| Library / Tipiṭaka / တိပိဋက • Tipiṭaka / မဇ္ဈိမနိကာယ (အဋ္ဌကထာ) • Majjhimanikāya (aṭṭhakathā) |
၂. အဂ္ဂိဝစ္ဆသုတ္တဝဏ္ဏနာ
2. Aggivacchasuttavaṇṇanā
၁၈၇. ဧဝံ မေ သုတန္တိ အဂ္ဂိဝစ္ဆသုတ္တံ။ တတ္ထ န ခော အဟန္တိ ပဌမဝာရေ နာဟံ သသ္သတဒိဋ္ဌိကောတိ ဝဒတိ, ဒုတိယေ နာဟံ ဥစ္ဆေဒဒိဋ္ဌိကောတိ။ ဧဝံ အန္တာနန္တိကာဒိဝသေန သဗ္ဗဝာရေသု ပဋိက္ခေပော ဝေဒိတဗ္ဗော။ ဟောတိ စ န စ ဟောတီတိ အယံ ပနေတ္ထ ဧကစ္စသသ္သတဝာဒော။ နေဝ ဟောတိ န န ဟောတီတိ အယံ အမရာဝိက္ခေပောတိ ဝေဒိတဗ္ဗော။
187.Evaṃme sutanti aggivacchasuttaṃ. Tattha na kho ahanti paṭhamavāre nāhaṃ sassatadiṭṭhikoti vadati, dutiye nāhaṃ ucchedadiṭṭhikoti. Evaṃ antānantikādivasena sabbavāresu paṭikkhepo veditabbo. Hoti ca na ca hotīti ayaṃ panettha ekaccasassatavādo. Neva hoti na na hotīti ayaṃ amarāvikkhepoti veditabbo.
၁၈၉. သဒုက္ခန္တိ ကိလေသဒုက္ခေန စေဝ ဝိပာကဒုက္ခေန စ သဒုက္ခံ။ သဝိဃာတန္တိ တေသံယေဝ ဒ္ဝိန္နံ ဝသေန သဥပဃာတကံ။ သဥပာယာသန္တိ တေသံယေဝ ဝသေန သဥပာယာသံ။ သပရိဠာဟန္တိ တေသံယေဝ ဝသေန သပရိဠာဟံ။
189.Sadukkhanti kilesadukkhena ceva vipākadukkhena ca sadukkhaṃ. Savighātanti tesaṃyeva dvinnaṃ vasena saupaghātakaṃ. Saupāyāsanti tesaṃyeva vasena saupāyāsaṃ. Sapariḷāhanti tesaṃyeva vasena sapariḷāhaṃ.
ကိဉ္စိ ဒိဋ္ဌိဂတန္တိ ကာစိ ဧကာ ဒိဋ္ဌိပိ ရုစ္စိတ္ဝာ ခမာပေတ္ဝာ ဂဟိတာ အတ္ထီတိ ပုစ္ဆတိ။ အပနီတန္တိ နီဟဋံ အပဝိဒ္ဓံ။ ဒိဋ္ဌန္တိ ပညာယ ဒိဋ္ဌံ။ တသ္မာတိ ယသ္မာ ပဉ္စန္နံ ခန္ဓာနံ ဥဒယဝယံ အဒ္ဒသ, တသ္မာ။ သဗ္ဗမညိတာနန္တိ သဗ္ဗေသံ တိဏ္ဏမ္ပိ တဏ္ဟာဒိဋ္ဌိမာနမညိတာနံ။ မထိတာနန္တိ တေသံယေဝ ဝေဝစနံ။ ဣဒာနိ တာနိ ဝိဘဇိတ္ဝာ ဒသ္သေန္တော သဗ္ဗအဟံကာရ-မမံကာရ-မာနာနုသယာနန္တိ အာဟ။ ဧတ္ထ ဟိ အဟံကာရော ဒိဋ္ဌိ, မမံကာရော တဏ္ဟာ, မာနာနုသယော မာနော။ အနုပာဒာ ဝိမုတ္တောတိ စတူဟိ ဥပာဒာနေဟိ ကဉ္စိ ဓမ္မံ အနုပာဒိယိတ္ဝာ ဝိမုတ္တော။
Kiñci diṭṭhigatanti kāci ekā diṭṭhipi ruccitvā khamāpetvā gahitā atthīti pucchati. Apanītanti nīhaṭaṃ apaviddhaṃ. Diṭṭhanti paññāya diṭṭhaṃ. Tasmāti yasmā pañcannaṃ khandhānaṃ udayavayaṃ addasa, tasmā. Sabbamaññitānanti sabbesaṃ tiṇṇampi taṇhādiṭṭhimānamaññitānaṃ. Mathitānanti tesaṃyeva vevacanaṃ. Idāni tāni vibhajitvā dassento sabbaahaṃkāra-mamaṃkāra-mānānusayānanti āha. Ettha hi ahaṃkāro diṭṭhi, mamaṃkāro taṇhā, mānānusayo māno. Anupādā vimuttoti catūhi upādānehi kañci dhammaṃ anupādiyitvā vimutto.
၁၉၀. န ဥပေတီတိ န ယုဇ္ဇတိ။ ဧတ္ထ စ ‘‘န ဥပပဇ္ဇတီ’’တိ ဣဒံ အနုဇာနိတဗ္ဗံ သိယာ။ ယသ္မာ ပန ဧဝံ ဝုတ္တေ သော ပရိဗ္ဗာဇကော ဥစ္ဆေဒံ ဂဏ္ဟေယ္ယ, ဥပပဇ္ဇတီတိ ပန သသ္သတမေဝ, ဥပပဇ္ဇတိ စ န စ ဥပပဇ္ဇတီတိ ဧကစ္စသသ္သတံ, နေဝ ဥပပဇ္ဇတိ န န ဥပပဇ္ဇတီတိ အမရာဝိက္ခေပံ, တသ္မာ ဘဂဝာ – ‘‘အယံ အပ္ပတိဋ္ဌော အနာလမ္ဗော ဟောတု, သုခပဝေသနဋ္ဌာနံ မာ လဘတူ’’တိ အနနုညာယ ဌတ္ဝာ အနုညမ္ပိ ပဋိက္ခိပိ။ အလန္တိ သမတ္ထံ ပရိယတ္တံ ။ ဓမ္မောတိ ပစ္စယာကာရဓမ္မော။ အညတ္ရယောဂေနာတိ အညတ္ထ ပယောဂေန။ အညတ္ရာစရိယကေနာတိ ပစ္စယာကာရံ အဇာနန္တာနံ အညေသံ အာစရိယာနံ သန္တိကေ ဝသန္တေန။
190.Na upetīti na yujjati. Ettha ca ‘‘na upapajjatī’’ti idaṃ anujānitabbaṃ siyā. Yasmā pana evaṃ vutte so paribbājako ucchedaṃ gaṇheyya, upapajjatīti pana sassatameva, upapajjati ca na ca upapajjatīti ekaccasassataṃ, neva upapajjati na na upapajjatīti amarāvikkhepaṃ, tasmā bhagavā – ‘‘ayaṃ appatiṭṭho anālambo hotu, sukhapavesanaṭṭhānaṃ mā labhatū’’ti ananuññāya ṭhatvā anuññampi paṭikkhipi. Alanti samatthaṃ pariyattaṃ . Dhammoti paccayākāradhammo. Aññatrayogenāti aññattha payogena. Aññatrācariyakenāti paccayākāraṃ ajānantānaṃ aññesaṃ ācariyānaṃ santike vasantena.
၁၉၁. တေန ဟိ ဝစ္ဆာတိ ယသ္မာ တ္ဝံ သမ္မောဟမာပာဒိန္တိ ဝဒသိ, တသ္မာ တံယေဝေတ္ထ ပဋိပုစ္ဆိသ္သာမိ။ အနာဟာရော နိဗ္ဗုတောတိ အပ္ပစ္စယော နိဗ္ဗုတော။
191.Tena hi vacchāti yasmā tvaṃ sammohamāpādinti vadasi, tasmā taṃyevettha paṭipucchissāmi. Anāhāronibbutoti appaccayo nibbuto.
၁၉၂. ယေန ရူပေနာတိ ယေန ရူပေန သတ္တသင္ခာတံ တထာဂတံ ရူပီတိ ပညာပေယ္ယ။ ဂမ္ဘီရောတိ ဂုဏဂမ္ဘီရော။ အပ္ပမေယ္ယောတိ ပမာဏံ ဂဏ္ဟိတုံ န သက္ကုဏေယ္ယော။ ဒုပ္ပရိယောဂာဠ္ဟောတိ ဒုဩဂာဟော ဒုဇ္ဇာနော။ သေယ္ယထာပိ မဟာသမုဒ္ဒောတိ ယထာ မဟာသမုဒ္ဒော ဂမ္ဘီရော အပ္ပမေယ္ယော ဒုဇ္ဇာနော, ဧဝမေဝ ခီဏာသဝောပိ။ တံ အာရဗ္ဘ ဥပပဇ္ဇတီတိအာဒိ သဗ္ဗံ န ယုဇ္ဇတိ။ ကထံ? ယထာ ပရိနိဗ္ဗုတံ အဂ္ဂိံ အာရဗ္ဘ ပုရတ္ထိမံ ဒိသံ ဂတောတိအာဒိ သဗ္ဗံ န ယုဇ္ဇတိ, ဧဝံ။
192.Yena rūpenāti yena rūpena sattasaṅkhātaṃ tathāgataṃ rūpīti paññāpeyya. Gambhīroti guṇagambhīro. Appameyyoti pamāṇaṃ gaṇhituṃ na sakkuṇeyyo. Duppariyogāḷhoti duogāho dujjāno. Seyyathāpi mahāsamuddoti yathā mahāsamuddo gambhīro appameyyo dujjāno, evameva khīṇāsavopi. Taṃ ārabbha upapajjatītiādi sabbaṃ na yujjati. Kathaṃ? Yathā parinibbutaṃ aggiṃ ārabbha puratthimaṃ disaṃ gatotiādi sabbaṃ na yujjati, evaṃ.
အနိစ္စတာတိ အနိစ္စတာယ။ သာရေ ပတိဋ္ဌိတန္တိ လောကုတ္တရဓမ္မသာရေ ပတိဋ္ဌိတံ။ သေသံ သဗ္ဗတ္ထ ဥတ္တာနမေဝာတိ။
Aniccatāti aniccatāya. Sāre patiṭṭhitanti lokuttaradhammasāre patiṭṭhitaṃ. Sesaṃ sabbattha uttānamevāti.
ပပဉ္စသူဒနိယာ မဇ္ဈိမနိကာယဋ္ဌကထာယ
Papañcasūdaniyā majjhimanikāyaṭṭhakathāya
အဂ္ဂိဝစ္ဆသုတ္တဝဏ္ဏနာ နိဋ္ဌိတာ။
Aggivacchasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / မဇ္ဈိမနိကာယ • Majjhimanikāya / ၂. အဂ္ဂိဝစ္ဆသုတ္တံ • 2. Aggivacchasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / မဇ္ဈိမနိကာယ (ဋီကာ) • Majjhimanikāya (ṭīkā) / ၂. အဂ္ဂိဝစ္ဆသုတ္တဝဏ္ဏနာ • 2. Aggivacchasuttavaṇṇanā
