| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
8. அக்³கி³கஸுத்தவண்ணனா
8. Aggikasuttavaṇṇanā
194. அட்ட²மே அக்³கி³கபா⁴ரத்³வாஜோதி அயம்பி பா⁴ரத்³வாஜோவ, அக்³கி³ பரிசரணவஸேன பனஸ்ஸ ஸங்கீ³திகாரேஹி ஏதங் நாமங் க³ஹிதங். ஸன்னிஹிதோ ஹோதீதி ஸங்யோஜிதோ ஹோதி. அட்டா²ஸீதி கஸ்மா தத்த² அட்டா²ஸி? ப⁴க³வா கிர பச்சூஸஸமயே லோகங் ஓலோகெந்தோ இமங் ப்³ராஹ்மணங் தி³ஸ்வா சிந்தேஸி – ‘‘அயங் ப்³ராஹ்மணோ ஏவரூபங் அக்³க³பாயாஸங் க³ஹெத்வா ‘மஹாப்³ரஹ்மானங் போ⁴ஜேமீ’தி அக்³கி³ம்ஹி ஜா²பெந்தோ அப²லங் கரோதி அபாயமக்³க³ங் ஓக்கமதி, இமங் லத்³தி⁴ங் அவிஸ்ஸஜ்ஜந்தோ அபாயபூரகோவ ப⁴விஸ்ஸதி, க³ச்சா²மிஸ்ஸ த⁴ம்மதே³ஸனாய, மிச்சா²தி³ட்டி²ங் பி⁴ந்தி³த்வா பப்³பா³ஜெத்வா சத்தாரோ மக்³கே³ சேவ சத்தாரி ச ப²லானி தே³மீ’’தி, தஸ்மா புப்³ப³ண்ஹஸமயே ராஜக³ஹங் பவிஸித்வா தத்த² அட்டா²ஸி.
194. Aṭṭhame aggikabhāradvājoti ayampi bhāradvājova, aggi paricaraṇavasena panassa saṅgītikārehi etaṃ nāmaṃ gahitaṃ. Sannihito hotīti saṃyojito hoti. Aṭṭhāsīti kasmā tattha aṭṭhāsi? Bhagavā kira paccūsasamaye lokaṃ olokento imaṃ brāhmaṇaṃ disvā cintesi – ‘‘ayaṃ brāhmaṇo evarūpaṃ aggapāyāsaṃ gahetvā ‘mahābrahmānaṃ bhojemī’ti aggimhi jhāpento aphalaṃ karoti apāyamaggaṃ okkamati, imaṃ laddhiṃ avissajjanto apāyapūrakova bhavissati, gacchāmissa dhammadesanāya, micchādiṭṭhiṃ bhinditvā pabbājetvā cattāro magge ceva cattāri ca phalāni demī’’ti, tasmā pubbaṇhasamaye rājagahaṃ pavisitvā tattha aṭṭhāsi.
தீஹி விஜ்ஜாஹீதி தீஹி வேதே³ஹி. ஜாதிமாதி யாவ ஸத்தமா பிதாமஹயுகா³ பரிஸுத்³தா⁴ய ஜாதியா ஸமன்னாக³தோ. ஸுதவா ப³ஹூதி ப³ஹு நானப்பகாரே க³ந்தே² ஸுதவா. ஸோமங் பு⁴ஞ்ஜெய்யாதி ஸோ தேவிஜ்ஜோ ப்³ராஹ்மணோ இமங் பாயாஸங் பு⁴ஞ்ஜிதுங் யுத்தோ, தும்ஹாகங் பனேஸ பாயாஸோ அயுத்தோதி வத³தி.
Tīhi vijjāhīti tīhi vedehi. Jātimāti yāva sattamā pitāmahayugā parisuddhāya jātiyā samannāgato. Sutavā bahūti bahu nānappakāre ganthe sutavā. Somaṃ bhuñjeyyāti so tevijjo brāhmaṇo imaṃ pāyāsaṃ bhuñjituṃ yutto, tumhākaṃ panesa pāyāso ayuttoti vadati.
வேதீ³தி புப்³பே³னிவாஸஞாணேன ஜானி படிவிஜ்ஜி². ஸக்³கா³பாயந்தி தி³ப்³பே³ன சக்கு²னா ஸக்³க³ம்பி அபாயம்பி பஸ்ஸதி. ஜாதிக்க²யந்தி அரஹத்தங். அபி⁴ஞ்ஞாவோஸிதோதி ஜானித்வா வோஸிதவோஸானோ. ப்³ராஹ்மணோ ப⁴வந்தி அவீசிதோ யாவ ப⁴வக்³கா³ போ⁴தா கோ³தமேன ஸதி³ஸோ ஜாதிஸம்பன்னோ கீ²ணாஸவப்³ராஹ்மணோ நத்தி², ப⁴வங்யேவ ப்³ராஹ்மணோதி.
Vedīti pubbenivāsañāṇena jāni paṭivijjhi. Saggāpāyanti dibbena cakkhunā saggampi apāyampi passati. Jātikkhayanti arahattaṃ. Abhiññāvositoti jānitvā vositavosāno. Brāhmaṇobhavanti avīcito yāva bhavaggā bhotā gotamena sadiso jātisampanno khīṇāsavabrāhmaṇo natthi, bhavaṃyeva brāhmaṇoti.
ஏவஞ்ச பன வத்வா ஸுவண்ணபாதிங் பூரெத்வா த³ஸப³லஸ்ஸ பாயாஸங் உபனாமேஸி. ஸத்தா² உப்பத்திங் தீ³பெத்வா போ⁴ஜனங் படிக்கி²பந்தோ கா³தா²பி⁴கீ³தங் மேதிஆதி³மாஹ. தத்த² கா³தா²பி⁴கீ³தந்தி கா³தா²ஹி அபி⁴கீ³தங். அபோ⁴ஜனெய்யந்தி அபு⁴ஞ்ஜிதப்³ப³ங் . இத³ங் வுத்தங் ஹோதி – த்வங், ப்³ராஹ்மண, மய்ஹங் எத்தகங் காலங் பி⁴க்கா²சாரவத்தேன டி²தஸ்ஸ கடச்சு²மத்தம்பி தா³துங் நாஸக்கி², இதா³னி பன மயா துய்ஹங் கிலஞ்ஜம்ஹி திலே வித்தா²ரெந்தேன விய ஸப்³பே³ பு³த்³த⁴கு³ணா பகாஸிதா, இதி கா³யனேன கா³யித்வா லத்³த⁴ங் விய இத³ங் போ⁴ஜனங் ஹோதி, தஸ்மா இத³ங் கா³தா²பி⁴கீ³தங் மே அபோ⁴ஜனெய்யந்தி. ஸம்பஸ்ஸதங், ப்³ராஹ்மண, நேஸ த⁴ம்மோதி, ப்³ராஹ்மண, அத்த²ஞ்ச த⁴ம்மஞ்ச ஸம்பஸ்ஸந்தானங் ‘‘ஏவரூபங் போ⁴ஜனங் பு⁴ஞ்ஜிதப்³ப³’’ந்தி ஏஸ த⁴ம்மோ ந ஹோதி. ஸுதா⁴போ⁴ஜனம்பி கா³தா²பி⁴கீ³தங் பனுத³ந்தி பு³த்³தா⁴, கா³தா²ஹி கா³யித்வா லத்³த⁴ங் பு³த்³தா⁴ நீஹரந்தியேவ. த⁴ம்மே ஸதி, ப்³ராஹ்மண, வுத்திரேஸாதி, ப்³ராஹ்மண, த⁴ம்மே ஸதி த⁴ம்மங் அபெக்கி²த்வா த⁴ம்மே பதிட்டா²ய ஜீவிதங் கப்பெந்தானங் ஏஸா வுத்தி அயங் ஆஜீவோ – ஏவரூபங் நீஹரித்வா த⁴ம்மலத்³த⁴மேவ பு⁴ஞ்ஜிதப்³ப³ந்தி.
Evañca pana vatvā suvaṇṇapātiṃ pūretvā dasabalassa pāyāsaṃ upanāmesi. Satthā uppattiṃ dīpetvā bhojanaṃ paṭikkhipanto gāthābhigītaṃ metiādimāha. Tattha gāthābhigītanti gāthāhi abhigītaṃ. Abhojaneyyanti abhuñjitabbaṃ . Idaṃ vuttaṃ hoti – tvaṃ, brāhmaṇa, mayhaṃ ettakaṃ kālaṃ bhikkhācāravattena ṭhitassa kaṭacchumattampi dātuṃ nāsakkhi, idāni pana mayā tuyhaṃ kilañjamhi tile vitthārentena viya sabbe buddhaguṇā pakāsitā, iti gāyanena gāyitvā laddhaṃ viya idaṃ bhojanaṃ hoti, tasmā idaṃ gāthābhigītaṃ me abhojaneyyanti. Sampassataṃ, brāhmaṇa, nesa dhammoti, brāhmaṇa, atthañca dhammañca sampassantānaṃ ‘‘evarūpaṃ bhojanaṃ bhuñjitabba’’nti esa dhammo na hoti. Sudhābhojanampi gāthābhigītaṃ panudanti buddhā, gāthāhi gāyitvā laddhaṃ buddhā nīharantiyeva. Dhamme sati, brāhmaṇa, vuttiresāti, brāhmaṇa, dhamme sati dhammaṃ apekkhitvā dhamme patiṭṭhāya jīvitaṃ kappentānaṃ esā vutti ayaṃ ājīvo – evarūpaṃ nīharitvā dhammaladdhameva bhuñjitabbanti.
அத² ப்³ராஹ்மணோ சிந்தேஸி – அஹங் புப்³பே³ ஸமணஸ்ஸ கோ³தமஸ்ஸ கு³ணே வா அகு³ணே வா ந ஜானாமி. இதா³னி பனஸ்ஸாஹங் கு³ணே ஞத்வா மம கே³ஹே அஸீதிகோடிமத்தங் த⁴னங் ஸாஸனே விப்பகிரிதுகாமோ ஜாதோ, அயஞ்ச ‘‘மயா தி³ன்னபச்சயா அகப்பியா’’தி வத³தி. அப்படிக்³க³ய்ஹோ அஹங் ஸமணேன கோ³தமேனாதி. அத² ப⁴க³வா ஸப்³ப³ஞ்ஞுதஞ்ஞாணங் பேஸெத்வா தஸ்ஸ சித்தாசாரங் வீமங்ஸந்தோ, ‘‘அயங் ஸப்³பே³பி அத்தனா தி³ன்னபச்சயே ‘அகப்பியா’தி ஸல்லக்கே²தி. யங் ஹி போ⁴ஜனங் ஆரப்³ப⁴ கதா² உப்பன்னா, ஏததே³வ ந வட்டதி, ஸேஸா நித்³தோ³ஸா’’தி ப்³ராஹ்மணஸ்ஸ சதுன்னங் பச்சயானங் தா³னத்³வாரங் த³ஸ்ஸெந்தோ அஞ்ஞேன சாதிஆதி³மாஹ. தத்த² குக்குச்சவூபஸந்தந்தி ஹத்த²குக்குச்சாதீ³னங் வஸேன வூபஸந்தகுக்குச்சங். அன்னேன பானேனாதி தே³ஸனாமத்தமேதங் . அயங் பனத்தோ² – அஞ்ஞேஹி தயா ‘‘பரிச்சஜிஸ்ஸாமீ’’தி ஸல்லக்கி²தேஹி சீவராதீ³ஹி பச்சயேஹி உபட்ட²ஹஸ்ஸு. கெ²த்தங் ஹி தங் புஞ்ஞபெக்க²ஸ்ஸ ஹோதீதி ஏதங் ததா²க³தஸாஸனங் நாம புஞ்ஞபெக்க²ஸ்ஸ புஞ்ஞத்தி²கஸ்ஸ துய்ஹங் அப்பேபி பீ³ஜே ப³ஹுஸஸ்ஸப²லதா³யகங் ஸுகெ²த்தங் விய படியத்தங் ஹோதி. அட்ட²மங்.
Atha brāhmaṇo cintesi – ahaṃ pubbe samaṇassa gotamassa guṇe vā aguṇe vā na jānāmi. Idāni panassāhaṃ guṇe ñatvā mama gehe asītikoṭimattaṃ dhanaṃ sāsane vippakiritukāmo jāto, ayañca ‘‘mayā dinnapaccayā akappiyā’’ti vadati. Appaṭiggayho ahaṃ samaṇena gotamenāti. Atha bhagavā sabbaññutaññāṇaṃ pesetvā tassa cittācāraṃ vīmaṃsanto, ‘‘ayaṃ sabbepi attanā dinnapaccaye ‘akappiyā’ti sallakkheti. Yaṃ hi bhojanaṃ ārabbha kathā uppannā, etadeva na vaṭṭati, sesā niddosā’’ti brāhmaṇassa catunnaṃ paccayānaṃ dānadvāraṃ dassento aññena cātiādimāha. Tattha kukkuccavūpasantanti hatthakukkuccādīnaṃ vasena vūpasantakukkuccaṃ. Annena pānenāti desanāmattametaṃ . Ayaṃ panattho – aññehi tayā ‘‘pariccajissāmī’’ti sallakkhitehi cīvarādīhi paccayehi upaṭṭhahassu. Khettaṃ hi taṃ puññapekkhassa hotīti etaṃ tathāgatasāsanaṃ nāma puññapekkhassa puññatthikassa tuyhaṃ appepi bīje bahusassaphaladāyakaṃ sukhettaṃ viya paṭiyattaṃ hoti. Aṭṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 8. அக்³கி³கஸுத்தங் • 8. Aggikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. அக்³கி³கஸுத்தவண்ணனா • 8. Aggikasuttavaṇṇanā
