| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੮. ਅਗ੍ਗਿਕਸੁਤ੍ਤવਣ੍ਣਨਾ
8. Aggikasuttavaṇṇanā
੧੯੪. ਅਟ੍ਠਮੇ ਅਗ੍ਗਿਕਭਾਰਦ੍વਾਜੋਤਿ ਅਯਮ੍ਪਿ ਭਾਰਦ੍વਾਜੋવ, ਅਗ੍ਗਿ ਪਰਿਚਰਣવਸੇਨ ਪਨਸ੍ਸ ਸਙ੍ਗੀਤਿਕਾਰੇਹਿ ਏਤਂ ਨਾਮਂ ਗਹਿਤਂ। ਸਨ੍ਨਿਹਿਤੋ ਹੋਤੀਤਿ ਸਂਯੋਜਿਤੋ ਹੋਤਿ। ਅਟ੍ਠਾਸੀਤਿ ਕਸ੍ਮਾ ਤਤ੍ਥ ਅਟ੍ਠਾਸਿ? ਭਗવਾ ਕਿਰ ਪਚ੍ਚੂਸਸਮਯੇ ਲੋਕਂ ਓਲੋਕੇਨ੍ਤੋ ਇਮਂ ਬ੍ਰਾਹ੍ਮਣਂ ਦਿਸ੍વਾ ਚਿਨ੍ਤੇਸਿ – ‘‘ਅਯਂ ਬ੍ਰਾਹ੍ਮਣੋ ਏવਰੂਪਂ ਅਗ੍ਗਪਾਯਾਸਂ ਗਹੇਤ੍વਾ ‘ਮਹਾਬ੍ਰਹ੍ਮਾਨਂ ਭੋਜੇਮੀ’ਤਿ ਅਗ੍ਗਿਮ੍ਹਿ ਝਾਪੇਨ੍ਤੋ ਅਫਲਂ ਕਰੋਤਿ ਅਪਾਯਮਗ੍ਗਂ ਓਕ੍ਕਮਤਿ, ਇਮਂ ਲਦ੍ਧਿਂ ਅવਿਸ੍ਸਜ੍ਜਨ੍ਤੋ ਅਪਾਯਪੂਰਕੋવ ਭવਿਸ੍ਸਤਿ, ਗਚ੍ਛਾਮਿਸ੍ਸ ਧਮ੍ਮਦੇਸਨਾਯ, ਮਿਚ੍ਛਾਦਿਟ੍ਠਿਂ ਭਿਨ੍ਦਿਤ੍વਾ ਪਬ੍ਬਾਜੇਤ੍વਾ ਚਤ੍ਤਾਰੋ ਮਗ੍ਗੇ ਚੇવ ਚਤ੍ਤਾਰਿ ਚ ਫਲਾਨਿ ਦੇਮੀ’’ਤਿ, ਤਸ੍ਮਾ ਪੁਬ੍ਬਣ੍ਹਸਮਯੇ ਰਾਜਗਹਂ ਪવਿਸਿਤ੍વਾ ਤਤ੍ਥ ਅਟ੍ਠਾਸਿ।
194. Aṭṭhame aggikabhāradvājoti ayampi bhāradvājova, aggi paricaraṇavasena panassa saṅgītikārehi etaṃ nāmaṃ gahitaṃ. Sannihito hotīti saṃyojito hoti. Aṭṭhāsīti kasmā tattha aṭṭhāsi? Bhagavā kira paccūsasamaye lokaṃ olokento imaṃ brāhmaṇaṃ disvā cintesi – ‘‘ayaṃ brāhmaṇo evarūpaṃ aggapāyāsaṃ gahetvā ‘mahābrahmānaṃ bhojemī’ti aggimhi jhāpento aphalaṃ karoti apāyamaggaṃ okkamati, imaṃ laddhiṃ avissajjanto apāyapūrakova bhavissati, gacchāmissa dhammadesanāya, micchādiṭṭhiṃ bhinditvā pabbājetvā cattāro magge ceva cattāri ca phalāni demī’’ti, tasmā pubbaṇhasamaye rājagahaṃ pavisitvā tattha aṭṭhāsi.
ਤੀਹਿ વਿਜ੍ਜਾਹੀਤਿ ਤੀਹਿ વੇਦੇਹਿ। ਜਾਤਿਮਾਤਿ ਯਾવ ਸਤ੍ਤਮਾ ਪਿਤਾਮਹਯੁਗਾ ਪਰਿਸੁਦ੍ਧਾਯ ਜਾਤਿਯਾ ਸਮਨ੍ਨਾਗਤੋ। ਸੁਤવਾ ਬਹੂਤਿ ਬਹੁ ਨਾਨਪ੍ਪਕਾਰੇ ਗਨ੍ਥੇ ਸੁਤવਾ। ਸੋਮਂ ਭੁਞ੍ਜੇਯ੍ਯਾਤਿ ਸੋ ਤੇવਿਜ੍ਜੋ ਬ੍ਰਾਹ੍ਮਣੋ ਇਮਂ ਪਾਯਾਸਂ ਭੁਞ੍ਜਿਤੁਂ ਯੁਤ੍ਤੋ, ਤੁਮ੍ਹਾਕਂ ਪਨੇਸ ਪਾਯਾਸੋ ਅਯੁਤ੍ਤੋਤਿ વਦਤਿ।
Tīhi vijjāhīti tīhi vedehi. Jātimāti yāva sattamā pitāmahayugā parisuddhāya jātiyā samannāgato. Sutavā bahūti bahu nānappakāre ganthe sutavā. Somaṃ bhuñjeyyāti so tevijjo brāhmaṇo imaṃ pāyāsaṃ bhuñjituṃ yutto, tumhākaṃ panesa pāyāso ayuttoti vadati.
વੇਦੀਤਿ ਪੁਬ੍ਬੇਨਿવਾਸਞਾਣੇਨ ਜਾਨਿ ਪਟਿવਿਜ੍ਝਿ। ਸਗ੍ਗਾਪਾਯਨ੍ਤਿ ਦਿਬ੍ਬੇਨ ਚਕ੍ਖੁਨਾ ਸਗ੍ਗਮ੍ਪਿ ਅਪਾਯਮ੍ਪਿ ਪਸ੍ਸਤਿ। ਜਾਤਿਕ੍ਖਯਨ੍ਤਿ ਅਰਹਤ੍ਤਂ। ਅਭਿਞ੍ਞਾવੋਸਿਤੋਤਿ ਜਾਨਿਤ੍વਾ વੋਸਿਤવੋਸਾਨੋ। ਬ੍ਰਾਹ੍ਮਣੋ ਭવਨ੍ਤਿ ਅવੀਚਿਤੋ ਯਾવ ਭવਗ੍ਗਾ ਭੋਤਾ ਗੋਤਮੇਨ ਸਦਿਸੋ ਜਾਤਿਸਮ੍ਪਨ੍ਨੋ ਖੀਣਾਸવਬ੍ਰਾਹ੍ਮਣੋ ਨਤ੍ਥਿ, ਭવਂਯੇવ ਬ੍ਰਾਹ੍ਮਣੋਤਿ।
Vedīti pubbenivāsañāṇena jāni paṭivijjhi. Saggāpāyanti dibbena cakkhunā saggampi apāyampi passati. Jātikkhayanti arahattaṃ. Abhiññāvositoti jānitvā vositavosāno. Brāhmaṇobhavanti avīcito yāva bhavaggā bhotā gotamena sadiso jātisampanno khīṇāsavabrāhmaṇo natthi, bhavaṃyeva brāhmaṇoti.
ਏવਞ੍ਚ ਪਨ વਤ੍વਾ ਸੁવਣ੍ਣਪਾਤਿਂ ਪੂਰੇਤ੍વਾ ਦਸਬਲਸ੍ਸ ਪਾਯਾਸਂ ਉਪਨਾਮੇਸਿ। ਸਤ੍ਥਾ ਉਪ੍ਪਤ੍ਤਿਂ ਦੀਪੇਤ੍વਾ ਭੋਜਨਂ ਪਟਿਕ੍ਖਿਪਨ੍ਤੋ ਗਾਥਾਭਿਗੀਤਂ ਮੇਤਿਆਦਿਮਾਹ। ਤਤ੍ਥ ਗਾਥਾਭਿਗੀਤਨ੍ਤਿ ਗਾਥਾਹਿ ਅਭਿਗੀਤਂ। ਅਭੋਜਨੇਯ੍ਯਨ੍ਤਿ ਅਭੁਞ੍ਜਿਤਬ੍ਬਂ । ਇਦਂ વੁਤ੍ਤਂ ਹੋਤਿ – ਤ੍વਂ, ਬ੍ਰਾਹ੍ਮਣ, ਮਯ੍ਹਂ ਏਤ੍ਤਕਂ ਕਾਲਂ ਭਿਕ੍ਖਾਚਾਰવਤ੍ਤੇਨ ਠਿਤਸ੍ਸ ਕਟਚ੍ਛੁਮਤ੍ਤਮ੍ਪਿ ਦਾਤੁਂ ਨਾਸਕ੍ਖਿ, ਇਦਾਨਿ ਪਨ ਮਯਾ ਤੁਯ੍ਹਂ ਕਿਲਞ੍ਜਮ੍ਹਿ ਤਿਲੇ વਿਤ੍ਥਾਰੇਨ੍ਤੇਨ વਿਯ ਸਬ੍ਬੇ ਬੁਦ੍ਧਗੁਣਾ ਪਕਾਸਿਤਾ, ਇਤਿ ਗਾਯਨੇਨ ਗਾਯਿਤ੍વਾ ਲਦ੍ਧਂ વਿਯ ਇਦਂ ਭੋਜਨਂ ਹੋਤਿ, ਤਸ੍ਮਾ ਇਦਂ ਗਾਥਾਭਿਗੀਤਂ ਮੇ ਅਭੋਜਨੇਯ੍ਯਨ੍ਤਿ। ਸਮ੍ਪਸ੍ਸਤਂ, ਬ੍ਰਾਹ੍ਮਣ, ਨੇਸ ਧਮ੍ਮੋਤਿ, ਬ੍ਰਾਹ੍ਮਣ, ਅਤ੍ਥਞ੍ਚ ਧਮ੍ਮਞ੍ਚ ਸਮ੍ਪਸ੍ਸਨ੍ਤਾਨਂ ‘‘ਏવਰੂਪਂ ਭੋਜਨਂ ਭੁਞ੍ਜਿਤਬ੍ਬ’’ਨ੍ਤਿ ਏਸ ਧਮ੍ਮੋ ਨ ਹੋਤਿ। ਸੁਧਾਭੋਜਨਮ੍ਪਿ ਗਾਥਾਭਿਗੀਤਂ ਪਨੁਦਨ੍ਤਿ ਬੁਦ੍ਧਾ, ਗਾਥਾਹਿ ਗਾਯਿਤ੍વਾ ਲਦ੍ਧਂ ਬੁਦ੍ਧਾ ਨੀਹਰਨ੍ਤਿਯੇવ। ਧਮ੍ਮੇ ਸਤਿ, ਬ੍ਰਾਹ੍ਮਣ, વੁਤ੍ਤਿਰੇਸਾਤਿ, ਬ੍ਰਾਹ੍ਮਣ, ਧਮ੍ਮੇ ਸਤਿ ਧਮ੍ਮਂ ਅਪੇਕ੍ਖਿਤ੍વਾ ਧਮ੍ਮੇ ਪਤਿਟ੍ਠਾਯ ਜੀવਿਤਂ ਕਪ੍ਪੇਨ੍ਤਾਨਂ ਏਸਾ વੁਤ੍ਤਿ ਅਯਂ ਆਜੀવੋ – ਏવਰੂਪਂ ਨੀਹਰਿਤ੍વਾ ਧਮ੍ਮਲਦ੍ਧਮੇવ ਭੁਞ੍ਜਿਤਬ੍ਬਨ੍ਤਿ।
Evañca pana vatvā suvaṇṇapātiṃ pūretvā dasabalassa pāyāsaṃ upanāmesi. Satthā uppattiṃ dīpetvā bhojanaṃ paṭikkhipanto gāthābhigītaṃ metiādimāha. Tattha gāthābhigītanti gāthāhi abhigītaṃ. Abhojaneyyanti abhuñjitabbaṃ . Idaṃ vuttaṃ hoti – tvaṃ, brāhmaṇa, mayhaṃ ettakaṃ kālaṃ bhikkhācāravattena ṭhitassa kaṭacchumattampi dātuṃ nāsakkhi, idāni pana mayā tuyhaṃ kilañjamhi tile vitthārentena viya sabbe buddhaguṇā pakāsitā, iti gāyanena gāyitvā laddhaṃ viya idaṃ bhojanaṃ hoti, tasmā idaṃ gāthābhigītaṃ me abhojaneyyanti. Sampassataṃ, brāhmaṇa, nesa dhammoti, brāhmaṇa, atthañca dhammañca sampassantānaṃ ‘‘evarūpaṃ bhojanaṃ bhuñjitabba’’nti esa dhammo na hoti. Sudhābhojanampi gāthābhigītaṃ panudanti buddhā, gāthāhi gāyitvā laddhaṃ buddhā nīharantiyeva. Dhamme sati, brāhmaṇa, vuttiresāti, brāhmaṇa, dhamme sati dhammaṃ apekkhitvā dhamme patiṭṭhāya jīvitaṃ kappentānaṃ esā vutti ayaṃ ājīvo – evarūpaṃ nīharitvā dhammaladdhameva bhuñjitabbanti.
ਅਥ ਬ੍ਰਾਹ੍ਮਣੋ ਚਿਨ੍ਤੇਸਿ – ਅਹਂ ਪੁਬ੍ਬੇ ਸਮਣਸ੍ਸ ਗੋਤਮਸ੍ਸ ਗੁਣੇ વਾ ਅਗੁਣੇ વਾ ਨ ਜਾਨਾਮਿ। ਇਦਾਨਿ ਪਨਸ੍ਸਾਹਂ ਗੁਣੇ ਞਤ੍વਾ ਮਮ ਗੇਹੇ ਅਸੀਤਿਕੋਟਿਮਤ੍ਤਂ ਧਨਂ ਸਾਸਨੇ વਿਪ੍ਪਕਿਰਿਤੁਕਾਮੋ ਜਾਤੋ, ਅਯਞ੍ਚ ‘‘ਮਯਾ ਦਿਨ੍ਨਪਚ੍ਚਯਾ ਅਕਪ੍ਪਿਯਾ’’ਤਿ વਦਤਿ। ਅਪ੍ਪਟਿਗ੍ਗਯ੍ਹੋ ਅਹਂ ਸਮਣੇਨ ਗੋਤਮੇਨਾਤਿ। ਅਥ ਭਗવਾ ਸਬ੍ਬਞ੍ਞੁਤਞ੍ਞਾਣਂ ਪੇਸੇਤ੍વਾ ਤਸ੍ਸ ਚਿਤ੍ਤਾਚਾਰਂ વੀਮਂਸਨ੍ਤੋ, ‘‘ਅਯਂ ਸਬ੍ਬੇਪਿ ਅਤ੍ਤਨਾ ਦਿਨ੍ਨਪਚ੍ਚਯੇ ‘ਅਕਪ੍ਪਿਯਾ’ਤਿ ਸਲ੍ਲਕ੍ਖੇਤਿ। ਯਂ ਹਿ ਭੋਜਨਂ ਆਰਬ੍ਭ ਕਥਾ ਉਪ੍ਪਨ੍ਨਾ, ਏਤਦੇવ ਨ વਟ੍ਟਤਿ, ਸੇਸਾ ਨਿਦ੍ਦੋਸਾ’’ਤਿ ਬ੍ਰਾਹ੍ਮਣਸ੍ਸ ਚਤੁਨ੍ਨਂ ਪਚ੍ਚਯਾਨਂ ਦਾਨਦ੍વਾਰਂ ਦਸ੍ਸੇਨ੍ਤੋ ਅਞ੍ਞੇਨ ਚਾਤਿਆਦਿਮਾਹ। ਤਤ੍ਥ ਕੁਕ੍ਕੁਚ੍ਚવੂਪਸਨ੍ਤਨ੍ਤਿ ਹਤ੍ਥਕੁਕ੍ਕੁਚ੍ਚਾਦੀਨਂ વਸੇਨ વੂਪਸਨ੍ਤਕੁਕ੍ਕੁਚ੍ਚਂ। ਅਨ੍ਨੇਨ ਪਾਨੇਨਾਤਿ ਦੇਸਨਾਮਤ੍ਤਮੇਤਂ । ਅਯਂ ਪਨਤ੍ਥੋ – ਅਞ੍ਞੇਹਿ ਤਯਾ ‘‘ਪਰਿਚ੍ਚਜਿਸ੍ਸਾਮੀ’’ਤਿ ਸਲ੍ਲਕ੍ਖਿਤੇਹਿ ਚੀવਰਾਦੀਹਿ ਪਚ੍ਚਯੇਹਿ ਉਪਟ੍ਠਹਸ੍ਸੁ। ਖੇਤ੍ਤਂ ਹਿ ਤਂ ਪੁਞ੍ਞਪੇਕ੍ਖਸ੍ਸ ਹੋਤੀਤਿ ਏਤਂ ਤਥਾਗਤਸਾਸਨਂ ਨਾਮ ਪੁਞ੍ਞਪੇਕ੍ਖਸ੍ਸ ਪੁਞ੍ਞਤ੍ਥਿਕਸ੍ਸ ਤੁਯ੍ਹਂ ਅਪ੍ਪੇਪਿ ਬੀਜੇ ਬਹੁਸਸ੍ਸਫਲਦਾਯਕਂ ਸੁਖੇਤ੍ਤਂ વਿਯ ਪਟਿਯਤ੍ਤਂ ਹੋਤਿ। ਅਟ੍ਠਮਂ।
Atha brāhmaṇo cintesi – ahaṃ pubbe samaṇassa gotamassa guṇe vā aguṇe vā na jānāmi. Idāni panassāhaṃ guṇe ñatvā mama gehe asītikoṭimattaṃ dhanaṃ sāsane vippakiritukāmo jāto, ayañca ‘‘mayā dinnapaccayā akappiyā’’ti vadati. Appaṭiggayho ahaṃ samaṇena gotamenāti. Atha bhagavā sabbaññutaññāṇaṃ pesetvā tassa cittācāraṃ vīmaṃsanto, ‘‘ayaṃ sabbepi attanā dinnapaccaye ‘akappiyā’ti sallakkheti. Yaṃ hi bhojanaṃ ārabbha kathā uppannā, etadeva na vaṭṭati, sesā niddosā’’ti brāhmaṇassa catunnaṃ paccayānaṃ dānadvāraṃ dassento aññena cātiādimāha. Tattha kukkuccavūpasantanti hatthakukkuccādīnaṃ vasena vūpasantakukkuccaṃ. Annena pānenāti desanāmattametaṃ . Ayaṃ panattho – aññehi tayā ‘‘pariccajissāmī’’ti sallakkhitehi cīvarādīhi paccayehi upaṭṭhahassu. Khettaṃ hi taṃ puññapekkhassa hotīti etaṃ tathāgatasāsanaṃ nāma puññapekkhassa puññatthikassa tuyhaṃ appepi bīje bahusassaphaladāyakaṃ sukhettaṃ viya paṭiyattaṃ hoti. Aṭṭhamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੮. ਅਗ੍ਗਿਕਸੁਤ੍ਤਂ • 8. Aggikasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੮. ਅਗ੍ਗਿਕਸੁਤ੍ਤવਣ੍ਣਨਾ • 8. Aggikasuttavaṇṇanā
