| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৫. পঞ্চমৰগ্গো
5. Pañcamavaggo
১. অগ্গপ্পসাদসুত্তং
1. Aggappasādasuttaṃ
৯০. ৰুত্তঞ্হেতং ভগৰতা, ৰুত্তমরহতাতি মে সুতং –
90. Vuttañhetaṃ bhagavatā, vuttamarahatāti me sutaṃ –
‘‘তযোমে, ভিক্খৰে, অগ্গপ্পসাদা। কতমে তযো? যাৰতা, ভিক্খৰে, সত্তা অপদা ৰা দ্ৰিপদা ৰা চতুপ্পদা ৰা বহুপ্পদা 1 ৰা রূপিনো ৰা অরূপিনো ৰা সঞ্ঞিনো ৰা অসঞ্ঞিনো ৰা নেৰসঞ্ঞিনাসঞ্ঞিনো ৰা, তথাগতো তেসং অগ্গমক্খাযতি অরহং সম্মাসম্বুদ্ধো । যে, ভিক্খৰে, বুদ্ধে পসন্না, অগ্গে তে পসন্না। অগ্গে খো পন পসন্নানং অগ্গো ৰিপাকো হোতি।
‘‘Tayome, bhikkhave, aggappasādā. Katame tayo? Yāvatā, bhikkhave, sattā apadā vā dvipadā vā catuppadā vā bahuppadā 2 vā rūpino vā arūpino vā saññino vā asaññino vā nevasaññināsaññino vā, tathāgato tesaṃ aggamakkhāyati arahaṃ sammāsambuddho . Ye, bhikkhave, buddhe pasannā, agge te pasannā. Agge kho pana pasannānaṃ aggo vipāko hoti.
‘‘যাৰতা, ভিক্খৰে, ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতি, যদিদং মদনিম্মদনো পিপাসৰিনযো আলযসমুগ্ঘাতো ৰট্টুপচ্ছেদো তণ্হক্খযো ৰিরাগো নিরোধো নিব্বানং। যে, ভিক্খৰে, ৰিরাগে ধম্মে পসন্না, অগ্গে তে পসন্না। অগ্গে খো পন পসন্নানং অগ্গো ৰিপাকো হোতি।
‘‘Yāvatā, bhikkhave, dhammā saṅkhatā vā asaṅkhatā vā, virāgo tesaṃ aggamakkhāyati, yadidaṃ madanimmadano pipāsavinayo ālayasamugghāto vaṭṭupacchedo taṇhakkhayo virāgo nirodho nibbānaṃ. Ye, bhikkhave, virāge dhamme pasannā, agge te pasannā. Agge kho pana pasannānaṃ aggo vipāko hoti.
‘‘যাৰতা , ভিক্খৰে, সঙ্ঘা ৰা গণা ৰা, তথাগতসাৰকসঙ্ঘো তেসং অগ্গমক্খাযতি, যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স। যে, ভিক্খৰে, সঙ্ঘে পসন্না, অগ্গে তে পসন্না। অগ্গে খো পন পসন্নানং অগ্গো ৰিপাকো হোতি। ইমে খো, ভিক্খৰে, তযো অগ্গপ্পসাদা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Yāvatā , bhikkhave, saṅghā vā gaṇā vā, tathāgatasāvakasaṅgho tesaṃ aggamakkhāyati, yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassa. Ye, bhikkhave, saṅghe pasannā, agge te pasannā. Agge kho pana pasannānaṃ aggo vipāko hoti. Ime kho, bhikkhave, tayo aggappasādā’’ti. Etamatthaṃ bhagavā avoca. Tatthetaṃ iti vuccati –
‘‘অগ্গতো ৰে পসন্নানং, অগ্গং ধম্মং ৰিজানতং।
‘‘Aggato ve pasannānaṃ, aggaṃ dhammaṃ vijānataṃ;
অগ্গে বুদ্ধে পসন্নানং, দক্খিণেয্যে অনুত্তরে॥
Agge buddhe pasannānaṃ, dakkhiṇeyye anuttare.
‘‘অগ্গে ধম্মে পসন্নানং, ৰিরাগূপসমে সুখে।
‘‘Agge dhamme pasannānaṃ, virāgūpasame sukhe;
অগ্গে সঙ্ঘে পসন্নানং, পুঞ্ঞক্খেত্তে অনুত্তরে॥
Agge saṅghe pasannānaṃ, puññakkhette anuttare.
‘‘অগ্গস্মিং দানং দদতং, অগ্গং পুঞ্ঞং পৰড্ঢতি।
‘‘Aggasmiṃ dānaṃ dadataṃ, aggaṃ puññaṃ pavaḍḍhati;
অগ্গং আযু চ ৰণ্ণো চ, যসো কিত্তি সুখং বলং॥
Aggaṃ āyu ca vaṇṇo ca, yaso kitti sukhaṃ balaṃ.
‘‘অগ্গস্স দাতা মেধাৰী, অগ্গধম্মসমাহিতো।
‘‘Aggassa dātā medhāvī, aggadhammasamāhito;
দেৰভূতো মনুস্সো ৰা, অগ্গপ্পত্তো পমোদতী’’তি॥
Devabhūto manusso vā, aggappatto pamodatī’’ti.
অযম্পি অত্থো ৰুত্তো ভগৰতা, ইতি মে সুতন্তি। পঠমং।
Ayampi attho vutto bhagavatā, iti me sutanti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১. অগ্গপ্পসাদসুত্তৰণ্ণনা • 1. Aggappasādasuttavaṇṇanā
