| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
ཨགྒཱསནཱདིཨནུཛཱནནཾ
Aggāsanādianujānanaṃ
༣༡༠. ཨཐ ཁོ བྷགཝཱ ཝེསཱལིཡཾ ཡཐཱབྷིརནྟཾ ཝིཧརིཏྭཱ ཡེན སཱཝཏྠི ཏེན ཙཱརིཀཾ པཀྐཱམི ། ཏེན ཁོ པན སམཡེན ཚབྦགྒིཡཱནཾ བྷིཀྑཱུནཾ ཨནྟེཝཱསིཀཱ བྷིཀྑཱུ བུདྡྷཔྤམུཁསྶ སངྒྷསྶ པུརཏོ པུརཏོ གནྟྭཱ ཝིཧཱརེ པརིགྒཎྷནྟི, སེཡྻཱཡོ པརིགྒཎྷནྟི – ཨིདཾ ཨམྷཱཀཾ ཨུཔཛ྄ཛྷཱཡཱནཾ བྷཝིསྶཏི, ཨིདཾ ཨམྷཱཀཾ ཨཱཙརིཡཱནཾ བྷཝིསྶཏི, ཨིདཾ ཨམྷཱཀཾ བྷཝིསྶཏཱི’’ཏི།
310. Atha kho bhagavā vesāliyaṃ yathābhirantaṃ viharitvā yena sāvatthi tena cārikaṃ pakkāmi . Tena kho pana samayena chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti, seyyāyo pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti.
ཨཐ ཁོ ཨཱཡསྨཱ སཱརིཔུཏྟོ བུདྡྷཔྤམུཁསྶ སངྒྷསྶ པིཊྛིཏོ པིཊྛིཏོ གནྟྭཱ ཝིཧཱརེསུ པརིགྒཧིཏེསུ, སེཡྻཱསུ པརིགྒཧིཏཱསུ, སེཡྻཾ ཨལབྷམཱནོ ཨཉྙཏརསྨིཾ རུཀྑམཱུལེ ནིསཱིདི། ཨཐ ཁོ བྷགཝཱ རཏྟིཡཱ པཙྩཱུསསམཡཾ པཙྩུཊྛཱཡ ཨུཀྐཱསི། ཨཱཡསྨཱཔི སཱརིཔུཏྟོ ཨུཀྐཱསི། ‘‘ཀོ ཨེཏྠཱ’’ཏི? ‘‘ཨཧཾ, བྷགཝཱ, སཱརིཔུཏྟོ’’ཏི། ‘‘ཀིསྶ ཏྭཾ, སཱརིཔུཏྟཾ, ཨིདྷ ནིསིནྣོ’’ཏི? ཨཐ ཁོ ཨཱཡསྨཱ སཱརིཔུཏྟོ བྷགཝཏོ ཨེཏམཏྠཾ ཨཱརོཙེསི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑཱུ པཊིཔུཙྪི – ‘‘སཙྩཾ ཀིར, བྷིཀྑཝེ, ཚབྦགྒིཡཱནཾ བྷིཀྑཱུནཾ ཨནྟེཝཱསིཀཱ བྷིཀྑཱུ བུདྡྷཔྤམུཁསྶ སངྒྷསྶ པུརཏོ པུརཏོ གནྟྭཱ ཝིཧཱརེ པརིགྒཎྷནྟི, སེཡྻཱཡོ པརིགྒཎྷནྟི – ཨིདཾ ཨམྷཱཀཾ ཨུཔཛ྄ཛྷཱཡཱནཾ བྷཝིསྶཏི, ཨིདཾ ཨམྷཱཀཾ ཨཱཙརིཡཱནཾ བྷཝིསྶཏི, ཨིདཾ ཨམྷཱཀཾ བྷཝིསྶཏཱི’’ཏི? ‘‘སཙྩཾ བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ‘‘ཀཐཉྷི ནཱམ ཏེ, བྷིཀྑཝེ, མོགྷཔུརིསཱ བུདྡྷཔྤམུཁསྶ སངྒྷསྶ པུརཏོ པུརཏོ གནྟྭཱ ཝིཧཱརེ པརིགྒཧེསྶནྟི, སེཡྻཱཡོ པརིགྒཧེསྶནྟི – ཨིདཾ ཨམྷཱཀཾ ཨུཔཛ྄ཛྷཱཡཱནཾ བྷཝིསྶཏི, ཨིདཾ ཨམྷཱཀཾ ཨཱཙརིཡཱནཾ བྷཝིསྶཏི, ཨིདཾ ཨམྷཱཀཾ བྷཝིསྶཏཱིཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཀོ, བྷིཀྑཝེ, ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི?
Atha kho āyasmā sāriputto buddhappamukhassa saṅghassa piṭṭhito piṭṭhito gantvā vihāresu pariggahitesu, seyyāsu pariggahitāsu, seyyaṃ alabhamāno aññatarasmiṃ rukkhamūle nisīdi. Atha kho bhagavā rattiyā paccūsasamayaṃ paccuṭṭhāya ukkāsi. Āyasmāpi sāriputto ukkāsi. ‘‘Ko etthā’’ti? ‘‘Ahaṃ, bhagavā, sāriputto’’ti. ‘‘Kissa tvaṃ, sāriputtaṃ, idha nisinno’’ti? Atha kho āyasmā sāriputto bhagavato etamatthaṃ ārocesi. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, chabbaggiyānaṃ bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti, seyyāyo pariggaṇhanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatī’’ti? ‘‘Saccaṃ bhagavā’’ti. Vigarahi buddho bhagavā…pe… ‘‘kathañhi nāma te, bhikkhave, moghapurisā buddhappamukhassa saṅghassa purato purato gantvā vihāre pariggahessanti, seyyāyo pariggahessanti – idaṃ amhākaṃ upajjhāyānaṃ bhavissati, idaṃ amhākaṃ ācariyānaṃ bhavissati, idaṃ amhākaṃ bhavissatīti! Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘ko, bhikkhave, arahati aggāsanaṃ aggodakaṃ aggapiṇḍa’’nti?
ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, ཁཏྟིཡཀུལཱ པབྦཛིཏོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, བྲཱཧྨཎཀུལཱ པབྦཛིཏོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, གཧཔཏིཀུལཱ པབྦཛིཏོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, སུཏྟནྟིཀོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, ཝིནཡདྷརོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, དྷམྨཀཐིཀོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, པཋམསྶ ཛྷཱནསྶ ལཱབྷཱི སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, དུཏིཡསྶ ཛྷཱནསྶ ལཱབྷཱི སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, ཏཏིཡསྶ ཛྷཱནསྶ ལཱབྷཱི སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, ཙཏུཏྠསྶ ཛྷཱནསྶ ལཱབྷཱི སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, སོཏཱཔནྣོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, སཀདཱགཱམཱི…པེ॰… ཡོ, བྷགཝཱ, ཨནཱགཱམཱི…པེ॰… ཡོ, བྷགཝཱ , ཨརཧཱ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, ཏེཝིཛྫོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི། ཨེཀཙྩེ བྷིཀྑཱུ ཨེཝམཱཧཾསུ – ‘‘ཡོ, བྷགཝཱ, ཚལ༹བྷིཉྙོ སོ ཨརཧཏི ཨགྒཱསནཾ ཨགྒོདཀཾ ཨགྒཔིཎྜ’’ནྟི།
Ekacce bhikkhū evamāhaṃsu – ‘‘yo, bhagavā, khattiyakulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, brāhmaṇakulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, gahapatikulā pabbajito so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, suttantiko so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, vinayadharo so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, dhammakathiko so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, paṭhamassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, dutiyassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, tatiyassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, catutthassa jhānassa lābhī so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, sotāpanno so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, sakadāgāmī…pe… yo, bhagavā, anāgāmī…pe… yo, bhagavā , arahā so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, tevijjo so arahati aggāsanaṃ aggodakaṃ aggapiṇḍa’’nti. Ekacce bhikkhū evamāhaṃsu – ‘‘yo, bhagavā, chaḷabhiñño so arahati aggāsanaṃ aggodakaṃ aggapiṇḍa’’nti.
༣༡༡. ཨཐ ཁོ བྷགཝཱ བྷིཀྑཱུ ཨཱམནྟེསི – ‘‘བྷཱུཏཔུབྦཾ, བྷིཀྑཝེ, ཧིམཝནྟཔདེསེ 1 མཧཱནིགྲོདྷོ ཨཧོསི། ཏཾ ཏཡོ སཧཱཡཱ ཨུཔནིསྶཱཡ ཝིཧརིཾསུ – ཏིཏྟིརོ ཙ, མཀྐཊོ ཙ, ཧཏྠིནཱགོ ཙ། ཏེ ཨཉྙམཉྙཾ ཨགཱརཝཱ ཨཔྤཏིསྶཱ ཨསབྷཱགཝུཏྟིཀཱ ཝིཧརནྟི། ཨཐ ཁོ, བྷིཀྑཝེ, ཏེསཾ སཧཱཡཱནཾ ཨེཏདཧོསི – ‘ཨཧོ ནཱུན མཡཾ ཛཱནེཡྻཱམ ཡཾ ཨམྷཱཀཾ ཛཱཏིཡཱ མཧནྟཏརཾ ཏཾ མཡཾ སཀྐརེཡྻཱམ གརུཾ ཀརེཡྻཱམ མཱནེཡྻཱམ པཱུཛེཡྻཱམ, ཏསྶ ཙ མཡཾ ཨོཝཱདེ ཏིཊྛེཡྻཱམཱ’ཏི།
311. Atha kho bhagavā bhikkhū āmantesi – ‘‘bhūtapubbaṃ, bhikkhave, himavantapadese 2 mahānigrodho ahosi. Taṃ tayo sahāyā upanissāya vihariṃsu – tittiro ca, makkaṭo ca, hatthināgo ca. Te aññamaññaṃ agāravā appatissā asabhāgavuttikā viharanti. Atha kho, bhikkhave, tesaṃ sahāyānaṃ etadahosi – ‘aho nūna mayaṃ jāneyyāma yaṃ amhākaṃ jātiyā mahantataraṃ taṃ mayaṃ sakkareyyāma garuṃ kareyyāma māneyyāma pūjeyyāma, tassa ca mayaṃ ovāde tiṭṭheyyāmā’ti.
‘‘ཨཐ ཁོ, བྷིཀྑཝེ, ཏིཏྟིརོ ཙ མཀྐཊོ ཙ ཧཏྠིནཱགཾ པུཙྪིཾསུ – ‘ཏྭཾ, སམྨ, ཀིཾ པོརཱཎཾ སརསཱི’ཏི? ‘ཡདཱཧཾ, སམྨཱ, པོཏོ ཧོམི, ཨིམཾ ནིགྲོདྷཾ ཨནྟརཱ སཏྠཱིནཾ 3 ཀརིཏྭཱ ཨཏིཀྐམཱམི, ཨགྒངྐུརཀཾ མེ ཨུདརཾ ཚུཔཏི། ཨིམཱཧཾ, སམྨཱ, པོརཱཎཾ སརཱམཱི’ཏི།
‘‘Atha kho, bhikkhave, tittiro ca makkaṭo ca hatthināgaṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Yadāhaṃ, sammā, poto homi, imaṃ nigrodhaṃ antarā satthīnaṃ 4 karitvā atikkamāmi, aggaṅkurakaṃ me udaraṃ chupati. Imāhaṃ, sammā, porāṇaṃ sarāmī’ti.
‘‘ཨཐ ཁོ, བྷིཀྑཝེ, ཏིཏྟིརོ ཙ ཧཏྠིནཱགོ ཙ མཀྐཊཾ པུཙྪིཾསུ – ‘ཏྭཾ, སམྨ, ཀིཾ པོརཱཎཾ སརསཱི’ཏི? ‘ཡདཱཧཾ, སམྨཱ, ཚཱཔོ ཧོམི, ཚམཱཡཾ ནིསཱིདིཏྭཱ ཨིམསྶ ནིགྲོདྷསྶ ཨགྒངྐུརཀཾ ཁཱདཱམི། ཨིམཱཧཾ, སམྨཱ, པོརཱཎཾ སརཱམཱི’ཏི།
‘‘Atha kho, bhikkhave, tittiro ca hatthināgo ca makkaṭaṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Yadāhaṃ, sammā, chāpo homi, chamāyaṃ nisīditvā imassa nigrodhassa aggaṅkurakaṃ khādāmi. Imāhaṃ, sammā, porāṇaṃ sarāmī’ti.
‘‘ཨཐ ཁོ, བྷིཀྑཝེ, མཀྐཊོ ཙ ཧཏྠིནཱགོ ཙ ཏིཏྟིརཾ པུཙྪིཾསུ – ‘ཏྭཾ, སམྨ, ཀིཾ པོརཱཎཾ སརསཱི’ཏི? ‘ཨམུཀསྨིཾ, སམྨཱ, ཨོཀཱསེ མཧཱནིགྲོདྷོ ཨཧོསི། ཏཏོ ཨཧཾ ཕལཾ བྷཀྑིཏྭཱ ཨིམསྨིཾ ཨོཀཱསེ ཝཙྩཾ ཨཀཱསིཾ; ཏསྶཱཡཾ ནིགྲོདྷོ ཛཱཏོ། ཏདཱཧཾ, སམྨཱ, ཛཱཏིཡཱ མཧནྟཏརོ’ཏི །
‘‘Atha kho, bhikkhave, makkaṭo ca hatthināgo ca tittiraṃ pucchiṃsu – ‘tvaṃ, samma, kiṃ porāṇaṃ sarasī’ti? ‘Amukasmiṃ, sammā, okāse mahānigrodho ahosi. Tato ahaṃ phalaṃ bhakkhitvā imasmiṃ okāse vaccaṃ akāsiṃ; tassāyaṃ nigrodho jāto. Tadāhaṃ, sammā, jātiyā mahantataro’ti .
‘‘ཨཐ ཁོ, བྷིཀྑཝེ, མཀྐཊོ ཙ ཧཏྠིནཱགོ ཙ ཏིཏྟིརཾ ཨེཏདཝོཙུཾ – ‘ཏྭཾ, སམྨ, ཨམྷཱཀཾ ཛཱཏིཡཱ མཧནྟཏརོ། ཏཾ མཡཾ སཀྐརིསྶཱམ གརུཾ ཀརིསྶཱམ མཱནེསྶཱམ པཱུཛེསྶཱམ, ཏུཡ྄ཧཉྩ མཡཾ ཨོཝཱདེ པཏིཊྛིསྶཱམཱ’ཏི། ཨཐ ཁོ, བྷིཀྑཝེ, ཏིཏྟིརོ མཀྐཊཉྩ ཧཏྠིནཱགཉྩ པཉྩསུ སཱིལེསུ སམཱདཔེསི, ཨཏྟནཱ ཙ པཉྩསུ སཱིལེསུ སམཱདཱཡ ཝཏྟཏི། ཏེ ཨཉྙམཉྙཾ སགཱརཝཱ སཔྤཏིསྶཱ སབྷཱགཝུཏྟིཀཱ ཝིཧརིཏྭཱ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫིཾསུ། ཨེཝཾ ཁོ ཏཾ, བྷིཀྑཝེ, ཏིཏྟིརིཡཾ ནཱམ བྲཧྨཙརིཡཾ ཨཧོསི།
‘‘Atha kho, bhikkhave, makkaṭo ca hatthināgo ca tittiraṃ etadavocuṃ – ‘tvaṃ, samma, amhākaṃ jātiyā mahantataro. Taṃ mayaṃ sakkarissāma garuṃ karissāma mānessāma pūjessāma, tuyhañca mayaṃ ovāde patiṭṭhissāmā’ti. Atha kho, bhikkhave, tittiro makkaṭañca hatthināgañca pañcasu sīlesu samādapesi, attanā ca pañcasu sīlesu samādāya vattati. Te aññamaññaṃ sagāravā sappatissā sabhāgavuttikā viharitvā kāyassa bhedā paraṃ maraṇā sugatiṃ saggaṃ lokaṃ upapajjiṃsu. Evaṃ kho taṃ, bhikkhave, tittiriyaṃ nāma brahmacariyaṃ ahosi.
དིཊྛེ དྷམྨེ ཙ པཱསཾསཱ, སམྤརཱཡེ ཙ སུགྒཏཱི’’ཏི༎
Diṭṭhe dhamme ca pāsaṃsā, samparāye ca suggatī’’ti.
‘‘ཏེ ཧི ནཱམ, བྷིཀྑཝེ, ཏིརཙྪཱནགཏཱ པཱཎཱ ཨཉྙམཉྙཾ སགཱརཝཱ སཔྤཏིསྶཱ སབྷཱགཝུཏྟིཀཱ ཝིཧརིསྶནྟི། ཨིདྷ ཁོ ཏཾ, བྷིཀྑཝེ, སོབྷེཐ ཡཾ ཏུམྷེ ཨེཝཾ སྭཱཀྑཱཏེ དྷམྨཝིནཡེ པབྦཛིཏཱ སམཱནཱ ཨཉྙམཉྙཾ ཨགཱརཝཱ ཨཔྤཏིསྶཱ ཨསབྷཱགཝུཏྟིཀཱ ཝིཧརེཡྻཱཐ? ནེཏཾ, བྷིཀྑཝེ , ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཡཐཱཝུཌྜྷཾ ཨབྷིཝཱདནཾ, པཙྩུཊྛཱནཾ, ཨཉྫལིཀམྨཾ, སཱམཱིཙིཀམྨཾ, ཨགྒཱསནཾ, ཨགྒོདཀཾ, ཨགྒཔིཎྜཾ། ན ཙ, བྷིཀྑཝེ, སངྒྷིཀཾ ཡཐཱཝུཌྜྷཾ པཊིབཱཧིཏབྦཾ། ཡོ པཊིབཱཧེཡྻ, ཨཱཔཏྟི དུཀྐཊསྶཱ’’ཏི།
‘‘Te hi nāma, bhikkhave, tiracchānagatā pāṇā aññamaññaṃ sagāravā sappatissā sabhāgavuttikā viharissanti. Idha kho taṃ, bhikkhave, sobhetha yaṃ tumhe evaṃ svākkhāte dhammavinaye pabbajitā samānā aññamaññaṃ agāravā appatissā asabhāgavuttikā vihareyyātha? Netaṃ, bhikkhave , appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘anujānāmi, bhikkhave, yathāvuḍḍhaṃ abhivādanaṃ, paccuṭṭhānaṃ, añjalikammaṃ, sāmīcikammaṃ, aggāsanaṃ, aggodakaṃ, aggapiṇḍaṃ. Na ca, bhikkhave, saṅghikaṃ yathāvuḍḍhaṃ paṭibāhitabbaṃ. Yo paṭibāheyya, āpatti dukkaṭassā’’ti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཝིཧཱརཱནུཛཱནནཀཐཱ • Vihārānujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཨགྒཱསནཱདིཨནུཛཱནནཀཐཱཝཎྞནཱ • Aggāsanādianujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཝིཧཱརཱནུཛཱནནཀཐཱཝཎྞནཱ • Vihārānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ཝིཧཱརཱནུཛཱནནཀཐཱ • Vihārānujānanakathā
