| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
২. অগ্গিৰচ্ছসুত্তং
2. Aggivacchasuttaṃ
১৮৭. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ –
187. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca –
‘‘কিং নু খো, ভো গোতম, ‘সস্সতো লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি 1 ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘সস্সতো লোকো, ইদমেৰ সচ্চং মোঘমঞ্ঞ’’’ন্তি।
‘‘Kiṃ nu kho, bho gotama, ‘sassato loko, idameva saccaṃ moghamañña’nti – evaṃdiṭṭhi 2 bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘sassato loko, idameva saccaṃ moghamañña’’’nti.
‘‘কিং পন, ভো গোতম, ‘অসস্সতো লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অসস্সতো লোকো, ইদমেৰ সচ্চং মোঘমঞ্ঞ’’’ন্তি।
‘‘Kiṃ pana, bho gotama, ‘asassato loko, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘asassato loko, idameva saccaṃ moghamañña’’’nti.
‘‘কিং নু খো, ভো গোতম, ‘অন্তৰা লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অন্তৰা লোকো, ইদমেৰ সচ্চং মোঘমঞ্ঞ’’’ন্তি।
‘‘Kiṃ nu kho, bho gotama, ‘antavā loko, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘antavā loko, idameva saccaṃ moghamañña’’’nti.
‘‘কিং পন, ভো গোতম, ‘অনন্তৰা লোকো, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অনন্তৰা লোকো, ইদমেৰ সচ্চং মোঘমঞ্ঞ’’’ন্তি।
‘‘Kiṃ pana, bho gotama, ‘anantavā loko, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘anantavā loko, idameva saccaṃ moghamañña’’’nti.
‘‘কিং নু খো, ভো গোতম, ‘তং জীৰং তং সরীরং, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘তং জীৰং তং সরীরং, ইদমেৰ সচ্চং মোঘমঞ্ঞ’’’ন্তি।
‘‘Kiṃ nu kho, bho gotama, ‘taṃ jīvaṃ taṃ sarīraṃ, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘taṃ jīvaṃ taṃ sarīraṃ, idameva saccaṃ moghamañña’’’nti.
‘‘কিং পন, ভো গোতম, ‘অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞ’’’ন্তি।
‘‘Kiṃ pana, bho gotama, ‘aññaṃ jīvaṃ aññaṃ sarīraṃ, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘aññaṃ jīvaṃ aññaṃ sarīraṃ, idameva saccaṃ moghamañña’’’nti.
‘‘কিং নু খো, ভো গোতম, ‘হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি।
‘‘Kiṃ nu kho, bho gotama, ‘hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘hoti tathāgato paraṃ maraṇā, idameva saccaṃ moghamañña’’’nti.
‘‘কিং পন, ভো গোতম, ‘ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘ন হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি।
‘‘Kiṃ pana, bho gotama, ‘na hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘na hoti tathāgato paraṃ maraṇā, idameva saccaṃ moghamañña’’’nti.
‘‘কিং নু খো, ভো গোতম, ‘হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি ? ‘‘ন খো অহং, ৰচ্ছ, এৰংদিট্ঠি – ‘হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি।
‘‘Kiṃ nu kho, bho gotama, ‘hoti ca na ca hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti ? ‘‘Na kho ahaṃ, vaccha, evaṃdiṭṭhi – ‘hoti ca na ca hoti tathāgato paraṃ maraṇā, idameva saccaṃ moghamañña’’’nti.
‘‘কিং পন, ভো গোতম, ‘নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি – এৰংদিট্ঠি ভৰং গোতমো’’তি? ‘‘ন খো অহং, ৰচ্ছ, এৰংদিট্ঠি – ‘নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’’’ন্তি।
‘‘Kiṃ pana, bho gotama, ‘neva hoti na na hoti tathāgato paraṃ maraṇā, idameva saccaṃ moghamañña’nti – evaṃdiṭṭhi bhavaṃ gotamo’’ti? ‘‘Na kho ahaṃ, vaccha, evaṃdiṭṭhi – ‘neva hoti na na hoti tathāgato paraṃ maraṇā, idameva saccaṃ moghamañña’’’nti.
১৮৮. ‘‘‘কিং নু খো, ভো গোতম, সস্সতো লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – সস্সতো লোকো, ইদমেৰ সচ্চং মোঘমঞ্ঞ’ন্তি ৰদেসি 3। ‘কিং পন, ভো গোতম, অসস্সতো লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ , এৰংদিট্ঠি – অসস্সতো লোকো, ইদমেৰ সচ্চং মোঘমঞ্ঞ’ন্তি ৰদেসি। ‘কিং নু খো, ভো গোতম, অন্তৰা লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অন্তৰা লোকো, ইদমেৰ সচ্চং মোঘমঞ্ঞ’ন্তি ৰদেসি। ‘কিং পন, ভো গোতম, অনন্তৰা লোকো, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অনন্তৰা লোকো, ইদমেৰ সচ্চং মোঘমঞ্ঞ’ন্তি ৰদেসি। ‘কিং নু খো, ভো গোতম, তং জীৰং তং সরীরং, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – তং জীৰং তং সরীরং, ইদমেৰ সচ্চং মোঘমঞ্ঞ’ন্তি ৰদেসি। ‘কিং পন, ভো গোতম, অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – অঞ্ঞং জীৰং অঞ্ঞং সরীরং, ইদমেৰ সচ্চং মোঘমঞ্ঞ’ন্তি ৰদেসি। ‘কিং নু খো, ভো গোতম, হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি।
188. ‘‘‘Kiṃ nu kho, bho gotama, sassato loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – sassato loko, idameva saccaṃ moghamañña’nti vadesi 4. ‘Kiṃ pana, bho gotama, asassato loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha , evaṃdiṭṭhi – asassato loko, idameva saccaṃ moghamañña’nti vadesi. ‘Kiṃ nu kho, bho gotama, antavā loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – antavā loko, idameva saccaṃ moghamañña’nti vadesi. ‘Kiṃ pana, bho gotama, anantavā loko, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – anantavā loko, idameva saccaṃ moghamañña’nti vadesi. ‘Kiṃ nu kho, bho gotama, taṃ jīvaṃ taṃ sarīraṃ, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – taṃ jīvaṃ taṃ sarīraṃ, idameva saccaṃ moghamañña’nti vadesi. ‘Kiṃ pana, bho gotama, aññaṃ jīvaṃ aññaṃ sarīraṃ, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – aññaṃ jīvaṃ aññaṃ sarīraṃ, idameva saccaṃ moghamañña’nti vadesi. ‘Kiṃ nu kho, bho gotama, hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – hoti tathāgato paraṃ maraṇā, idameva saccaṃ moghamañña’nti vadesi.
‘‘‘কিং পন, ভো গোতম, ন হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি। ‘কিং নু খো, ভো গোতম, হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – হোতি চ ন চ হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি। ‘কিং পন, ভো গোতম, নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞন্তি – এৰংদিট্ঠি ভৰং গোতমো’তি ইতি পুট্ঠো সমানো ‘ন খো অহং, ৰচ্ছ, এৰংদিট্ঠি – নেৰ হোতি ন ন হোতি তথাগতো পরং মরণা, ইদমেৰ সচ্চং মোঘমঞ্ঞ’ন্তি ৰদেসি।
‘‘‘Kiṃ pana, bho gotama, na hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – na hoti tathāgato paraṃ maraṇā, idameva saccaṃ moghamañña’nti vadesi. ‘Kiṃ nu kho, bho gotama, hoti ca na ca hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – hoti ca na ca hoti tathāgato paraṃ maraṇā, idameva saccaṃ moghamañña’nti vadesi. ‘Kiṃ pana, bho gotama, neva hoti na na hoti tathāgato paraṃ maraṇā, idameva saccaṃ moghamaññanti – evaṃdiṭṭhi bhavaṃ gotamo’ti iti puṭṭho samāno ‘na kho ahaṃ, vaccha, evaṃdiṭṭhi – neva hoti na na hoti tathāgato paraṃ maraṇā, idameva saccaṃ moghamañña’nti vadesi.
‘‘কিং পন ভো গোতমো আদীনৰং সম্পস্সমানো এৰং ইমানি সব্বসো দিট্ঠিগতানি অনুপগতো’’তি?
‘‘Kiṃ pana bho gotamo ādīnavaṃ sampassamāno evaṃ imāni sabbaso diṭṭhigatāni anupagato’’ti?
১৮৯. ‘‘‘সস্সতো লোকো’তি খো, ৰচ্ছ, দিট্ঠিগতমেতং দিট্ঠিগহনং দিট্ঠিকন্তারো 5 দিট্ঠিৰিসূকং দিট্ঠিৰিপ্ফন্দিতং দিট্ঠিসংযোজনং সদুক্খং সৰিঘাতং সউপাযাসং সপরিল়াহং, ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি । ‘অসস্সতো লোকো’তি খো, ৰচ্ছ…পে॰… ‘অন্তৰা লোকো’তি খো, ৰচ্ছ…পে॰… ‘অনন্তৰা লোকো’তি খো, ৰচ্ছ…পে॰… ‘তং জীৰং তং সরীর’ন্তি খো, ৰচ্ছ…পে॰… ‘অঞ্ঞং জীৰং অঞ্ঞং সরীর’ন্তি খো, ৰচ্ছ…পে॰… ‘হোতি তথাগতো পরং মরণা’তি খো, ৰচ্ছ …পে॰… ‘ন হোতি তথাগতো পরং মরণা’তি খো, ৰচ্ছ…পে॰… ‘হোতি চ ন চ হোতি তথাগতো পরং মরণা’তি খো, ৰচ্ছ…পে॰… ‘নেৰ হোতি ন ন হোতি তথাগতো পরং মরণা’তি খো, ৰচ্ছ, দিট্ঠিগতমেতং দিট্ঠিগহনং দিট্ঠিকন্তারো দিট্ঠিৰিসূকং দিট্ঠিৰিপ্ফন্দিতং দিট্ঠিসংযোজনং সদুক্খং সৰিঘাতং সউপাযাসং সপরিল়াহং, ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি। ইমং খো অহং, ৰচ্ছ, আদীনৰং সম্পস্সমানো এৰং ইমানি সব্বসো দিট্ঠিগতানি অনুপগতো’’তি।
189. ‘‘‘Sassato loko’ti kho, vaccha, diṭṭhigatametaṃ diṭṭhigahanaṃ diṭṭhikantāro 6 diṭṭhivisūkaṃ diṭṭhivipphanditaṃ diṭṭhisaṃyojanaṃ sadukkhaṃ savighātaṃ saupāyāsaṃ sapariḷāhaṃ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati . ‘Asassato loko’ti kho, vaccha…pe… ‘antavā loko’ti kho, vaccha…pe… ‘anantavā loko’ti kho, vaccha…pe… ‘taṃ jīvaṃ taṃ sarīra’nti kho, vaccha…pe… ‘aññaṃ jīvaṃ aññaṃ sarīra’nti kho, vaccha…pe… ‘hoti tathāgato paraṃ maraṇā’ti kho, vaccha …pe… ‘na hoti tathāgato paraṃ maraṇā’ti kho, vaccha…pe… ‘hoti ca na ca hoti tathāgato paraṃ maraṇā’ti kho, vaccha…pe… ‘neva hoti na na hoti tathāgato paraṃ maraṇā’ti kho, vaccha, diṭṭhigatametaṃ diṭṭhigahanaṃ diṭṭhikantāro diṭṭhivisūkaṃ diṭṭhivipphanditaṃ diṭṭhisaṃyojanaṃ sadukkhaṃ savighātaṃ saupāyāsaṃ sapariḷāhaṃ, na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Imaṃ kho ahaṃ, vaccha, ādīnavaṃ sampassamāno evaṃ imāni sabbaso diṭṭhigatāni anupagato’’ti.
‘‘অত্থি পন ভোতো গোতমস্স কিঞ্চি দিট্ঠিগত’’ন্তি? ‘‘দিট্ঠিগতন্তি খো, ৰচ্ছ, অপনীতমেতং তথাগতস্স। দিট্ঠঞ্হেতং, ৰচ্ছ, তথাগতেন – ‘ইতি রূপং, ইতি রূপস্স সমুদযো, ইতি রূপস্স অত্থঙ্গমো; ইতি ৰেদনা, ইতি ৰেদনায সমুদযো, ইতি ৰেদনায অত্থঙ্গমো; ইতি সঞ্ঞা, ইতি সঞ্ঞায সমুদযো, ইতি সঞ্ঞায অত্থঙ্গমো; ইতি সঙ্খারা, ইতি সঙ্খারানং সমুদযো, ইতি সঙ্খারানং অত্থঙ্গমো; ইতি ৰিঞ্ঞাণং, ইতি ৰিঞ্ঞাণস্স সমুদযো, ইতি ৰিঞ্ঞাণস্স অত্থঙ্গমো’তি। তস্মা তথাগতো সব্বমঞ্ঞিতানং সব্বমথিতানং সব্বঅহংকারমমংকারমানানুসযানং খযা ৰিরাগা নিরোধা চাগা পটিনিস্সগ্গা অনুপাদা ৰিমুত্তোতি ৰদামী’’তি।
‘‘Atthi pana bhoto gotamassa kiñci diṭṭhigata’’nti? ‘‘Diṭṭhigatanti kho, vaccha, apanītametaṃ tathāgatassa. Diṭṭhañhetaṃ, vaccha, tathāgatena – ‘iti rūpaṃ, iti rūpassa samudayo, iti rūpassa atthaṅgamo; iti vedanā, iti vedanāya samudayo, iti vedanāya atthaṅgamo; iti saññā, iti saññāya samudayo, iti saññāya atthaṅgamo; iti saṅkhārā, iti saṅkhārānaṃ samudayo, iti saṅkhārānaṃ atthaṅgamo; iti viññāṇaṃ, iti viññāṇassa samudayo, iti viññāṇassa atthaṅgamo’ti. Tasmā tathāgato sabbamaññitānaṃ sabbamathitānaṃ sabbaahaṃkāramamaṃkāramānānusayānaṃ khayā virāgā nirodhā cāgā paṭinissaggā anupādā vimuttoti vadāmī’’ti.
১৯০. ‘‘এৰং ৰিমুত্তচিত্তো পন, ভো গোতম, ভিক্খু কুহিং উপপজ্জতী’’তি? ‘‘উপপজ্জতীতি খো, ৰচ্ছ, ন উপেতি’’। ‘‘তেন হি, ভো গোতম, ন উপপজ্জতী’’তি? ‘‘ন উপপজ্জতীতি খো, ৰচ্ছ, ন উপেতি’’। ‘‘তেন হি, ভো গোতম, উপপজ্জতি চ ন চ উপপজ্জতী’’তি? ‘‘উপপজ্জতি চ ন চ উপপজ্জতীতি খো, ৰচ্ছ, ন উপেতি’’। ‘‘তেন হি, ভো গোতম, নেৰ উপপজ্জতি ন ন উপপজ্জতী’’তি? ‘‘নেৰ উপপজ্জতি ন ন উপপজ্জতীতি খো, ৰচ্ছ, ন উপেতি’’।
190. ‘‘Evaṃ vimuttacitto pana, bho gotama, bhikkhu kuhiṃ upapajjatī’’ti? ‘‘Upapajjatīti kho, vaccha, na upeti’’. ‘‘Tena hi, bho gotama, na upapajjatī’’ti? ‘‘Na upapajjatīti kho, vaccha, na upeti’’. ‘‘Tena hi, bho gotama, upapajjati ca na ca upapajjatī’’ti? ‘‘Upapajjati ca na ca upapajjatīti kho, vaccha, na upeti’’. ‘‘Tena hi, bho gotama, neva upapajjati na na upapajjatī’’ti? ‘‘Neva upapajjati na na upapajjatīti kho, vaccha, na upeti’’.
‘‘‘এৰং ৰিমুত্তচিত্তো পন, ভো গোতম, ভিক্খু কুহিং উপপজ্জতী’তি ইতি পুট্ঠো সমানো ‘উপপজ্জতীতি খো, ৰচ্ছ, ন উপেতী’তি ৰদেসি। ‘তেন হি, ভো গোতম, ন উপপজ্জতী’তি ইতি পুট্ঠো সমানো ‘ন উপপজ্জতীতি খো, ৰচ্ছ, ন উপেতী’তি ৰদেসি। ‘তেন হি, ভো গোতম, উপপজ্জতি চ ন চ উপপজ্জতী’তি ইতি পুট্ঠো সমানো ‘উপপজ্জতি চ ন চ উপপজ্জতীতি খো, ৰচ্ছ, ন উপেতী’তি ৰদেসি। ‘তেন হি, ভো গোতম, নেৰ উপপজ্জতি ন ন উপপজ্জতী’তি ইতি পুট্ঠো সমানো ‘নেৰ উপপজ্জতি ন ন উপপজ্জতীতি খো, ৰচ্ছ, ন উপেতী’তি ৰদেসি। এত্থাহং, ভো গোতম, অঞ্ঞাণমাপাদিং, এত্থ সম্মোহমাপাদিং। যাপি মে এসা ভোতো গোতমস্স পুরিমেন কথাসল্লাপেন অহু পসাদমত্তা সাপি মে এতরহি অন্তরহিতা’’তি। ‘‘অলঞ্হি তে, ৰচ্ছ, অঞ্ঞাণায, অলং সম্মোহায। গম্ভীরো হাযং, ৰচ্ছ, ধম্মো দুদ্দসো দুরনুবোধো সন্তো পণীতো অতক্কাৰচরো নিপুণো পণ্ডিতৰেদনীযো। সো তযা দুজ্জানো অঞ্ঞদিট্ঠিকেন অঞ্ঞখন্তিকেন অঞ্ঞরুচিকেন অঞ্ঞত্রযোগেন 7 অঞ্ঞত্রাচরিযকেন’’ 8।
‘‘‘Evaṃ vimuttacitto pana, bho gotama, bhikkhu kuhiṃ upapajjatī’ti iti puṭṭho samāno ‘upapajjatīti kho, vaccha, na upetī’ti vadesi. ‘Tena hi, bho gotama, na upapajjatī’ti iti puṭṭho samāno ‘na upapajjatīti kho, vaccha, na upetī’ti vadesi. ‘Tena hi, bho gotama, upapajjati ca na ca upapajjatī’ti iti puṭṭho samāno ‘upapajjati ca na ca upapajjatīti kho, vaccha, na upetī’ti vadesi. ‘Tena hi, bho gotama, neva upapajjati na na upapajjatī’ti iti puṭṭho samāno ‘neva upapajjati na na upapajjatīti kho, vaccha, na upetī’ti vadesi. Etthāhaṃ, bho gotama, aññāṇamāpādiṃ, ettha sammohamāpādiṃ. Yāpi me esā bhoto gotamassa purimena kathāsallāpena ahu pasādamattā sāpi me etarahi antarahitā’’ti. ‘‘Alañhi te, vaccha, aññāṇāya, alaṃ sammohāya. Gambhīro hāyaṃ, vaccha, dhammo duddaso duranubodho santo paṇīto atakkāvacaro nipuṇo paṇḍitavedanīyo. So tayā dujjāno aññadiṭṭhikena aññakhantikena aññarucikena aññatrayogena 9 aññatrācariyakena’’ 10.
১৯১. ‘‘তেন হি, ৰচ্ছ, তঞ্ঞেৰেত্থ পটিপুচ্ছিস্সামি; যথা তে খমেয্য তথা নং ব্যাকরেয্যাসি। তং কিং মঞ্ঞসি, ৰচ্ছ, সচে তে পুরতো অগ্গি জলেয্য, জানেয্যাসি ত্ৰং – ‘অযং মে পুরতো অগ্গি জলতী’’’তি? ‘‘সচে মে, ভো গোতম, পুরতো অগ্গি জলেয্য, জানেয্যাহং – ‘অযং মে পুরতো অগ্গি জলতী’’’তি।
191. ‘‘Tena hi, vaccha, taññevettha paṭipucchissāmi; yathā te khameyya tathā naṃ byākareyyāsi. Taṃ kiṃ maññasi, vaccha, sace te purato aggi jaleyya, jāneyyāsi tvaṃ – ‘ayaṃ me purato aggi jalatī’’’ti? ‘‘Sace me, bho gotama, purato aggi jaleyya, jāneyyāhaṃ – ‘ayaṃ me purato aggi jalatī’’’ti.
‘‘সচে পন তং, ৰচ্ছ, এৰং পুচ্ছেয্য – ‘যো তে অযং পুরতো অগ্গি জলতি অযং অগ্গি কিং পটিচ্চ জলতী’তি, এৰং পুট্ঠো ত্ৰং, ৰচ্ছ, কিন্তি ব্যাকরেয্যাসী’’তি? ‘‘সচে মং, ভো গোতম, এৰং পুচ্ছেয্য – ‘যো তে অযং পুরতো অগ্গি জলতি অযং অগ্গি কিং পটিচ্চ জলতী’তি, এৰং পুট্ঠো অহং, ভো গোতম, এৰং ব্যাকরেয্যং – ‘যো মে অযং পুরতো অগ্গি জলতি অযং অগ্গি তিণকট্ঠুপাদানং পটিচ্চ জলতী’’’তি।
‘‘Sace pana taṃ, vaccha, evaṃ puccheyya – ‘yo te ayaṃ purato aggi jalati ayaṃ aggi kiṃ paṭicca jalatī’ti, evaṃ puṭṭho tvaṃ, vaccha, kinti byākareyyāsī’’ti? ‘‘Sace maṃ, bho gotama, evaṃ puccheyya – ‘yo te ayaṃ purato aggi jalati ayaṃ aggi kiṃ paṭicca jalatī’ti, evaṃ puṭṭho ahaṃ, bho gotama, evaṃ byākareyyaṃ – ‘yo me ayaṃ purato aggi jalati ayaṃ aggi tiṇakaṭṭhupādānaṃ paṭicca jalatī’’’ti.
‘‘সচে তে, ৰচ্ছ, পুরতো সো অগ্গি নিব্বাযেয্য, জানেয্যাসি ত্ৰং – ‘অযং মে পুরতো অগ্গি নিব্বুতো’’’তি? ‘‘সচে মে, ভো গোতম, পুরতো সো অগ্গি নিব্বাযেয্য, জানেয্যাহং – ‘অযং মে পুরতো অগ্গি নিব্বুতো’’’তি।
‘‘Sace te, vaccha, purato so aggi nibbāyeyya, jāneyyāsi tvaṃ – ‘ayaṃ me purato aggi nibbuto’’’ti? ‘‘Sace me, bho gotama, purato so aggi nibbāyeyya, jāneyyāhaṃ – ‘ayaṃ me purato aggi nibbuto’’’ti.
‘‘সচে পন তং, ৰচ্ছ, এৰং পুচ্ছেয্য – ‘যো তে অযং পুরতো অগ্গি নিব্বুতো সো অগ্গি ইতো কতমং দিসং গতো – পুরত্থিমং ৰা দক্খিণং ৰা পচ্ছিমং ৰা উত্তরং ৰা’তি, এৰং পুট্ঠো ত্ৰং, ৰচ্ছ, কিন্তি ব্যাকরেয্যাসী’’তি? ‘‘ন উপেতি, ভো গোতম, যঞ্হি সো, ভো গোতম, অগ্গি তিণকট্ঠুপাদানং পটিচ্চ অজলি 11 তস্স চ পরিযাদানা অঞ্ঞস্স চ অনুপহারা অনাহারো নিব্বুতো ত্ৰেৰ সঙ্খ্যং গচ্ছতী’’তি।
‘‘Sace pana taṃ, vaccha, evaṃ puccheyya – ‘yo te ayaṃ purato aggi nibbuto so aggi ito katamaṃ disaṃ gato – puratthimaṃ vā dakkhiṇaṃ vā pacchimaṃ vā uttaraṃ vā’ti, evaṃ puṭṭho tvaṃ, vaccha, kinti byākareyyāsī’’ti? ‘‘Na upeti, bho gotama, yañhi so, bho gotama, aggi tiṇakaṭṭhupādānaṃ paṭicca ajali 12 tassa ca pariyādānā aññassa ca anupahārā anāhāro nibbuto tveva saṅkhyaṃ gacchatī’’ti.
১৯২. ‘‘এৰমেৰ খো, ৰচ্ছ, যেন রূপেন তথাগতং পঞ্ঞাপযমানো পঞ্ঞাপেয্য তং রূপং তথাগতস্স পহীনং উচ্ছিন্নমূলং তালাৰত্থুকতং অনভাৰংকতং আযতিং অনুপ্পাদধম্মং। রূপসঙ্খযৰিমুত্তো 13 খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো। উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি।
192. ‘‘Evameva kho, vaccha, yena rūpena tathāgataṃ paññāpayamāno paññāpeyya taṃ rūpaṃ tathāgatassa pahīnaṃ ucchinnamūlaṃ tālāvatthukataṃ anabhāvaṃkataṃ āyatiṃ anuppādadhammaṃ. Rūpasaṅkhayavimutto 14 kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘যায ৰেদনায তথাগতং পঞ্ঞাপযমানো পঞ্ঞাপেয্য সা ৰেদনা তথাগতস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা। ৰেদনাসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো। উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি।
‘‘Yāya vedanāya tathāgataṃ paññāpayamāno paññāpeyya sā vedanā tathāgatassa pahīnā ucchinnamūlā tālāvatthukatā anabhāvaṃkatā āyatiṃ anuppādadhammā. Vedanāsaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘যায সঞ্ঞায তথাগতং পঞ্ঞাপযমানো পঞ্ঞাপেয্য সা সঞ্ঞা তথাগতস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা। সঞ্ঞাসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো। উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি।
‘‘Yāya saññāya tathāgataṃ paññāpayamāno paññāpeyya sā saññā tathāgatassa pahīnā ucchinnamūlā tālāvatthukatā anabhāvaṃkatā āyatiṃ anuppādadhammā. Saññāsaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘যেহি সঙ্খারেহি তথাগতং পঞ্ঞাপযমানো পঞ্ঞাপেয্য তে সঙ্খারা তথাগতস্স পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা। সঙ্খারসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো। উপপজ্জতীতি ন উপেতি , ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি।
‘‘Yehi saṅkhārehi tathāgataṃ paññāpayamāno paññāpeyya te saṅkhārā tathāgatassa pahīnā ucchinnamūlā tālāvatthukatā anabhāvaṃkatā āyatiṃ anuppādadhammā. Saṅkhārasaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti , na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti.
‘‘যেন ৰিঞ্ঞাণেন তথাগতং পঞ্ঞাপযমানো পঞ্ঞাপেয্য তং ৰিঞ্ঞাণং তথাগতস্স পহীনং উচ্ছিন্নমূলং তালাৰত্থুকতং অনভাৰংকতং আযতিং অনুপ্পাদধম্মং। ৰিঞ্ঞাণসঙ্খযৰিমুত্তো খো, ৰচ্ছ, তথাগতো গম্ভীরো অপ্পমেয্যো দুপ্পরিযোগাল়্হো – সেয্যথাপি মহাসমুদ্দো। উপপজ্জতীতি ন উপেতি, ন উপপজ্জতীতি ন উপেতি, উপপজ্জতি চ ন চ উপপজ্জতীতি ন উপেতি, নেৰ উপপজ্জতি ন ন উপপজ্জতীতি ন উপেতি’’।
‘‘Yena viññāṇena tathāgataṃ paññāpayamāno paññāpeyya taṃ viññāṇaṃ tathāgatassa pahīnaṃ ucchinnamūlaṃ tālāvatthukataṃ anabhāvaṃkataṃ āyatiṃ anuppādadhammaṃ. Viññāṇasaṅkhayavimutto kho, vaccha, tathāgato gambhīro appameyyo duppariyogāḷho – seyyathāpi mahāsamuddo. Upapajjatīti na upeti, na upapajjatīti na upeti, upapajjati ca na ca upapajjatīti na upeti, neva upapajjati na na upapajjatīti na upeti’’.
এৰং ৰুত্তে, ৰচ্ছগোত্তো পরিব্বাজকো ভগৰন্তং এতদৰোচ – ‘‘সেয্যথাপি, ভো গোতম, গামস্স ৰা নিগমস্স ৰা অৰিদূরে মহাসালরুক্খো। তস্স অনিচ্চতা সাখাপলাসা পলুজ্জেয্যুং 15, তচপপটিকা পলুজ্জেয্যুং, ফেগ্গূ পলুজ্জেয্যুং 16; সো অপরেন সমযেন অপগতসাখাপলাসো অপগততচপপটিকো অপগতফেগ্গুকো সুদ্ধো অস্স, সারে পতিট্ঠিতো; এৰমেৰ ভোতো গোতমস্স পাৰচনং অপগতসাখাপলাসং অপগততচপপটিকং অপগতফেগ্গুকং সুদ্ধং, সারে পতিট্ঠিতং। অভিক্কন্তং, ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, vacchagotto paribbājako bhagavantaṃ etadavoca – ‘‘seyyathāpi, bho gotama, gāmassa vā nigamassa vā avidūre mahāsālarukkho. Tassa aniccatā sākhāpalāsā palujjeyyuṃ 17, tacapapaṭikā palujjeyyuṃ, pheggū palujjeyyuṃ 18; so aparena samayena apagatasākhāpalāso apagatatacapapaṭiko apagataphegguko suddho assa, sāre patiṭṭhito; evameva bhoto gotamassa pāvacanaṃ apagatasākhāpalāsaṃ apagatatacapapaṭikaṃ apagatapheggukaṃ suddhaṃ, sāre patiṭṭhitaṃ. Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
অগ্গিৰচ্ছসুত্তং নিট্ঠিতং দুতিযং।
Aggivacchasuttaṃ niṭṭhitaṃ dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ২. অগ্গিৰচ্ছসুত্তৰণ্ণনা • 2. Aggivacchasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ২. অগ্গিৰচ্ছসুত্তৰণ্ণনা • 2. Aggivacchasuttavaṇṇanā
