| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8-9. அக்³கி³க்க²ந்தோ⁴பமஸுத்தாதி³வண்ணனா
8-9. Aggikkhandhopamasuttādivaṇṇanā
72-73. அட்ட²மே பஸ்ஸத² நூதி அபி பஸ்ஸத². மஹந்தந்தி விபுலங். அக்³கி³க்க²ந்த⁴ந்தி அக்³கி³ஸமூஹங். ஆதி³த்தந்தி பதி³த்தங். ஸம்பஜ்ஜலிதந்தி ஸமந்ததோ பஜ்ஜலிதங் அச்சிவிப்பு²லிங்கா³னி முஞ்சந்தங். ஸஜோதிபூ⁴தந்தி ஸமந்ததோ உட்டி²தாஹி ஜாலாஹி ஏகப்பபா⁴ஸமுத³யபூ⁴தங். தங் கிங் மஞ்ஞதா²தி தங் இதா³னி மயா வுச்சமானத்த²ங் கிங் மஞ்ஞதா²தி அனுமதிக்³க³ஹணத்த²ங் புச்ச²தி. யதெ³த்த² ஸத்தா² அக்³கி³க்க²ந்தா⁴லிங்க³னங் கஞ்ஞாலிங்க³னஞ்ச ஆனேஸி, தமத்த²ங் விபா⁴வேதுங் ‘‘ஆரோசயாமீ’’திஆதி³மாஹ.
72-73. Aṭṭhame passatha nūti api passatha. Mahantanti vipulaṃ. Aggikkhandhanti aggisamūhaṃ. Ādittanti padittaṃ. Sampajjalitanti samantato pajjalitaṃ accivipphuliṅgāni muñcantaṃ. Sajotibhūtanti samantato uṭṭhitāhi jālāhi ekappabhāsamudayabhūtaṃ. Taṃ kiṃ maññathāti taṃ idāni mayā vuccamānatthaṃ kiṃ maññathāti anumatiggahaṇatthaṃ pucchati. Yadettha satthā aggikkhandhāliṅganaṃ kaññāliṅganañca ānesi, tamatthaṃ vibhāvetuṃ ‘‘ārocayāmī’’tiādimāha.
து³ஸ்ஸீலஸ்ஸாதி நிஸ்ஸீலஸ்ஸ ஸீலவிரஹிதஸ்ஸ. பாபத⁴ம்மஸ்ஸாதி து³ஸ்ஸீலத்தா ஏவ ஹீனஜ்ஜா²ஸயதாய லாமகஸபா⁴வஸ்ஸ. அஸுசிஸங்கஸ்ஸரஸமாசாரஸ்ஸாதி அபரிஸுத்³த⁴தாய அஸுசி ஹுத்வா ஸங்காய ஸரிதப்³ப³ஸமாசாரஸ்ஸ. து³ஸ்ஸீலோ ஹி கிஞ்சிதே³வ அஸாருப்பங் தி³ஸ்வா ‘‘இத³ங் அஸுகேன கதங் ப⁴விஸ்ஸதீ’’தி பரேஸங் ஆஸங்கா ஹோதி. கேனசிதே³வ கரணீயேன மந்தயந்தே பி⁴க்கூ² தி³ஸ்வா ‘‘கச்சி நு கோ² இமே மயா கதகம்மங் ஜானித்வா மந்தெந்தீ’’தி அத்தனோயேவ ஸங்காய ஸரிதப்³ப³ஸமாசாரோ . படிச்ச²ன்னகம்மந்தஸ்ஸாதி லஜ்ஜிதப்³ப³தாய படிச்சா²தே³தப்³ப³கம்மந்தஸ்ஸ. அஸ்ஸமணஸ்ஸாதி ந ஸமணஸ்ஸ. ஸலாகக்³க³ஹணாதீ³ஸு ‘‘அஹம்பி ஸமணோ’’தி மிச்சா²படிஞ்ஞாய ஸமணபடிஞ்ஞஸ்ஸ. அஸெட்ட²சாரிதாய அப்³ரஹ்மசாரிஸ்ஸ. உபோஸதா²தீ³ஸு ‘‘அஹம்பி ப்³ரஹ்மசாரீ’’தி மிச்சா²படிஞ்ஞாய ப்³ரஹ்மசாரிபடிஞ்ஞஸ்ஸ. பூதினா கம்மேன ஸீலவிபத்தியா அந்தோ அனுபவிட்ட²த்தா அந்தோபூதிகஸ்ஸ. ச²த்³வாரேஹி ராகா³தி³கிலேஸானுஸ்ஸவனேன திந்தத்தா அவஸ்ஸுதஸ்ஸ. ஸஞ்ஜாதராகா³தி³கசவரத்தா ஸீலவந்தேஹி ச²ட்³டே³தப்³ப³த்தா ச கஸம்பு³ஜாதஸ்ஸ.
Dussīlassāti nissīlassa sīlavirahitassa. Pāpadhammassāti dussīlattā eva hīnajjhāsayatāya lāmakasabhāvassa. Asucisaṅkassarasamācārassāti aparisuddhatāya asuci hutvā saṅkāya saritabbasamācārassa. Dussīlo hi kiñcideva asāruppaṃ disvā ‘‘idaṃ asukena kataṃ bhavissatī’’ti paresaṃ āsaṅkā hoti. Kenacideva karaṇīyena mantayante bhikkhū disvā ‘‘kacci nu kho ime mayā katakammaṃ jānitvā mantentī’’ti attanoyeva saṅkāya saritabbasamācāro . Paṭicchannakammantassāti lajjitabbatāya paṭicchādetabbakammantassa. Assamaṇassāti na samaṇassa. Salākaggahaṇādīsu ‘‘ahampi samaṇo’’ti micchāpaṭiññāya samaṇapaṭiññassa. Aseṭṭhacāritāya abrahmacārissa. Uposathādīsu ‘‘ahampi brahmacārī’’ti micchāpaṭiññāya brahmacāripaṭiññassa. Pūtinā kammena sīlavipattiyā anto anupaviṭṭhattā antopūtikassa. Chadvārehi rāgādikilesānussavanena tintattā avassutassa. Sañjātarāgādikacavarattā sīlavantehi chaḍḍetabbattā ca kasambujātassa.
வாலரஜ்ஜுயாதி வாலேஹி கதரஜ்ஜுயா. ஸா ஹி க²ரதரா ஹோதி. க⁴ங்ஸெய்யாதி மத²னவஸேன க⁴ங்ஸெய்ய. தேலதோ⁴தாயாதி தேலேன நிஸிதாய. பச்சோரஸ்மிந்தி பதிஉரஸ்மிங், அபி⁴முகே² உரமஜ்ஜே²தி அதி⁴ப்பாயோ. அயோஸங்குனாதி ஸண்டா³ஸேன. பே²ணுத்³தே³ஹகந்தி பே²ணங் உத்³தே³ஹெத்வா உத்³தே³ஹெத்வா, அனேகவாரங் பே²ணங் உட்டா²பெத்வாதி அத்தோ². ஏவமெத்த² ஸங்கே²பதோ பாளிவண்ணனா வேதி³தப்³பா³. நவமங் உத்தானமேவ.
Vālarajjuyāti vālehi katarajjuyā. Sā hi kharatarā hoti. Ghaṃseyyāti mathanavasena ghaṃseyya. Teladhotāyāti telena nisitāya. Paccorasminti patiurasmiṃ, abhimukhe uramajjheti adhippāyo. Ayosaṅkunāti saṇḍāsena. Pheṇuddehakanti pheṇaṃ uddehetvā uddehetvā, anekavāraṃ pheṇaṃ uṭṭhāpetvāti attho. Evamettha saṅkhepato pāḷivaṇṇanā veditabbā. Navamaṃ uttānameva.
அக்³கி³க்க²ந்தோ⁴பமஸுத்தாதி³வண்ணனா நிட்டி²தா.
Aggikkhandhopamasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
8. அக்³கி³க்க²ந்தோ⁴பமஸுத்தங் • 8. Aggikkhandhopamasuttaṃ
9. ஸுனெத்தஸுத்தங் • 9. Sunettasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 8. அக்³கி³க்க²ந்தோ⁴பமஸுத்தவண்ணனா • 8. Aggikkhandhopamasuttavaṇṇanā
