརནྟཱིཏི ཨེཝཾ ཚ མཱསེ ཁཎེ ཁཎེ སིནེརུཏོ ཨཔསཀྐནཝསེན ཏཏོ ནིཀྑམིཏྭཱ ཙཀྐཝཱལ༹སམཱིཔཾ པཏྟཱ, ཏཏོཔི ཚ མཱསེ ཁཎེ ཁཎེ ཨཔསཀྐནཝསེན ནིཀྑམིཏྭཱ སིནེརུསམཱིཔཾ པཱཔུཎནྟཱ ཨནྟོ ཝིཙརནྟི། ཨིདཱནི ཏམེཝཏྠཾ སངྑེཔེན ཝུཏྟཾ ཝིཝརིཏུཾ ‘‘ཏེཧཱི’’ཏིཨཱདི ཝུཏྟཾ། སིནེརུསྶ, ཙཀྐཝཱལ༹སྶ ཙ ཡཾ ཋཱནཾ ཝེམཛ྄ཛྷཾ, ཏསྶ, སིནེརུསྶ ཙ ཡཾ ཋཱནཾ ཝེམཛ྄ཛྷཾ, ཏེན གཙྪནྟཱ ‘‘སིནེརུསམཱིཔེན ཝིཙརནྟཱི’’ཏི ཝུཏྟཱ, ན སིནེརུསྶ ཨགྒཱལི༹ནྡཨལླཱིནཱ། ཙཀྐཝཱལ༹སམཱིཔེན ཙརིཏྭཱཏི ཨེཏྠཱཔི ཨེསེཝ ནཡོ། མཛ྄ཛྷེནཱཏི སིནེརུསྶ, ཙཀྐཝཱལ༹སྶ ཙ ཨུཛུཀཾ ཝེམཛ྄ཛྷེན མགྒེན། ཙིཏྲམཱསེ མཛ྄ཛྷེནཱཏི ཨེཏྠཱཔི ཨེསེཝ ནཡོ།
Evaṃ ‘‘kati nesaṃ vīthiyo’’ti pañhaṃ vissajjetvā ‘‘kathaṃ vicarantī’’ti pañhaṃ vissajjetuṃ ‘‘candimasūriyā’’tiādi vuttaṃ. Tattha sineruto bahi nikkhamantīti sinerusamīpena taṃ padakkhiṇaṃ katvā gacchantā tato gamanavīthito bahi attano tiriyagamanena cakkavāḷābhimukhā nikkhamanti. Anto vicarantīti evaṃ cha māse khaṇe khaṇe sineruto apasakkanavasena tato nikkhamitvā cakkavāḷasamīpaṃ pattā, tatopi cha māse khaṇe khaṇe apasakkanavasena nikkhamitvā sinerusamīpaṃ pāpuṇantā anto vicaranti. Idāni tamevatthaṃ saṅkhepena vuttaṃ vivarituṃ ‘‘tehī’’tiādi vuttaṃ. Sinerussa, cakkavāḷassa ca yaṃ ṭhānaṃ vemajjhaṃ, tassa, sinerussa ca yaṃ ṭhānaṃ vemajjhaṃ, tena gacchantā ‘‘sinerusamīpenavicarantī’’ti vuttā, na sinerussa aggāḷindaallīnā. Cakkavāḷasamīpena caritvāti etthāpi eseva nayo. Majjhenāti sinerussa, cakkavāḷassa ca ujukaṃ vemajjhena maggena. Citramāse majjhenāti etthāpi eseva nayo.
ཨེཀཔྤཧཱརེནཱཏི ཨེཀཝེལཱཡ, ཨེཀེནེཝ ཝཱ ཨཏྟནོ ཨེཀཔྤཧཱརེན། མཛ྄ཛྷནྷིཀོཏི ཋིཏམཛ྄ཛྷནྷིཀོ ཀཱལོ ཧོཏི། ཏདཱ ཧི སཱུརིཡམཎྜལཾ ཨུགྒཙྪནྟཾ ཧུཏྭཱཔི ཨིམསྨིཾ དཱིཔེ ཋིཏསྶ ཨུཔཌྜྷམེཝ དིསྶཏི, ཨུཏྟརཀུརཱུསུ ཋིཏསྶ ཨོགཙྪནྟཾ ཧུཏྭཱ། ཨེཝཉྷི ཨེཀཝེལཱཡམེཝ ཏཱིསུ དཱིཔེསུ ཨཱལོཀཀརཎཾ།
Ekappahārenāti ekavelāya, ekeneva vā attano ekappahārena. Majjhanhikoti ṭhitamajjhanhiko kālo hoti. Tadā hi sūriyamaṇḍalaṃ uggacchantaṃ hutvāpi imasmiṃ dīpe ṭhitassa upaḍḍhameva dissati, uttarakurūsu ṭhitassa ogacchantaṃ hutvā. Evañhi ekavelāyameva tīsu dīpesu ālokakaraṇaṃ.
ཡེསུ ཀཏྟིཀཱདིནཀྑཏྟསམཉྙཱ, ཏཱནིཔི ཏཱརཀརཱུཔཱནི ཡེཝཱཏི ཝུཏྟཾ ‘‘སེསཏཱརཀརཱུཔཱནི ཙཱ’’ཏི, ནཀྑཏྟསཉྙིཏཏཱརཀརཱུཔཏོ ཨཝསིཊྛཏཱརཀརཱུཔཱནཱིཏི ཨཏྠོ། ཨུབྷཡཱནིཔི ཏཱནི དེཝཏཱནཾ ཝསནཀཝིམཱནཱནཱིཏི ཝེདིཏབྦཱནི། རཱ-སདྡོ ཏིཡཏི ཚིཛྫཏི ཨེཏྠཱཏི རཏྟི, སཏྟཱནཾ སདྡསྶ ཝཱུཔསམནཀཱལོཏི ཨཏྠོ། དིབྦནྟི སཏྟཱ ཀཱིལ༹ནྟི ཛོཏནྟི ཨེཏྠཱཏི དིཝཱ། སཏྟཱནཾ ཨཱཡུཾ མིནནྟོ ཝིཡ སིཡཏི ཨནྟཾ ཀརོཏཱིཏི མཱསོ། ཏཾ ཏཾ ཀིརིཡཾ ཨརཏི ཝཏྟེཏཱིཏི ཨུཏུ། ཏཾ ཏཾ སཏྟཾ, དྷམྨཔྤཝཏྟིཉྩ སངྒམྨ ཝདནྟོ ཝིཡ སརཏི ཝཏྟེཏཱིཏི སཾཝཙྪརོ།
Yesu kattikādinakkhattasamaññā, tānipi tārakarūpāni yevāti vuttaṃ ‘‘sesatārakarūpāni cā’’ti, nakkhattasaññitatārakarūpato avasiṭṭhatārakarūpānīti attho. Ubhayānipi tāni devatānaṃ vasanakavimānānīti veditabbāni. Rā-saddo tiyati chijjati etthāti ratti, sattānaṃ saddassa vūpasamanakāloti attho. Dibbanti sattā kīḷanti jotanti etthāti divā. Sattānaṃ āyuṃ minanto viya siyati antaṃ karotīti māso. Taṃ taṃ kiriyaṃ arati vattetīti utu. Taṃ taṃ sattaṃ, dhammappavattiñca saṅgamma vadanto viya sarati vattetīti saṃvaccharo.
༡༢༢. ཝིཝཛྫནཾ ཝིཝཛྫོ, སོ ཨེཝ ཝེཝཛྫཾ, ཝཎྞསྶ ཝེཝཛྫཾ ཝཎྞཝེཝཛྫཾ, ཝཎྞསམྤཏྟིཡཱ ཝིགམོ, ཏསྶ པན ཨཏྠིཏཱ ‘‘ཝཎྞཝེཝཛྫཏཱ’’ཏི ཝུཏྟཱ། ཏེནཱཧ ‘‘ཝིཝཛྫབྷཱཝོ’’ཏི། ཏེསནྟི ཝཎྞཝནྟཱནཾ སཏྟཱནཾ། ཨཏིམཱནཔྤཙྩཡཱཏི དུབྦཎྞཝམྦྷནཝསེན ཨཏིཀྐམྨ ཨཏྟནོ ཝཎྞཾ པཊིཙྩ མཱནཔཙྩཡཱ, མཱནསམྤགྒཎྷནནིམིཏྟནྟི ཨཏྠོ། སཱཏིསཡོ རསོ ཨེཏིསྶཱ ཨཏྠཱིཏི རསཱཏི ལདྡྷམཱནཱཡ, ཨནུབྷཱསིཾསཱུཏི ཨནུརོདྷཝསེན བྷཱསིཾསུ། ལོཀུཔྤཏྟིཝཾསཀཐནྟི ལོཀུཔྤཏྟིཝཾསཛཾ པཝེཎཱིཀཐཾ, ཨཱདིཀཱལེ ཨུཔྤནྣཾ པཝེཎཱིཨཱགཏཀཐནྟི ཨཏྠོ། ‘‘ཨནུཔཏནྟཱི’’ཏིཔི པཱཋོ, སོ ཨེཝཏྠོ།
122. Vivajjanaṃ vivajjo, so eva vevajjaṃ, vaṇṇassa vevajjaṃ vaṇṇavevajjaṃ, vaṇṇasampattiyā vigamo, tassa pana atthitā ‘‘vaṇṇavevajjatā’’ti vuttā. Tenāha ‘‘vivajjabhāvo’’ti. Tesanti vaṇṇavantānaṃ sattānaṃ. Atimānappaccayāti dubbaṇṇavambhanavasena atikkamma attano vaṇṇaṃ paṭicca mānapaccayā, mānasampaggaṇhananimittanti attho. Sātisayo raso etissā atthīti rasāti laddhamānāya, anubhāsiṃsūti anurodhavasena bhāsiṃsu. Lokuppattivaṃsakathanti lokuppattivaṃsajaṃ paveṇīkathaṃ, ādikāle uppannaṃ paveṇīāgatakathanti attho. ‘‘Anupatantī’’tipi pāṭho, so evattho.
བྷཱུམིཔཔྤཊཀཔཱཏུབྷཱཝཱདིཝཎྞནཱ
Bhūmipappaṭakapātubhāvādivaṇṇanā
༡༢༣. ཨེདིསོ ཧུཏྭཱཏི ཨཧིཙྪཏྟཀསདིསོ ཧུཏྭཱ།
123.Ediso hutvāti ahicchattakasadiso hutvā.
༡༢༤. པདཱལཏཱཏི ‘‘པདཱ’’ཏི ཨེཝཾནཱམཱ ཨེཀཱ ལཏཱ, སཱ པན ཡསྨཱ སམྤནྣཝཎྞགནྡྷརསཱ, ཏསྨཱ ‘‘བྷདྡལཏཱ’’ཏི ཝུཏྟཱ། ནཱལི༹ཀཱཏི ནཱལི༹ཝལླི། ཨཧཱཡཱིཏི ནསྶི།
124.Padālatāti ‘‘padā’’ti evaṃnāmā ekā latā, sā pana yasmā sampannavaṇṇagandharasā, tasmā ‘‘bhaddalatā’’ti vuttā. Nāḷikāti nāḷivalli. Ahāyīti nassi.
༡༢༥. ཨཀཊྛཔཱཀོཏི ཨཀཊྛེཡེཝ ཋཱནེ ཨུཔྤཛྫིཏྭཱ པཙྩནཀོ, ནཱིཝཱརོ ཝིཡ སཉྫཱཏོ ཧུཏྭཱ ནིཔྤཛྫནཀོཏི ཨཏྠོ། ཀཎོ ‘‘ཀུཎྜཀ’’ནྟི ཙ ཝུཙྩཏི། ཐུསནྟི ཏཎྜུལཾ པརིཡོནནྡྷིཏྭཱ ཋིཏཏྟཙོ, ཏདབྷཱཝཏོ ‘‘ཨཀཎོ, ཨཐུསོ’’ཏི སཱལི ཝུཏྟོ། ‘‘པཊིཝིརཱུལ༹ྷ’’ནྟི ཨིདཾ པཀྐབྷཱཝསྶ ཀཱརཎཝཙནཾ། པཊིཝིརཱུལ༹ྷཏོ ཧི ཏཾ པཀྐནྟི། ཡསྨིཾ ཋཱནེ སཱཡཾ པཀྐོ སཱལི གཧིཏོ, ཏདེཝ ཋཱནཾ དུཏིཡདིཝསེ པཱཏོ པཀྐེན སཱལིནཱ པརིཔུཎྞཾ ཧུཏྭཱ ཏིཊྛཏཱིཏི ཨཱཧ ‘‘སཱཡཾ གཧིཏཊྛཱནཾ པཱཏོ པཀྐཾ ཧོཏཱི’’ཏིཨཱདི། ཨལཱཡིཏནྟི ལཱཡིཏཊྛཱནམྤི ཏེསཾ ཀམྨཔྤཙྩཡཱ ཨལཱཡིཏམེཝ ཧུཏྭཱ ཨནཱུནཾ པརིཔུཎྞམེཝ པཉྙཱཡཏི, ན ཀེཝལཾ པཉྙཱཡནམེཝ, ཨཐ ཁོ ཏཐཱབྷཱུཏམེཝ ཧུཏྭཱ ཏིཊྛཏི།
125.Akaṭṭhapākoti akaṭṭheyeva ṭhāne uppajjitvā paccanako, nīvāro viya sañjāto hutvā nippajjanakoti attho. Kaṇo ‘‘kuṇḍaka’’nti ca vuccati. Thusanti taṇḍulaṃ pariyonandhitvā ṭhitattaco, tadabhāvato ‘‘akaṇo, athuso’’ti sāli vutto. ‘‘Paṭivirūḷha’’nti idaṃ pakkabhāvassa kāraṇavacanaṃ. Paṭivirūḷhato hi taṃ pakkanti. Yasmiṃ ṭhāne sāyaṃ pakko sāli gahito, tadeva ṭhānaṃ dutiyadivase pāto pakkena sālinā paripuṇṇaṃ hutvā tiṭṭhatīti āha ‘‘sāyaṃ gahitaṭṭhānaṃ pāto pakkaṃ hotī’’tiādi. Alāyitanti lāyitaṭṭhānampi tesaṃ kammappaccayā alāyitameva hutvā anūnaṃ paripuṇṇameva paññāyati, na kevalaṃ paññāyanameva, atha kho tathābhūtameva hutvā tiṭṭhati.
ཨིཏྠིཔུརིསལིངྒཱདིཔཱཏུབྷཱཝཝཎྞནཱ
Itthipurisaliṅgādipātubhāvavaṇṇanā
༡༢༦. ‘‘མནུསྶཀཱལེ’’ཏི ཨིདཾ པུབྦེ མནུསྶབྷཱུཏཱནཾཡེཝ ཏཏྠ ཨིདཱནི ནིཀནྟིཝསེན ཨུཔྤཏྟི ཧོཏཱིཏི ཀཏྭཱ ཝུཏྟཾ, དེཝཏཱནམྤི པུརིམཛཱཏིཡཾ ཨིཏྠིབྷཱཝེ ཋིཏཱནཾ ཏཏྠ ཝིརཱགཱདིཔུརིསཏྟཔྤཙྩཡེ ཨསཏི ཏདཱ ཨིཏྠིལིངྒམེཝ པཱཏུབྷཝཏི། པུརིསཏྟཔཙྩཡེཏི ‘‘ཨཏྟནོཔི ཨནིསྶརཏཱ, སབྦཀཱལཾ པརཱཡཏྟཝུཏྟིཏཱ, རཛསྶལཏཱ ཝཉྩཏཱ, གབྦྷདྷཱརཎཾ, པཋམཱཡ པཀཏིཡཱ ནིཧཱིནཔཀཏིཏཱ, སཱུརཝཱིརཏཱབྷཱཝོ, ‘ཨཔྤཀཱ ཛནཱ’ཏི ‘ཧཱིལེ༹ཏབྦཏཱ’ཏི ཨེཝམཱདི ཨཱདཱིནཝཔཙྩཝེཀྑཎཔུབྦཀམྤི ཨིཏྠིབྷཱཝེ ‘ཨལཾ ཨིཏྠིབྷཱཝེན, ན ཧི ཨིཏྠིབྷཱཝེ ཋཏྭཱ ཙཀྐཝཏྟིསིརིཾ, ན སཀྐམཱརབྲཧྨསིརིཡོ པཙྩནུབྷཝིཏུཾ, ན པཙྩེཀབོདྷིཾ, ན སམྨཱསམྦོདྷིཾ ཨདྷིགནྟུཾ སཀྐཱ’ཏི ཨེཝཾ ཨིཏྠིབྷཱཝཝིརཛྫནཾ, ‘ཡཐཱཝུཏྟཨཱདཱིནཝཝིརཧཏོ ཨུཏྟམཔཀཏིབྷཱཝཏོ སམྤདམིདཾ པུརིསཏྟཾ ནཱམ སེཊྛཾ ཨུཏྟམཾ, ཨེཏྠ ཋཏྭཱ སཀྐཱ ཨེཏཱ སམྤཏྟིཡོ སམྤཱཔུཎིཏུ’ནྟི ཨེཝཾ པུརིསཏྟབྷཱཝེ སམྦྷཱཝནཱཔུབྦཀཾ པཏྠནཱཋཔནཾ, ‘ཏཏྠ ནིནྣཔོཎཔབྦྷཱརཙིཏྟཏཱ’ཏི’’ ཨེཝམཱདིཀེ པུརིསབྷཱཝསྶ པཙྩཡབྷཱུཏེ དྷམྨེ། པཱུརེཏྭཱ ཝཌྜྷེཏྭཱ། པཙྩཀྑཾ བྷཱུཏཾ, སདིསཉྩ དིཊྛདྷམྨིཀཾ, སམྤརཱཡིཀཉྩ སུཝིཔུལཾ ཨནཏྠཾ ཨཙིནྟེཏྭཱ པུརིསསྶ ཀཱམེསུ མིཙྪཱཙརཎཾ ཀེཝལཾ ཨིཏྠིཡཾ ཨཱསཱཔཏྟི ཕལེནེཝཱཏི ཨཱསཱཨཱཔཏྟི ཨིཏྠིབྷཱཝཱཝཧཱཔི ཧོཏིཡེཝ། ཏནྣིནྣཔོཎཔབྦྷཱརབྷཱཝེན ཏནྣིཀནྟིཡཱ ནིམིཏྟབྷཱཝཱཔཏྟིཏོཏི ཝུཏྟཾ ‘‘པུརིསོ ཨིཏྠཏྟབྷཱཝཾ ལབྷནྟོ ཀཱམེསུམིཙྪཱཙཱརཾ ནིསྶཱཡ ལབྷཏཱི’’ཏི། ཏདཱཏི ཡཐཱཝུཏྟེ པཋམཀཔྤིཀཀཱལེ། པཀཏིཡཱཏི སབྷཱཝེན། མཱཏུགཱམསྶཱཏི པུརིམཏྟབྷཱཝེ མཱཏུགཱམབྷཱུཏསྶ། པུརིསསྶཱཏི ཨེཏྠཱཔི ‘‘པཀཏིཡཱ’’ཏི པདཾ ཨཱནེཏྭཱ སམྦནྡྷིཏབྦཾ། ཨུཔནིཛ྄ཛྷཱཡཏནྟི ཨུཔེཙྩ ནིཛ྄ཛྷཱཡནྟཱནཾ། ཡཐཱ ཨཉྙམཉྙསྨིཾ སཱརཱགོ ཨུཔྤཛྫཏི, ཨེཝཾ སཱཔེཀྑབྷཱཝེན ཨོལོཀེནྟཱནཾ། རཱགཔརིལཱ༹ཧོཏི རཱགཛོ པརིལཱ༹ཧོ།
126.‘‘Manussakāle’’ti idaṃ pubbe manussabhūtānaṃyeva tattha idāni nikantivasena uppatti hotīti katvā vuttaṃ, devatānampi purimajātiyaṃ itthibhāve ṭhitānaṃ tattha virāgādipurisattappaccaye asati tadā itthiliṅgameva pātubhavati. Purisattapaccayeti ‘‘attanopi anissaratā, sabbakālaṃ parāyattavuttitā, rajassalatā vañcatā, gabbhadhāraṇaṃ, paṭhamāya pakatiyā nihīnapakatitā, sūravīratābhāvo, ‘appakā janā’ti ‘hīḷetabbatā’ti evamādi ādīnavapaccavekkhaṇapubbakampi itthibhāve ‘alaṃ itthibhāvena, na hi itthibhāve ṭhatvā cakkavattisiriṃ, na sakkamārabrahmasiriyo paccanubhavituṃ, na paccekabodhiṃ, na sammāsambodhiṃ adhigantuṃ sakkā’ti evaṃ itthibhāvavirajjanaṃ, ‘yathāvuttaādīnavavirahato uttamapakatibhāvato sampadamidaṃ purisattaṃ nāma seṭṭhaṃ uttamaṃ, ettha ṭhatvā sakkā etā sampattiyo sampāpuṇitu’nti evaṃ purisattabhāve sambhāvanāpubbakaṃ patthanāṭhapanaṃ, ‘tattha ninnapoṇapabbhāracittatā’ti’’ evamādike purisabhāvassa paccayabhūte dhamme. Pūretvā vaḍḍhetvā. Paccakkhaṃ bhūtaṃ, sadisañca diṭṭhadhammikaṃ, samparāyikañca suvipulaṃ anatthaṃ acintetvā purisassa kāmesu micchācaraṇaṃ kevalaṃ itthiyaṃ āsāpatti phalenevāti āsāāpatti itthibhāvāvahāpi hotiyeva. Tanninnapoṇapabbhārabhāvena tannikantiyā nimittabhāvāpattitoti vuttaṃ ‘‘puriso itthattabhāvaṃ labhanto kāmesumicchācāraṃ nissāya labhatī’’ti. Tadāti yathāvutte paṭhamakappikakāle. Pakatiyāti sabhāvena. Mātugāmassāti purimattabhāve mātugāmabhūtassa. Purisassāti etthāpi ‘‘pakatiyā’’ti padaṃ ānetvā sambandhitabbaṃ. Upanijjhāyatanti upecca nijjhāyantānaṃ. Yathā aññamaññasmiṃ sārāgo uppajjati, evaṃ sāpekkhabhāvena olokentānaṃ. Rāgapariḷāhoti rāgajo pariḷāho.
ནིབྦུཡ྄ཧམཱནཱཡཱཏི པརིཎཏཱ ཧུཏྭཱ ནིཡྻམཱནཱཡ།
Nibbuyhamānāyāti pariṇatā hutvā niyyamānāya.
མེཐུནདྷམྨསམཱཙཱརཝཎྞནཱ
Methunadhammasamācāravaṇṇanā
༡༢༧. གོམཡཔིཎྜམཏྟམྤི ནཱལཏྠཱཏི སམྨདེཝ ཝིཝཱཧཀམྨཾ ནཱལཏྠཱཏི ཨདྷིཔྤཱཡེན ཝདནྟི། པཱཏབྱཏནྟི ཏསྨིཾ ཨསདྡྷམྨེ ཀིལེསཀཱམེན པིཝིཏབྦཏཾ ཀིཉྩི པིཝིཏབྦཝཏྠུཾ པིཝནྟཱ ཝིཡ ཨཏིཝིཡ ཏོསེཏྭཱ པརིབྷུཉྫིཏབྦཏཾ ཨཱཔཛྫིཾསུ, པཱཏབྱཏནྟི ཝཱ པརིབྷུཉྫནཀཏཾ ཨཱཔཛྫིཾསུ ཨུཔགཙྪིཾསུ། པརིབྷོགཏྠོ ཧི ཨཡཾ པཱ-སདྡོ, ཀཏྟུསཱདྷནོ ཙ ཏབྱ-སདྡོ, ཡཐཱརུཙི པརིབྷུཉྫིཾསཱུཏི ཨཏྠོ།
127.Gomayapiṇḍamattampi nālatthāti sammadeva vivāhakammaṃ nālatthāti adhippāyena vadanti. Pātabyatanti tasmiṃ asaddhamme kilesakāmena pivitabbataṃ kiñci pivitabbavatthuṃ pivantā viya ativiya tosetvā paribhuñjitabbataṃ āpajjiṃsu, pātabyatanti vā paribhuñjanakataṃ āpajjiṃsu upagacchiṃsu. Paribhogattho hi ayaṃ pā-saddo, kattusādhano ca tabya-saddo, yathāruci paribhuñjiṃsūti attho.
སནྣིདྷིཀཱརཀནྟི སནྣིདྷིཀཱརཾ, ཀ-ཀཱརོ པདཝཌྜྷནམཏྟནྟི ཨཱཧ ‘‘སནྣིདྷིཾ ཀཏྭཱ’’ཏི། ཨཔདཱནནྟི ཨཝཁཎྜནཾ། ཨེཀེཀསྨིཾ ཋཱནེཏི ཡཏྠ ཡཏྠ ཝཧིཏཾ, ཏསྨིཾ ཏསྨིཾ ཨེཀེཀསྨིཾ ཋཱནེ། གུམྦགུམྦཱཏི པུཉྫཔུཉྫཱ།
Sannidhikārakanti sannidhikāraṃ, ka-kāro padavaḍḍhanamattanti āha ‘‘sannidhiṃ katvā’’ti. Apadānanti avakhaṇḍanaṃ. Ekekasmiṃ ṭhāneti yattha yattha vahitaṃ, tasmiṃ tasmiṃ ekekasmiṃ ṭhāne. Gumbagumbāti puñjapuñjā.
སཱལིཝིབྷཱགཝཎྞནཱ
Sālivibhāgavaṇṇanā
༡༢༨. སཱིམཾ ཋཔེཡྻཱམཱཏི ‘‘ཨཡཾ བྷཱུམིབྷཱགོ ཨསུཀསྶ, ཨཡཾ བྷཱུམིབྷཱགོ ཨསུཀསྶཱ’’ཏི ཨེཝཾ པརིཙྪེདཾ ཀརེཡྻཱམ། ཏཾ ཨགྒཾ ཀཏྭཱཏི ཏཾ ཨཱདིཾ ཀཏྭཱ།
128.Sīmaṃ ṭhapeyyāmāti ‘‘ayaṃ bhūmibhāgo asukassa, ayaṃ bhūmibhāgo asukassā’’ti evaṃ paricchedaṃ kareyyāma. Taṃ aggaṃ katvāti taṃ ādiṃ katvā.
མཧཱསམྨཏརཱཛཝཎྞནཱ
Mahāsammatarājavaṇṇanā
༡༣༠. པཀཱསེཏབྦནྟི དོསཝསེན པཀཱསེཏབྦཾ། ཁིཔིཏབྦནྟི ཁེཔཾ ཀཱཏབྦཾ། ཏེནཱཧ ‘‘ཧཱརེཏབྦ’’ནྟི, སཏྟནིཀཱཡཏོ ནཱིཧརིཏབྦཾ།
130.Pakāsetabbanti dosavasena pakāsetabbaṃ. Khipitabbanti khepaṃ kātabbaṃ. Tenāha ‘‘hāretabba’’nti, sattanikāyato nīharitabbaṃ.
ནེསནྟི ནིདྡྷཱརཎེ སཱམིཝཙནཾ།
Nesanti niddhāraṇe sāmivacanaṃ.
༡༣༡. ཨཀྑརནྟི ནིརུཏྟིཾ། སཱ ཧི མཧཱཛནེན སམྨཏོཏི ནིདྡྷཱརེཏྭཱ ཝཏྟབྦཏོ ནིརུཏྟི , ཏསྨིཾཡེཝ ནིརཱུལ༹ྷབྷཱཝཏོ , ཨཉྙཏྠ ཨསཉྩརཎཏོ ཨཀྑརནྟི ཙ ཝུཙྩཏི, ཏཐཱ སངྑཱཏབྦཏོ སངྑཱ, སམཉྙཱཡཏཱིཏི སམཉྙཱ, པཉྙཱཔནཏོ པཉྙཏྟི, ཝོཧརཎཏོ ཝོཧཱརོ། ཨུཔྤནྣོཏི པཝཏྟོ། ན ཀེཝལཾ ཨཀྑརམེཝཱཏི ན ཀེཝལཾ སམཉྙཱཀརཎམེཝ། ཁེཏྟསཱམིནོཏི ཏཾ ཏཾ བྷཱུམིབྷཱགཾ པརིགྒཧེཏྭཱ ཋིཏསཏྟཱ། ཏཱིཧི སངྑེཧཱིཏི ཏིཝིདྷཀིརིཡཱབྷིསངྑཏེཧི ཏཱིཧི སངྑེཧི ཁཏྟིཡཱདཱིཧི ཏཱིཧི ཝཎྞེཧི པརིགྒཧིཏེཧི། ‘‘ཁཏྟིཡཱནུཡནྟབྲཱཧྨཎགཧཔཏིཀནེགམཛཱནཔདེཧི ཏཱིཧི གཧཔཏཱིཧི པརིགྒཧིཏེཧཱི’’ཏི ཙ ཝདནྟི། ཨགྒནྟི ཉཱཏེནཱཏི ཨགྒཾ ཀུལནྟི ཉཱཏེན། ཁཏྟིཡཀུལཉྷི ལོཀེ སབྦསེཊྛཾ། ཡཐཱཧ ‘‘ཁཏྟིཡོ སེཊྛོ ཛནེཏསྨིཾ, ཡེ གོཏྟཔཊིསཱརིནོ’’ཏི, (དཱི॰ ནི॰ ༡.༢༧༧; ༣.༡༤༠; མ॰ ནི॰ ༢.༣༠; སཾ॰ ནི॰ ༡.༡༨༢, ༢༤༥) ཨབྷེདོཔཙཱརེན པན ཨཀྑརསྶ ཁཏྟིཡསདྡསྶཔི སེཊྛཏཱཏི པཱལི༹ཡཾ ‘‘ཨགྒཉྙེན ཨཀྑརེནཱ’’ཏི ཝུཏྟཾ། ཨིདཱནི ཨབྷེདོཔཙཱརེན ཝིནཱ ཨེཝ ཨཏྠཾ དསྶེཏུཾ ‘‘ཨགྒེ ཝཱ’’ཏིཨཱདི ཝུཏྟཾ།
131.Akkharanti niruttiṃ. Sā hi mahājanena sammatoti niddhāretvā vattabbato nirutti , tasmiṃyeva nirūḷhabhāvato , aññattha asañcaraṇato akkharanti ca vuccati, tathā saṅkhātabbato saṅkhā, samaññāyatīti samaññā, paññāpanato paññatti, voharaṇato vohāro. Uppannoti pavatto. Na kevalaṃ akkharamevāti na kevalaṃ samaññākaraṇameva. Khettasāminoti taṃ taṃ bhūmibhāgaṃ pariggahetvā ṭhitasattā. Tīhi saṅkhehīti tividhakiriyābhisaṅkhatehi tīhi saṅkhehi khattiyādīhi tīhi vaṇṇehi pariggahitehi. ‘‘Khattiyānuyantabrāhmaṇagahapatikanegamajānapadehi tīhi gahapatīhi pariggahitehī’’ti ca vadanti. Agganti ñātenāti aggaṃ kulanti ñātena. Khattiyakulañhi loke sabbaseṭṭhaṃ. Yathāha ‘‘khattiyo seṭṭho janetasmiṃ, ye gottapaṭisārino’’ti, (dī. ni. 1.277; 3.140; ma. ni. 2.30; saṃ. ni. 1.182, 245) abhedopacārena pana akkharassa khattiyasaddassapi seṭṭhatāti pāḷiyaṃ ‘‘aggaññena akkharenā’’ti vuttaṃ. Idāni abhedopacārena vinā eva atthaṃ dassetuṃ ‘‘agge vā’’tiādi vuttaṃ.
བྲཱཧྨཎམཎྜལཱདིཝཎྞནཱ
Brāhmaṇamaṇḍalādivaṇṇanā
༡༣༢. ཡེན ཨནཱརམྦྷབྷཱཝེན བཱཧིཏཱཀུསལཱ ‘‘བྲཱཧྨཎཱ’’ཏི ཝུཏྟཱ, ཏམེཝ ཏཱཝ དསྶེཏུཾ པཱལི༹ཡཾ ‘‘ཝཱིཏངྒཱརཱ’’ཏིཨཱདི ཝུཏྟནྟི ཏདཏྠཾ དསྶེནྟོ ‘‘པཙིཏྭཱ’’ཏིཨཱདིམཱཧ། ཏམེནནྟི ཝཙནཝིཔལླཱསེན ནིདྡེསོཏི ཨཱཧ ‘‘ཏེ ཨེཏེ’’ཏི། ཨབྷིསངྑརོནྟཱཏི ཙིཏྟམནྟབྷཱཝེན ཨཉྙམཉྙཾ ཨབྷིཝིསིཊྛེ ཀརོནྟཱ, བྲཱཧྨཎཱཀཔྤབྷཱཝེན སངྑརོནྟཱ ཙ། ཝཱཙེནྟཱཏི པརེསཾ ཀཐེནྟཱ, ཡེ ཏཐཱ གནྠེ ཀཱཏུཾ ན ཛཱནནྟི། ཨཙྪནྟཱིཏི ཨཱསནྟི, ཨུཔཝིསནྟཱིཏི ཨཏྠོ། ཏེནཱཧ ‘‘ཝསནྟཱི’’ཏི། ཨཙྪེནྟཱིཏི ཀཱལཾ ཁེཔེནྟི། ཧཱིནསམྨཏཾ ཛྷཱནབྷཱཝནཱནུཡོགཾ ཚཌྜེཏྭཱ གནྠེ པསུཏཏཱདཱིཔནཏོ། སེཊྛསམྨཏཾ ཛཱཏཾ ‘‘ཝེདདྷརཱ སོཏྟིཡཱ སུབྲཱཧྨཎཱཏི ཨེཝཾ སེཊྛསམྨཏཾ ཛཱཏཾ།
132. Yena anārambhabhāvena bāhitākusalā ‘‘brāhmaṇā’’ti vuttā, tameva tāva dassetuṃ pāḷiyaṃ ‘‘vītaṅgārā’’tiādi vuttanti tadatthaṃ dassento ‘‘pacitvā’’tiādimāha. Tamenanti vacanavipallāsena niddesoti āha ‘‘te ete’’ti. Abhisaṅkharontāti cittamantabhāvena aññamaññaṃ abhivisiṭṭhe karontā, brāhmaṇākappabhāvena saṅkharontā ca. Vācentāti paresaṃ kathentā, ye tathā ganthe kātuṃ na jānanti. Acchantīti āsanti, upavisantīti attho. Tenāha ‘‘vasantī’’ti. Acchentīti kālaṃ khepenti. Hīnasammataṃ jhānabhāvanānuyogaṃ chaḍḍetvā ganthe pasutatādīpanato. Seṭṭhasammataṃ jātaṃ ‘‘vedadharā sottiyā subrāhmaṇāti evaṃ seṭṭhasammataṃ jātaṃ.
༡༣༣. མེཐུནདྷམྨཾ སམཱདིཡིཏྭཱཏི ཛཱཡཱཔཏིཀབྷཱཝེན དྭཡཾ དྭཡཾ ནིཝཱསཾ ཨཛ྄ཛྷུཔགནྟྭཱ། ཝཱཎིཛཀམྨཱདིཀེཏི ཨཱདི-སདྡེན ཀསིཀམྨཱདིཾ སངྒཎྷཱཏི།
133.Methunadhammaṃ samādiyitvāti jāyāpatikabhāvena dvayaṃ dvayaṃ nivāsaṃ ajjhupagantvā. Vāṇijakammādiketi ādi-saddena kasikammādiṃ saṅgaṇhāti.
༡༣༤. ལུདྡཱཙཱརཀམྨཁུདྡཱཙཱརཀམྨུནཱཏི པརཝིཧེཋནཱདིལུདྡཱཙཱརཀམྨུནཱ, ནལ༹ཀཱརདཱརུཀམྨཱདིཁུདྡཱཙཱརཀམྨུནཱ ཙ། སུདྡནྟི ཨེཏྠ སུ-ཨིཏི སཱིགྷཏྠེ ནིཔཱཏོ། དཱ-ཨིཏི གརཧཎཏྠེཏི ཨཱཧ ‘‘སུདྡཾ སུདྡཾ ལཧུཾ ལཧུཾ ཀུཙྪིཏཾ གཙྪནྟཱི’’ཏི།
134.Luddācārakammakhuddācārakammunāti paraviheṭhanādiluddācārakammunā, naḷakāradārukammādikhuddācārakammunā ca. Suddanti ettha su-iti sīghatthe nipāto. Dā-iti garahaṇattheti āha ‘‘suddaṃ suddaṃ lahuṃ lahuṃ kucchitaṃ gacchantī’’ti.
༡༣༥. ཨཧཱུཏི ཀཱལཝིཔལླཱསཝསེན ཝུཏྟནྟི དསྶེནྟོ ‘‘ཧོཏི ཁོ’’ཏི ཨཱཧ། ཨིམིནཱཏི ‘‘ཨིམེཧི ཁོ, ཝཱསེཊྛ, ཙཏཱུཧི མཎྜལེཧི སམཎམཎྜལསྶ ཨབྷིནིབྦཏྟི ཧོཏཱི’’ཏི ཨིམིནཱ ཝཙནེན། ཨིམཾ དསྶེཏཱིཏི སམཎམཎྜལཾ ནཱམ…པེ॰… སུདྡྷིཾ པཱཔུཎནྟཱིཏི ཨིམཾ ཨཏྠཛཱཏཾ དསྶེཏི། ཡདི ཨིམེཧི…པེ॰… ཨབྷིནིབྦཏྟི ཧོཏི, ཨེཝཾ སནྟེ ཨིམཱནེཝ ཙཏྟཱརི མཎྜལཱནི པདྷཱནཱནི, སམཎམཎྜལཾ ཨཔྤདྷཱནཾ ཏཏོ ཨབྷིནིབྦཏྟཏྟཱཏི? ནཡིདམེཝནྟི དསྶེཏུཾ ‘‘ཨིམཱནཱི’’ཏིཨཱདི ཝུཏྟཾ། སམཎམཎྜལཾ ཨནུཝཏྟནྟི གུཎེཧི ཝིསིཊྛབྷཱཝཏོ། གུཎོ ཧི ཝིཉྙཱུནཾ ཨནུཝཏྟནཧེཏུ, ན ཀོལཔུཏྟིཡཾ, ཝཎྞཔོཀྑརཏཱ, ཝཱཀྐརཎམཏྟཾ ཝཱ། ཏེནཱཧ ‘‘དྷམྨེནེཝ ཨནུཝཏྟནྟི, ནོ ཨདྷམྨེནཱ’’ཏི། སོ དྷམྨོ ཙ ལོཀུཏྟརོཝ ཨདྷིཔྤེཏོ, ཡེན སཾསཱརཏོ ཝིསུཛ྄ཛྷཏི, ཏསྨཱ སམཎམཎྜལནྟི ཙ སཱསནིཀམེཝ སམཎགཎཾ ཝདཏཱིཏི དཊྛབྦཾ། ཏེནཱཧ ‘‘སམཎམཎྜལཉྷཱི’’ཏིཨཱདི།
135.Ahūti kālavipallāsavasena vuttanti dassento ‘‘hoti kho’’ti āha. Imināti ‘‘imehi kho, vāseṭṭha, catūhi maṇḍalehi samaṇamaṇḍalassa abhinibbatti hotī’’ti iminā vacanena. Imaṃ dassetīti samaṇamaṇḍalaṃ nāma…pe… suddhiṃ pāpuṇantīti imaṃ atthajātaṃ dasseti. Yadi imehi…pe… abhinibbatti hoti, evaṃ sante imāneva cattāri maṇḍalāni padhānāni, samaṇamaṇḍalaṃ appadhānaṃ tato abhinibbattattāti? Nayidamevanti dassetuṃ ‘‘imānī’’tiādi vuttaṃ. Samaṇamaṇḍalaṃ anuvattanti guṇehi visiṭṭhabhāvato. Guṇo hi viññūnaṃ anuvattanahetu, na kolaputtiyaṃ, vaṇṇapokkharatā, vākkaraṇamattaṃ vā. Tenāha ‘‘dhammeneva anuvattanti, no adhammenā’’ti. So dhammo ca lokuttarova adhippeto, yena saṃsārato visujjhati, tasmā samaṇamaṇḍalanti ca sāsanikameva samaṇagaṇaṃ vadatīti daṭṭhabbaṃ. Tenāha ‘‘samaṇamaṇḍalañhī’’tiādi.
དུཙྩརིཏཱདིཀཐཱཝཎྞནཱ
Duccaritādikathāvaṇṇanā
༡༣༦. མིཙྪཱདིཊྛིཝསེན སམཱདིནྣཀམྨཾ ནཱམ ‘‘ཀོ ཨནུབནྡྷིཏབྦོ། ཨཛོཏགྒིསོཊྛིམིསོ’’ཏིཨཱདིནཱ ཡཉྙཝིདྷཱནཱདིཝསེན པཝཏྟིཏཾ ཧིཾསཱདིཔཱཔཀམྨཾ། མིཙྪཱདིཊྛིཀམྨསྶཱཏི ‘‘ཨེས སདྡྷཱདྷིགཏོ དེཝཡཱནོ, ཡེན ཡནྟི པུཏྟིནོ ཝིསོཀཱ’’ཏིཨཱདིནཱ པཝཏྟིཏསྶ མིཙྪཱདིཊྛིསཧགཏཀམྨསྶ། སམཱདཱནཾ ཏསྶ ཏཐཱ པཝཏྟནཾ, ཏསྶཱ ཝཱ དིཊྛིཡཱ ཨུཔགམནཾ།
136.Micchādiṭṭhivasena samādinnakammaṃ nāma ‘‘ko anubandhitabbo. Ajotaggisoṭṭhimiso’’tiādinā yaññavidhānādivasena pavattitaṃ hiṃsādipāpakammaṃ. Micchādiṭṭhikammassāti ‘‘esa saddhādhigato devayāno, yena yanti puttino visokā’’tiādinā pavattitassa micchādiṭṭhisahagatakammassa. Samādānaṃ tassa tathā pavattanaṃ, tassā vā diṭṭhiyā upagamanaṃ.
༡༣༧. དྭཡཀཱརཱིཏི ཀུསལཱཀུསལདྭཡསྶ ཀཏྟཱ། ཏཡིདཾ དྭཡཾ ཡསྨཱ ཨེཀཛ྄ཛྷཾ ནཔྤཝཏྟཏི, ཏསྨཱ ཨཱཧ ‘‘ཀཱལེནཱ’’ཏིཨཱདི། ཨེཀཀྑཎེ ཨུབྷཡཝིཔཱཀདཱནཊྛཱནཾ ནཱམ ནཏྠི ཨེཀསྨིཾ ཁཎེ ཙིཏྟདྭཡཱུཔསཉྷིཏཱཡ སཏྟསནྟཏིཡཱ ཨབྷཱཝཏོ། ཡཐཱ པན དྭཡཀཱརིནོ སུཁདུཀྑཔཊིསཾཝེདིཏཱ སམྦྷཝཏི, ཏཾ དསྶེཏུཾ ‘‘ཡེན པནཱ’’ཏིཨཱདི ཝུཏྟཾ། ཨེཝཾབྷཱུཏོཏི ཝིཀལཱཝཡཝོ། དྭེཔིཧི ཀུསལཱཀུསལཀམྨཱནི ཀཏཱུཔཙིཏཱནི སབྷཱཝཏོ བལཝནྟཱནེཝ ཧོནྟི, ཏསྨཱ མརཎཀཱལེ ཨུཔཊྛཧནྟི ། ཏེསུ ཨཀུསལཾ བལཝཏརཾ ཧོཏི པཙྩཡལཱབྷཏོ། ནིཀནྟིཨཱདཡོ ཧི པཙྩཡཝིསེསཱ ཨཀུསལསྶེཝ སབྷཱགཱ, ན ཀུསལསྶ, ཏསྨཱ ཀཏཱུཔཙིཏབྷཱཝེན སམཱནབལེསུཔི ཀུསལཱཀུསལེསུ པཙྩཡལཱབྷེན ཝིཔཙྩིཏུཾ ལདྡྷོཀཱསཏཱཡ ཀུསལཏོ ཨཀུསལཾ བལཝཏརཾ ཧོཏཱིཏི, ཏཐཱབྷཱུཏམྤི ཏཾ ཡཐཱ ཝིཔཱཀདཱནེ ལདྡྷོཀཱསསྶ ཀུསལསྶཱཔི ཨཝསརོ ཧོཏི, ཏཐཱ ལདྡྷཔཙྩཡཾ པཊིསནྡྷིདཱནཱབྷིམུཁཾ ཀུསལཾ པཊིབཱཧིཏྭཱ པཊིསནྡྷིཾ དེནྟཾ ཏིརཙྪཱནཡོནིཡཾ ནིབྦཏྟཱཔེཏཱིཏི། ‘‘ཨཀུསལཾ བལཝཏརཾ ཧོཏཱི’’ཏི ཨེཏྠ ‘‘ཨཀུསལཾ ཙེ བལཝཏརཾ ཧོཏི, ཏཾ ཀུསལཾ པཊིབཱཧིཏྭཱ’’ཏི ཝུཏྟནཡེནེཝ ཨཏྠཾ ཝཏྭཱ ཏེསུ ཀུསལཾ ཙེ བལཝཏརཾ ཧོཏི, ཏཉྩ ཨཀུསལཾ པཊིབཱཧིཏྭཱ མནུསྶཡོནིཡཾ ནིབྦཏྟཱཔེཏི, ཨཀུསལཾ པཝཏྟིཝེདནཱིཡཾ ཧོཏི, ཨཐ ནཾ ཏཾ ཀཱཎམྤི ཀརོཏི ཁུཛྫམྤི པཱིཋསཔྤིམྤི ཀུཙྪིརོགཱདཱིཧི ཝཱ ཨུཔདྡུཏཾ། ཨེཝཾ སོ པཝཏྟིཡཾ ནཱནཔྤཀཱརཾ དུཀྑཾ པཙྩནུབྷཝཏཱིཏི ཨིདཾ སནྡྷཱཡ ཝུཏྟཾ ‘‘སུཁདུཀྑཔྤཊིསཾཝེདཱི ཧོཏཱི’’ཏི། ཏཏྲཱཡཾ ཝིནིཙྪཡོ – ཝུཏྟཀཱལེ ཝཱ ཀཱརེན སམཱནབལེསུ ཀུསལཱཀུསལཀམྨེསུ ཨུཔཊྛཧནྟེསུ མརཎསྶ ཨཱསནྣཝེལཱཡཾ ཡདི བལཝཏརཱནི ཀུསལཛཝནཱནི ཛཝནྟི, ཡཐཱཨུཔཊྛིཏཾ ཨཀུསལཾ པཊིབཱཧིཏྭཱ ཀུསལཾ ཝུཏྟནཡེན པཊིསནྡྷིཾ དེཏི། ཨཐ བལཝཏརཱནི ཨཀུསལཛཝནཱནི ཛཝནྟི, ཡཐཱཨུཔཊྛིཏཾ ཀུསལཾ པཊིབཱཧིཏྭཱ ཨཀུསལཾ ཝུཏྟནཡེནེཝ པཊིསནྡྷིཾ དེཏི། ཏཾ ཀིསྶ ཧེཏུ? ཨུབྷིནྣཾ ཀམྨཱནཾ སམཱནབལཝབྷཱཝཏོ, པཙྩཡནྟརསཱཔེཀྑཏོ ཙཱཏི, སབྦཾ ཝཱིམཾསིཏྭཱ གཧེཏབྦཾ།
137.Dvayakārīti kusalākusaladvayassa kattā. Tayidaṃ dvayaṃ yasmā ekajjhaṃ nappavattati, tasmā āha ‘‘kālenā’’tiādi. Ekakkhaṇe ubhayavipākadānaṭṭhānaṃ nāma natthi ekasmiṃ khaṇe cittadvayūpasañhitāya sattasantatiyā abhāvato. Yathā pana dvayakārino sukhadukkhapaṭisaṃveditā sambhavati, taṃ dassetuṃ ‘‘yena panā’’tiādi vuttaṃ. Evaṃbhūtoti vikalāvayavo. Dvepihi kusalākusalakammāni katūpacitāni sabhāvato balavantāneva honti, tasmā maraṇakāle upaṭṭhahanti . Tesu akusalaṃ balavataraṃ hoti paccayalābhato. Nikantiādayo hi paccayavisesā akusalasseva sabhāgā, na kusalassa, tasmā katūpacitabhāvena samānabalesupi kusalākusalesu paccayalābhena vipaccituṃ laddhokāsatāya kusalato akusalaṃ balavataraṃ hotīti, tathābhūtampi taṃ yathā vipākadāne laddhokāsassa kusalassāpi avasaro hoti, tathā laddhapaccayaṃ paṭisandhidānābhimukhaṃ kusalaṃ paṭibāhitvā paṭisandhiṃ dentaṃ tiracchānayoniyaṃ nibbattāpetīti. ‘‘Akusalaṃ balavataraṃ hotī’’ti ettha ‘‘akusalaṃ ce balavataraṃ hoti, taṃ kusalaṃ paṭibāhitvā’’ti vuttanayeneva atthaṃ vatvā tesu kusalaṃ ce balavataraṃ hoti, tañca akusalaṃ paṭibāhitvā manussayoniyaṃ nibbattāpeti, akusalaṃ pavattivedanīyaṃ hoti, atha naṃ taṃ kāṇampi karoti khujjampi pīṭhasappimpi kucchirogādīhi vā upaddutaṃ. Evaṃ so pavattiyaṃ nānappakāraṃ dukkhaṃ paccanubhavatīti idaṃ sandhāya vuttaṃ ‘‘sukhadukkhappaṭisaṃvedī hotī’’ti. Tatrāyaṃ vinicchayo – vuttakāle vā kārena samānabalesu kusalākusalakammesu upaṭṭhahantesu maraṇassa āsannavelāyaṃ yadi balavatarāni kusalajavanāni javanti, yathāupaṭṭhitaṃ akusalaṃ paṭibāhitvā kusalaṃ vuttanayena paṭisandhiṃ deti. Atha balavatarāni akusalajavanāni javanti, yathāupaṭṭhitaṃ kusalaṃ paṭibāhitvā akusalaṃ vuttanayeneva paṭisandhiṃ deti. Taṃ kissa hetu? Ubhinnaṃ kammānaṃ samānabalavabhāvato, paccayantarasāpekkhato cāti, sabbaṃ vīmaṃsitvā gahetabbaṃ.
བོདྷིཔཀྑིཡབྷཱཝནཱཝཎྞནཱ
Bodhipakkhiyabhāvanāvaṇṇanā
༡༣༨. བོདྷི ཝུཙྩཏི མགྒསམྨཱདིཊྛི, ཙཏྟཱརི ཨརིཡསཙྩཱནི བུཛ྄ཛྷཏཱིཏི ཀཏྭཱ, སབྷཱཝཏོ, ཏཾསབྷཱཝཏོ ཙ ཏསྶཱ པཀྑེ བྷཝཱཏི བོདྷིཔཀྑིཡཱ, སཏིཝཱིརིཡཱདཡོ དྷམྨཱ, ཏེསཾ བོདྷིཔཀྑིཡཱནཾ། པཊིཔཱཊིཡཱཏི བོདྷིཔཀྑིཡདེསནཱཔཊིཔཱཊིཡཱ། བྷཱཝནཾ ཨནུགནྟྭཱཏི ཨནུཀྐམེན པཝཏྟཾ བྷཱཝནཾ པཏྭཱ། ཏེནཱཧ ‘‘པཊིཔཛྫིཏྭཱ’’ཏི། སཨུཔཱདིསེསཱཡ ནིབྦཱནདྷཱཏུཡཱ ཝསེན ཁཱིཎཱསཝསྶ སེཊྛབྷཱཝཾ ལོཀསྶ པཱཀཊཾ ཀཏྭཱ དསྶེཏུཾ སཀྐཱ, ན ཨིཏརཱཡ སབྦསོ ཨཔཉྙཏྟིབྷཱཝཱུཔགམནེ ཏསྶ ཨདསྶནཏོཏི ཝུཏྟཾ ‘‘པརིནིབྦཱཏཱིཏི ཀིལེསཔརིནིབྦཱནེན པརིནིབྦཱཡཏཱི’’ཏི། ཝིནིཝཏྟེཏྭཱཏི ཏཏོ ཙཏུཝཎྞཏོ ནཱིཧརིཏྭཱ།
138.Bodhi vuccati maggasammādiṭṭhi, cattāri ariyasaccāni bujjhatīti katvā, sabhāvato, taṃsabhāvato ca tassā pakkhe bhavāti bodhipakkhiyā, sativīriyādayo dhammā, tesaṃ bodhipakkhiyānaṃ. Paṭipāṭiyāti bodhipakkhiyadesanāpaṭipāṭiyā. Bhāvanaṃ anugantvāti anukkamena pavattaṃ bhāvanaṃ patvā. Tenāha ‘‘paṭipajjitvā’’ti. Saupādisesāya nibbānadhātuyā vasena khīṇāsavassa seṭṭhabhāvaṃ lokassa pākaṭaṃ katvā dassetuṃ sakkā, na itarāya sabbaso apaññattibhāvūpagamane tassa adassanatoti vuttaṃ ‘‘parinibbātīti kilesaparinibbānena parinibbāyatī’’ti. Vinivattetvāti tato catuvaṇṇato nīharitvā.
༡༤༠. ཏམེཝཏྠནྟི ‘‘ཁཱིཎཱསཝོཝ དེཝམནུསྶེསུ སེཊྛོ’’ཏི ཝུཏྟམེཝཏྠཾ།
140.Tamevatthanti ‘‘khīṇāsavova devamanussesu seṭṭho’’ti vuttamevatthaṃ.
སེཊྛཙྪེདཀཝཱདམེཝཱཏི ཛཱཏིབྲཱཧྨཎཱནཾ སེཊྛབྷཱཝསམུཙྪེདཀམེཝ ཀཐཾ། དསྶེཏྭཱ བྷཱསིཏྭཱ། སུཏྟནྟཾ ཝིནིཝཏྟེཏྭཱཏི པུབྦེ ལོཀིཡདྷམྨསནྡསྶནཝསེན པཝཏྟཾ ཨགྒཉྙསུཏྟཾ ‘‘སཏྟནྣཾ བོདྷིཔཀྑིཡཱནཾ དྷམྨཱནཾ བྷཱཝནམནྭཱཡཱ’’ཏིཨཱདིནཱ ཏཏོ ཝིནིཝཏྟེཏྭཱ ནཱིཧརིཏྭཱ ཏེན ཨསཾསཊྛཾ ཀཏྭཱ། ཨཱཝཛྫནྟཱཏི སམནྣཱཧརནྟཱ། ཨནུམཛྫནྟཱཏི པུབྦེནཱཔརཾ ཨཏྠཏོ ཝིཙརནྟཱཏི།
Seṭṭhacchedakavādamevāti jātibrāhmaṇānaṃ seṭṭhabhāvasamucchedakameva kathaṃ. Dassetvā bhāsitvā. Suttantaṃ vinivattetvāti pubbe lokiyadhammasandassanavasena pavattaṃ aggaññasuttaṃ ‘‘sattannaṃ bodhipakkhiyānaṃ dhammānaṃ bhāvanamanvāyā’’tiādinā tato vinivattetvā nīharitvā tena asaṃsaṭṭhaṃ katvā. Āvajjantāti samannāharantā. Anumajjantāti pubbenāparaṃ atthato vicarantāti.
ཨགྒཉྙསུཏྟཝཎྞནཱཡ ལཱིནཏྠཔྤཀཱསནཱ།
Aggaññasuttavaṇṇanāya līnatthappakāsanā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༤. ཨགྒཉྙསུཏྟཾ • 4. Aggaññasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༤. ཨགྒཉྙསུཏྟཝཎྞནཱ • 4. Aggaññasuttavaṇṇanā
