| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੮. ਅਗ੍ਗਿਕਸੁਤ੍ਤવਣ੍ਣਨਾ
8. Aggikasuttavaṇṇanā
੧੯੪. ਅਗ੍ਗਿਪਰਿਚਰਣવਸੇਨਾਤਿ ਅਗ੍ਗਿਹੁਤ੍ਤਜੁਹਨવਸੇਨ। ਸਨ੍ਨਿਹਿਤੋਤਿ ਮਿਸ੍ਸੀਭਾવਂ ਸਮ੍ਪਾਪਿਤੋ। ਤਥਾਭੂਤੋ ਚ ਸੋ ਸਪ੍ਪਿਨਾ ਸਦ੍ਧਿਂ ਯੋਜਿਤੋ ਨਾਮ ਹੋਤੀਤਿ ਆਹ ‘‘ਸਂਯੋਜਿਤੋ’’ਤਿ। ਅਪਾਯਮਗ੍ਗਂ ਓਕ੍ਕਮਤਿ ਮਿਚ੍ਛਾਦਿਟ੍ਠਿਮਿਚ੍ਛਾਸਙ੍ਕਪ੍ਪਾਦੀਨਂ ਅਤ੍ਤਨੋ ਸਨ੍ਤਾਨੇ ਸਮੁਪ੍ਪਾਦਨਤੋ। ਤੇਨਾਹ ‘‘ਇਮਂ ਲਦ੍ਧਿ’’ਨ੍ਤਿਆਦਿ।
194.Aggiparicaraṇavasenāti aggihuttajuhanavasena. Sannihitoti missībhāvaṃ sampāpito. Tathābhūto ca so sappinā saddhiṃ yojito nāma hotīti āha ‘‘saṃyojito’’ti. Apāyamaggaṃ okkamati micchādiṭṭhimicchāsaṅkappādīnaṃ attano santāne samuppādanato. Tenāha ‘‘imaṃ laddhi’’ntiādi.
ਜਾਤਿਯਾਤਿ ਸਦੋਸਕਿਰਿਯਾਪਰਾਧਸ੍ਸ ਅਸਮ੍ਭવੇਨ ਪਰਿਸੁਦ੍ਧਾਯ ਜਾਤਿਯਾ। ਨਾਨਪ੍ਪਕਾਰੇ ਅਟ੍ਠਾਰਸવਿਜ੍ਜਾਟ੍ਠਾਨਸਞ੍ਞਿਤੇ ਗਨ੍ਥੇ। ਸੁਤવਾਤਿ ਸੁਤ੍વਾ ਨਿਟ੍ਠਂ ਪਤ੍ਤੋ ਅਗ੍ਗਦਕ੍ਖਿਣੇਯ੍ਯਤ੍ਤਾਤਿ ਅਧਿਪ੍ਪਾਯੋ।
Jātiyāti sadosakiriyāparādhassa asambhavena parisuddhāya jātiyā. Nānappakāre aṭṭhārasavijjāṭṭhānasaññite ganthe. Sutavāti sutvā niṭṭhaṃ patto aggadakkhiṇeyyattāti adhippāyo.
ਪੁਬ੍ਬੇਨਿવਾਸਞਾਣੇਨਾਤਿ ਇਦਂ ਲੋਕੇ ਸਾਸਨੇ ਚ ਨਿਰੁਲ਼੍ਹਤਾવਸੇਨ વੁਤ੍ਤਂ। ਅਞ੍ਞੇ ਹਿ ਪੁਬ੍ਬੇਨਿવਾਸਂ ਜਾਨਨ੍ਤਾ ਪੁਬ੍ਬੇਨਿવਾਸਞਾਣੇਨੇવ ਜਾਨਨ੍ਤਿ, ਭਗવਾ ਪਨ ਸਬ੍ਬਞ੍ਞੁਤਞ੍ਞਾਣੇਨਪਿ ਜਾਨਾਤਿ। ਦਿਬ੍ਬੇਨ ਚਕ੍ਖੁਨਾਤਿ ਏਤ੍ਥਾਪਿ ਏਸੇવ ਨਯੋ। ਸਬ੍ਬਸੋ ਜਾਤਿ ਖੀਯਤਿ ਏਤੇਨਾਤਿ ਜਾਤਿਕ੍ਖਯੋ, ਅਗ੍ਗਮਗ੍ਗੋ , ਤੇਨ ਪਤ੍ਤਬ੍ਬਤ੍ਤਾ ਆਪਨ੍ਨਤ੍ਤਾ ਚ ਜਾਤਿਕ੍ਖਯੋ ਅਰਹਤ੍ਤਂ। ਜਾਨਿਤ੍વਾ વੋਸਿਤવੋਸਾਨੋਤਿ વਿਜਾਨਿਤਬ੍ਬਂ ਚਤੁਸਚ੍ਚਧਮ੍ਮਂ ਮਗ੍ਗਞਾਣੇਨ ਜਾਨਿਤ੍વਾ ਸੋਲ਼ਸਨ੍ਨਮ੍ਪਿ ਕਿਚ੍ਚਾਨਂ વੋਸਿਤવੋਸਾਨੋ।
Pubbenivāsañāṇenāti idaṃ loke sāsane ca niruḷhatāvasena vuttaṃ. Aññe hi pubbenivāsaṃ jānantā pubbenivāsañāṇeneva jānanti, bhagavā pana sabbaññutaññāṇenapi jānāti. Dibbena cakkhunāti etthāpi eseva nayo. Sabbaso jāti khīyati etenāti jātikkhayo, aggamaggo , tena pattabbattā āpannattā ca jātikkhayo arahattaṃ. Jānitvā vositavosānoti vijānitabbaṃ catusaccadhammaṃ maggañāṇena jānitvā soḷasannampi kiccānaṃ vositavosāno.
ਉਪ੍ਪਤ੍ਤਿਂ ਦੀਪੇਤ੍વਾਤਿ ਪਾਯਸਦਾਨਸ੍ਸ ਆਗਮਨਂ ਪਕਾਸੇਤ੍વਾ। ਗਾਥਾਹਿ ਅਭਿਗੀਤਨ੍ਤਿ ਦ੍વੀਹਿ ਗਾਥਾਹਿ ਮਯਾ ਅਭਿਗੀਤਂ। ਅਭੁਞ੍ਜਿਤਬ੍ਬਨ੍ਤਿ ਭੁਞ੍ਜਿਤੁਂ ਨ ਯੁਤ੍ਤਂ। ‘‘ਅਭੋਜਨੇਯ੍ਯ’’ਨ੍ਤਿ ਕਸ੍ਮਾ વੁਤ੍ਤਂ, ਨਨੁ ਭਗવਤੋ ਅਜ੍ਝਾਸਯੋ ਅਚ੍ਚਨ੍ਤਮੇવ ਸੁਦ੍ਧੋਤਿ? ਸਚ੍ਚਮੇਤਂ, ਬ੍ਰਾਹ੍ਮਣੋ ਪਨ ਪੁਬ੍ਬੇ ਅਦਾਤੁਕਾਮੋ ਪਚ੍ਛਾ ਗਾਥਾ ਸੁਤ੍વਾ ਧਮ੍ਮਦੇਸਨਾਯ ਮੁਦੁਹਦਯੋ ਹੁਤ੍વਾ ਦਾਤੁਕਾਮੋ ਅਹੋਸਿ, ਤਸ੍ਮਾ ਤਂ ਭਿਕ੍ਖੂਨਂ ਅਨਾਗਤੇ ਦਿਟ੍ਠਾਨੁਗਤਿਆਪਜ੍ਜਨਤ੍ਥਂ ਪਟਿਕ੍ਖਿਪਿ। ਤਥਾ ਹਿ ਅਨਨ੍ਤਰਸੁਤ੍ਤੇ ਕਸਿਭਾਰਦ੍વਾਜਸੁਤ੍ਤੇ ਚ ਏવਮੇવ ਪਟਿਪਜ੍ਜਿ। ਤੇਨਾਹ ‘‘ਤ੍વਂ ਬ੍ਰਾਹ੍ਮਣਾ’’ਤਿਆਦਿ। ਕਿਲਞ੍ਜਮ੍ਹਿ…ਪੇ॰… ਪਕਾਸਿਤਾਤਿ ਏਤੇਨ ਗਾਥਂ ਉਦ੍ਦੇਸਟ੍ਠਾਨੇવ ਠਪੇਤ੍વਾ ਭਗવਾ ਬ੍ਰਾਹ੍ਮਣਸ੍ਸ વਿਤ੍ਥਾਰੇਨ ਧਮ੍ਮਂ ਦੇਸੇਸੀਤਿ ਦਸ੍ਸੇਤਿ। ਗਾਯਨੇਨਾਤਿ ਗਾਯਨਕੇਨ, ਗਾਨੇਨ વਾ। ਅਤ੍ਥਞ੍ਚ ਧਮ੍ਮਞ੍ਚਾਤਿ ਸਦੇવਕਸ੍ਸ ਲੋਕਸ੍ਸ ਹਿਤਞ੍ਚੇવ ਤਸ੍ਸ ਕਾਰਣਞ੍ਚ। ਸਮ੍ਪਸ੍ਸਨ੍ਤਾਨਨ੍ਤਿ ਸਮ੍ਮਦੇવ ਪਸ੍ਸਨ੍ਤਾਨਂ। ਧਮ੍ਮੋਤਿ ਪવੇਣਿਆਗਤੋ ਚਾਰਿਤ੍ਤਧਮ੍ਮੋ ਨ ਹੋਤਿ। ਭੋਜਨੇਸੁ ਉਕ੍ਕਂਸਗਤਂ ਦਸ੍ਸੇਤੁਂ ‘‘ਸੁਧਾਭੋਜਨ’’ਨ੍ਤਿ ਆਹ। ਧਮ੍ਮੇ ਸਤੀਤਿ ਅਰਿਯਾਨਂ ਆਚਾਰਧਮ੍ਮੇ ਸਤਿ ਤਂ ਆਲਮ੍ਬਿਤ੍વਾ ਜੀવਨ੍ਤਾਨਂ ਏਤਦੇવ ਸੇਟ੍ਠਨ੍ਤਿ ‘‘ਸੋਮਂ ਭੁਞ੍ਜੇਯ੍ਯ ਪਾਯਸ’’ਨ੍ਤਿ ਤਂ ਆਰਬ੍ਭ ਕਥਾਯ ਉਪ੍ਪਨ੍ਨਤ੍ਤਾ।
Uppattiṃ dīpetvāti pāyasadānassa āgamanaṃ pakāsetvā. Gāthāhi abhigītanti dvīhi gāthāhi mayā abhigītaṃ. Abhuñjitabbanti bhuñjituṃ na yuttaṃ. ‘‘Abhojaneyya’’nti kasmā vuttaṃ, nanu bhagavato ajjhāsayo accantameva suddhoti? Saccametaṃ, brāhmaṇo pana pubbe adātukāmo pacchā gāthā sutvā dhammadesanāya muduhadayo hutvā dātukāmo ahosi, tasmā taṃ bhikkhūnaṃ anāgate diṭṭhānugatiāpajjanatthaṃ paṭikkhipi. Tathā hi anantarasutte kasibhāradvājasutte ca evameva paṭipajji. Tenāha ‘‘tvaṃ brāhmaṇā’’tiādi. Kilañjamhi…pe… pakāsitāti etena gāthaṃ uddesaṭṭhāneva ṭhapetvā bhagavā brāhmaṇassa vitthārena dhammaṃ desesīti dasseti. Gāyanenāti gāyanakena, gānena vā. Atthañca dhammañcāti sadevakassa lokassa hitañceva tassa kāraṇañca. Sampassantānanti sammadeva passantānaṃ. Dhammoti paveṇiāgato cārittadhammo na hoti. Bhojanesu ukkaṃsagataṃ dassetuṃ ‘‘sudhābhojana’’nti āha. Dhamme satīti ariyānaṃ ācāradhamme sati taṃ ālambitvā jīvantānaṃ etadeva seṭṭhanti ‘‘somaṃ bhuñjeyya pāyasa’’nti taṃ ārabbha kathāya uppannattā.
ਸਲ੍ਲਕ੍ਖੇਤਿ ਅਯਂ ਬ੍ਰਾਹ੍ਮਣੋ। ਸੇਸਾ ਪਚ੍ਚਯਾ ਨਿਦ੍ਦੋਸਾ ਤੇ ਆਰਬ੍ਭ ਕਥਾਯ ਅਪ੍ਪવਤ੍ਤਿਤਤ੍ਤਾ। ਕੁਕ੍ਕੁਚ੍ਚવੂਪਸਨ੍ਤਨ੍ਤਿ ਅਗ੍ਗਿਆਹਿਤਪਦਸ੍ਸ વਿਯ ਸਦ੍ਦਸਿਦ੍ਧਿ વੇਦਿਤਬ੍ਬਾ। ਅਨ੍ਨੇਨ ਪਾਨੇਨਾਤਿ ਲਕ੍ਖਣવਚਨਮੇਤਂ ਯਥਾ ‘‘ਕਾਕੇਹਿ ਸਪ੍ਪਿ ਰਕ੍ਖਿਤਬ੍ਬ’’ਨ੍ਤਿ। ਤੇਨਾਹ ‘‘ਦੇਸਨਾਮਤ੍ਤਮੇਤ’’ਨ੍ਤਿ। ਬਹੁਸਸ੍ਸਫਲਦਾਯਕਂ ਸੁਖੇਤ੍ਤਂ વਿਯ ਪਟਿਯਤ੍ਤਨ੍ਤਿ ਸਮ੍ਮਾ ਕਸਨਬੀਜਨਉਦਕਾਨਯਨਾਪਨਯਨਾਦਿਨਾ ਸੁਸਜ੍ਜਿਤਂ ਖੇਤ੍ਤਂ વਿਯ ਸੀਲਾਦਿਗੁਣવਿਸੇਸਸਮ੍ਪਾਦਨੇਨ ਪਟਿਯਤ੍ਤਂ ਪੁਞ੍ਞਕ੍ਖੇਤ੍ਤਂ ਏਤਂ।
Sallakkheti ayaṃ brāhmaṇo. Sesā paccayā niddosā te ārabbha kathāya appavattitattā. Kukkuccavūpasantanti aggiāhitapadassa viya saddasiddhi veditabbā. Annena pānenāti lakkhaṇavacanametaṃ yathā ‘‘kākehi sappi rakkhitabba’’nti. Tenāha ‘‘desanāmattameta’’nti. Bahusassaphaladāyakaṃ sukhettaṃ viya paṭiyattanti sammā kasanabījanaudakānayanāpanayanādinā susajjitaṃ khettaṃ viya sīlādiguṇavisesasampādanena paṭiyattaṃ puññakkhettaṃ etaṃ.
ਅਗ੍ਗਿਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Aggikasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੮. ਅਗ੍ਗਿਕਸੁਤ੍ਤਂ • 8. Aggikasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੮. ਅਗ੍ਗਿਕਸੁਤ੍ਤવਣ੍ਣਨਾ • 8. Aggikasuttavaṇṇanā
