| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. အဂ္ဂိက္ခန္ဓောပမသုတ္တဝဏ္ဏနာ
8. Aggikkhandhopamasuttavaṇṇanā
၇၂. အဋ္ဌမံ အတ္ထုပ္ပတ္တိယံ ကထိတံ။ အတ္ထုပ္ပတ္တိ ပနသ္သ ဟေဋ္ဌာ စူဠစ္ဆရာသင္ဃာတသုတ္တဝဏ္ဏနာယ (အ. နိ. အဋ္ဌ. ၁.၁.၅၁ အာဒယော) ဝိတ္ထာရိတာ ဧဝ။ ပသ္သထ နောတိ ပသ္သထ နု။ အာလိင္ဂိတ္ဝာတိ ဥပဂူဟိတ္ဝာ။ ဥပနိသီဒေယ္ယာတိ သမီပေ နိသ္သာယ နိသီဒေယ္ယ။ ဥပနိပဇ္ဇေယ္ယာတိ ဥပဂန္တ္ဝာ နိပဇ္ဇေယ္ယ။ အာရောစယာမီတိ အာစိက္ခာမိ။ ပဋိဝေဒယာမီတိ ပဋိဝေဒေတ္ဝာ ဇာနာပေတ္ဝာ ကထေမိ။ ဝာလရဇ္ဇုယာတိ အသ္သဝာလဂောဝာလေဟိ ဝဋ္ဋိတရဇ္ဇုယာ။ ပစ္စောရသ္မိန္တိ ဥရမဇ္ဈေ။ ဖေဏုဒ္ဒေဟကန္တိ ဖေဏံ ဥဒ္ဒေဟိတ္ဝာ, ဥသ္သာဒေတ္ဝာတိ အတ္ထော။ အတ္တတ္ထန္တိ အတ္တနော ဒိဋ္ဌဓမ္မိကသမ္ပရာယိကလောကိယလောကုတ္တရံ အတ္ထံ။ ပရတ္ထောဘယတ္ထေသုပိ ဧသေဝ နယော။ သေသမေတ္ထ ယံ ဝတ္တဗ္ဗံ သိယာ, တံ သဗ္ဗံ စူဠစ္ဆရာသင္ဃာတသုတ္တသ္သ (အ. နိ. ၁.၅၁ အာဒယော) အတ္ထုပ္ပတ္တိယံ ကထိတမေဝ။ ဣဒဉ္စ ပန သုတ္တံ ကထေတ္ဝာ သတ္ထာ စူဠစ္ဆရာသင္ဃာတသုတ္တံ ကထေသိ။ နဝမံ ဥတ္တာနတ္ထမေဝ။
72. Aṭṭhamaṃ atthuppattiyaṃ kathitaṃ. Atthuppatti panassa heṭṭhā cūḷaccharāsaṅghātasuttavaṇṇanāya (a. ni. aṭṭha. 1.1.51 ādayo) vitthāritā eva. Passatha noti passatha nu. Āliṅgitvāti upagūhitvā. Upanisīdeyyāti samīpe nissāya nisīdeyya. Upanipajjeyyāti upagantvā nipajjeyya. Ārocayāmīti ācikkhāmi. Paṭivedayāmīti paṭivedetvā jānāpetvā kathemi. Vālarajjuyāti assavālagovālehi vaṭṭitarajjuyā. Paccorasminti uramajjhe. Pheṇuddehakanti pheṇaṃ uddehitvā, ussādetvāti attho. Attatthanti attano diṭṭhadhammikasamparāyikalokiyalokuttaraṃ atthaṃ. Paratthobhayatthesupi eseva nayo. Sesamettha yaṃ vattabbaṃ siyā, taṃ sabbaṃ cūḷaccharāsaṅghātasuttassa (a. ni. 1.51 ādayo) atthuppattiyaṃ kathitameva. Idañca pana suttaṃ kathetvā satthā cūḷaccharāsaṅghātasuttaṃ kathesi. Navamaṃ uttānatthameva.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. အဂ္ဂိက္ခန္ဓောပမသုတ္တံ • 8. Aggikkhandhopamasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈-၉. အဂ္ဂိက္ခန္ဓောပမသုတ္တာဒိဝဏ္ဏနာ • 8-9. Aggikkhandhopamasuttādivaṇṇanā
