அக்³கா³ஸனாதி³அனுஜானநகதா²வண்ணனா

310-311. த³க்கி²ணோத³கந்தி அக்³க³தோ உபனீயமானங் த³க்கி²ணோத³கங். அத² கோ² ப⁴க³வா பி⁴க்கூ² ஆமந்தேஸீதி (ஜா॰ அட்ட²॰ 1.1.36 தித்திரஜாதகவண்ணனா) தேஹி பி⁴க்கூ²ஹி அத்தனோ அத்தனோ ருசிவஸேன அக்³கா³ஸனாதி³ரஹானங் கதி²தகாலே ‘‘ந, பி⁴க்க²வே, மய்ஹங் ஸாஸனே அக்³கா³ஸனாதீ³னி பத்வா க²த்தியகுலா பப்³ப³ஜிதோ பமாணங், ந ப்³ராஹ்மணகுலா, ந க³ஹபதிகுலா பப்³ப³ஜிதோ, ந வினயத⁴ரோ, ந ஸுத்தந்திகோ, ந ஆபி⁴த⁴ம்மிகோ, ந பட²மஜ்ஜா²னாதி³லாபி⁴னோ, ந ஸோதாபன்னாத³யோ பமாணங், அத² கோ², பி⁴க்க²வே, இமஸ்மிங் ஸாஸனே யதா²வுட்³ட⁴ங் அபி⁴வாத³னங் பச்சுட்டா²னங் அஞ்ஜலிகம்மங் ஸாமீசிகம்மங் கத்தப்³ப³ங், அக்³கா³ஸனங் அக்³கோ³த³கங் அக்³க³பிண்டோ³ லத்³த⁴ப்³போ³, இத³மெத்த² பமாணங், தஸ்மா வுட்³ட⁴தரோ பி⁴க்கு² ஏதேஸங் அனுச்ச²விகோ. இதா³னி கோ² பன, பி⁴க்க²வே, ஸாரிபுத்தோ மய்ஹங் அக்³க³ஸாவகோ அனுத⁴ம்மசக்கப்பவத்தகோ மமானந்தரஸேனாஸனங் லத்³து⁴ங் அரஹதி. ஸோ இமங் ரத்திங் ஸேனாஸனங் அலப⁴ந்தோ ருக்க²மூலே வீதினாமேஸி. தும்ஹே இதா³னேவ ஏவங் அகா³ரவா அப்பதிஸ்ஸா, க³ச்ச²ந்தே க³ச்ச²ந்தே காலே கிந்தி கத்வா விஹரிஸ்ஸதா²’’தி வத்வா அத² நேஸங் ஓவாத³தா³னத்தா²ய ‘‘புப்³பே³, பி⁴க்க²வே, திரச்சா²னக³தாபி ‘ந கோ² பனேதங் அம்ஹாகங் பதிரூபங், யங் மயங் அஞ்ஞமஞ்ஞங் அகா³ரவா அப்பதிஸ்ஸா அஸபா⁴க³வுத்தினோ விஹரெய்யாம, அம்ஹேஸு மஹல்லகதரங் ஜானித்வா தஸ்ஸ அபி⁴வாத³னாதீ³னி கரிஸ்ஸாமா’தி ஸாது⁴கங் வீமங்ஸித்வா ‘அயங் மஹல்லகோ’தி ஞத்வா தஸ்ஸ அபி⁴வாத³னாதீ³னி கத்வா தே³வபத²ங் பூரயமானா க³தா’’தி வத்வா அதீதங் ஆஹரித்வா த³ஸ்ஸேதுங் பி⁴க்கூ² ஆமந்தேஸி.

யே வுட்³ட⁴மபசாயந்தீதி ஜாதிவுட்³டோ⁴ வயோவுட்³டோ⁴ கு³ணவுட்³டோ⁴தி தயோ வுட்³டா⁴. தேஸு ஜாதிஸம்பன்னோ ஜாதிவுட்³டோ⁴ நாம, வயே டி²தோ வயோவுட்³டோ⁴ நாம, கு³ணஸம்பன்னோ கு³ணவுட்³டோ⁴ நாம. தேஸு கு³ணஸம்பன்னோ வயோவுட்³டோ⁴ இமஸ்மிங் டா²னே வுட்³டோ⁴தி அதி⁴ப்பேதோ. அபசாயந்தீதி ஜெட்டா²பசாயிககம்மேன பூஜெந்தி. த⁴ம்மஸ்ஸ கோவிதா³தி ஜெட்டா²பசாயனத⁴ம்மஸ்ஸ கோவிதா³ குஸலா. தி³ட்டே²வ த⁴ம்மேதி இமஸ்மிங்யேவ அத்தபா⁴வே. பாஸங்ஸாதி பஸங்ஸாரஹா. ஸம்பராயே ச ஸுக்³க³தீதி ஸம்பரேதப்³பே³ இமங் லோகங் ஹித்வா க³ந்தப்³பே³ பரலோகேபி தேஸங் ஸுக³தியேவ ஹோதீதி அத்தோ². அயங் பனெத்த² பிண்ட³த்தோ² – பி⁴க்க²வே, க²த்தியா வா ஹொந்து ப்³ராஹ்மணா வா வெஸ்ஸா வா ஸுத்³தா³ வா க³ஹட்டா² வா பப்³ப³ஜிதா வா திரச்சா²னக³தா வா, யே கேசி ஸத்தா ஜெட்டா²பசிதிகம்மே சே²கா குஸலா கு³ணஸம்பன்னானங் வயோவுட்³டா⁴னங் அபசிதிங் கரொந்தி, தே இமஸ்மிஞ்ச அத்தபா⁴வே ஜெட்டா²பசிதிகாரகாதி பஸங்ஸங் வண்ணனங் தோ²மனங் லப⁴ந்தி, காயஸ்ஸ ச பே⁴தா³ ஸக்³கே³ நிப்³ப³த்தந்தீதி.

அக்³கா³ஸனாதி³அனுஜானநகதா²வண்ணனா நிட்டி²தா.