| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༨. ཨགྒིཀསུཏྟཝཎྞནཱ
8. Aggikasuttavaṇṇanā
༡༩༤. ཨགྒིཔརིཙརཎཝསེནཱཏི ཨགྒིཧུཏྟཛུཧནཝསེན། སནྣིཧིཏོཏི མིསྶཱིབྷཱཝཾ སམྤཱཔིཏོ། ཏཐཱབྷཱུཏོ ཙ སོ སཔྤིནཱ སདྡྷིཾ ཡོཛིཏོ ནཱམ ཧོཏཱིཏི ཨཱཧ ‘‘སཾཡོཛིཏོ’’ཏི། ཨཔཱཡམགྒཾ ཨོཀྐམཏི མིཙྪཱདིཊྛིམིཙྪཱསངྐཔྤཱདཱིནཾ ཨཏྟནོ སནྟཱནེ སམུཔྤཱདནཏོ། ཏེནཱཧ ‘‘ཨིམཾ ལདྡྷི’’ནྟིཨཱདི།
194.Aggiparicaraṇavasenāti aggihuttajuhanavasena. Sannihitoti missībhāvaṃ sampāpito. Tathābhūto ca so sappinā saddhiṃ yojito nāma hotīti āha ‘‘saṃyojito’’ti. Apāyamaggaṃ okkamati micchādiṭṭhimicchāsaṅkappādīnaṃ attano santāne samuppādanato. Tenāha ‘‘imaṃ laddhi’’ntiādi.
ཛཱཏིཡཱཏི སདོསཀིརིཡཱཔརཱདྷསྶ ཨསམྦྷཝེན པརིསུདྡྷཱཡ ཛཱཏིཡཱ། ནཱནཔྤཀཱརེ ཨཊྛཱརསཝིཛྫཱཊྛཱནསཉྙིཏེ གནྠེ། སུཏཝཱཏི སུཏྭཱ ནིཊྛཾ པཏྟོ ཨགྒདཀྑིཎེཡྻཏྟཱཏི ཨདྷིཔྤཱཡོ།
Jātiyāti sadosakiriyāparādhassa asambhavena parisuddhāya jātiyā. Nānappakāre aṭṭhārasavijjāṭṭhānasaññite ganthe. Sutavāti sutvā niṭṭhaṃ patto aggadakkhiṇeyyattāti adhippāyo.
པུབྦེནིཝཱསཉཱཎེནཱཏི ཨིདཾ ལོཀེ སཱསནེ ཙ ནིརུལ༹ྷཏཱཝསེན ཝུཏྟཾ། ཨཉྙེ ཧི པུབྦེནིཝཱསཾ ཛཱནནྟཱ པུབྦེནིཝཱསཉཱཎེནེཝ ཛཱནནྟི, བྷགཝཱ པན སབྦཉྙུཏཉྙཱཎེནཔི ཛཱནཱཏི། དིབྦེན ཙཀྑུནཱཏི ཨེཏྠཱཔི ཨེསེཝ ནཡོ། སབྦསོ ཛཱཏི ཁཱིཡཏི ཨེཏེནཱཏི ཛཱཏིཀྑཡོ, ཨགྒམགྒོ , ཏེན པཏྟབྦཏྟཱ ཨཱཔནྣཏྟཱ ཙ ཛཱཏིཀྑཡོ ཨརཧཏྟཾ། ཛཱནིཏྭཱ ཝོསིཏཝོསཱནོཏི ཝིཛཱནིཏབྦཾ ཙཏུསཙྩདྷམྨཾ མགྒཉཱཎེན ཛཱནིཏྭཱ སོལ༹སནྣམྤི ཀིཙྩཱནཾ ཝོསིཏཝོསཱནོ།
Pubbenivāsañāṇenāti idaṃ loke sāsane ca niruḷhatāvasena vuttaṃ. Aññe hi pubbenivāsaṃ jānantā pubbenivāsañāṇeneva jānanti, bhagavā pana sabbaññutaññāṇenapi jānāti. Dibbena cakkhunāti etthāpi eseva nayo. Sabbaso jāti khīyati etenāti jātikkhayo, aggamaggo , tena pattabbattā āpannattā ca jātikkhayo arahattaṃ. Jānitvā vositavosānoti vijānitabbaṃ catusaccadhammaṃ maggañāṇena jānitvā soḷasannampi kiccānaṃ vositavosāno.
ཨུཔྤཏྟིཾ དཱིཔེཏྭཱཏི པཱཡསདཱནསྶ ཨཱགམནཾ པཀཱསེཏྭཱ། གཱཐཱཧི ཨབྷིགཱིཏནྟི དྭཱིཧི གཱཐཱཧི མཡཱ ཨབྷིགཱིཏཾ། ཨབྷུཉྫིཏབྦནྟི བྷུཉྫིཏུཾ ན ཡུཏྟཾ། ‘‘ཨབྷོཛནེཡྻ’’ནྟི ཀསྨཱ ཝུཏྟཾ, ནནུ བྷགཝཏོ ཨཛ྄ཛྷཱསཡོ ཨཙྩནྟམེཝ སུདྡྷོཏི? སཙྩམེཏཾ, བྲཱཧྨཎོ པན པུབྦེ ཨདཱཏུཀཱམོ པཙྪཱ གཱཐཱ སུཏྭཱ དྷམྨདེསནཱཡ མུདུཧདཡོ ཧུཏྭཱ དཱཏུཀཱམོ ཨཧོསི, ཏསྨཱ ཏཾ བྷིཀྑཱུནཾ ཨནཱགཏེ དིཊྛཱནུགཏིཨཱཔཛྫནཏྠཾ པཊིཀྑིཔི། ཏཐཱ ཧི ཨནནྟརསུཏྟེ ཀསིབྷཱརདྭཱཛསུཏྟེ ཙ ཨེཝམེཝ པཊིཔཛྫི། ཏེནཱཧ ‘‘ཏྭཾ བྲཱཧྨཎཱ’’ཏིཨཱདི། ཀིལཉྫམྷི…པེ॰… པཀཱསིཏཱཏི ཨེཏེན གཱཐཾ ཨུདྡེསཊྛཱནེཝ ཋཔེཏྭཱ བྷགཝཱ བྲཱཧྨཎསྶ ཝིཏྠཱརེན དྷམྨཾ དེསེསཱིཏི དསྶེཏི། གཱཡནེནཱཏི གཱཡནཀེན, གཱནེན ཝཱ། ཨཏྠཉྩ དྷམྨཉྩཱཏི སདེཝཀསྶ ལོཀསྶ ཧིཏཉྩེཝ ཏསྶ ཀཱརཎཉྩ། སམྤསྶནྟཱནནྟི སམྨདེཝ པསྶནྟཱནཾ། དྷམྨོཏི པཝེཎིཨཱགཏོ ཙཱརིཏྟདྷམྨོ ན ཧོཏི། བྷོཛནེསུ ཨུཀྐཾསགཏཾ དསྶེཏུཾ ‘‘སུདྷཱབྷོཛན’’ནྟི ཨཱཧ། དྷམྨེ སཏཱིཏི ཨརིཡཱནཾ ཨཱཙཱརདྷམྨེ སཏི ཏཾ ཨཱལམྦིཏྭཱ ཛཱིཝནྟཱནཾ ཨེཏདེཝ སེཊྛནྟི ‘‘སོམཾ བྷུཉྫེཡྻ པཱཡས’’ནྟི ཏཾ ཨཱརབྦྷ ཀཐཱཡ ཨུཔྤནྣཏྟཱ།
Uppattiṃ dīpetvāti pāyasadānassa āgamanaṃ pakāsetvā. Gāthāhi abhigītanti dvīhi gāthāhi mayā abhigītaṃ. Abhuñjitabbanti bhuñjituṃ na yuttaṃ. ‘‘Abhojaneyya’’nti kasmā vuttaṃ, nanu bhagavato ajjhāsayo accantameva suddhoti? Saccametaṃ, brāhmaṇo pana pubbe adātukāmo pacchā gāthā sutvā dhammadesanāya muduhadayo hutvā dātukāmo ahosi, tasmā taṃ bhikkhūnaṃ anāgate diṭṭhānugatiāpajjanatthaṃ paṭikkhipi. Tathā hi anantarasutte kasibhāradvājasutte ca evameva paṭipajji. Tenāha ‘‘tvaṃ brāhmaṇā’’tiādi. Kilañjamhi…pe… pakāsitāti etena gāthaṃ uddesaṭṭhāneva ṭhapetvā bhagavā brāhmaṇassa vitthārena dhammaṃ desesīti dasseti. Gāyanenāti gāyanakena, gānena vā. Atthañca dhammañcāti sadevakassa lokassa hitañceva tassa kāraṇañca. Sampassantānanti sammadeva passantānaṃ. Dhammoti paveṇiāgato cārittadhammo na hoti. Bhojanesu ukkaṃsagataṃ dassetuṃ ‘‘sudhābhojana’’nti āha. Dhamme satīti ariyānaṃ ācāradhamme sati taṃ ālambitvā jīvantānaṃ etadeva seṭṭhanti ‘‘somaṃ bhuñjeyya pāyasa’’nti taṃ ārabbha kathāya uppannattā.
སལླཀྑེཏི ཨཡཾ བྲཱཧྨཎོ། སེསཱ པཙྩཡཱ ནིདྡོསཱ ཏེ ཨཱརབྦྷ ཀཐཱཡ ཨཔྤཝཏྟིཏཏྟཱ། ཀུཀྐུཙྩཝཱུཔསནྟནྟི ཨགྒིཨཱཧིཏཔདསྶ ཝིཡ སདྡསིདྡྷི ཝེདིཏབྦཱ། ཨནྣེན པཱནེནཱཏི ལཀྑཎཝཙནམེཏཾ ཡཐཱ ‘‘ཀཱཀེཧི སཔྤི རཀྑིཏབྦ’’ནྟི། ཏེནཱཧ ‘‘དེསནཱམཏྟམེཏ’’ནྟི། བཧུསསྶཕལདཱཡཀཾ སུཁེཏྟཾ ཝིཡ པཊིཡཏྟནྟི སམྨཱ ཀསནབཱིཛནཨུདཀཱནཡནཱཔནཡནཱདིནཱ སུསཛྫིཏཾ ཁེཏྟཾ ཝིཡ སཱིལཱདིགུཎཝིསེསསམྤཱདནེན པཊིཡཏྟཾ པུཉྙཀྑེཏྟཾ ཨེཏཾ།
Sallakkheti ayaṃ brāhmaṇo. Sesā paccayā niddosā te ārabbha kathāya appavattitattā. Kukkuccavūpasantanti aggiāhitapadassa viya saddasiddhi veditabbā. Annena pānenāti lakkhaṇavacanametaṃ yathā ‘‘kākehi sappi rakkhitabba’’nti. Tenāha ‘‘desanāmattameta’’nti. Bahusassaphaladāyakaṃ sukhettaṃ viya paṭiyattanti sammā kasanabījanaudakānayanāpanayanādinā susajjitaṃ khettaṃ viya sīlādiguṇavisesasampādanena paṭiyattaṃ puññakkhettaṃ etaṃ.
ཨགྒིཀསུཏྟཝཎྞནཱ ནིཊྛིཏཱ།
Aggikasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༨. ཨགྒིཀསུཏྟཾ • 8. Aggikasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༨. ཨགྒིཀསུཏྟཝཎྞནཱ • 8. Aggikasuttavaṇṇanā
