| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
१०. आघातपटिविनयसुत्तं
10. Āghātapaṭivinayasuttaṃ
८०. ‘‘दसयिमे , भिक्खवे, आघातपटिविनया। कतमे दस? ‘अनत्थं मे अचरि, तं कुतेत्थ लब्भा’ति आघातं पटिविनेति , ‘अनत्थं मे चरति, तं कुतेत्थ लब्भा’ति आघातं पटिविनेति, ‘अनत्थं मे चरिस्सति, तं कुतेत्थ लब्भा’ति आघातं पटिविनेति, पियस्स मे मनापस्स अनत्थं अचरि…पे॰… चरति…पे॰… चरिस्सति, तं कुतेत्थ लब्भाति आघातं पटिविनेति , अप्पियस्स मे अमनापस्स अत्थं अचरि…पे॰… अत्थं चरति…पे॰… अत्थं चरिस्सति, तं कुतेत्थ लब्भाति आघातं पटिविनेति, अट्ठाने च न कुप्पति – इमे खो, भिक्खवे, दस आघातपटिविनया’’ति। दसमं।
80. ‘‘Dasayime , bhikkhave, āghātapaṭivinayā. Katame dasa? ‘Anatthaṃ me acari, taṃ kutettha labbhā’ti āghātaṃ paṭivineti , ‘anatthaṃ me carati, taṃ kutettha labbhā’ti āghātaṃ paṭivineti, ‘anatthaṃ me carissati, taṃ kutettha labbhā’ti āghātaṃ paṭivineti, piyassa me manāpassa anatthaṃ acari…pe… carati…pe… carissati, taṃ kutettha labbhāti āghātaṃ paṭivineti , appiyassa me amanāpassa atthaṃ acari…pe… atthaṃ carati…pe… atthaṃ carissati, taṃ kutettha labbhāti āghātaṃ paṭivineti, aṭṭhāne ca na kuppati – ime kho, bhikkhave, dasa āghātapaṭivinayā’’ti. Dasamaṃ.
आकङ्खवग्गो ततियो।
Ākaṅkhavaggo tatiyo.
तस्सुद्दानं –
Tassuddānaṃ –
आकङ्खो कण्टको इट्ठा, वड्ढि च मिगसालाय।
Ākaṅkho kaṇṭako iṭṭhā, vaḍḍhi ca migasālāya;
तयो धम्मा च काको च, निगण्ठा द्वे च आघाताति॥
Tayo dhammā ca kāko ca, nigaṇṭhā dve ca āghātāti.
Related texts:
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ५-१०. मिगसालासुत्तादिवण्णना • 5-10. Migasālāsuttādivaṇṇanā
