| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
2. аахаараваг̇г̇о
2. Āhāravaggo
1. аахаарасуд̇д̇аван̣н̣анаа
1. Āhārasuttavaṇṇanā
11. аахаараваг̇г̇асса батамз аахаараад̇и бажжаяаа. бажжаяаа хи аахаранд̇и ад̇д̇ано палам̣, д̇асмаа аахаараад̇и вужжанд̇и. бхууд̇аанам̣ ваа сад̇д̇аананд̇иаад̣̇ийсу бхууд̇аад̇и ж̇аад̇аа ниб̣б̣ад̇д̇аа. самбхавзсинод̇и яз самбхавам̣ ж̇аад̇им̣ ниб̣б̣ад̇д̇им̣ зсанд̇и г̇авзсанд̇и. д̇ад̇т̇а жад̇уусу яонийсу ан̣д̣аж̇аж̇алааб̣уж̇аа сад̇д̇аа яаава ан̣д̣агосам̣ вад̇т̇игосан̃жа на бхинд̣̇анд̇и, д̇аава самбхавзсино наама, ан̣д̣агосам̣ вад̇т̇игосан̃жа бхинд̣̇ид̇ваа б̣ахи нигканд̇аа бхууд̇аа наама. сам̣сзд̣̇аж̇аа обабаад̇игаа жа батамажид̇д̇агкан̣з самбхавзсино наама, д̣̇уд̇ияажид̇д̇агкан̣ад̇о бабхуд̇и бхууд̇аа наама. язна ваа ирияаабат̇зна ж̇ааяанд̇и, яаава д̇ад̇о ан̃н̃ам̣ на баабун̣анд̇и, д̇аава самбхавзсино наама, д̇ад̇о барам̣ бхууд̇аа наама. ат̇а ваа бхууд̇аад̇и ж̇аад̇аа абхиниб̣б̣ад̇д̇аа, яз бхууд̇аа абхиниб̣б̣ад̇д̇ааязва, на буна бхависсанд̇ийд̇и сан̇кам̣ г̇ажчанд̇и, д̇зсам̣ кийн̣аасаваанам̣ зд̇ам̣ ад̇хиважанам̣. самбхавамзсанд̇ийд̇и самбхавзсино. аббахийнабхавасам̣яож̇анад̇д̇аа ааяад̇имби самбхавам̣ зсанд̇аанам̣ сзгкабут̇уж̇ж̇анаанамзд̇ам̣ ад̇хиважанам̣. звам̣ саб̣б̣ат̇ааби имзхи д̣̇вийхи бад̣̇зхи саб̣б̣асад̇д̇з барияаад̣̇ияад̇и. ваасад̣̇д̣̇о жзд̇т̇а самбин̣д̣анад̇т̇о, д̇асмаа бхууд̇аанан̃жа самбхавзсийнан̃жаад̇и аяамад̇т̇о взд̣̇ид̇аб̣б̣о.
11. Āhāravaggassa paṭhame āhārāti paccayā. Paccayā hi āharanti attano phalaṃ, tasmā āhārāti vuccanti. Bhūtānaṃ vā sattānantiādīsu bhūtāti jātā nibbattā. Sambhavesinoti ye sambhavaṃ jātiṃ nibbattiṃ esanti gavesanti. Tattha catūsu yonīsu aṇḍajajalābujā sattā yāva aṇḍakosaṃ vatthikosañca na bhindanti, tāva sambhavesino nāma, aṇḍakosaṃ vatthikosañca bhinditvā bahi nikkhantā bhūtā nāma. Saṃsedajā opapātikā ca paṭhamacittakkhaṇe sambhavesino nāma, dutiyacittakkhaṇato pabhuti bhūtā nāma. Yena vā iriyāpathena jāyanti, yāva tato aññaṃ na pāpuṇanti, tāva sambhavesino nāma, tato paraṃ bhūtā nāma. Atha vā bhūtāti jātā abhinibbattā, ye bhūtā abhinibbattāyeva, na puna bhavissantīti saṅkhaṃ gacchanti, tesaṃ khīṇāsavānaṃ etaṃ adhivacanaṃ. Sambhavamesantīti sambhavesino. Appahīnabhavasaṃyojanattā āyatimpi sambhavaṃ esantānaṃ sekkhaputhujjanānametaṃ adhivacanaṃ. Evaṃ sabbathāpi imehi dvīhi padehi sabbasatte pariyādiyati. Vāsaddo cettha sampiṇḍanattho, tasmā bhūtānañca sambhavesīnañcāti ayamattho veditabbo.
тид̇ияаад̇и тид̇ад̇т̇ам̣. ануг̇г̇ахааяаад̇и ануг̇г̇ахад̇т̇ам̣. важанабхзд̣̇оязва жзса, ад̇т̇о бана д̣̇виннамби бад̣̇аанам̣ згоязва. ат̇а ваа тид̇ияаад̇и д̇асса д̇асса сад̇д̇асса уббаннад̇хаммаанам̣ ануббаб̣анд̇хавасзна авижчзд̣̇ааяа. ануг̇г̇ахааяаад̇и ануббаннаанам̣ уббаад̣̇ааяа. убхоби жзд̇аани ‘‘бхууд̇аанам̣ ваа тид̇ияаа жзва ануг̇г̇ахааяа жа, самбхавзсийнам̣ ваа тид̇ияаа жзва ануг̇г̇ахааяа жаа’’д̇и звам̣ убхаяад̇т̇а д̣̇адтаб̣б̣аанийд̇и.
Ṭhitiyāti ṭhitatthaṃ. Anuggahāyāti anuggahatthaṃ. Vacanabhedoyeva cesa, attho pana dvinnampi padānaṃ ekoyeva. Atha vā ṭhitiyāti tassa tassa sattassa uppannadhammānaṃ anuppabandhavasena avicchedāya. Anuggahāyāti anuppannānaṃ uppādāya. Ubhopi cetāni ‘‘bhūtānaṃ vā ṭhitiyā ceva anuggahāya ca, sambhavesīnaṃ vā ṭhitiyā ceva anuggahāya cā’’ti evaṃ ubhayattha daṭṭhabbānīti.
габ̣ал̣ийгааро аахаарод̇и габ̣ал̣ам̣ гад̇ваа аж̇жхохарид̇аб̣б̣аго аахааро, од̣̇анагуммаасаад̣̇ивад̇т̇угааяа ож̇ааязд̇ам̣ ад̇хиважанам̣. ол̣аариго ваа сукумо ваад̇и вад̇т̇уол̣ааригад̇ааяа ол̣аариго, сукумад̇ааяа сукумо. сабхаавзна бана сукумаруубабарияаабаннад̇д̇аа габ̣ал̣ийгааро аахааро сукумова ход̇и. сааби жасса вад̇т̇уд̇о ол̣ааригад̇аа сукумад̇аа жа убаад̣̇ааяубаад̣̇ааяа взд̣̇ид̇аб̣б̣аа. гумбхийлаанан̃хи аахаарам̣ убаад̣̇ааяа мораанам̣ аахааро сукумо. гумбхийлаа гира баасаан̣з г̇иланд̇и, д̇з жа нзсам̣ гужчиббад̇д̇аа вилийяанд̇и. мораа саббавижчигаад̣̇ибаан̣з каад̣̇анд̇и. мораанам̣ бана аахаарам̣ убаад̣̇ааяа д̇аражчаанам̣ аахааро сукумо. д̇з гира д̇ивассачад̣д̣ид̇аани висаан̣аани жзва адтийни жа каад̣̇анд̇и, д̇аани жа нзсам̣ кзл̣зна д̇змид̇амад̇д̇аанзва ганд̣̇амуулам̣ вияа муд̣̇угаани хонд̇и. д̇аражчаанам̣ аахаарам̣ убаад̣̇ааяа хад̇т̇ийнам̣ аахааро сукумо. д̇з хи наанааругкасаакаад̣̇аяо каад̣̇анд̇и. хад̇т̇ийнам̣ аахаарад̇о г̇аваяаг̇оган̣н̣амиг̇аад̣̇ийнам̣ аахааро сукумо. д̇з гира ниссаараани наанааругкабан̣н̣аад̣̇ийни каад̣̇анд̇и. д̇зсамби аахаарад̇о г̇уннам̣ аахааро сукумо. д̇з алласугкад̇ин̣аани каад̣̇анд̇и. д̇зсам̣ аахаарад̇о сасаанам̣ аахааро сукумо. сасаанам̣ аахаарад̇о сагун̣аанам̣ аахааро сукумо. сагун̣аанам̣ аахаарад̇о бажжанд̇аваасийнам̣ аахааро сукумо. бажжанд̇аваасийнам̣ аахаарад̇о г̇аамабхож̇агаанам̣ аахааро сукумо. г̇аамабхож̇агаанам̣ аахаарад̇о рааж̇арааж̇амахаамад̇д̇аанам̣ аахааро сукумо. д̇зсамби аахаарад̇о жаггавад̇д̇ино аахааро сукумо. жаггавад̇д̇ино аахаарад̇о бхуммаанам̣ д̣̇зваанам̣ аахааро сукумо. бхуммаанам̣ д̣̇зваанам̣ аахаарад̇о жаад̇умахаарааж̇игаанам̣. звам̣ яаава бараниммид̇авасавад̇д̇ийнам̣ аахаараа вид̇т̇аарзд̇аб̣б̣аа. д̇зсам̣ банаахааро сукумод̇взва нидтам̣ бад̇д̇о.
Kabaḷīkāro āhāroti kabaḷaṃ katvā ajjhoharitabbako āhāro, odanakummāsādivatthukāya ojāyetaṃ adhivacanaṃ. Oḷāriko vā sukhumo vāti vatthuoḷārikatāya oḷāriko, sukhumatāya sukhumo. Sabhāvena pana sukhumarūpapariyāpannattā kabaḷīkāro āhāro sukhumova hoti. Sāpi cassa vatthuto oḷārikatā sukhumatā ca upādāyupādāya veditabbā. Kumbhīlānañhi āhāraṃ upādāya morānaṃ āhāro sukhumo. Kumbhīlā kira pāsāṇe gilanti, te ca nesaṃ kucchippattā vilīyanti. Morā sappavicchikādipāṇe khādanti. Morānaṃ pana āhāraṃ upādāya taracchānaṃ āhāro sukhumo. Te kira tivassachaḍḍitāni visāṇāni ceva aṭṭhīni ca khādanti, tāni ca nesaṃ kheḷena temitamattāneva kandamūlaṃ viya mudukāni honti. Taracchānaṃ āhāraṃ upādāya hatthīnaṃ āhāro sukhumo. Te hi nānārukkhasākhādayo khādanti. Hatthīnaṃ āhārato gavayagokaṇṇamigādīnaṃ āhāro sukhumo. Te kira nissārāni nānārukkhapaṇṇādīni khādanti. Tesampi āhārato gunnaṃ āhāro sukhumo. Te allasukkhatiṇāni khādanti. Tesaṃ āhārato sasānaṃ āhāro sukhumo. Sasānaṃ āhārato sakuṇānaṃ āhāro sukhumo. Sakuṇānaṃ āhārato paccantavāsīnaṃ āhāro sukhumo. Paccantavāsīnaṃ āhārato gāmabhojakānaṃ āhāro sukhumo. Gāmabhojakānaṃ āhārato rājarājamahāmattānaṃ āhāro sukhumo. Tesampi āhārato cakkavattino āhāro sukhumo. Cakkavattino āhārato bhummānaṃ devānaṃ āhāro sukhumo. Bhummānaṃ devānaṃ āhārato cātumahārājikānaṃ. Evaṃ yāva paranimmitavasavattīnaṃ āhārā vitthāretabbā. Tesaṃ panāhāro sukhumotveva niṭṭhaṃ patto.
зд̇т̇а жа ол̣ааригз вад̇т̇усмим̣ ож̇аа барид̇д̇аа ход̇и д̣̇уб̣б̣алаа, сукумз б̣алавад̇ий. д̇ат̇аа хи згабад̇д̇абуурамби яааг̇ум̣ бийд̇о мухуд̇д̇знзва ж̇игхажчид̇о ход̇и яам̣гин̃жид̣̇зва каад̣̇ид̇угаамо, саббим̣ бана басад̇амад̇д̇ам̣ бивид̇ваа д̣̇ивасам̣ абход̇д̇угаамо ход̇и. д̇ад̇т̇а вад̇т̇у гаммаж̇ад̇зж̇асан̇каад̇ам̣ бариссаяам̣ винод̣̇зд̇и, на бана саггод̇и баалзд̇ум̣. ож̇аа бана баалзд̇и, на саггод̇и бариссаяам̣ винод̣̇зд̇ум̣. д̣̇вз бана згад̇о худ̇ваа бариссаяан̃жзва винод̣̇знд̇и баалзнд̇и жаад̇и.
Ettha ca oḷārike vatthusmiṃ ojā parittā hoti dubbalā, sukhume balavatī. Tathā hi ekapattapūrampi yāguṃ pīto muhutteneva jighacchito hoti yaṃkiñcideva khāditukāmo, sappiṃ pana pasatamattaṃ pivitvā divasaṃ abhottukāmo hoti. Tattha vatthu kammajatejasaṅkhātaṃ parissayaṃ vinodeti, na pana sakkoti pāletuṃ. Ojā pana pāleti, na sakkoti parissayaṃ vinodetuṃ. Dve pana ekato hutvā parissayañceva vinodenti pālenti cāti.
пассо д̣̇уд̇ияод̇и жагкусампассаад̣̇и чаб̣б̣ид̇хоби пассо зд̇зсу жад̇уусу аахаарзсу д̣̇уд̇ияо аахаарод̇и взд̣̇ид̇аб̣б̣о. д̣̇зсанаанаяо зва жзса, д̇асмаа иминаа наама гааран̣зна д̣̇уд̇ияо д̇ад̇ияо жаад̇и ид̣̇амзд̇т̇а на г̇авзсид̇аб̣б̣ам̣. маносан̃жзд̇анаад̇и жзд̇анаава вужжад̇и. вин̃н̃аан̣анд̇и жид̇д̇ам̣. ид̇и бхаг̇аваа имасмим̣ таанз убаад̣̇ин̣н̣агаанубаад̣̇ин̣н̣агавасзна згараасим̣ гад̇ваа жад̇д̇ааро аахаарз д̣̇ассзси. габ̣ал̣ийгаараахааро хи убаад̣̇ин̣н̣агоби ад̇т̇и анубаад̣̇ин̣н̣агоби, д̇ат̇аа пассаад̣̇аяо. д̇ад̇т̇а саббаад̣̇ийхи г̇илид̇аанам̣ ман̣д̣уугаад̣̇ийнам̣ васзна убаад̣̇ин̣н̣агагаб̣ал̣ийгаараахааро д̣̇адтаб̣б̣о. ман̣д̣уугаад̣̇аяо хи саббаад̣̇ийхи г̇илид̇аа анд̇огужчиг̇ад̇ааби гин̃жи гаалам̣ ж̇ийванд̇иязва. д̇з яаава убаад̣̇ин̣н̣агабагкз д̇идтанд̇и, д̇аава аахаарад̇т̇ам̣ на саад̇хзнд̇и . бхиж̇ж̇ид̇ваа бана анубаад̣̇ин̣н̣агабагкз тид̇аа саад̇хзнд̇и. д̇ад̣̇ааби убаад̣̇ин̣н̣агаахаарод̇и вужжанд̇ийд̇и. ид̣̇ам̣ бана аажарияаанам̣ на ружжад̇ийд̇и адтагат̇ааяамзва бадигкибид̇ваа ид̣̇ам̣ вуд̇д̇ам̣ – имзсам̣ сад̇д̇аанам̣ каад̣̇анд̇аанамби акаад̣̇анд̇аанамби бхун̃ж̇анд̇аанамби абхун̃ж̇анд̇аанамби бадисанд̇хижид̇д̇знзва сахаж̇аад̇аа гаммаж̇аа ож̇аа наама ад̇т̇и, саа яааваби сад̇д̇амаа д̣̇ивасаа баалзд̇и, аяамзва убаад̣̇ин̣н̣агагаб̣ал̣ийгаараахаарод̇и взд̣̇ид̇аб̣б̣о. д̇збхуумагавибаагавасзна бана убаад̣̇ин̣н̣агапассаад̣̇аяо взд̣̇ид̇аб̣б̣аа, д̇збхуумагагусалаагусалагирияавасзна анубаад̣̇ин̣н̣агаа. логуд̇д̇араа бана рул̣хийвасзна гат̇ид̇аад̇и.
Phasso dutiyoti cakkhusamphassādi chabbidhopi phasso etesu catūsu āhāresu dutiyo āhāroti veditabbo. Desanānayo eva cesa, tasmā iminā nāma kāraṇena dutiyo tatiyo cāti idamettha na gavesitabbaṃ. Manosañcetanāti cetanāva vuccati. Viññāṇanti cittaṃ. Iti bhagavā imasmiṃ ṭhāne upādiṇṇakaanupādiṇṇakavasena ekarāsiṃ katvā cattāro āhāre dassesi. Kabaḷīkārāhāro hi upādiṇṇakopi atthi anupādiṇṇakopi, tathā phassādayo. Tattha sappādīhi gilitānaṃ maṇḍūkādīnaṃ vasena upādiṇṇakakabaḷīkārāhāro daṭṭhabbo. Maṇḍūkādayo hi sappādīhi gilitā antokucchigatāpi kiñci kālaṃ jīvantiyeva. Te yāva upādiṇṇakapakkhe tiṭṭhanti, tāva āhāratthaṃ na sādhenti . Bhijjitvā pana anupādiṇṇakapakkhe ṭhitā sādhenti. Tadāpi upādiṇṇakāhāroti vuccantīti. Idaṃ pana ācariyānaṃ na ruccatīti aṭṭhakathāyameva paṭikkhipitvā idaṃ vuttaṃ – imesaṃ sattānaṃ khādantānampi akhādantānampi bhuñjantānampi abhuñjantānampi paṭisandhicitteneva sahajātā kammajā ojā nāma atthi, sā yāvapi sattamā divasā pāleti, ayameva upādiṇṇakakabaḷīkārāhāroti veditabbo. Tebhūmakavipākavasena pana upādiṇṇakaphassādayo veditabbā, tebhūmakakusalākusalakiriyavasena anupādiṇṇakā. Lokuttarā pana ruḷhīvasena kathitāti.
зд̇т̇ааха – ‘‘яад̣̇и бажжаяадто аахаарадто, ат̇а гасмаа ан̃н̃зсуби сад̇д̇аанам̣ бажжаязсу виж̇ж̇амаанзсу имзязва жад̇д̇ааро вуд̇д̇аа’’д̇и? вужжад̇з – аж̇жхад̇д̇игасанд̇ад̇ияаа висзсабажжаяад̇д̇аа. висзсабажжаяо хи габ̣ал̣ийгаараахаарабхагкаанам̣ сад̇д̇аанам̣ руубагааяасса габ̣ал̣ийгааро аахааро, наамагааяз взд̣̇анааяа пассо, вин̃н̃аан̣асса маносан̃жзд̇анаа, наамаруубасса вин̃н̃аан̣ам̣. яат̇ааха – ‘‘сзяяат̇ааби, бхигкавз, аяам̣ гааяо аахаарадтид̇иго аахаарам̣ бадижжа д̇идтад̇и, анаахааро но д̇идтад̇и (сам̣. ни. 5.183), д̇ат̇аа пассабажжаяаа взд̣̇анаа, сан̇каарабажжаяаа вин̃н̃аан̣ам̣, вин̃н̃аан̣абажжаяаа наамарууба’’нд̇и (сам̣. ни. 2.1; вибха. 225).
Etthāha – ‘‘yadi paccayaṭṭho āhāraṭṭho, atha kasmā aññesupi sattānaṃ paccayesu vijjamānesu imeyeva cattāro vuttā’’ti? Vuccate – ajjhattikasantatiyā visesapaccayattā. Visesapaccayo hi kabaḷīkārāhārabhakkhānaṃ sattānaṃ rūpakāyassa kabaḷīkāro āhāro, nāmakāye vedanāya phasso, viññāṇassa manosañcetanā, nāmarūpassa viññāṇaṃ. Yathāha – ‘‘seyyathāpi, bhikkhave, ayaṃ kāyo āhāraṭṭhitiko āhāraṃ paṭicca tiṭṭhati, anāhāro no tiṭṭhati (saṃ. ni. 5.183), tathā phassapaccayā vedanā, saṅkhārapaccayā viññāṇaṃ, viññāṇapaccayā nāmarūpa’’nti (saṃ. ni. 2.1; vibha. 225).
го банзд̇т̇а аахааро гим̣ аахарад̇ийд̇и? габ̣ал̣ийгаараахааро ож̇адтамагаруубаани аахарад̇и пассаахааро д̇иссо взд̣̇анаа, маносан̃жзд̇анаахааро д̇аяо бхавз, вин̃н̃аан̣аахааро бадисанд̇хинаамаруубанд̇и.
Ko panettha āhāro kiṃ āharatīti? Kabaḷīkārāhāro ojaṭṭhamakarūpāni āharati phassāhāro tisso vedanā, manosañcetanāhāro tayo bhave, viññāṇāhāro paṭisandhināmarūpanti.
гат̇ам̣? габ̣ал̣ийгаараахааро д̇аава мукз табид̇амад̇д̇зязва адта руубаани самудтаабзд̇и, д̣̇анд̇авижун̣н̣ид̇ам̣ бана аж̇жхохарияамаанам̣ згзгам̣ сид̇т̇ам̣ адтадтаруубаани самудтаабзд̇иязва. звам̣ габ̣ал̣ийгаараахааро ож̇адтамагаруубаани аахарад̇и. пассаахааро бана сукавзд̣̇анийяо пассо уббаж̇ж̇амааноязва сукам̣ взд̣̇анам̣ аахарад̇и, д̣̇угкавзд̣̇анийяо д̣̇угкам̣, ад̣̇угкамасукавзд̣̇анийяо ад̣̇угкамасуканд̇и звам̣ саб̣б̣ат̇ааби пассаахааро д̇иссо взд̣̇анаа аахарад̇и.
Kathaṃ? Kabaḷīkārāhāro tāva mukhe ṭhapitamatteyeva aṭṭha rūpāni samuṭṭhāpeti, dantavicuṇṇitaṃ pana ajjhohariyamānaṃ ekekaṃ sitthaṃ aṭṭhaṭṭharūpāni samuṭṭhāpetiyeva. Evaṃ kabaḷīkārāhāro ojaṭṭhamakarūpāni āharati. Phassāhāro pana sukhavedanīyo phasso uppajjamānoyeva sukhaṃ vedanaṃ āharati, dukkhavedanīyo dukkhaṃ, adukkhamasukhavedanīyo adukkhamasukhanti evaṃ sabbathāpi phassāhāro tisso vedanā āharati.
маносан̃жзд̇анаахааро гаамабхавуубаг̇ам̣ гаммам̣ гаамабхавам̣ аахарад̇и, руубааруубабхавуубаг̇аани д̇ам̣ д̇ам̣ бхавам̣. звам̣ саб̣б̣ат̇ааби маносан̃жзд̇анаахааро д̇аяо бхавз аахарад̇и. вин̃н̃аан̣аахааро бана яз жа бадисанд̇хигкан̣з д̇ам̣самбаяуд̇д̇агаа д̇аяо канд̇хаа, яаани жа д̇исанд̇ад̇ивасзна д̇им̣са руубаани уббаж̇ж̇анд̇и, сахаж̇аад̇аад̣̇ибажжаяанаязна д̇аани аахарад̇ийд̇и вужжад̇и. звам̣ вин̃н̃аан̣аахааро бадисанд̇хинаамаруубам̣ аахарад̇ийд̇и. зд̇т̇а жа ‘‘маносан̃жзд̇анаа д̇аяо бхавз аахарад̇ий’’д̇и саасавагусалаагусалажзд̇анаава вуд̇д̇аа. ‘‘вин̃н̃аан̣ам̣ бадисанд̇хинаамаруубам̣ аахарад̇ий’’д̇и бадисанд̇хивин̃н̃аан̣амзва вуд̇д̇ам̣. ависзсзна бана д̇ам̣самбаяуд̇д̇ад̇ам̣самудтаанад̇хаммаанам̣ аахаран̣ад̇обзд̇з ‘‘аахаараа’’д̇и взд̣̇ид̇аб̣б̣аа.
Manosañcetanāhāro kāmabhavūpagaṃ kammaṃ kāmabhavaṃ āharati, rūpārūpabhavūpagāni taṃ taṃ bhavaṃ. Evaṃ sabbathāpi manosañcetanāhāro tayo bhave āharati. Viññāṇāhāro pana ye ca paṭisandhikkhaṇe taṃsampayuttakā tayo khandhā, yāni ca tisantativasena tiṃsa rūpāni uppajjanti, sahajātādipaccayanayena tāni āharatīti vuccati. Evaṃ viññāṇāhāro paṭisandhināmarūpaṃ āharatīti. Ettha ca ‘‘manosañcetanā tayo bhave āharatī’’ti sāsavakusalākusalacetanāva vuttā. ‘‘Viññāṇaṃ paṭisandhināmarūpaṃ āharatī’’ti paṭisandhiviññāṇameva vuttaṃ. Avisesena pana taṃsampayuttataṃsamuṭṭhānadhammānaṃ āharaṇatopete ‘‘āhārā’’ti veditabbā.
зд̇зсу жад̇уусу аахаарзсу габ̣ал̣ийгаараахааро убад̇т̇амбхзнд̇о аахаарагижжам̣ саад̇хзд̇и, пассо пусанд̇оязва маносан̃жзд̇анаа ааяуухамаанаава, вин̃н̃аан̣ам̣ виж̇аананд̇амзва. гат̇ам̣? габ̣ал̣ийгаараахааро хи убад̇т̇амбхзнд̇оязва гааяадтабанзна сад̇д̇аанам̣ тид̇ияаа ход̇и. гаммаж̇анид̇оби хи аяам̣ гааяо габ̣ал̣ийгаараахаарзна убад̇т̇ад̣̇д̇хо д̣̇асаби вассаани вассасад̇амби яаава ааяубаримаан̣аа д̇идтад̇и. яат̇аа гим̣ ? яат̇аа маад̇уяаа ж̇анид̇оби д̣̇аараго д̇хаад̇ияаа т̇ан̃н̃аад̣̇ийни бааязд̇ваа босияамаано жирам̣ д̇идтад̇и, яат̇аа жа убад̇т̇амбхзна убад̇т̇амбхид̇ам̣ г̇зхам̣. вуд̇д̇амби жзд̇ам̣ –
Etesu catūsu āhāresu kabaḷīkārāhāro upatthambhento āhārakiccaṃ sādheti, phasso phusantoyeva manosañcetanā āyūhamānāva, viññāṇaṃ vijānantameva. Kathaṃ? Kabaḷīkārāhāro hi upatthambhentoyeva kāyaṭṭhapanena sattānaṃ ṭhitiyā hoti. Kammajanitopi hi ayaṃ kāyo kabaḷīkārāhārena upatthaddho dasapi vassāni vassasatampi yāva āyuparimāṇā tiṭṭhati. Yathā kiṃ ? Yathā mātuyā janitopi dārako dhātiyā thaññādīni pāyetvā posiyamāno ciraṃ tiṭṭhati, yathā ca upatthambhena upatthambhitaṃ gehaṃ. Vuttampi cetaṃ –
‘‘яат̇аа, махаарааж̇а, г̇зхз бабад̇анд̇з ан̃н̃зна д̣̇аарунаа убад̇т̇амбхид̇ам̣ санд̇ам̣ зва д̇ам̣ г̇зхам̣ на бад̇ад̇и. звамзва ко, махаарааж̇а, аяам̣ гааяо аахаарадтид̇иго аахаарам̣ бадижжа д̇идтад̇ий’’д̇и.
‘‘Yathā, mahārāja, gehe papatante aññena dārunā upatthambhitaṃ santaṃ eva taṃ gehaṃ na patati. Evameva kho, mahārāja, ayaṃ kāyo āhāraṭṭhitiko āhāraṃ paṭicca tiṭṭhatī’’ti.
звам̣ габ̣ал̣ийгааро аахааро убад̇т̇амбхзнд̇о аахаарагижжам̣ саад̇хзд̇и.
Evaṃ kabaḷīkāro āhāro upatthambhento āhārakiccaṃ sādheti.
звам̣ саад̇хзнд̇оби жа габ̣ал̣ийгааро аахааро д̣̇виннам̣ руубасанд̇ад̇ийнам̣ бажжаяо ход̇и аахаарасамудтаанасса жа убаад̣̇ин̣н̣агасса жа. гаммаж̇аанам̣ анубаалаго худ̇ваа бажжаяо ход̇и, аахаарасамудтаанаанам̣ ж̇анаго худ̇ваад̇и. пассо бана сукаад̣̇ивад̇т̇убхууд̇ам̣ аарамман̣ам̣ пусанд̇оязва сукаад̣̇ивзд̣̇анаабавад̇д̇анзна сад̇д̇аанам̣ тид̇ияаа ход̇и. маносан̃жзд̇анаа гусалаагусалагаммавасзна ааяуухамаанааязва бхавамууланибпаад̣̇анад̇о сад̇д̇аанам̣ тид̇ияаа ход̇и. вин̃н̃аан̣ам̣ виж̇аананд̇амзва наамаруубаббавад̇д̇анзна сад̇д̇аанам̣ тид̇ияаа ход̇ийд̇и.
Evaṃ sādhentopi ca kabaḷīkāro āhāro dvinnaṃ rūpasantatīnaṃ paccayo hoti āhārasamuṭṭhānassa ca upādiṇṇakassa ca. Kammajānaṃ anupālako hutvā paccayo hoti, āhārasamuṭṭhānānaṃ janako hutvāti. Phasso pana sukhādivatthubhūtaṃ ārammaṇaṃ phusantoyeva sukhādivedanāpavattanena sattānaṃ ṭhitiyā hoti. Manosañcetanā kusalākusalakammavasena āyūhamānāyeva bhavamūlanipphādanato sattānaṃ ṭhitiyā hoti. Viññāṇaṃ vijānantameva nāmarūpappavattanena sattānaṃ ṭhitiyā hotīti.
звам̣ убад̇т̇амбханаад̣̇ивасзна аахаарагижжам̣ саад̇хаяамаанзсу банзд̇зсу жад̇д̇аари бхаяаани д̣̇адтаб̣б̣аани. сзяяат̇ид̣̇ам̣ – габ̣ал̣ийгаараахаарз ниганд̇иязва бхаяам̣, пассз убаг̇аманамзва, маносан̃жзд̇анааяа ааяууханамзва, вин̃н̃аан̣з абхинибаад̇оязва бхаяанд̇и. гим̣ гааран̣аа? габ̣ал̣ийгаараахаарз хи ниганд̇им̣ гад̇ваа сийд̇аад̣̇ийнам̣ бурагкад̇аа сад̇д̇аа аахаарад̇т̇ааяа муд̣̇д̣̇ааг̇ан̣анаад̣̇игаммаани гаронд̇аа анаббагам̣ д̣̇угкам̣ ниг̇ажчанд̇и. згажжз жа имасмим̣ саасанз баб̣б̣аж̇ид̇вааби взж̇ж̇агаммаад̣̇игааяа анзсанааяа аахаарам̣ бариязсанд̇аа д̣̇идтзва д̇хаммз г̇аараяхаа хонд̇и, самбарааязби, ‘‘д̇асса сан̇гхаадиби аад̣̇ид̇д̇аа самбаж̇ж̇алид̇аа’’д̇иаад̣̇инаа лагкан̣асам̣яуд̇д̇з (сам̣. ни. 2.218) вуд̇д̇анаязна саман̣абзд̇аа хонд̇и. иминаа д̇аава гааран̣зна габ̣ал̣ийгаарз аахаарз ниганд̇и зва бхаяанд̇и взд̣̇ид̇аб̣б̣аа.
Evaṃ upatthambhanādivasena āhārakiccaṃ sādhayamānesu panetesu cattāri bhayāni daṭṭhabbāni. Seyyathidaṃ – kabaḷīkārāhāre nikantiyeva bhayaṃ, phasse upagamanameva, manosañcetanāya āyūhanameva, viññāṇe abhinipātoyeva bhayanti. Kiṃ kāraṇā? Kabaḷīkārāhāre hi nikantiṃ katvā sītādīnaṃ purakkhatā sattā āhāratthāya muddāgaṇanādikammāni karontā anappakaṃ dukkhaṃ nigacchanti. Ekacce ca imasmiṃ sāsane pabbajitvāpi vejjakammādikāya anesanāya āhāraṃ pariyesantā diṭṭheva dhamme gārayhā honti, samparāyepi, ‘‘tassa saṅghāṭipi ādittā sampajjalitā’’tiādinā lakkhaṇasaṃyutte (saṃ. ni. 2.218) vuttanayena samaṇapetā honti. Iminā tāva kāraṇena kabaḷīkāre āhāre nikanti eva bhayanti veditabbā.
пассам̣ убаг̇ажчанд̇ааби пассассаад̣̇ино барзсам̣ рагкид̇аг̇обид̇зсу д̣̇аараад̣̇ийсу бхан̣д̣зсу абараж̇жханд̇и, д̇з саха бхан̣д̣зна бхан̣д̣асаамигаа г̇ахзд̇ваа кан̣д̣аакан̣д̣игам̣ ваа чинд̣̇ид̇ваа сан̇гаарагуудз чад̣д̣знд̇и , ран̃н̃о ваа нияяаад̣̇знд̇и. д̇ад̇о д̇з рааж̇аа вивид̇хаа гаммагааран̣аа гаараабзд̇и. гааяасса жа бхзд̣̇аа д̣̇уг̇г̇ад̇и д̇зсам̣ баадиган̇каа ход̇и. ид̇и пассассаад̣̇амуулагам̣ д̣̇идтад̇хаммигамби самбарааяигамби бхаяам̣ саб̣б̣амааг̇ад̇амзва ход̇и. иминаа гааран̣зна пассаахаарз убаг̇аманамзва бхаяанд̇и взд̣̇ид̇аб̣б̣ам̣.
Phassaṃ upagacchantāpi phassassādino paresaṃ rakkhitagopitesu dārādīsu bhaṇḍesu aparajjhanti, te saha bhaṇḍena bhaṇḍasāmikā gahetvā khaṇḍākhaṇḍikaṃ vā chinditvā saṅkārakūṭe chaḍḍenti , rañño vā niyyādenti. Tato te rājā vividhā kammakāraṇā kārāpeti. Kāyassa ca bhedā duggati tesaṃ pāṭikaṅkhā hoti. Iti phassassādamūlakaṃ diṭṭhadhammikampi samparāyikampi bhayaṃ sabbamāgatameva hoti. Iminā kāraṇena phassāhāre upagamanameva bhayanti veditabbaṃ.
гусалаагусалагаммааяууханз бана д̇аммуулагам̣ д̇ийсу бхавзсу бхаяам̣ саб̣б̣ам̣ ааг̇ад̇амзва ход̇и. иминаа гааран̣зна маносан̃жзд̇анаахаарз ааяууханамзва бхаяанд̇и взд̣̇ид̇аб̣б̣ам̣.
Kusalākusalakammāyūhane pana tammūlakaṃ tīsu bhavesu bhayaṃ sabbaṃ āgatameva hoti. Iminā kāraṇena manosañcetanāhāre āyūhanameva bhayanti veditabbaṃ.
бадисанд̇хивин̃н̃аан̣ан̃жа яасмим̣ яасмим̣ таанз абхинибад̇ад̇и, д̇асмим̣ д̇асмим̣ таанз бадисанд̇хинаамаруубам̣ г̇ахзд̇ваава ниб̣б̣ад̇д̇ад̇и. д̇асмин̃жа ниб̣б̣ад̇д̇з саб̣б̣абхаяаани ниб̣б̣ад̇д̇ааниязва хонд̇и д̇аммуулагад̇д̇аад̇и иминаа гааран̣зна вин̃н̃аан̣аахаарз абхинибаад̇оязва бхаяанд̇и взд̣̇ид̇аб̣б̣од̇и.
Paṭisandhiviññāṇañca yasmiṃ yasmiṃ ṭhāne abhinipatati, tasmiṃ tasmiṃ ṭhāne paṭisandhināmarūpaṃ gahetvāva nibbattati. Tasmiñca nibbatte sabbabhayāni nibbattāniyeva honti tammūlakattāti iminā kāraṇena viññāṇāhāre abhinipātoyeva bhayanti veditabboti.
гим̣нид̣̇аанаад̇иаад̣̇ийсу нид̣̇аанаад̣̇ийни саб̣б̣аанзва гааран̣авзважанаани. гааран̣ан̃хи яасмаа палам̣ нид̣̇зд̇и, ‘‘ханд̣̇а нам̣ г̇ан̣хат̇аа’’д̇и аббзд̇и вияа, д̇асмаа нид̣̇аананд̇и вужжад̇и. яасмаа д̇ам̣ д̇ад̇о самуд̣̇зд̇и ж̇ааяад̇и бабхавад̇и, д̇асмаа самуд̣̇аяо ж̇аад̇и бабхавод̇и вужжад̇и. аяам̣ банзд̇т̇а бад̣̇ад̇т̇о – гим̣нид̣̇аанам̣ зд̇зсанд̇и гим̣нид̣̇аанаа. го самуд̣̇аяо зд̇зсанд̇и гим̣самуд̣̇аяаа. гаа ж̇аад̇и зд̇зсанд̇и гим̣ж̇аад̇игаа. го бабхаво зд̇зсанд̇и гим̣бабхаваа. яасмаа бана д̇зсам̣ д̇ан̣хаа яат̇аавуд̇д̇зна ад̇т̇зна нид̣̇аанан̃жзва самуд̣̇аяо жа ж̇аад̇и жа бабхаво жа, д̇асмаа ‘‘д̇ан̣хаанид̣̇аанаа’’д̇иаад̣̇имааха. звам̣ саб̣б̣абад̣̇зсу ад̇т̇о взд̣̇ид̇аб̣б̣о.
Kiṃnidānātiādīsu nidānādīni sabbāneva kāraṇavevacanāni. Kāraṇañhi yasmā phalaṃ nideti, ‘‘handa naṃ gaṇhathā’’ti appeti viya, tasmā nidānanti vuccati. Yasmā taṃ tato samudeti jāyati pabhavati, tasmā samudayo jāti pabhavoti vuccati. Ayaṃ panettha padattho – kiṃnidānaṃ etesanti kiṃnidānā. Ko samudayo etesanti kiṃsamudayā. Kā jāti etesanti kiṃjātikā. Ko pabhavo etesanti kiṃpabhavā. Yasmā pana tesaṃ taṇhā yathāvuttena atthena nidānañceva samudayo ca jāti ca pabhavo ca, tasmā ‘‘taṇhānidānā’’tiādimāha. Evaṃ sabbapadesu attho veditabbo.
зд̇т̇а жа имз жад̇д̇ааро аахаараа д̇ан̣хаанид̣̇аанаад̇и бадисанд̇хим̣ аад̣̇им̣ гад̇ваа ад̇д̇абхаавасан̇каад̇аанам̣ аахаараанам̣ буримад̇ан̣хаанам̣ васзна нид̣̇аанам̣ взд̣̇ид̇аб̣б̣ам̣. гат̇ам̣? бадисанд̇хигкан̣з д̇аава барибун̣н̣ааяад̇анаанам̣ сад̇д̇аанам̣ сад̇д̇асанд̇ад̇ивасзна, сзсаанам̣ д̇ад̇о уунауунасанд̇ад̇ивасзна уббаннаруубаб̣бханд̇арам̣ ж̇аад̇аа ож̇аа ад̇т̇и, аяам̣ д̇ан̣хаанид̣̇аано убаад̣̇ин̣н̣агагаб̣ал̣ийгаараахааро. бадисанд̇хижид̇д̇асамбаяуд̇д̇аа бана пассажзд̇анаа саяан̃жа жид̇д̇ам̣ вин̃н̃аан̣анд̇и имз д̇ан̣хаанид̣̇аанаа убаад̣̇ин̣н̣ага-пассаманосан̃жзд̇анаа-вин̃н̃аан̣аахаараад̇и звам̣ д̇аава буримад̇ан̣хаанид̣̇аанаа бадисанд̇хигаа аахаараа. яат̇аа жа бадисанд̇хигаа, звам̣ д̇ад̇о барам̣ батамабхаван̇г̇ажид̇д̇агкан̣аад̣̇иниб̣б̣ад̇д̇ааби взд̣̇ид̇аб̣б̣аа.
Ettha ca ime cattāro āhārā taṇhānidānāti paṭisandhiṃ ādiṃ katvā attabhāvasaṅkhātānaṃ āhārānaṃ purimataṇhānaṃ vasena nidānaṃ veditabbaṃ. Kathaṃ? Paṭisandhikkhaṇe tāva paripuṇṇāyatanānaṃ sattānaṃ sattasantativasena, sesānaṃ tato ūnaūnasantativasena uppannarūpabbhantaraṃ jātā ojā atthi, ayaṃ taṇhānidāno upādiṇṇakakabaḷīkārāhāro. Paṭisandhicittasampayuttā pana phassacetanā sayañca cittaṃ viññāṇanti ime taṇhānidānā upādiṇṇaka-phassamanosañcetanā-viññāṇāhārāti evaṃ tāva purimataṇhānidānā paṭisandhikā āhārā. Yathā ca paṭisandhikā, evaṃ tato paraṃ paṭhamabhavaṅgacittakkhaṇādinibbattāpi veditabbā.
яасмаа бана бхаг̇аваа на гзвалам̣ аахаараанамзва нид̣̇аанам̣ ж̇аанаад̇и, аахааранид̣̇аанабхууд̇ааяа д̇ан̣хааяаби, д̇ан̣хааяа нид̣̇аанаанам̣ взд̣̇анаад̣̇ийнамби нид̣̇аанам̣ ж̇аанаад̇иязва, д̇асмаа д̇ан̣хаа жааяам̣, бхигкавз, гим̣нид̣̇аанаад̇иаад̣̇инаа наязна ваддам̣ д̣̇ассзд̇ваа виваддам̣ д̣̇ассзси. имасмин̃жа бана таанз бхаг̇аваа ад̇ийд̇аабхимукам̣ д̣̇зсанам̣ гад̇ваа ад̇ийд̇зна ваддам̣ д̣̇ассзд̇и. гат̇ам̣? аахааравасзна хи аяам̣ ад̇д̇абхааво г̇ахид̇о.
Yasmā pana bhagavā na kevalaṃ āhārānameva nidānaṃ jānāti, āhāranidānabhūtāya taṇhāyapi, taṇhāya nidānānaṃ vedanādīnampi nidānaṃ jānātiyeva, tasmā taṇhā cāyaṃ, bhikkhave, kiṃnidānātiādinā nayena vaṭṭaṃ dassetvā vivaṭṭaṃ dassesi. Imasmiñca pana ṭhāne bhagavā atītābhimukhaṃ desanaṃ katvā atītena vaṭṭaṃ dasseti. Kathaṃ? Āhāravasena hi ayaṃ attabhāvo gahito.
д̇ан̣хаад̇и имассад̇д̇абхаавасса ж̇анагам̣ гаммам̣, взд̣̇анаапассасал̣ааяад̇ананаамаруубавин̃н̃аан̣аани яасмим̣ ад̇д̇абхаавз тад̇ваа гаммам̣ ааяуухид̇ам̣, д̇ам̣ д̣̇ассзд̇ум̣ вуд̇д̇аани, авиж̇ж̇аасан̇каараа д̇ассад̇д̇абхаавасса ж̇анагам̣ гаммам̣. ид̇и д̣̇вийсу таанзсу ад̇д̇абхааво, д̣̇вийсу д̇асса ж̇анагам̣ гамманд̇и сан̇кзбзна гамман̃жзва гаммавибааган̃жаад̇и, д̣̇взби д̇хаммз д̣̇ассзнд̇зна ад̇ийд̇аабхимукам̣ д̣̇зсанам̣ гад̇ваа ад̇ийд̇зна ваддам̣ д̣̇ассид̇ам̣.
Taṇhāti imassattabhāvassa janakaṃ kammaṃ, vedanāphassasaḷāyatananāmarūpaviññāṇāni yasmiṃ attabhāve ṭhatvā kammaṃ āyūhitaṃ, taṃ dassetuṃ vuttāni, avijjāsaṅkhārā tassattabhāvassa janakaṃ kammaṃ. Iti dvīsu ṭhānesu attabhāvo, dvīsu tassa janakaṃ kammanti saṅkhepena kammañceva kammavipākañcāti, dvepi dhamme dassentena atītābhimukhaṃ desanaṃ katvā atītena vaṭṭaṃ dassitaṃ.
д̇ад̇рааяам̣ д̣̇зсанаа анааг̇ад̇асса ад̣̇ассид̇ад̇д̇аа абарибун̣н̣аад̇и на д̣̇адтаб̣б̣аа. наяад̇о бана барибун̣н̣аад̇взва д̣̇адтаб̣б̣аа. яат̇аа хи жагкумаа бурисо уд̣̇агабидтз нибаннам̣ сум̣сумаарам̣ д̣̇исваа д̇асса барабхааг̇ам̣ ологзнд̇о г̇ийвам̣ бассзяяа, орад̇о бидтим̣, барияосаанз нан̇г̇удтамуулам̣, хздтаа гужчим̣ ологзнд̇о бана уд̣̇агаг̇ад̇ам̣ аг̇г̇анан̇г̇удтан̃жзва жад̇д̇ааро жа хад̇т̇абаад̣̇з на бассзяяа, со на зд̇д̇аавад̇аа ‘‘абарибун̣н̣о сум̣сумааро’’д̇и г̇ан̣хаад̇и, наяад̇о бана барибун̣н̣од̇взва г̇ан̣хаад̇и, звам̣самбад̣̇амид̣̇ам̣ взд̣̇ид̇аб̣б̣ам̣.
Tatrāyaṃ desanā anāgatassa adassitattā aparipuṇṇāti na daṭṭhabbā. Nayato pana paripuṇṇātveva daṭṭhabbā. Yathā hi cakkhumā puriso udakapiṭṭhe nipannaṃ suṃsumāraṃ disvā tassa parabhāgaṃ olokento gīvaṃ passeyya, orato piṭṭhiṃ, pariyosāne naṅguṭṭhamūlaṃ, heṭṭhā kucchiṃ olokento pana udakagataṃ agganaṅguṭṭhañceva cattāro ca hatthapāde na passeyya, so na ettāvatā ‘‘aparipuṇṇo suṃsumāro’’ti gaṇhāti, nayato pana paripuṇṇotveva gaṇhāti, evaṃsampadamidaṃ veditabbaṃ.
уд̣̇агабидтз нибаннасум̣сумааро вияа хи д̇збхуумагаваддам̣. д̇ийрз тид̇о жагкумаа бурисо вияа яог̇ааважаро. д̇зна бурисзна уд̣̇агабидтз сум̣сумаарасса д̣̇идтагаало вияа яог̇инаа аахааравасзна имассад̇д̇абхаавасса д̣̇идтагаало. барад̇о г̇ийвааяа д̣̇идтагаало вияа имассад̇д̇абхаавасса ж̇анигааяа д̇ан̣хааяа д̣̇идтагаало. бидтияаа д̣̇идтагаало вияа яасмим̣ ад̇д̇абхаавз д̇ан̣хаасан̇каад̇ам̣ гаммам̣ гад̇ам̣, взд̣̇анаад̣̇ивасзна д̇асса д̣̇идтагаало. нан̇г̇удтамууласса д̣̇идтагаало вияа д̇ассад̇д̇абхаавасса ж̇анагаанам̣ авиж̇ж̇аасан̇каараанам̣ д̣̇идтагаало. хздтаа гужчим̣ ологзнд̇асса бана аг̇г̇анан̇г̇удтан̃жзва жад̇д̇ааро жа хад̇т̇абаад̣̇з ад̣̇исвааби ‘‘абарибун̣н̣о сум̣сумааро’’д̇и аг̇ахзд̇ваа наяад̇о барибун̣н̣од̇взва г̇ахан̣ам̣ вияа яад̇т̇а яад̇т̇а бажжаяаваддам̣ баал̣ияам̣ на ааг̇ад̇ам̣, д̇ад̇т̇а д̇ад̇т̇а ‘‘д̣̇зсанаа абарибун̣н̣аа’’д̇и аг̇ахзд̇ваа наяад̇о барибун̣н̣аад̇взва г̇ахан̣ам̣ взд̣̇ид̇аб̣б̣ам̣. д̇ад̇т̇а жа аахаарад̇ан̣хаанам̣ анд̇арз зго санд̇хи, д̇ан̣хаавзд̣̇анаанам̣ анд̇арз зго, вин̃н̃аан̣асан̇каараанам̣ анд̇арз згод̇и звам̣ д̇исанд̇хижад̇усан̇кзбамзва ваддам̣ д̣̇ассид̇анд̇и. батамам̣.
Udakapiṭṭhe nipannasuṃsumāro viya hi tebhūmakavaṭṭaṃ. Tīre ṭhito cakkhumā puriso viya yogāvacaro. Tena purisena udakapiṭṭhe suṃsumārassa diṭṭhakālo viya yoginā āhāravasena imassattabhāvassa diṭṭhakālo. Parato gīvāya diṭṭhakālo viya imassattabhāvassa janikāya taṇhāya diṭṭhakālo. Piṭṭhiyā diṭṭhakālo viya yasmiṃ attabhāve taṇhāsaṅkhātaṃ kammaṃ kataṃ, vedanādivasena tassa diṭṭhakālo. Naṅguṭṭhamūlassa diṭṭhakālo viya tassattabhāvassa janakānaṃ avijjāsaṅkhārānaṃ diṭṭhakālo. Heṭṭhā kucchiṃ olokentassa pana agganaṅguṭṭhañceva cattāro ca hatthapāde adisvāpi ‘‘aparipuṇṇo suṃsumāro’’ti agahetvā nayato paripuṇṇotveva gahaṇaṃ viya yattha yattha paccayavaṭṭaṃ pāḷiyaṃ na āgataṃ, tattha tattha ‘‘desanā aparipuṇṇā’’ti agahetvā nayato paripuṇṇātveva gahaṇaṃ veditabbaṃ. Tattha ca āhārataṇhānaṃ antare eko sandhi, taṇhāvedanānaṃ antare eko, viññāṇasaṅkhārānaṃ antare ekoti evaṃ tisandhicatusaṅkhepameva vaṭṭaṃ dassitanti. Paṭhamaṃ.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 1. аахаарасуд̇д̇ам̣ • 1. Āhārasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 1. аахаарасуд̇д̇аван̣н̣анаа • 1. Āhārasuttavaṇṇanā
