| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) |
༢. ཨགྒིཝཙྪསུཏྟཝཎྞནཱ
2. Aggivacchasuttavaṇṇanā
༡༨༧. ཨེཝཾ མེ སུཏནྟི ཨགྒིཝཙྪསུཏྟཾ། ཏཏྠ ན ཁོ ཨཧནྟི པཋམཝཱརེ ནཱཧཾ སསྶཏདིཊྛིཀོཏི ཝདཏི, དུཏིཡེ ནཱཧཾ ཨུཙྪེདདིཊྛིཀོཏི། ཨེཝཾ ཨནྟཱནནྟིཀཱདིཝསེན སབྦཝཱརེསུ པཊིཀྑེཔོ ཝེདིཏབྦོ། ཧོཏི ཙ ན ཙ ཧོཏཱིཏི ཨཡཾ པནེཏྠ ཨེཀཙྩསསྶཏཝཱདོ། ནེཝ ཧོཏི ན ན ཧོཏཱིཏི ཨཡཾ ཨམརཱཝིཀྑེཔོཏི ཝེདིཏབྦོ།
187.Evaṃme sutanti aggivacchasuttaṃ. Tattha na kho ahanti paṭhamavāre nāhaṃ sassatadiṭṭhikoti vadati, dutiye nāhaṃ ucchedadiṭṭhikoti. Evaṃ antānantikādivasena sabbavāresu paṭikkhepo veditabbo. Hoti ca na ca hotīti ayaṃ panettha ekaccasassatavādo. Neva hoti na na hotīti ayaṃ amarāvikkhepoti veditabbo.
༡༨༩. སདུཀྑནྟི ཀིལེསདུཀྑེན ཙེཝ ཝིཔཱཀདུཀྑེན ཙ སདུཀྑཾ། སཝིགྷཱཏནྟི ཏེསཾཡེཝ དྭིནྣཾ ཝསེན སཨུཔགྷཱཏཀཾ། སཨུཔཱཡཱསནྟི ཏེསཾཡེཝ ཝསེན སཨུཔཱཡཱསཾ། སཔརིལཱ༹ཧནྟི ཏེསཾཡེཝ ཝསེན སཔརིལཱ༹ཧཾ།
189.Sadukkhanti kilesadukkhena ceva vipākadukkhena ca sadukkhaṃ. Savighātanti tesaṃyeva dvinnaṃ vasena saupaghātakaṃ. Saupāyāsanti tesaṃyeva vasena saupāyāsaṃ. Sapariḷāhanti tesaṃyeva vasena sapariḷāhaṃ.
ཀིཉྩི དིཊྛིགཏནྟི ཀཱཙི ཨེཀཱ དིཊྛིཔི རུཙྩིཏྭཱ ཁམཱཔེཏྭཱ གཧིཏཱ ཨཏྠཱིཏི པུཙྪཏི། ཨཔནཱིཏནྟི ནཱིཧཊཾ ཨཔཝིདྡྷཾ། དིཊྛནྟི པཉྙཱཡ དིཊྛཾ། ཏསྨཱཏི ཡསྨཱ པཉྩནྣཾ ཁནྡྷཱནཾ ཨུདཡཝཡཾ ཨདྡས, ཏསྨཱ། སབྦམཉྙིཏཱནནྟི སབྦེསཾ ཏིཎྞམྤི ཏཎྷཱདིཊྛིམཱནམཉྙིཏཱནཾ། མཐིཏཱནནྟི ཏེསཾཡེཝ ཝེཝཙནཾ། ཨིདཱནི ཏཱནི ཝིབྷཛིཏྭཱ དསྶེནྟོ སབྦཨཧཾཀཱར-མམཾཀཱར-མཱནཱནུསཡཱནནྟི ཨཱཧ། ཨེཏྠ ཧི ཨཧཾཀཱརོ དིཊྛི, མམཾཀཱརོ ཏཎྷཱ, མཱནཱནུསཡོ མཱནོ། ཨནུཔཱདཱ ཝིམུཏྟོཏི ཙཏཱུཧི ཨུཔཱདཱནེཧི ཀཉྩི དྷམྨཾ ཨནུཔཱདིཡིཏྭཱ ཝིམུཏྟོ།
Kiñci diṭṭhigatanti kāci ekā diṭṭhipi ruccitvā khamāpetvā gahitā atthīti pucchati. Apanītanti nīhaṭaṃ apaviddhaṃ. Diṭṭhanti paññāya diṭṭhaṃ. Tasmāti yasmā pañcannaṃ khandhānaṃ udayavayaṃ addasa, tasmā. Sabbamaññitānanti sabbesaṃ tiṇṇampi taṇhādiṭṭhimānamaññitānaṃ. Mathitānanti tesaṃyeva vevacanaṃ. Idāni tāni vibhajitvā dassento sabbaahaṃkāra-mamaṃkāra-mānānusayānanti āha. Ettha hi ahaṃkāro diṭṭhi, mamaṃkāro taṇhā, mānānusayo māno. Anupādā vimuttoti catūhi upādānehi kañci dhammaṃ anupādiyitvā vimutto.
༡༩༠. ན ཨུཔེཏཱིཏི ན ཡུཛྫཏི། ཨེཏྠ ཙ ‘‘ན ཨུཔཔཛྫཏཱི’’ཏི ཨིདཾ ཨནུཛཱནིཏབྦཾ སིཡཱ། ཡསྨཱ པན ཨེཝཾ ཝུཏྟེ སོ པརིབྦཱཛཀོ ཨུཙྪེདཾ གཎྷེཡྻ, ཨུཔཔཛྫཏཱིཏི པན སསྶཏམེཝ, ཨུཔཔཛྫཏི ཙ ན ཙ ཨུཔཔཛྫཏཱིཏི ཨེཀཙྩསསྶཏཾ, ནེཝ ཨུཔཔཛྫཏི ན ན ཨུཔཔཛྫཏཱིཏི ཨམརཱཝིཀྑེཔཾ, ཏསྨཱ བྷགཝཱ – ‘‘ཨཡཾ ཨཔྤཏིཊྛོ ཨནཱལམྦོ ཧོཏུ, སུཁཔཝེསནཊྛཱནཾ མཱ ལབྷཏཱུ’’ཏི ཨནནུཉྙཱཡ ཋཏྭཱ ཨནུཉྙམྤི པཊིཀྑིཔི། ཨལནྟི སམཏྠཾ པརིཡཏྟཾ ། དྷམྨོཏི པཙྩཡཱཀཱརདྷམྨོ། ཨཉྙཏྲཡོགེནཱཏི ཨཉྙཏྠ པཡོགེན། ཨཉྙཏྲཱཙརིཡཀེནཱཏི པཙྩཡཱཀཱརཾ ཨཛཱནནྟཱནཾ ཨཉྙེསཾ ཨཱཙརིཡཱནཾ སནྟིཀེ ཝསནྟེན།
190.Na upetīti na yujjati. Ettha ca ‘‘na upapajjatī’’ti idaṃ anujānitabbaṃ siyā. Yasmā pana evaṃ vutte so paribbājako ucchedaṃ gaṇheyya, upapajjatīti pana sassatameva, upapajjati ca na ca upapajjatīti ekaccasassataṃ, neva upapajjati na na upapajjatīti amarāvikkhepaṃ, tasmā bhagavā – ‘‘ayaṃ appatiṭṭho anālambo hotu, sukhapavesanaṭṭhānaṃ mā labhatū’’ti ananuññāya ṭhatvā anuññampi paṭikkhipi. Alanti samatthaṃ pariyattaṃ . Dhammoti paccayākāradhammo. Aññatrayogenāti aññattha payogena. Aññatrācariyakenāti paccayākāraṃ ajānantānaṃ aññesaṃ ācariyānaṃ santike vasantena.
༡༩༡. ཏེན ཧི ཝཙྪཱཏི ཡསྨཱ ཏྭཾ སམྨོཧམཱཔཱདིནྟི ཝདསི, ཏསྨཱ ཏཾཡེཝེཏྠ པཊིཔུཙྪིསྶཱམི། ཨནཱཧཱརོ ནིབྦུཏོཏི ཨཔྤཙྩཡོ ནིབྦུཏོ།
191.Tena hi vacchāti yasmā tvaṃ sammohamāpādinti vadasi, tasmā taṃyevettha paṭipucchissāmi. Anāhāronibbutoti appaccayo nibbuto.
༡༩༢. ཡེན རཱུཔེནཱཏི ཡེན རཱུཔེན སཏྟསངྑཱཏཾ ཏཐཱགཏཾ རཱུཔཱིཏི པཉྙཱཔེཡྻ། གམྦྷཱིརོཏི གུཎགམྦྷཱིརོ། ཨཔྤམེཡྻོཏི པམཱཎཾ གཎྷིཏུཾ ན སཀྐུཎེཡྻོ། དུཔྤརིཡོགཱལ༹ྷོཏི དུཨོགཱཧོ དུཛྫཱནོ། སེཡྻཐཱཔི མཧཱསམུདྡོཏི ཡཐཱ མཧཱསམུདྡོ གམྦྷཱིརོ ཨཔྤམེཡྻོ དུཛྫཱནོ, ཨེཝམེཝ ཁཱིཎཱསཝོཔི། ཏཾ ཨཱརབྦྷ ཨུཔཔཛྫཏཱིཏིཨཱདི སབྦཾ ན ཡུཛྫཏི། ཀཐཾ? ཡཐཱ པརིནིབྦུཏཾ ཨགྒིཾ ཨཱརབྦྷ པུརཏྠིམཾ དིསཾ གཏོཏིཨཱདི སབྦཾ ན ཡུཛྫཏི, ཨེཝཾ།
192.Yena rūpenāti yena rūpena sattasaṅkhātaṃ tathāgataṃ rūpīti paññāpeyya. Gambhīroti guṇagambhīro. Appameyyoti pamāṇaṃ gaṇhituṃ na sakkuṇeyyo. Duppariyogāḷhoti duogāho dujjāno. Seyyathāpi mahāsamuddoti yathā mahāsamuddo gambhīro appameyyo dujjāno, evameva khīṇāsavopi. Taṃ ārabbha upapajjatītiādi sabbaṃ na yujjati. Kathaṃ? Yathā parinibbutaṃ aggiṃ ārabbha puratthimaṃ disaṃ gatotiādi sabbaṃ na yujjati, evaṃ.
ཨནིཙྩཏཱཏི ཨནིཙྩཏཱཡ། སཱརེ པཏིཊྛིཏནྟི ལོཀུཏྟརདྷམྨསཱརེ པཏིཊྛིཏཾ། སེསཾ སབྦཏྠ ཨུཏྟཱནམེཝཱཏི།
Aniccatāti aniccatāya. Sāre patiṭṭhitanti lokuttaradhammasāre patiṭṭhitaṃ. Sesaṃ sabbattha uttānamevāti.
པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ
Papañcasūdaniyā majjhimanikāyaṭṭhakathāya
ཨགྒིཝཙྪསུཏྟཝཎྞནཱ ནིཊྛིཏཱ།
Aggivacchasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༢. ཨགྒིཝཙྪསུཏྟཾ • 2. Aggivacchasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༢. ཨགྒིཝཙྪསུཏྟཝཎྞནཱ • 2. Aggivacchasuttavaṇṇanā
