| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. ஆஹாரவக்³கோ³
2. Āhāravaggo
1. ஆஹாரஸுத்தவண்ணனா
1. Āhārasuttavaṇṇanā
11. ஆஹாரவக்³க³ஸ்ஸ பட²மே ஆஹாராதி பச்சயா. பச்சயா ஹி ஆஹரந்தி அத்தனோ ப²லங், தஸ்மா ஆஹாராதி வுச்சந்தி. பூ⁴தானங் வா ஸத்தானந்திஆதீ³ஸு பூ⁴தாதி ஜாதா நிப்³ப³த்தா. ஸம்ப⁴வேஸினோதி யே ஸம்ப⁴வங் ஜாதிங் நிப்³ப³த்திங் ஏஸந்தி க³வேஸந்தி. தத்த² சதூஸு யோனீஸு அண்ட³ஜஜலாபு³ஜா ஸத்தா யாவ அண்ட³கோஸங் வத்தி²கோஸஞ்ச ந பி⁴ந்த³ந்தி, தாவ ஸம்ப⁴வேஸினோ நாம, அண்ட³கோஸங் வத்தி²கோஸஞ்ச பி⁴ந்தி³த்வா ப³ஹி நிக்க²ந்தா பூ⁴தா நாம. ஸங்ஸேத³ஜா ஓபபாதிகா ச பட²மசித்தக்க²ணே ஸம்ப⁴வேஸினோ நாம, து³தியசித்தக்க²ணதோ பபு⁴தி பூ⁴தா நாம. யேன வா இரியாபதே²ன ஜாயந்தி, யாவ ததோ அஞ்ஞங் ந பாபுணந்தி, தாவ ஸம்ப⁴வேஸினோ நாம, ததோ பரங் பூ⁴தா நாம. அத² வா பூ⁴தாதி ஜாதா அபி⁴னிப்³ப³த்தா, யே பூ⁴தா அபி⁴னிப்³ப³த்தாயேவ, ந புன ப⁴விஸ்ஸந்தீதி ஸங்க²ங் க³ச்ச²ந்தி, தேஸங் கீ²ணாஸவானங் ஏதங் அதி⁴வசனங். ஸம்ப⁴வமேஸந்தீதி ஸம்ப⁴வேஸினோ. அப்பஹீனப⁴வஸங்யோஜனத்தா ஆயதிம்பி ஸம்ப⁴வங் ஏஸந்தானங் ஸெக்க²புது²ஜ்ஜனானமேதங் அதி⁴வசனங். ஏவங் ஸப்³ப³தா²பி இமேஹி த்³வீஹி பதே³ஹி ஸப்³ப³ஸத்தே பரியாதி³யதி. வாஸத்³தோ³ செத்த² ஸம்பிண்ட³னத்தோ², தஸ்மா பூ⁴தானஞ்ச ஸம்ப⁴வேஸீனஞ்சாதி அயமத்தோ² வேதி³தப்³போ³.
11. Āhāravaggassa paṭhame āhārāti paccayā. Paccayā hi āharanti attano phalaṃ, tasmā āhārāti vuccanti. Bhūtānaṃ vā sattānantiādīsu bhūtāti jātā nibbattā. Sambhavesinoti ye sambhavaṃ jātiṃ nibbattiṃ esanti gavesanti. Tattha catūsu yonīsu aṇḍajajalābujā sattā yāva aṇḍakosaṃ vatthikosañca na bhindanti, tāva sambhavesino nāma, aṇḍakosaṃ vatthikosañca bhinditvā bahi nikkhantā bhūtā nāma. Saṃsedajā opapātikā ca paṭhamacittakkhaṇe sambhavesino nāma, dutiyacittakkhaṇato pabhuti bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesino nāma, tato paraṃ bhūtā nāma. Atha vā bhūtāti jātā abhinibbattā, ye bhūtā abhinibbattāyeva, na puna bhavissantīti saṅkhaṃ gacchanti, tesaṃ khīṇāsavānaṃ etaṃ adhivacanaṃ. Sambhavamesantīti sambhavesino. Appahīnabhavasaṃyojanattā āyatimpi sambhavaṃ esantānaṃ sekkhaputhujjanānametaṃ adhivacanaṃ. Evaṃ sabbathāpi imehi dvīhi padehi sabbasatte pariyādiyati. Vāsaddo cettha sampiṇḍanattho, tasmā bhūtānañca sambhavesīnañcāti ayamattho veditabbo.
டி²தியாதி டி²தத்த²ங். அனுக்³க³ஹாயாதி அனுக்³க³ஹத்த²ங். வசனபே⁴தோ³யேவ சேஸ, அத்தோ² பன த்³வின்னம்பி பதா³னங் ஏகோயேவ. அத² வா டி²தியாதி தஸ்ஸ தஸ்ஸ ஸத்தஸ்ஸ உப்பன்னத⁴ம்மானங் அனுப்பப³ந்த⁴வஸேன அவிச்சே²தா³ய. அனுக்³க³ஹாயாதி அனுப்பன்னானங் உப்பாதா³ய. உபோ⁴பி சேதானி ‘‘பூ⁴தானங் வா டி²தியா சேவ அனுக்³க³ஹாய ச, ஸம்ப⁴வேஸீனங் வா டி²தியா சேவ அனுக்³க³ஹாய சா’’தி ஏவங் உப⁴யத்த² த³ட்ட²ப்³பா³னீதி.
Ṭhitiyāti ṭhitatthaṃ. Anuggahāyāti anuggahatthaṃ. Vacanabhedoyeva cesa, attho pana dvinnampi padānaṃ ekoyeva. Atha vā ṭhitiyāti tassa tassa sattassa uppannadhammānaṃ anuppabandhavasena avicchedāya. Anuggahāyāti anuppannānaṃ uppādāya. Ubhopi cetāni ‘‘bhūtānaṃ vā ṭhitiyā ceva anuggahāya ca, sambhavesīnaṃ vā ṭhitiyā ceva anuggahāya cā’’ti evaṃ ubhayattha daṭṭhabbānīti.
கப³ளீகாரோ ஆஹாரோதி கப³ளங் கத்வா அஜ்ஜோ²ஹரிதப்³ப³கோ ஆஹாரோ, ஓத³னகும்மாஸாதி³வத்து²காய ஓஜாயேதங் அதி⁴வசனங். ஓளாரிகோ வா ஸுகு²மோ வாதி வத்து²ஓளாரிகதாய ஓளாரிகோ, ஸுகு²மதாய ஸுகு²மோ. ஸபா⁴வேன பன ஸுகு²மரூபபரியாபன்னத்தா கப³ளீகாரோ ஆஹாரோ ஸுகு²மோவ ஹோதி. ஸாபி சஸ்ஸ வத்து²தோ ஓளாரிகதா ஸுகு²மதா ச உபாதா³யுபாதா³ய வேதி³தப்³பா³. கும்பீ⁴லானஞ்ஹி ஆஹாரங் உபாதா³ய மோரானங் ஆஹாரோ ஸுகு²மோ. கும்பீ⁴லா கிர பாஸாணே கி³லந்தி, தே ச நேஸங் குச்சி²ப்பத்தா விலீயந்தி. மோரா ஸப்பவிச்சி²காதி³பாணே கா²த³ந்தி. மோரானங் பன ஆஹாரங் உபாதா³ய தரச்சா²னங் ஆஹாரோ ஸுகு²மோ. தே கிர திவஸ்ஸச²ட்³டி³தானி விஸாணானி சேவ அட்டீ²னி ச கா²த³ந்தி, தானி ச நேஸங் கே²ளேன தேமிதமத்தானேவ கந்த³மூலங் விய முது³கானி ஹொந்தி. தரச்சா²னங் ஆஹாரங் உபாதா³ய ஹத்தீ²னங் ஆஹாரோ ஸுகு²மோ. தே ஹி நானாருக்க²ஸாகா²த³யோ கா²த³ந்தி. ஹத்தீ²னங் ஆஹாரதோ க³வயகோ³கண்ணமிகா³தீ³னங் ஆஹாரோ ஸுகு²மோ. தே கிர நிஸ்ஸாரானி நானாருக்க²பண்ணாதீ³னி கா²த³ந்தி. தேஸம்பி ஆஹாரதோ கு³ன்னங் ஆஹாரோ ஸுகு²மோ. தே அல்லஸுக்க²திணானி கா²த³ந்தி. தேஸங் ஆஹாரதோ ஸஸானங் ஆஹாரோ ஸுகு²மோ. ஸஸானங் ஆஹாரதோ ஸகுணானங் ஆஹாரோ ஸுகு²மோ. ஸகுணானங் ஆஹாரதோ பச்சந்தவாஸீனங் ஆஹாரோ ஸுகு²மோ. பச்சந்தவாஸீனங் ஆஹாரதோ கா³மபோ⁴ஜகானங் ஆஹாரோ ஸுகு²மோ. கா³மபோ⁴ஜகானங் ஆஹாரதோ ராஜராஜமஹாமத்தானங் ஆஹாரோ ஸுகு²மோ. தேஸம்பி ஆஹாரதோ சக்கவத்தினோ ஆஹாரோ ஸுகு²மோ. சக்கவத்தினோ ஆஹாரதோ பு⁴ம்மானங் தே³வானங் ஆஹாரோ ஸுகு²மோ. பு⁴ம்மானங் தே³வானங் ஆஹாரதோ சாதுமஹாராஜிகானங். ஏவங் யாவ பரனிம்மிதவஸவத்தீனங் ஆஹாரா வித்தா²ரேதப்³பா³. தேஸங் பனாஹாரோ ஸுகு²மொத்வேவ நிட்ட²ங் பத்தோ.
Kabaḷīkāro āhāroti kabaḷaṃ katvā ajjhoharitabbako āhāro, odanakummāsādivatthukāya ojāyetaṃ adhivacanaṃ. Oḷāriko vā sukhumo vāti vatthuoḷārikatāya oḷāriko, sukhumatāya sukhumo. Sabhāvena pana sukhumarūpapariyāpannattā kabaḷīkāro āhāro sukhumova hoti. Sāpi cassa vatthuto oḷārikatā sukhumatā ca upādāyupādāya veditabbā. Kumbhīlānañhi āhāraṃ upādāya morānaṃ āhāro sukhumo. Kumbhīlā kira pāsāṇe gilanti, te ca nesaṃ kucchippattā vilīyanti. Morā sappavicchikādipāṇe khādanti. Morānaṃ pana āhāraṃ upādāya taracchānaṃ āhāro sukhumo. Te kira tivassachaḍḍitāni visāṇāni ceva aṭṭhīni ca khādanti, tāni ca nesaṃ kheḷena temitamattāneva kandamūlaṃ viya mudukāni honti. Taracchānaṃ āhāraṃ upādāya hatthīnaṃ āhāro sukhumo. Te hi nānārukkhasākhādayo khādanti. Hatthīnaṃ āhārato gavayagokaṇṇamigādīnaṃ āhāro sukhumo. Te kira nissārāni nānārukkhapaṇṇādīni khādanti. Tesampi āhārato gunnaṃ āhāro sukhumo. Te allasukkhatiṇāni khādanti. Tesaṃ āhārato sasānaṃ āhāro sukhumo. Sasānaṃ āhārato sakuṇānaṃ āhāro sukhumo. Sakuṇānaṃ āhārato paccantavāsīnaṃ āhāro sukhumo. Paccantavāsīnaṃ āhārato gāmabhojakānaṃ āhāro sukhumo. Gāmabhojakānaṃ āhārato rājarājamahāmattānaṃ āhāro sukhumo. Tesampi āhārato cakkavattino āhāro sukhumo. Cakkavattino āhārato bhummānaṃ devānaṃ āhāro sukhumo. Bhummānaṃ devānaṃ āhārato cātumahārājikānaṃ. Evaṃ yāva paranimmitavasavattīnaṃ āhārā vitthāretabbā. Tesaṃ panāhāro sukhumotveva niṭṭhaṃ patto.
எத்த² ச ஓளாரிகே வத்து²ஸ்மிங் ஓஜா பரித்தா ஹோதி து³ப்³ப³லா, ஸுகு²மே ப³லவதீ. ததா² ஹி ஏகபத்தபூரம்பி யாகு³ங் பீதோ முஹுத்தேனேவ ஜிக⁴ச்சி²தோ ஹோதி யங்கிஞ்சிதே³வ கா²தி³துகாமோ, ஸப்பிங் பன பஸதமத்தங் பிவித்வா தி³வஸங் அபொ⁴த்துகாமோ ஹோதி. தத்த² வத்து² கம்மஜதேஜஸங்கா²தங் பரிஸ்ஸயங் வினோதே³தி, ந பன ஸக்கோதி பாலேதுங். ஓஜா பன பாலேதி, ந ஸக்கோதி பரிஸ்ஸயங் வினோதே³துங். த்³வே பன ஏகதோ ஹுத்வா பரிஸ்ஸயஞ்சேவ வினோதெ³ந்தி பாலெந்தி சாதி.
Ettha ca oḷārike vatthusmiṃ ojā parittā hoti dubbalā, sukhume balavatī. Tathā hi ekapattapūrampi yāguṃ pīto muhutteneva jighacchito hoti yaṃkiñcideva khāditukāmo, sappiṃ pana pasatamattaṃ pivitvā divasaṃ abhottukāmo hoti. Tattha vatthu kammajatejasaṅkhātaṃ parissayaṃ vinodeti, na pana sakkoti pāletuṃ. Ojā pana pāleti, na sakkoti parissayaṃ vinodetuṃ. Dve pana ekato hutvā parissayañceva vinodenti pālenti cāti.
ப²ஸ்ஸோ து³தியோதி சக்கு²ஸம்ப²ஸ்ஸாதி³ ச²ப்³பி³தோ⁴பி ப²ஸ்ஸோ ஏதேஸு சதூஸு ஆஹாரேஸு து³தியோ ஆஹாரோதி வேதி³தப்³போ³. தே³ஸனானயோ ஏவ சேஸ, தஸ்மா இமினா நாம காரணேன து³தியோ ததியோ சாதி இத³மெத்த² ந க³வேஸிதப்³ப³ங். மனோஸஞ்சேதனாதி சேதனாவ வுச்சதி. விஞ்ஞாணந்தி சித்தங். இதி ப⁴க³வா இமஸ்மிங் டா²னே உபாதி³ண்ணகஅனுபாதி³ண்ணகவஸேன ஏகராஸிங் கத்வா சத்தாரோ ஆஹாரே த³ஸ்ஸேஸி. கப³ளீகாராஹாரோ ஹி உபாதி³ண்ணகோபி அத்தி² அனுபாதி³ண்ணகோபி, ததா² ப²ஸ்ஸாத³யோ. தத்த² ஸப்பாதீ³ஹி கி³லிதானங் மண்டூ³காதீ³னங் வஸேன உபாதி³ண்ணககப³ளீகாராஹாரோ த³ட்ட²ப்³போ³. மண்டூ³காத³யோ ஹி ஸப்பாதீ³ஹி கி³லிதா அந்தோகுச்சி²க³தாபி கிஞ்சி காலங் ஜீவந்தியேவ. தே யாவ உபாதி³ண்ணகபக்கே² திட்ட²ந்தி, தாவ ஆஹாரத்த²ங் ந ஸாதெ⁴ந்தி . பி⁴ஜ்ஜித்வா பன அனுபாதி³ண்ணகபக்கே² டி²தா ஸாதெ⁴ந்தி. ததா³பி உபாதி³ண்ணகாஹாரோதி வுச்சந்தீதி. இத³ங் பன ஆசரியானங் ந ருச்சதீதி அட்ட²கதா²யமேவ படிக்கி²பித்வா இத³ங் வுத்தங் – இமேஸங் ஸத்தானங் கா²த³ந்தானம்பி அகா²த³ந்தானம்பி பு⁴ஞ்ஜந்தானம்பி அபு⁴ஞ்ஜந்தானம்பி படிஸந்தி⁴சித்தேனேவ ஸஹஜாதா கம்மஜா ஓஜா நாம அத்தி², ஸா யாவபி ஸத்தமா தி³வஸா பாலேதி, அயமேவ உபாதி³ண்ணககப³ளீகாராஹாரோதி வேதி³தப்³போ³. தேபூ⁴மகவிபாகவஸேன பன உபாதி³ண்ணகப²ஸ்ஸாத³யோ வேதி³தப்³பா³, தேபூ⁴மககுஸலாகுஸலகிரியவஸேன அனுபாதி³ண்ணகா. லோகுத்தரா பன ருள்ஹீவஸேன கதி²தாதி.
Phasso dutiyoti cakkhusamphassādi chabbidhopi phasso etesu catūsu āhāresu dutiyo āhāroti veditabbo. Desanānayo eva cesa, tasmā iminā nāma kāraṇena dutiyo tatiyo cāti idamettha na gavesitabbaṃ. Manosañcetanāti cetanāva vuccati. Viññāṇanti cittaṃ. Iti bhagavā imasmiṃ ṭhāne upādiṇṇakaanupādiṇṇakavasena ekarāsiṃ katvā cattāro āhāre dassesi. Kabaḷīkārāhāro hi upādiṇṇakopi atthi anupādiṇṇakopi, tathā phassādayo. Tattha sappādīhi gilitānaṃ maṇḍūkādīnaṃ vasena upādiṇṇakakabaḷīkārāhāro daṭṭhabbo. Maṇḍūkādayo hi sappādīhi gilitā antokucchigatāpi kiñci kālaṃ jīvantiyeva. Te yāva upādiṇṇakapakkhe tiṭṭhanti, tāva āhāratthaṃ na sādhenti . Bhijjitvā pana anupādiṇṇakapakkhe ṭhitā sādhenti. Tadāpi upādiṇṇakāhāroti vuccantīti. Idaṃ pana ācariyānaṃ na ruccatīti aṭṭhakathāyameva paṭikkhipitvā idaṃ vuttaṃ – imesaṃ sattānaṃ khādantānampi akhādantānampi bhuñjantānampi abhuñjantānampi paṭisandhicitteneva sahajātā kammajā ojā nāma atthi, sā yāvapi sattamā divasā pāleti, ayameva upādiṇṇakakabaḷīkārāhāroti veditabbo. Tebhūmakavipākavasena pana upādiṇṇakaphassādayo veditabbā, tebhūmakakusalākusalakiriyavasena anupādiṇṇakā. Lokuttarā pana ruḷhīvasena kathitāti.
எத்தா²ஹ – ‘‘யதி³ பச்சயட்டோ² ஆஹாரட்டோ², அத² கஸ்மா அஞ்ஞேஸுபி ஸத்தானங் பச்சயேஸு விஜ்ஜமானேஸு இமேயேவ சத்தாரோ வுத்தா’’தி? வுச்சதே – அஜ்ஜ²த்திகஸந்ததியா விஸேஸபச்சயத்தா. விஸேஸபச்சயோ ஹி கப³ளீகாராஹாரப⁴க்கா²னங் ஸத்தானங் ரூபகாயஸ்ஸ கப³ளீகாரோ ஆஹாரோ, நாமகாயே வேத³னாய ப²ஸ்ஸோ, விஞ்ஞாணஸ்ஸ மனோஸஞ்சேதனா, நாமரூபஸ்ஸ விஞ்ஞாணங். யதா²ஹ – ‘‘ஸெய்யதா²பி, பி⁴க்க²வே, அயங் காயோ ஆஹாரட்டி²திகோ ஆஹாரங் படிச்ச திட்ட²தி, அனாஹாரோ நோ திட்ட²தி (ஸங்॰ நி॰ 5.183), ததா² ப²ஸ்ஸபச்சயா வேத³னா, ஸங்கா²ரபச்சயா விஞ்ஞாணங், விஞ்ஞாணபச்சயா நாமரூப’’ந்தி (ஸங்॰ நி॰ 2.1; விப⁴॰ 225).
Etthāha – ‘‘yadi paccayaṭṭho āhāraṭṭho, atha kasmā aññesupi sattānaṃ paccayesu vijjamānesu imeyeva cattāro vuttā’’ti? Vuccate – ajjhattikasantatiyā visesapaccayattā. Visesapaccayo hi kabaḷīkārāhārabhakkhānaṃ sattānaṃ rūpakāyassa kabaḷīkāro āhāro, nāmakāye vedanāya phasso, viññāṇassa manosañcetanā, nāmarūpassa viññāṇaṃ. Yathāha – ‘‘seyyathāpi, bhikkhave, ayaṃ kāyo āhāraṭṭhitiko āhāraṃ paṭicca tiṭṭhati, anāhāro no tiṭṭhati (saṃ. ni. 5.183), tathā phassapaccayā vedanā, saṅkhārapaccayā viññāṇaṃ, viññāṇapaccayā nāmarūpa’’nti (saṃ. ni. 2.1; vibha. 225).
கோ பனெத்த² ஆஹாரோ கிங் ஆஹரதீதி? கப³ளீகாராஹாரோ ஓஜட்ட²மகரூபானி ஆஹரதி ப²ஸ்ஸாஹாரோ திஸ்ஸோ வேத³னா, மனோஸஞ்சேதனாஹாரோ தயோ ப⁴வே, விஞ்ஞாணாஹாரோ படிஸந்தி⁴னாமரூபந்தி.
Ko panettha āhāro kiṃ āharatīti? Kabaḷīkārāhāro ojaṭṭhamakarūpāni āharati phassāhāro tisso vedanā, manosañcetanāhāro tayo bhave, viññāṇāhāro paṭisandhināmarūpanti.
கத²ங்? கப³ளீகாராஹாரோ தாவ முகே² ட²பிதமத்தேயேவ அட்ட² ரூபானி ஸமுட்டா²பேதி, த³ந்தவிசுண்ணிதங் பன அஜ்ஜோ²ஹரியமானங் ஏகேகங் ஸித்த²ங் அட்ட²ட்ட²ரூபானி ஸமுட்டா²பேதியேவ. ஏவங் கப³ளீகாராஹாரோ ஓஜட்ட²மகரூபானி ஆஹரதி. ப²ஸ்ஸாஹாரோ பன ஸுக²வேத³னீயோ ப²ஸ்ஸோ உப்பஜ்ஜமானோயேவ ஸுக²ங் வேத³னங் ஆஹரதி, து³க்க²வேத³னீயோ து³க்க²ங், அது³க்க²மஸுக²வேத³னீயோ அது³க்க²மஸுக²ந்தி ஏவங் ஸப்³ப³தா²பி ப²ஸ்ஸாஹாரோ திஸ்ஸோ வேத³னா ஆஹரதி.
Kathaṃ? Kabaḷīkārāhāro tāva mukhe ṭhapitamatteyeva aṭṭha rūpāni samuṭṭhāpeti, dantavicuṇṇitaṃ pana ajjhohariyamānaṃ ekekaṃ sitthaṃ aṭṭhaṭṭharūpāni samuṭṭhāpetiyeva. Evaṃ kabaḷīkārāhāro ojaṭṭhamakarūpāni āharati. Phassāhāro pana sukhavedanīyo phasso uppajjamānoyeva sukhaṃ vedanaṃ āharati, dukkhavedanīyo dukkhaṃ, adukkhamasukhavedanīyo adukkhamasukhanti evaṃ sabbathāpi phassāhāro tisso vedanā āharati.
மனோஸஞ்சேதனாஹாரோ காமப⁴வூபக³ங் கம்மங் காமப⁴வங் ஆஹரதி, ரூபாரூபப⁴வூபகா³னி தங் தங் ப⁴வங். ஏவங் ஸப்³ப³தா²பி மனோஸஞ்சேதனாஹாரோ தயோ ப⁴வே ஆஹரதி. விஞ்ஞாணாஹாரோ பன யே ச படிஸந்தி⁴க்க²ணே தங்ஸம்பயுத்தகா தயோ க²ந்தா⁴, யானி ச திஸந்ததிவஸேன திங்ஸ ரூபானி உப்பஜ்ஜந்தி, ஸஹஜாதாதி³பச்சயனயேன தானி ஆஹரதீதி வுச்சதி. ஏவங் விஞ்ஞாணாஹாரோ படிஸந்தி⁴னாமரூபங் ஆஹரதீதி. எத்த² ச ‘‘மனோஸஞ்சேதனா தயோ ப⁴வே ஆஹரதீ’’தி ஸாஸவகுஸலாகுஸலசேதனாவ வுத்தா. ‘‘விஞ்ஞாணங் படிஸந்தி⁴னாமரூபங் ஆஹரதீ’’தி படிஸந்தி⁴விஞ்ஞாணமேவ வுத்தங். அவிஸேஸேன பன தங்ஸம்பயுத்ததங்ஸமுட்டா²னத⁴ம்மானங் ஆஹரணதோபேதே ‘‘ஆஹாரா’’தி வேதி³தப்³பா³.
Manosañcetanāhāro kāmabhavūpagaṃ kammaṃ kāmabhavaṃ āharati, rūpārūpabhavūpagāni taṃ taṃ bhavaṃ. Evaṃ sabbathāpi manosañcetanāhāro tayo bhave āharati. Viññāṇāhāro pana ye ca paṭisandhikkhaṇe taṃsampayuttakā tayo khandhā, yāni ca tisantativasena tiṃsa rūpāni uppajjanti, sahajātādipaccayanayena tāni āharatīti vuccati. Evaṃ viññāṇāhāro paṭisandhināmarūpaṃ āharatīti. Ettha ca ‘‘manosañcetanā tayo bhave āharatī’’ti sāsavakusalākusalacetanāva vuttā. ‘‘Viññāṇaṃ paṭisandhināmarūpaṃ āharatī’’ti paṭisandhiviññāṇameva vuttaṃ. Avisesena pana taṃsampayuttataṃsamuṭṭhānadhammānaṃ āharaṇatopete ‘‘āhārā’’ti veditabbā.
ஏதேஸு சதூஸு ஆஹாரேஸு கப³ளீகாராஹாரோ உபத்த²ம்பெ⁴ந்தோ ஆஹாரகிச்சங் ஸாதே⁴தி, ப²ஸ்ஸோ பு²ஸந்தோயேவ மனோஸஞ்சேதனா ஆயூஹமானாவ, விஞ்ஞாணங் விஜானந்தமேவ. கத²ங்? கப³ளீகாராஹாரோ ஹி உபத்த²ம்பெ⁴ந்தோயேவ காயட்ட²பனேன ஸத்தானங் டி²தியா ஹோதி. கம்மஜனிதோபி ஹி அயங் காயோ கப³ளீகாராஹாரேன உபத்த²த்³தோ⁴ த³ஸபி வஸ்ஸானி வஸ்ஸஸதம்பி யாவ ஆயுபரிமாணா திட்ட²தி. யதா² கிங் ? யதா² மாதுயா ஜனிதோபி தா³ரகோ தா⁴தியா த²ஞ்ஞாதீ³னி பாயெத்வா போஸியமானோ சிரங் திட்ட²தி, யதா² ச உபத்த²ம்பே⁴ன உபத்த²ம்பி⁴தங் கே³ஹங். வுத்தம்பி சேதங் –
Etesu catūsu āhāresu kabaḷīkārāhāro upatthambhento āhārakiccaṃ sādheti, phasso phusantoyeva manosañcetanā āyūhamānāva, viññāṇaṃ vijānantameva. Kathaṃ? Kabaḷīkārāhāro hi upatthambhentoyeva kāyaṭṭhapanena sattānaṃ ṭhitiyā hoti. Kammajanitopi hi ayaṃ kāyo kabaḷīkārāhārena upatthaddho dasapi vassāni vassasatampi yāva āyuparimāṇā tiṭṭhati. Yathā kiṃ ? Yathā mātuyā janitopi dārako dhātiyā thaññādīni pāyetvā posiyamāno ciraṃ tiṭṭhati, yathā ca upatthambhena upatthambhitaṃ gehaṃ. Vuttampi cetaṃ –
‘‘யதா², மஹாராஜ, கே³ஹே பபதந்தே அஞ்ஞேன தா³ருனா உபத்த²ம்பி⁴தங் ஸந்தங் ஏவ தங் கே³ஹங் ந பததி. ஏவமேவ கோ², மஹாராஜ, அயங் காயோ ஆஹாரட்டி²திகோ ஆஹாரங் படிச்ச திட்ட²தீ’’தி.
‘‘Yathā, mahārāja, gehe papatante aññena dārunā upatthambhitaṃ santaṃ eva taṃ gehaṃ na patati. Evameva kho, mahārāja, ayaṃ kāyo āhāraṭṭhitiko āhāraṃ paṭicca tiṭṭhatī’’ti.
ஏவங் கப³ளீகாரோ ஆஹாரோ உபத்த²ம்பெ⁴ந்தோ ஆஹாரகிச்சங் ஸாதே⁴தி.
Evaṃ kabaḷīkāro āhāro upatthambhento āhārakiccaṃ sādheti.
ஏவங் ஸாதெ⁴ந்தோபி ச கப³ளீகாரோ ஆஹாரோ த்³வின்னங் ரூபஸந்ததீனங் பச்சயோ ஹோதி ஆஹாரஸமுட்டா²னஸ்ஸ ச உபாதி³ண்ணகஸ்ஸ ச. கம்மஜானங் அனுபாலகோ ஹுத்வா பச்சயோ ஹோதி, ஆஹாரஸமுட்டா²னானங் ஜனகோ ஹுத்வாதி. ப²ஸ்ஸோ பன ஸுகா²தி³வத்து²பூ⁴தங் ஆரம்மணங் பு²ஸந்தோயேவ ஸுகா²தி³வேத³னாபவத்தனேன ஸத்தானங் டி²தியா ஹோதி. மனோஸஞ்சேதனா குஸலாகுஸலகம்மவஸேன ஆயூஹமானாயேவ ப⁴வமூலனிப்பா²த³னதோ ஸத்தானங் டி²தியா ஹோதி. விஞ்ஞாணங் விஜானந்தமேவ நாமரூபப்பவத்தனேன ஸத்தானங் டி²தியா ஹோதீதி.
Evaṃ sādhentopi ca kabaḷīkāro āhāro dvinnaṃ rūpasantatīnaṃ paccayo hoti āhārasamuṭṭhānassa ca upādiṇṇakassa ca. Kammajānaṃ anupālako hutvā paccayo hoti, āhārasamuṭṭhānānaṃ janako hutvāti. Phasso pana sukhādivatthubhūtaṃ ārammaṇaṃ phusantoyeva sukhādivedanāpavattanena sattānaṃ ṭhitiyā hoti. Manosañcetanā kusalākusalakammavasena āyūhamānāyeva bhavamūlanipphādanato sattānaṃ ṭhitiyā hoti. Viññāṇaṃ vijānantameva nāmarūpappavattanena sattānaṃ ṭhitiyā hotīti.
ஏவங் உபத்த²ம்ப⁴னாதி³வஸேன ஆஹாரகிச்சங் ஸாத⁴யமானேஸு பனேதேஸு சத்தாரி ப⁴யானி த³ட்ட²ப்³பா³னி. ஸெய்யதி²த³ங் – கப³ளீகாராஹாரே நிகந்தியேவ ப⁴யங், ப²ஸ்ஸே உபக³மனமேவ, மனோஸஞ்சேதனாய ஆயூஹனமேவ, விஞ்ஞாணே அபி⁴னிபாதோயேவ ப⁴யந்தி. கிங் காரணா? கப³ளீகாராஹாரே ஹி நிகந்திங் கத்வா ஸீதாதீ³னங் புரக்க²தா ஸத்தா ஆஹாரத்தா²ய முத்³தா³க³ணனாதி³கம்மானி கரொந்தா அனப்பகங் து³க்க²ங் நிக³ச்ச²ந்தி. ஏகச்சே ச இமஸ்மிங் ஸாஸனே பப்³ப³ஜித்வாபி வேஜ்ஜகம்மாதி³காய அனேஸனாய ஆஹாரங் பரியேஸந்தா தி³ட்டே²வ த⁴ம்மே கா³ரய்ஹா ஹொந்தி, ஸம்பராயேபி, ‘‘தஸ்ஸ ஸங்கா⁴டிபி ஆதி³த்தா ஸம்பஜ்ஜலிதா’’திஆதி³னா லக்க²ணஸங்யுத்தே (ஸங்॰ நி॰ 2.218) வுத்தனயேன ஸமணபேதா ஹொந்தி. இமினா தாவ காரணேன கப³ளீகாரே ஆஹாரே நிகந்தி ஏவ ப⁴யந்தி வேதி³தப்³பா³.
Evaṃ upatthambhanādivasena āhārakiccaṃ sādhayamānesu panetesu cattāri bhayāni daṭṭhabbāni. Seyyathidaṃ – kabaḷīkārāhāre nikantiyeva bhayaṃ, phasse upagamanameva, manosañcetanāya āyūhanameva, viññāṇe abhinipātoyeva bhayanti. Kiṃ kāraṇā? Kabaḷīkārāhāre hi nikantiṃ katvā sītādīnaṃ purakkhatā sattā āhāratthāya muddāgaṇanādikammāni karontā anappakaṃ dukkhaṃ nigacchanti. Ekacce ca imasmiṃ sāsane pabbajitvāpi vejjakammādikāya anesanāya āhāraṃ pariyesantā diṭṭheva dhamme gārayhā honti, samparāyepi, ‘‘tassa saṅghāṭipi ādittā sampajjalitā’’tiādinā lakkhaṇasaṃyutte (saṃ. ni. 2.218) vuttanayena samaṇapetā honti. Iminā tāva kāraṇena kabaḷīkāre āhāre nikanti eva bhayanti veditabbā.
ப²ஸ்ஸங் உபக³ச்ச²ந்தாபி ப²ஸ்ஸஸ்ஸாதி³னோ பரேஸங் ரக்கி²தகோ³பிதேஸு தா³ராதீ³ஸு ப⁴ண்டே³ஸு அபரஜ்ஜ²ந்தி, தே ஸஹ ப⁴ண்டே³ன ப⁴ண்ட³ஸாமிகா க³ஹெத்வா க²ண்டா³க²ண்டி³கங் வா சி²ந்தி³த்வா ஸங்காரகூடே ச²ட்³டெ³ந்தி , ரஞ்ஞோ வா நிய்யாதெ³ந்தி. ததோ தே ராஜா விவிதா⁴ கம்மகாரணா காராபேதி. காயஸ்ஸ ச பே⁴தா³ து³க்³க³தி தேஸங் பாடிகங்கா² ஹோதி. இதி ப²ஸ்ஸஸ்ஸாத³மூலகங் தி³ட்ட²த⁴ம்மிகம்பி ஸம்பராயிகம்பி ப⁴யங் ஸப்³ப³மாக³தமேவ ஹோதி. இமினா காரணேன ப²ஸ்ஸாஹாரே உபக³மனமேவ ப⁴யந்தி வேதி³தப்³ப³ங்.
Phassaṃ upagacchantāpi phassassādino paresaṃ rakkhitagopitesu dārādīsu bhaṇḍesu aparajjhanti, te saha bhaṇḍena bhaṇḍasāmikā gahetvā khaṇḍākhaṇḍikaṃ vā chinditvā saṅkārakūṭe chaḍḍenti , rañño vā niyyādenti. Tato te rājā vividhā kammakāraṇā kārāpeti. Kāyassa ca bhedā duggati tesaṃ pāṭikaṅkhā hoti. Iti phassassādamūlakaṃ diṭṭhadhammikampi samparāyikampi bhayaṃ sabbamāgatameva hoti. Iminā kāraṇena phassāhāre upagamanameva bhayanti veditabbaṃ.
குஸலாகுஸலகம்மாயூஹனே பன தம்மூலகங் தீஸு ப⁴வேஸு ப⁴யங் ஸப்³ப³ங் ஆக³தமேவ ஹோதி. இமினா காரணேன மனோஸஞ்சேதனாஹாரே ஆயூஹனமேவ ப⁴யந்தி வேதி³தப்³ப³ங்.
Kusalākusalakammāyūhane pana tammūlakaṃ tīsu bhavesu bhayaṃ sabbaṃ āgatameva hoti. Iminā kāraṇena manosañcetanāhāre āyūhanameva bhayanti veditabbaṃ.
படிஸந்தி⁴விஞ்ஞாணஞ்ச யஸ்மிங் யஸ்மிங் டா²னே அபி⁴னிபததி, தஸ்மிங் தஸ்மிங் டா²னே படிஸந்தி⁴னாமரூபங் க³ஹெத்வாவ நிப்³ப³த்ததி. தஸ்மிஞ்ச நிப்³ப³த்தே ஸப்³ப³ப⁴யானி நிப்³ப³த்தானியேவ ஹொந்தி தம்மூலகத்தாதி இமினா காரணேன விஞ்ஞாணாஹாரே அபி⁴னிபாதோயேவ ப⁴யந்தி வேதி³தப்³போ³தி.
Paṭisandhiviññāṇañca yasmiṃ yasmiṃ ṭhāne abhinipatati, tasmiṃ tasmiṃ ṭhāne paṭisandhināmarūpaṃ gahetvāva nibbattati. Tasmiñca nibbatte sabbabhayāni nibbattāniyeva honti tammūlakattāti iminā kāraṇena viññāṇāhāre abhinipātoyeva bhayanti veditabboti.
கிங்னிதா³னாதிஆதீ³ஸு நிதா³னாதீ³னி ஸப்³பா³னேவ காரணவேவசனானி. காரணஞ்ஹி யஸ்மா ப²லங் நிதே³தி, ‘‘ஹந்த³ நங் க³ண்ஹதா²’’தி அப்பேதி விய, தஸ்மா நிதா³னந்தி வுச்சதி. யஸ்மா தங் ததோ ஸமுதே³தி ஜாயதி பப⁴வதி, தஸ்மா ஸமுத³யோ ஜாதி பப⁴வோதி வுச்சதி. அயங் பனெத்த² பத³த்தோ² – கிங்னிதா³னங் ஏதேஸந்தி கிங்னிதா³னா. கோ ஸமுத³யோ ஏதேஸந்தி கிங்ஸமுத³யா. கா ஜாதி ஏதேஸந்தி கிங்ஜாதிகா. கோ பப⁴வோ ஏதேஸந்தி கிங்பப⁴வா. யஸ்மா பன தேஸங் தண்ஹா யதா²வுத்தேன அத்தே²ன நிதா³னஞ்சேவ ஸமுத³யோ ச ஜாதி ச பப⁴வோ ச, தஸ்மா ‘‘தண்ஹானிதா³னா’’திஆதி³மாஹ. ஏவங் ஸப்³ப³பதே³ஸு அத்தோ² வேதி³தப்³போ³.
Kiṃnidānātiādīsu nidānādīni sabbāneva kāraṇavevacanāni. Kāraṇañhi yasmā phalaṃ nideti, ‘‘handa naṃ gaṇhathā’’ti appeti viya, tasmā nidānanti vuccati. Yasmā taṃ tato samudeti jāyati pabhavati, tasmā samudayo jāti pabhavoti vuccati. Ayaṃ panettha padattho – kiṃnidānaṃ etesanti kiṃnidānā. Ko samudayo etesanti kiṃsamudayā. Kā jāti etesanti kiṃjātikā. Ko pabhavo etesanti kiṃpabhavā. Yasmā pana tesaṃ taṇhā yathāvuttena atthena nidānañceva samudayo ca jāti ca pabhavo ca, tasmā ‘‘taṇhānidānā’’tiādimāha. Evaṃ sabbapadesu attho veditabbo.
எத்த² ச இமே சத்தாரோ ஆஹாரா தண்ஹானிதா³னாதி படிஸந்தி⁴ங் ஆதி³ங் கத்வா அத்தபா⁴வஸங்கா²தானங் ஆஹாரானங் புரிமதண்ஹானங் வஸேன நிதா³னங் வேதி³தப்³ப³ங். கத²ங்? படிஸந்தி⁴க்க²ணே தாவ பரிபுண்ணாயதனானங் ஸத்தானங் ஸத்தஸந்ததிவஸேன, ஸேஸானங் ததோ ஊனஊனஸந்ததிவஸேன உப்பன்னரூபப்³ப⁴ந்தரங் ஜாதா ஓஜா அத்தி², அயங் தண்ஹானிதா³னோ உபாதி³ண்ணககப³ளீகாராஹாரோ. படிஸந்தி⁴சித்தஸம்பயுத்தா பன ப²ஸ்ஸசேதனா ஸயஞ்ச சித்தங் விஞ்ஞாணந்தி இமே தண்ஹானிதா³னா உபாதி³ண்ணக-ப²ஸ்ஸமனோஸஞ்சேதனா-விஞ்ஞாணாஹாராதி ஏவங் தாவ புரிமதண்ஹானிதா³னா படிஸந்தி⁴கா ஆஹாரா. யதா² ச படிஸந்தி⁴கா, ஏவங் ததோ பரங் பட²மப⁴வங்க³சித்தக்க²ணாதி³னிப்³ப³த்தாபி வேதி³தப்³பா³.
Ettha ca ime cattāro āhārā taṇhānidānāti paṭisandhiṃ ādiṃ katvā attabhāvasaṅkhātānaṃ āhārānaṃ purimataṇhānaṃ vasena nidānaṃ veditabbaṃ. Kathaṃ? Paṭisandhikkhaṇe tāva paripuṇṇāyatanānaṃ sattānaṃ sattasantativasena, sesānaṃ tato ūnaūnasantativasena uppannarūpabbhantaraṃ jātā ojā atthi, ayaṃ taṇhānidāno upādiṇṇakakabaḷīkārāhāro. Paṭisandhicittasampayuttā pana phassacetanā sayañca cittaṃ viññāṇanti ime taṇhānidānā upādiṇṇaka-phassamanosañcetanā-viññāṇāhārāti evaṃ tāva purimataṇhānidānā paṭisandhikā āhārā. Yathā ca paṭisandhikā, evaṃ tato paraṃ paṭhamabhavaṅgacittakkhaṇādinibbattāpi veditabbā.
யஸ்மா பன ப⁴க³வா ந கேவலங் ஆஹாரானமேவ நிதா³னங் ஜானாதி, ஆஹாரனிதா³னபூ⁴தாய தண்ஹாயபி, தண்ஹாய நிதா³னானங் வேத³னாதீ³னம்பி நிதா³னங் ஜானாதியேவ, தஸ்மா தண்ஹா சாயங், பி⁴க்க²வே, கிங்னிதா³னாதிஆதி³னா நயேன வட்டங் த³ஸ்ஸெத்வா விவட்டங் த³ஸ்ஸேஸி. இமஸ்மிஞ்ச பன டா²னே ப⁴க³வா அதீதாபி⁴முக²ங் தே³ஸனங் கத்வா அதீதேன வட்டங் த³ஸ்ஸேதி. கத²ங்? ஆஹாரவஸேன ஹி அயங் அத்தபா⁴வோ க³ஹிதோ.
Yasmā pana bhagavā na kevalaṃ āhārānameva nidānaṃ jānāti, āhāranidānabhūtāya taṇhāyapi, taṇhāya nidānānaṃ vedanādīnampi nidānaṃ jānātiyeva, tasmā taṇhā cāyaṃ, bhikkhave, kiṃnidānātiādinā nayena vaṭṭaṃ dassetvā vivaṭṭaṃ dassesi. Imasmiñca pana ṭhāne bhagavā atītābhimukhaṃ desanaṃ katvā atītena vaṭṭaṃ dasseti. Kathaṃ? Āhāravasena hi ayaṃ attabhāvo gahito.
தண்ஹாதி இமஸ்ஸத்தபா⁴வஸ்ஸ ஜனகங் கம்மங், வேத³னாப²ஸ்ஸஸளாயதனநாமரூபவிஞ்ஞாணானி யஸ்மிங் அத்தபா⁴வே ட²த்வா கம்மங் ஆயூஹிதங், தங் த³ஸ்ஸேதுங் வுத்தானி, அவிஜ்ஜாஸங்கா²ரா தஸ்ஸத்தபா⁴வஸ்ஸ ஜனகங் கம்மங். இதி த்³வீஸு டா²னேஸு அத்தபா⁴வோ, த்³வீஸு தஸ்ஸ ஜனகங் கம்மந்தி ஸங்கே²பேன கம்மஞ்சேவ கம்மவிபாகஞ்சாதி, த்³வேபி த⁴ம்மே த³ஸ்ஸெந்தேன அதீதாபி⁴முக²ங் தே³ஸனங் கத்வா அதீதேன வட்டங் த³ஸ்ஸிதங்.
Taṇhāti imassattabhāvassa janakaṃ kammaṃ, vedanāphassasaḷāyatananāmarūpaviññāṇāni yasmiṃ attabhāve ṭhatvā kammaṃ āyūhitaṃ, taṃ dassetuṃ vuttāni, avijjāsaṅkhārā tassattabhāvassa janakaṃ kammaṃ. Iti dvīsu ṭhānesu attabhāvo, dvīsu tassa janakaṃ kammanti saṅkhepena kammañceva kammavipākañcāti, dvepi dhamme dassentena atītābhimukhaṃ desanaṃ katvā atītena vaṭṭaṃ dassitaṃ.
தத்ராயங் தே³ஸனா அனாக³தஸ்ஸ அத³ஸ்ஸிதத்தா அபரிபுண்ணாதி ந த³ட்ட²ப்³பா³. நயதோ பன பரிபுண்ணாத்வேவ த³ட்ட²ப்³பா³. யதா² ஹி சக்கு²மா புரிஸோ உத³கபிட்டே² நிபன்னங் ஸுங்ஸுமாரங் தி³ஸ்வா தஸ்ஸ பரபா⁴க³ங் ஓலோகெந்தோ கீ³வங் பஸ்ஸெய்ய, ஓரதோ பிட்டி²ங், பரியோஸானே நங்கு³ட்ட²மூலங், ஹெட்டா² குச்சி²ங் ஓலோகெந்தோ பன உத³கக³தங் அக்³க³னங்கு³ட்ட²ஞ்சேவ சத்தாரோ ச ஹத்த²பாதே³ ந பஸ்ஸெய்ய, ஸோ ந எத்தாவதா ‘‘அபரிபுண்ணோ ஸுங்ஸுமாரோ’’தி க³ண்ஹாதி, நயதோ பன பரிபுண்ணொத்வேவ க³ண்ஹாதி, ஏவங்ஸம்பத³மித³ங் வேதி³தப்³ப³ங்.
Tatrāyaṃ desanā anāgatassa adassitattā aparipuṇṇāti na daṭṭhabbā. Nayato pana paripuṇṇātveva daṭṭhabbā. Yathā hi cakkhumā puriso udakapiṭṭhe nipannaṃ suṃsumāraṃ disvā tassa parabhāgaṃ olokento gīvaṃ passeyya, orato piṭṭhiṃ, pariyosāne naṅguṭṭhamūlaṃ, heṭṭhā kucchiṃ olokento pana udakagataṃ agganaṅguṭṭhañceva cattāro ca hatthapāde na passeyya, so na ettāvatā ‘‘aparipuṇṇo suṃsumāro’’ti gaṇhāti, nayato pana paripuṇṇotveva gaṇhāti, evaṃsampadamidaṃ veditabbaṃ.
உத³கபிட்டே² நிபன்னஸுங்ஸுமாரோ விய ஹி தேபூ⁴மகவட்டங். தீரே டி²தோ சக்கு²மா புரிஸோ விய யோகா³வசரோ. தேன புரிஸேன உத³கபிட்டே² ஸுங்ஸுமாரஸ்ஸ தி³ட்ட²காலோ விய யோகி³னா ஆஹாரவஸேன இமஸ்ஸத்தபா⁴வஸ்ஸ தி³ட்ட²காலோ. பரதோ கீ³வாய தி³ட்ட²காலோ விய இமஸ்ஸத்தபா⁴வஸ்ஸ ஜனிகாய தண்ஹாய தி³ட்ட²காலோ. பிட்டி²யா தி³ட்ட²காலோ விய யஸ்மிங் அத்தபா⁴வே தண்ஹாஸங்கா²தங் கம்மங் கதங், வேத³னாதி³வஸேன தஸ்ஸ தி³ட்ட²காலோ. நங்கு³ட்ட²மூலஸ்ஸ தி³ட்ட²காலோ விய தஸ்ஸத்தபா⁴வஸ்ஸ ஜனகானங் அவிஜ்ஜாஸங்கா²ரானங் தி³ட்ட²காலோ. ஹெட்டா² குச்சி²ங் ஓலோகெந்தஸ்ஸ பன அக்³க³னங்கு³ட்ட²ஞ்சேவ சத்தாரோ ச ஹத்த²பாதே³ அதி³ஸ்வாபி ‘‘அபரிபுண்ணோ ஸுங்ஸுமாரோ’’தி அக³ஹெத்வா நயதோ பரிபுண்ணொத்வேவ க³ஹணங் விய யத்த² யத்த² பச்சயவட்டங் பாளியங் ந ஆக³தங், தத்த² தத்த² ‘‘தே³ஸனா அபரிபுண்ணா’’தி அக³ஹெத்வா நயதோ பரிபுண்ணாத்வேவ க³ஹணங் வேதி³தப்³ப³ங். தத்த² ச ஆஹாரதண்ஹானங் அந்தரே ஏகோ ஸந்தி⁴, தண்ஹாவேத³னானங் அந்தரே ஏகோ, விஞ்ஞாணஸங்கா²ரானங் அந்தரே ஏகோதி ஏவங் திஸந்தி⁴சதுஸங்கே²பமேவ வட்டங் த³ஸ்ஸிதந்தி. பட²மங்.
Udakapiṭṭhe nipannasuṃsumāro viya hi tebhūmakavaṭṭaṃ. Tīre ṭhito cakkhumā puriso viya yogāvacaro. Tena purisena udakapiṭṭhe suṃsumārassa diṭṭhakālo viya yoginā āhāravasena imassattabhāvassa diṭṭhakālo. Parato gīvāya diṭṭhakālo viya imassattabhāvassa janikāya taṇhāya diṭṭhakālo. Piṭṭhiyā diṭṭhakālo viya yasmiṃ attabhāve taṇhāsaṅkhātaṃ kammaṃ kataṃ, vedanādivasena tassa diṭṭhakālo. Naṅguṭṭhamūlassa diṭṭhakālo viya tassattabhāvassa janakānaṃ avijjāsaṅkhārānaṃ diṭṭhakālo. Heṭṭhā kucchiṃ olokentassa pana agganaṅguṭṭhañceva cattāro ca hatthapāde adisvāpi ‘‘aparipuṇṇo suṃsumāro’’ti agahetvā nayato paripuṇṇotveva gahaṇaṃ viya yattha yattha paccayavaṭṭaṃ pāḷiyaṃ na āgataṃ, tattha tattha ‘‘desanā aparipuṇṇā’’ti agahetvā nayato paripuṇṇātveva gahaṇaṃ veditabbaṃ. Tattha ca āhārataṇhānaṃ antare eko sandhi, taṇhāvedanānaṃ antare eko, viññāṇasaṅkhārānaṃ antare ekoti evaṃ tisandhicatusaṅkhepameva vaṭṭaṃ dassitanti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஆஹாரஸுத்தங் • 1. Āhārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஆஹாரஸுத்தவண்ணனா • 1. Āhārasuttavaṇṇanā
