| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
11. அஹிங்ஸானிக்³க³ஹபஞ்ஹோ
11. Ahiṃsāniggahapañho
11. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘அஹிங்ஸயங் பரங் லோகே, பியோ ஹோஹிஸி மாமகோ’தி. புன ச ப⁴ணிதங் ‘நிக்³க³ண்ஹே நிக்³க³ஹாரஹங், பக்³க³ண்ஹே பக்³க³ஹாரஹ’ந்தி. நிக்³க³ஹோ நாம, ப⁴ந்தே நாக³ஸேன, ஹத்த²ச்சே²தோ³ பாத³ச்சே²தோ³ வதோ⁴ ப³ந்த⁴னங் காரணா மாரணங் ஸந்ததிவிகோபனங், ந ஏதங் வசனங் ப⁴க³வதோ யுத்தங், ந ச ப⁴க³வா அரஹதி ஏதங் வசனங் வத்துங். யதி³, ப⁴ந்தே நாக³ஸேன, ப⁴க³வதா ப⁴ணிதங் ‘அஹிங்ஸயங் பரங் லோகே, பியோ ஹோஹிஸி மாமகோ’’தி, தேன ஹி ‘‘நிக்³க³ண்ஹே நிக்³க³ஹாரஹங், பக்³க³ண்ஹே பக்³க³ஹாரஹ’’ந்தி யங் வசனங், தங் மிச்சா². யதி³ ததா²க³தேன ப⁴ணிதங் ‘‘நிக்³க³ண்ஹே நிக்³க³ஹாரஹங், பக்³க³ண்ஹே பக்³க³ஹாரஹ’’ந்தி, தேன ஹி ‘‘அஹிங்ஸயங் பரங் லோகே, பியோ ஹோஹிஸி மாமகோ’’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
11. ‘‘Bhante nāgasena, bhāsitampetaṃ bhagavatā ‘ahiṃsayaṃ paraṃ loke, piyo hohisi māmako’ti. Puna ca bhaṇitaṃ ‘niggaṇhe niggahārahaṃ, paggaṇhe paggahāraha’nti. Niggaho nāma, bhante nāgasena, hatthacchedo pādacchedo vadho bandhanaṃ kāraṇā māraṇaṃ santativikopanaṃ, na etaṃ vacanaṃ bhagavato yuttaṃ, na ca bhagavā arahati etaṃ vacanaṃ vattuṃ. Yadi, bhante nāgasena, bhagavatā bhaṇitaṃ ‘ahiṃsayaṃ paraṃ loke, piyo hohisi māmako’’ti, tena hi ‘‘niggaṇhe niggahārahaṃ, paggaṇhe paggahāraha’’nti yaṃ vacanaṃ, taṃ micchā. Yadi tathāgatena bhaṇitaṃ ‘‘niggaṇhe niggahārahaṃ, paggaṇhe paggahāraha’’nti, tena hi ‘‘ahiṃsayaṃ paraṃ loke, piyo hohisi māmako’’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘அஹிங்ஸயங் பரங் லோகே, பியோ ஹோஹிஸி மாமகோ’தி, ப⁴ணிதஞ்ச ‘நிக்³க³ண்ஹே நிக்³க³ஹாரஹங், பக்³க³ண்ஹே பக்³க³ஹாரஹ’ந்தி . ‘அஹிங்ஸயங் பரங் லோகே, பியோ ஹோஹிஸி மாமகோ’தி ஸப்³பே³ஸங், மஹாராஜ, ததா²க³தானங் அனுமதங் ஏதங், ஏஸா அனுஸிட்டி², ஏஸா த⁴ம்மதே³ஸனா, த⁴ம்மோ ஹி, மஹாராஜ, அஹிங்ஸாலக்க²ணோ, ஸபா⁴வவசனங் ஏதங். யங் பன, மஹாராஜ, ததா²க³தோ ஆஹ ‘நிக்³க³ண்ஹே நிக்³க³ஹாரஹங், பக்³க³ண்ஹே பக்³க³ஹாரஹ’ந்தி, பா⁴ஸா ஏஸா, உத்³த⁴தங், மஹாராஜ, சித்தங் நிக்³க³ஹேதப்³ப³ங், லீனங் சித்தங் பக்³க³ஹேதப்³ப³ங். அகுஸலங் சித்தங் நிக்³க³ஹேதப்³ப³ங், குஸலங் சித்தங் பக்³க³ஹேதப்³ப³ங். அயோனிஸோ மனஸிகாரோ நிக்³க³ஹேதப்³போ³, யோனிஸோ மனஸிகாரோ பக்³க³ஹேதப்³போ³. மிச்சா²படிபன்னோ நிக்³க³ஹேதப்³போ³, ஸம்மாபடிபன்னோ பக்³க³ஹேதப்³போ³. அனரியோ நிக்³க³ஹேதப்³போ³ அரியோ பக்³க³ஹேதப்³போ³. சோரோ நிக்³க³ஹேதப்³போ³, அசோரோ பக்³க³ஹேதப்³போ³’’தி.
‘‘Bhāsitampetaṃ, mahārāja, bhagavatā ‘ahiṃsayaṃ paraṃ loke, piyo hohisi māmako’ti, bhaṇitañca ‘niggaṇhe niggahārahaṃ, paggaṇhe paggahāraha’nti . ‘Ahiṃsayaṃ paraṃ loke, piyo hohisi māmako’ti sabbesaṃ, mahārāja, tathāgatānaṃ anumataṃ etaṃ, esā anusiṭṭhi, esā dhammadesanā, dhammo hi, mahārāja, ahiṃsālakkhaṇo, sabhāvavacanaṃ etaṃ. Yaṃ pana, mahārāja, tathāgato āha ‘niggaṇhe niggahārahaṃ, paggaṇhe paggahāraha’nti, bhāsā esā, uddhataṃ, mahārāja, cittaṃ niggahetabbaṃ, līnaṃ cittaṃ paggahetabbaṃ. Akusalaṃ cittaṃ niggahetabbaṃ, kusalaṃ cittaṃ paggahetabbaṃ. Ayoniso manasikāro niggahetabbo, yoniso manasikāro paggahetabbo. Micchāpaṭipanno niggahetabbo, sammāpaṭipanno paggahetabbo. Anariyo niggahetabbo ariyo paggahetabbo. Coro niggahetabbo, acoro paggahetabbo’’ti.
‘‘ஹோது, ப⁴ந்தே நாக³ஸேன, இதா³னி த்வங் பச்சாக³தோஸி மம விஸயங், யமஹங் புச்சா²மி, ஸோ மே அத்தோ² உபக³தோ. சோரோ பன, ப⁴ந்தே நாக³ஸேன, நிக்³க³ண்ஹந்தேன கத²ங் நிக்³க³ஹேதப்³போ³’’தி? ‘‘சோரோ, மஹாராஜ, நிக்³க³ண்ஹந்தேன ஏவங் நிக்³க³ஹேதப்³போ³, பரிபா⁴ஸனீயோ பரிபா⁴ஸிதப்³போ³, த³ண்ட³னீயோ த³ண்டே³தப்³போ³, பப்³பா³ஜனீயோ பப்³பா³ஜேதப்³போ³, ப³ந்த⁴னீயோ ப³ந்தி⁴தப்³போ³, கா⁴தனீயோ கா⁴தேதப்³போ³’’தி. ‘‘யங் பன, ப⁴ந்தே நாக³ஸேன, சோரானங் கா⁴தனங், தங் ததா²க³தானங் அனுமத’’ந்தி? ‘‘ந ஹி, மஹாராஜா’’தி. ‘‘கிஸ்ஸ பன சோரோ அனுஸாஸனீயோ அனுமதோ ததா²க³தான’’ந்தி? ‘‘யோ ஸோ, மஹாராஜ, கா⁴தீயதி, ந ஸோ ததா²க³தானங் அனுமதியா கா⁴தீயதி, ஸயங்கதேன ஸோ கா⁴தீயதி, அபி ச த⁴ம்மானுஸிட்டி²யா அனுஸாஸீயதி, ஸக்கா பன, மஹாராஜ, தயா புரிஸங் அகாரகங் அனபராத⁴ங் வீதி²யங் சரந்தங் க³ஹெத்வா கா⁴தயிது’’ந்தி? ‘‘ந ஸக்கா, ப⁴ந்தே’’தி. ‘‘கேன காரணேன, மஹாராஜா’’தி? ‘‘அகாரகத்தா, ப⁴ந்தே’’தி. ‘‘ஏவமேவ கோ², மஹாராஜ, ந சோரோ ததா²க³தானங் அனுமதியா ஹஞ்ஞதி, ஸயங்கதேன ஸோ ஹஞ்ஞதி, கிங் பனெத்த² அனுஸாஸகோ கிஞ்சி தோ³ஸங் ஆபஜ்ஜதீ’’தி? ‘‘ந ஹி ப⁴ந்தே’’தி. ‘‘தேன ஹி, மஹாராஜ, ததா²க³தானங் அனுஸிட்டி² ஸம்மானுஸிட்டி² ஹோதீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Hotu, bhante nāgasena, idāni tvaṃ paccāgatosi mama visayaṃ, yamahaṃ pucchāmi, so me attho upagato. Coro pana, bhante nāgasena, niggaṇhantena kathaṃ niggahetabbo’’ti? ‘‘Coro, mahārāja, niggaṇhantena evaṃ niggahetabbo, paribhāsanīyo paribhāsitabbo, daṇḍanīyo daṇḍetabbo, pabbājanīyo pabbājetabbo, bandhanīyo bandhitabbo, ghātanīyo ghātetabbo’’ti. ‘‘Yaṃ pana, bhante nāgasena, corānaṃ ghātanaṃ, taṃ tathāgatānaṃ anumata’’nti? ‘‘Na hi, mahārājā’’ti. ‘‘Kissa pana coro anusāsanīyo anumato tathāgatāna’’nti? ‘‘Yo so, mahārāja, ghātīyati, na so tathāgatānaṃ anumatiyā ghātīyati, sayaṃkatena so ghātīyati, api ca dhammānusiṭṭhiyā anusāsīyati, sakkā pana, mahārāja, tayā purisaṃ akārakaṃ anaparādhaṃ vīthiyaṃ carantaṃ gahetvā ghātayitu’’nti? ‘‘Na sakkā, bhante’’ti. ‘‘Kena kāraṇena, mahārājā’’ti? ‘‘Akārakattā, bhante’’ti. ‘‘Evameva kho, mahārāja, na coro tathāgatānaṃ anumatiyā haññati, sayaṃkatena so haññati, kiṃ panettha anusāsako kiñci dosaṃ āpajjatī’’ti? ‘‘Na hi bhante’’ti. ‘‘Tena hi, mahārāja, tathāgatānaṃ anusiṭṭhi sammānusiṭṭhi hotī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
அஹிங்ஸானிக்³க³ஹபஞ்ஹோ ஏகாத³ஸமோ.
Ahiṃsāniggahapañho ekādasamo.
