| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
အဂ္ဂာသနာဒိအနုဇာနနံ
Aggāsanādianujānanaṃ
၃၁၀. အထ ခော ဘဂဝာ ဝေသာလိယံ ယထာဘိရန္တံ ဝိဟရိတ္ဝာ ယေန သာဝတ္ထိ တေန စာရိကံ ပက္ကာမိ ။ တေန ခော ပန သမယေန ဆဗ္ဗဂ္ဂိယာနံ ဘိက္ခူနံ အန္တေဝာသိကာ ဘိက္ခူ ဗုဒ္ဓပ္ပမုခသ္သ သင္ဃသ္သ ပုရတော ပုရတော ဂန္တ္ဝာ ဝိဟာရေ ပရိဂ္ဂဏ္ဟန္တိ, သေယ္ယာယော ပရိဂ္ဂဏ္ဟန္တိ – ဣဒံ အမ္ဟာကံ ဥပဇ္ဈာယာနံ ဘဝိသ္သတိ, ဣဒံ အမ္ဟာကံ အာစရိယာနံ ဘဝိသ္သတိ, ဣဒံ အမ္ဟာကံ ဘဝိသ္သတီ’’တိ။
310. Atha kho bhagavā vesāliyaṃ yathābhirantaṃ viharitvā yena sāvatthi tena cārikaṃ pakkāmi . Tena kho pana samayena chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti, seyyāyo pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti.
အထ ခော အာယသ္မာ သာရိပုတ္တော ဗုဒ္ဓပ္ပမုခသ္သ သင္ဃသ္သ ပိဋ္ဌိတော ပိဋ္ဌိတော ဂန္တ္ဝာ ဝိဟာရေသု ပရိဂ္ဂဟိတေသု, သေယ္ယာသု ပရိဂ္ဂဟိတာသု, သေယ္ယံ အလဘမာနော အညတရသ္မိံ ရုက္ခမူလေ နိသီဒိ။ အထ ခော ဘဂဝာ ရတ္တိယာ ပစ္စူသသမယံ ပစ္စုဋ္ဌာယ ဥက္ကာသိ။ အာယသ္မာပိ သာရိပုတ္တော ဥက္ကာသိ။ ‘‘ကော ဧတ္ထာ’’တိ? ‘‘အဟံ, ဘဂဝာ, သာရိပုတ္တော’’တိ။ ‘‘ကိသ္သ တ္ဝံ, သာရိပုတ္တံ, ဣဓ နိသိန္နော’’တိ? အထ ခော အာယသ္မာ သာရိပုတ္တော ဘဂဝတော ဧတမတ္ထံ အာရောစေသိ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, ဆဗ္ဗဂ္ဂိယာနံ ဘိက္ခူနံ အန္တေဝာသိကာ ဘိက္ခူ ဗုဒ္ဓပ္ပမုခသ္သ သင္ဃသ္သ ပုရတော ပုရတော ဂန္တ္ဝာ ဝိဟာရေ ပရိဂ္ဂဏ္ဟန္တိ, သေယ္ယာယော ပရိဂ္ဂဏ္ဟန္တိ – ဣဒံ အမ္ဟာကံ ဥပဇ္ဈာယာနံ ဘဝိသ္သတိ, ဣဒံ အမ္ဟာကံ အာစရိယာနံ ဘဝိသ္သတိ, ဣဒံ အမ္ဟာကံ ဘဝိသ္သတီ’’တိ? ‘‘သစ္စံ ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ‘‘ကထဉ္ဟိ နာမ တေ, ဘိက္ခဝေ, မောဃပုရိသာ ဗုဒ္ဓပ္ပမုခသ္သ သင္ဃသ္သ ပုရတော ပုရတော ဂန္တ္ဝာ ဝိဟာရေ ပရိဂ္ဂဟေသ္သန္တိ, သေယ္ယာယော ပရိဂ္ဂဟေသ္သန္တိ – ဣဒံ အမ္ဟာကံ ဥပဇ္ဈာယာနံ ဘဝိသ္သတိ, ဣဒံ အမ္ဟာကံ အာစရိယာနံ ဘဝိသ္သတိ, ဣဒံ အမ္ဟာကံ ဘဝိသ္သတီတိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘ကော, ဘိက္ခဝေ, အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ?
Atha kho āyasmā sāriputto buddhappamukhassa saṅghassa piṭṭhito piṭṭhito gantvā vihāresu pariggahitesu, seyyāsu pariggahitāsu, seyyaṃ alabhamāno aññatarasmiṃ rukkhamūle nisīdi. Atha kho bhagavā rattiyā paccūsasamayaṃ paccuṭṭhāya ukkāsi. Āyasmāpi sāriputto ukkāsi. ‘‘Ko etthā’’ti? ‘‘Ahaṃ, bhagavā, sāriputto’’ti. ‘‘Kissa tvaṃ, sāriputtaṃ, idha nisinno’’ti? Atha kho āyasmā sāriputto bhagavato etamatthaṃ ārocesi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti, seyyāyo pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti? ‘‘Saccaṃ bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā buddhappamukhassa saṅghassa purato purato gantvā vihāre pariggahessanti, seyyāyo pariggahessanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatīti! Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘ko, bhikkhave, arahati aggāsanaṃ aggodakaṃ aggapiṇḍa’’nti?
ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ခတ္တိယကုလာ ပဗ္ဗဇိတော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ဗ္ရာဟ္မဏကုလာ ပဗ္ဗဇိတော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ဂဟပတိကုလာ ပဗ္ဗဇိတော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, သုတ္တန္တိကော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ဝိနယဓရော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ဓမ္မကထိကော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ပဌမသ္သ ဈာနသ္သ လာဘီ သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ဒုတိယသ္သ ဈာနသ္သ လာဘီ သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, တတိယသ္သ ဈာနသ္သ လာဘီ သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, စတုတ္ထသ္သ ဈာနသ္သ လာဘီ သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, သောတာပန္နော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, သကဒာဂာမီ။ပေ.။ ယော, ဘဂဝာ, အနာဂာမီ။ပေ.။ ယော, ဘဂဝာ , အရဟာ သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, တေဝိဇ္ဇော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။ ဧကစ္စေ ဘိက္ခူ ဧဝမာဟံသု – ‘‘ယော, ဘဂဝာ, ဆဠဘိညော သော အရဟတိ အဂ္ဂာသနံ အဂ္ဂောဒကံ အဂ္ဂပိဏ္ဍ’’န္တိ။
Ekacce bhikkhū evamāhaṃsu – ‘‘yo, bhagavā, khattiyakulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, brāhmaṇakulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, gahapatikulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, suttantiko so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, vinayadharo so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, dhammakathiko so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, paṭhamassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, dutiyassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, tatiyassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, catutthassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, sotāpanno so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, sakadāgāmī…pe… yo, bhagavā, anāgāmī…pe… yo, bhagavā , arahā so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, tevijjo so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, chaḷabhiñño so arahati aggāsanaṃ aggodakaṃ aggapiṇḍa’’nti.
၃၁၁. အထ ခော ဘဂဝာ ဘိက္ခူ အာမန္တေသိ – ‘‘ဘူတပုဗ္ဗံ, ဘိက္ခဝေ, ဟိမဝန္တပဒေသေ 1 မဟာနိဂ္ရောဓော အဟောသိ။ တံ တယော သဟာယာ ဥပနိသ္သာယ ဝိဟရိံသု – တိတ္တိရော စ, မက္ကဋော စ, ဟတ္ထိနာဂော စ။ တေ အညမညံ အဂာရဝာ အပ္ပတိသ္သာ အသဘာဂဝုတ္တိကာ ဝိဟရန္တိ။ အထ ခော, ဘိက္ခဝေ, တေသံ သဟာယာနံ ဧတဒဟောသိ – ‘အဟော နူန မယံ ဇာနေယ္ယာမ ယံ အမ္ဟာကံ ဇာတိယာ မဟန္တတရံ တံ မယံ သက္ကရေယ္ယာမ ဂရုံ ကရေယ္ယာမ မာနေယ္ယာမ ပူဇေယ္ယာမ, တသ္သ စ မယံ ဩဝာဒေ တိဋ္ဌေယ္ယာမာ’တိ။
311. Atha kho bhagavā bhikkhū āmantesi – ‘‘bhūtapubbaṃ, bhikkhave, himavantapadese 2 mahānigrodho ahosi. Taṃ tayo sahāyā upanissāya vihariṃsu – tittiro ca, makkaṭo ca, hatthināgo ca. Te aññamaññaṃ agāravā appatissā asabhāgavuttikā viharanti. Atha kho, bhikkhave, tesaṃ sahāyānaṃ etadahosi – ‘aho nūna mayaṃ jāneyyāma yaṃ amhākaṃ jātiyā mahantataraṃ taṃ mayaṃ sakkareyyāma garuṃ kareyyāma māneyyāma pūjeyyāma, tassa ca mayaṃ ovāde tiṭṭheyyāmā’ti.
‘‘အထ ခော, ဘိက္ခဝေ, တိတ္တိရော စ မက္ကဋော စ ဟတ္ထိနာဂံ ပုစ္ဆိံသု – ‘တ္ဝံ, သမ္မ, ကိံ ပောရာဏံ သရသီ’တိ? ‘ယဒာဟံ, သမ္မာ, ပောတော ဟောမိ, ဣမံ နိဂ္ရောဓံ အန္တရာ သတ္ထီနံ 3 ကရိတ္ဝာ အတိက္ကမာမိ, အဂ္ဂင္ကုရကံ မေ ဥဒရံ ဆုပတိ။ ဣမာဟံ, သမ္မာ, ပောရာဏံ သရာမီ’တိ။
‘‘Atha kho, bhikkhave, tittiro ca makkaṭo ca hatthināgaṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Yadāhaṃ, sammā, poto homi, imaṃ nigrodhaṃ antarā satthīnaṃ 4 karitvā atikkamāmi, aggaṅkurakaṃ me udaraṃ chupati. Imāhaṃ, sammā, porāṇaṃ sarāmī’ti.
‘‘အထ ခော, ဘိက္ခဝေ, တိတ္တိရော စ ဟတ္ထိနာဂော စ မက္ကဋံ ပုစ္ဆိံသု – ‘တ္ဝံ, သမ္မ, ကိံ ပောရာဏံ သရသီ’တိ? ‘ယဒာဟံ, သမ္မာ, ဆာပော ဟောမိ, ဆမာယံ နိသီဒိတ္ဝာ ဣမသ္သ နိဂ္ရောဓသ္သ အဂ္ဂင္ကုရကံ ခာဒာမိ။ ဣမာဟံ, သမ္မာ, ပောရာဏံ သရာမီ’တိ။
‘‘Atha kho, bhikkhave, tittiro ca hatthināgo ca makkaṭaṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Yadāhaṃ, sammā, chāpo homi, chamāyaṃ nisīditvā imassa nigrodhassa aggaṅkurakaṃ khādāmi. Imāhaṃ, sammā, porāṇaṃ sarāmī’ti.
‘‘အထ ခော, ဘိက္ခဝေ, မက္ကဋော စ ဟတ္ထိနာဂော စ တိတ္တိရံ ပုစ္ဆိံသု – ‘တ္ဝံ, သမ္မ, ကိံ ပောရာဏံ သရသီ’တိ? ‘အမုကသ္မိံ, သမ္မာ, ဩကာသေ မဟာနိဂ္ရောဓော အဟောသိ။ တတော အဟံ ဖလံ ဘက္ခိတ္ဝာ ဣမသ္မိံ ဩကာသေ ဝစ္စံ အကာသိံ; တသ္သာယံ နိဂ္ရောဓော ဇာတော။ တဒာဟံ, သမ္မာ, ဇာတိယာ မဟန္တတရော’တိ ။
‘‘Atha kho, bhikkhave, makkaṭo ca hatthināgo ca tittiraṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Amukasmiṃ, sammā, okāse mahānigrodho ahosi. Tato ahaṃ phalaṃ bhakkhitvā imasmiṃ okāse vaccaṃ akāsiṃ; tassāyaṃ nigrodho jāto. Tadāhaṃ, sammā, jātiyā mahantataro’ti .
‘‘အထ ခော, ဘိက္ခဝေ, မက္ကဋော စ ဟတ္ထိနာဂော စ တိတ္တိရံ ဧတဒဝောစုံ – ‘တ္ဝံ, သမ္မ, အမ္ဟာကံ ဇာတိယာ မဟန္တတရော။ တံ မယံ သက္ကရိသ္သာမ ဂရုံ ကရိသ္သာမ မာနေသ္သာမ ပူဇေသ္သာမ, တုယ္ဟဉ္စ မယံ ဩဝာဒေ ပတိဋ္ဌိသ္သာမာ’တိ။ အထ ခော, ဘိက္ခဝေ, တိတ္တိရော မက္ကဋဉ္စ ဟတ္ထိနာဂဉ္စ ပဉ္စသု သီလေသု သမာဒပေသိ, အတ္တနာ စ ပဉ္စသု သီလေသု သမာဒာယ ဝတ္တတိ။ တေ အညမညံ သဂာရဝာ သပ္ပတိသ္သာ သဘာဂဝုတ္တိကာ ဝိဟရိတ္ဝာ ကာယသ္သ ဘေဒာ ပရံ မရဏာ သုဂတိံ သဂ္ဂံ လောကံ ဥပပဇ္ဇိံသု။ ဧဝံ ခော တံ, ဘိက္ခဝေ, တိတ္တိရိယံ နာမ ဗ္ရဟ္မစရိယံ အဟောသိ။
‘‘Atha kho, bhikkhave, makkaṭo ca hatthināgo ca tittiraṃ etadavocuṃ – ‘tvaṃ, samma, amhākaṃ jātiyā mahantataro. Taṃ mayaṃ sakkarissāma garuṃ karissāma mānessāma pūjessāma, tuyhañca mayaṃ ovāde patiṭṭhissāmā’ti. Atha kho, bhikkhave, tittiro makkaṭañca hatthināgañca pañcasu sīlesu samādapesi, attanā ca pañcasu sīlesu samādāya vattati. Te aññamaññaṃ sagāravā sappatissā sabhāgavuttikā viharitvā kāyassa bhedā paraṃ maraṇā sugatiṃ saggaṃ lokaṃ upapajjiṃsu. Evaṃ kho taṃ, bhikkhave, tittiriyaṃ nāma brahmacariyaṃ ahosi.
ဒိဋ္ဌေ ဓမ္မေ စ ပာသံသာ၊ သမ္ပရာယေ စ သုဂ္ဂတီ’’တိ။
Diṭṭhe dhamme ca pāsaṃsā, samparāye ca suggatī’’ti.
‘‘တေ ဟိ နာမ, ဘိက္ခဝေ, တိရစ္ဆာနဂတာ ပာဏာ အညမညံ သဂာရဝာ သပ္ပတိသ္သာ သဘာဂဝုတ္တိကာ ဝိဟရိသ္သန္တိ။ ဣဓ ခော တံ, ဘိက္ခဝေ, သောဘေထ ယံ တုမ္ဟေ ဧဝံ သ္ဝာက္ခာတေ ဓမ္မဝိနယေ ပဗ္ဗဇိတာ သမာနာ အညမညံ အဂာရဝာ အပ္ပတိသ္သာ အသဘာဂဝုတ္တိကာ ဝိဟရေယ္ယာထ? နေတံ, ဘိက္ခဝေ , အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ယထာဝုဍ္ဎံ အဘိဝာဒနံ, ပစ္စုဋ္ဌာနံ, အဉ္ဇလိကမ္မံ, သာမီစိကမ္မံ, အဂ္ဂာသနံ, အဂ္ဂောဒကံ, အဂ္ဂပိဏ္ဍံ။ န စ, ဘိက္ခဝေ, သင္ဃိကံ ယထာဝုဍ္ဎံ ပဋိဗာဟိတဗ္ဗံ။ ယော ပဋိဗာဟေယ္ယ, အာပတ္တိ ဒုက္ကဋသ္သာ’’တိ။
‘‘Te hi nāma, bhikkhave, tiracchānagatā pāṇā aññamaññaṃ sagāravā sappatissā sabhāgavuttikā viharissanti. Idha kho taṃ, bhikkhave, sobhetha yaṃ tumhe evaṃ svākkhāte dhammavinaye pabbajitā samānā aññamaññaṃ agāravā appatissā asabhāgavuttikā vihareyyātha? Netaṃ, bhikkhave , appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘anujānāmi, bhikkhave, yathāvuḍḍhaṃ abhivādanaṃ, paccuṭṭhānaṃ, añjalikammaṃ, sāmīcikammaṃ, aggāsanaṃ, aggodakaṃ, aggapiṇḍaṃ. Na ca, bhikkhave, saṅghikaṃ yathāvuḍḍhaṃ paṭibāhitabbaṃ. Yo paṭibāheyya, āpatti dukkaṭassā’’ti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / ဝိဟာရာနုဇာနနကထာ • Vihārānujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / အဂ္ဂာသနာဒိအနုဇာနနကထာဝဏ္ဏနာ • Aggāsanādianujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဝိဟာရာနုဇာနနကထာဝဏ္ဏနာ • Vihārānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဝိဟာရာနုဇာနနကထာ • Vihārānujānanakathā
