| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
২. অগ্গিৰচ্ছসুত্তৰণ্ণনা
2. Aggivacchasuttavaṇṇanā
১৮৭. এৰং মে সুতন্তি অগ্গিৰচ্ছসুত্তং। তত্থ ন খো অহন্তি পঠমৰারে নাহং সস্সতদিট্ঠিকোতি ৰদতি, দুতিযে নাহং উচ্ছেদদিট্ঠিকোতি। এৰং অন্তানন্তিকাদিৰসেন সব্বৰারেসু পটিক্খেপো ৰেদিতব্বো। হোতি চ ন চ হোতীতি অযং পনেত্থ একচ্চসস্সতৰাদো। নেৰ হোতি ন ন হোতীতি অযং অমরাৰিক্খেপোতি ৰেদিতব্বো।
187.Evaṃme sutanti aggivacchasuttaṃ. Tattha na kho ahanti paṭhamavāre nāhaṃ sassatadiṭṭhikoti vadati, dutiye nāhaṃ ucchedadiṭṭhikoti. Evaṃ antānantikādivasena sabbavāresu paṭikkhepo veditabbo. Hoti ca na ca hotīti ayaṃ panettha ekaccasassatavādo. Neva hoti na na hotīti ayaṃ amarāvikkhepoti veditabbo.
১৮৯. সদুক্খন্তি কিলেসদুক্খেন চেৰ ৰিপাকদুক্খেন চ সদুক্খং। সৰিঘাতন্তি তেসংযেৰ দ্ৰিন্নং ৰসেন সউপঘাতকং। সউপাযাসন্তি তেসংযেৰ ৰসেন সউপাযাসং। সপরিল়াহন্তি তেসংযেৰ ৰসেন সপরিল়াহং।
189.Sadukkhanti kilesadukkhena ceva vipākadukkhena ca sadukkhaṃ. Savighātanti tesaṃyeva dvinnaṃ vasena saupaghātakaṃ. Saupāyāsanti tesaṃyeva vasena saupāyāsaṃ. Sapariḷāhanti tesaṃyeva vasena sapariḷāhaṃ.
কিঞ্চি দিট্ঠিগতন্তি কাচি একা দিট্ঠিপি রুচ্চিত্ৰা খমাপেত্ৰা গহিতা অত্থীতি পুচ্ছতি। অপনীতন্তি নীহটং অপৰিদ্ধং। দিট্ঠন্তি পঞ্ঞায দিট্ঠং। তস্মাতি যস্মা পঞ্চন্নং খন্ধানং উদযৰযং অদ্দস, তস্মা। সব্বমঞ্ঞিতানন্তি সব্বেসং তিণ্ণম্পি তণ্হাদিট্ঠিমানমঞ্ঞিতানং। মথিতানন্তি তেসংযেৰ ৰেৰচনং। ইদানি তানি ৰিভজিত্ৰা দস্সেন্তো সব্বঅহংকার-মমংকার-মানানুসযানন্তি আহ। এত্থ হি অহংকারো দিট্ঠি, মমংকারো তণ্হা, মানানুসযো মানো। অনুপাদা ৰিমুত্তোতি চতূহি উপাদানেহি কঞ্চি ধম্মং অনুপাদিযিত্ৰা ৰিমুত্তো।
Kiñci diṭṭhigatanti kāci ekā diṭṭhipi ruccitvā khamāpetvā gahitā atthīti pucchati. Apanītanti nīhaṭaṃ apaviddhaṃ. Diṭṭhanti paññāya diṭṭhaṃ. Tasmāti yasmā pañcannaṃ khandhānaṃ udayavayaṃ addasa, tasmā. Sabbamaññitānanti sabbesaṃ tiṇṇampi taṇhādiṭṭhimānamaññitānaṃ. Mathitānanti tesaṃyeva vevacanaṃ. Idāni tāni vibhajitvā dassento sabbaahaṃkāra-mamaṃkāra-mānānusayānanti āha. Ettha hi ahaṃkāro diṭṭhi, mamaṃkāro taṇhā, mānānusayo māno. Anupādā vimuttoti catūhi upādānehi kañci dhammaṃ anupādiyitvā vimutto.
১৯০. ন উপেতীতি ন যুজ্জতি। এত্থ চ ‘‘ন উপপজ্জতী’’তি ইদং অনুজানিতব্বং সিযা। যস্মা পন এৰং ৰুত্তে সো পরিব্বাজকো উচ্ছেদং গণ্হেয্য, উপপজ্জতীতি পন সস্সতমেৰ, উপপজ্জতি চ ন চ উপপজ্জতীতি একচ্চসস্সতং, নেৰ উপপজ্জতি ন ন উপপজ্জতীতি অমরাৰিক্খেপং, তস্মা ভগৰা – ‘‘অযং অপ্পতিট্ঠো অনালম্বো হোতু, সুখপৰেসনট্ঠানং মা লভতূ’’তি অননুঞ্ঞায ঠত্ৰা অনুঞ্ঞম্পি পটিক্খিপি। অলন্তি সমত্থং পরিযত্তং । ধম্মোতি পচ্চযাকারধম্মো। অঞ্ঞত্রযোগেনাতি অঞ্ঞত্থ পযোগেন। অঞ্ঞত্রাচরিযকেনাতি পচ্চযাকারং অজানন্তানং অঞ্ঞেসং আচরিযানং সন্তিকে ৰসন্তেন।
190.Na upetīti na yujjati. Ettha ca ‘‘na upapajjatī’’ti idaṃ anujānitabbaṃ siyā. Yasmā pana evaṃ vutte so paribbājako ucchedaṃ gaṇheyya, upapajjatīti pana sassatameva, upapajjati ca na ca upapajjatīti ekaccasassataṃ, neva upapajjati na na upapajjatīti amarāvikkhepaṃ, tasmā bhagavā – ‘‘ayaṃ appatiṭṭho anālambo hotu, sukhapavesanaṭṭhānaṃ mā labhatū’’ti ananuññāya ṭhatvā anuññampi paṭikkhipi. Alanti samatthaṃ pariyattaṃ . Dhammoti paccayākāradhammo. Aññatrayogenāti aññattha payogena. Aññatrācariyakenāti paccayākāraṃ ajānantānaṃ aññesaṃ ācariyānaṃ santike vasantena.
১৯১. তেন হি ৰচ্ছাতি যস্মা ত্ৰং সম্মোহমাপাদিন্তি ৰদসি, তস্মা তংযেৰেত্থ পটিপুচ্ছিস্সামি। অনাহারো নিব্বুতোতি অপ্পচ্চযো নিব্বুতো।
191.Tena hi vacchāti yasmā tvaṃ sammohamāpādinti vadasi, tasmā taṃyevettha paṭipucchissāmi. Anāhāronibbutoti appaccayo nibbuto.
১৯২. যেন রূপেনাতি যেন রূপেন সত্তসঙ্খাতং তথাগতং রূপীতি পঞ্ঞাপেয্য। গম্ভীরোতি গুণগম্ভীরো। অপ্পমেয্যোতি পমাণং গণ্হিতুং ন সক্কুণেয্যো। দুপ্পরিযোগাল়্হোতি দুওগাহো দুজ্জানো। সেয্যথাপি মহাসমুদ্দোতি যথা মহাসমুদ্দো গম্ভীরো অপ্পমেয্যো দুজ্জানো, এৰমেৰ খীণাসৰোপি। তং আরব্ভ উপপজ্জতীতিআদি সব্বং ন যুজ্জতি। কথং? যথা পরিনিব্বুতং অগ্গিং আরব্ভ পুরত্থিমং দিসং গতোতিআদি সব্বং ন যুজ্জতি, এৰং।
192.Yena rūpenāti yena rūpena sattasaṅkhātaṃ tathāgataṃ rūpīti paññāpeyya. Gambhīroti guṇagambhīro. Appameyyoti pamāṇaṃ gaṇhituṃ na sakkuṇeyyo. Duppariyogāḷhoti duogāho dujjāno. Seyyathāpi mahāsamuddoti yathā mahāsamuddo gambhīro appameyyo dujjāno, evameva khīṇāsavopi. Taṃ ārabbha upapajjatītiādi sabbaṃ na yujjati. Kathaṃ? Yathā parinibbutaṃ aggiṃ ārabbha puratthimaṃ disaṃ gatotiādi sabbaṃ na yujjati, evaṃ.
অনিচ্চতাতি অনিচ্চতায। সারে পতিট্ঠিতন্তি লোকুত্তরধম্মসারে পতিট্ঠিতং। সেসং সব্বত্থ উত্তানমেৰাতি।
Aniccatāti aniccatāya. Sāre patiṭṭhitanti lokuttaradhammasāre patiṭṭhitaṃ. Sesaṃ sabbattha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
অগ্গিৰচ্ছসুত্তৰণ্ণনা নিট্ঠিতা।
Aggivacchasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ২. অগ্গিৰচ্ছসুত্তং • 2. Aggivacchasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ২. অগ্গিৰচ্ছসুত্তৰণ্ণনা • 2. Aggivacchasuttavaṇṇanā
