| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. அஹிராஜஸுத்தவண்ணனா
7. Ahirājasuttavaṇṇanā
67. ஸத்தமே இமானி சத்தாரி அஹிராஜகுலானீதி இத³ங் த³ட்ட²விஸானேவ ஸந்தா⁴ய வுத்தங். யே ஹி கேசி த³ட்ட²விஸா, ஸப்³பே³தே இமேஸங் சதுன்னங் அஹிராஜகுலானங் அப்³ப⁴ந்தரக³தாவ ஹொந்தி. அத்தகு³த்தியாதி அத்தனோ கு³த்தத்தா²ய. அத்தரக்கா²யாதி அத்தனோ ரக்க²ணத்தா²ய. அத்தபரித்தாயாதி அத்தனோ பரித்தாணத்தா²ய. பரித்தங் நாம அனுஜானாமீதி அத்தோ².
67. Sattame imāni cattāri ahirājakulānīti idaṃ daṭṭhavisāneva sandhāya vuttaṃ. Ye hi keci daṭṭhavisā, sabbete imesaṃ catunnaṃ ahirājakulānaṃ abbhantaragatāva honti. Attaguttiyāti attano guttatthāya. Attarakkhāyāti attano rakkhaṇatthāya. Attaparittāyāti attano parittāṇatthāya. Parittaṃ nāma anujānāmīti attho.
இதா³னி யதா² தங் பரித்தங் காதப்³ப³ங், தங் த³ஸ்ஸெந்தோ விரூபக்கே²ஹி மேதிஆதி³மாஹ. தத்த² விரூபக்கே²ஹீதி விரூபக்க²னாக³குலேஹி. ஸேஸேஸுபி ஏஸேவ நயோ. அபாத³கேஹீதி அபாத³கஸத்தேஹி. ஸேஸேஸுபி ஏஸேவ நயோ. ஸப்³பே³ ஸத்தாதி இதோ புப்³பே³ எத்தகேன டா²னேன ஓதி³ஸ்ஸகமெத்தங் கதெ²த்வா இதா³னி அனோதி³ஸ்ஸகமெத்தங் கதே²துங் இத³மாரத்³த⁴ங். தத்த² ஸத்தா பாணா பூ⁴தாதி ஸப்³பா³னேதானி புக்³க³லவேவசனானேவ. ப⁴த்³ரானி பஸ்ஸந்தூதி ப⁴த்³ரானி ஆரம்மணானி பஸ்ஸந்து. மா கஞ்சி பாபமாக³மாதி கஞ்சி ஸத்தங் பாபகங் லாமகங் மா ஆக³ச்ச²து. அப்பமாணோ பு³த்³தோ⁴தி எத்த² பு³த்³தோ⁴தி பு³த்³த⁴கு³ணா வேதி³தப்³பா³. தே ஹி அப்பமாணா நாம. ஸேஸபத³த்³வயேபி ஏஸேவ நயோ. பமாணவந்தானீதி கு³ணப்பமாணேன யுத்தானி. உண்ணனாபீ⁴தி லோமஸனாபி⁴கோ மக்கடகோ. ஸரபூ³தி க⁴ரகோ³லிகா. கதா மே ரக்கா², கதா மே பரித்தாதி மயா எத்தகஸ்ஸ ஜனஸ்ஸ ரக்கா² ச பரித்தாணஞ்ச கதங். படிக்கமந்து பூ⁴தானீதி ஸப்³பே³பி மே கதபரித்தாணா ஸத்தா அபக³ச்ச²ந்து, மா மங் விஹேட²யிங்ஸூதி அத்தோ².
Idāni yathā taṃ parittaṃ kātabbaṃ, taṃ dassento virūpakkhehi metiādimāha. Tattha virūpakkhehīti virūpakkhanāgakulehi. Sesesupi eseva nayo. Apādakehīti apādakasattehi. Sesesupi eseva nayo. Sabbe sattāti ito pubbe ettakena ṭhānena odissakamettaṃ kathetvā idāni anodissakamettaṃ kathetuṃ idamāraddhaṃ. Tattha sattā pāṇā bhūtāti sabbānetāni puggalavevacanāneva. Bhadrāni passantūti bhadrāni ārammaṇāni passantu. Mā kañci pāpamāgamāti kañci sattaṃ pāpakaṃ lāmakaṃ mā āgacchatu. Appamāṇo buddhoti ettha buddhoti buddhaguṇā veditabbā. Te hi appamāṇā nāma. Sesapadadvayepi eseva nayo. Pamāṇavantānīti guṇappamāṇena yuttāni. Uṇṇanābhīti lomasanābhiko makkaṭako. Sarabūti gharagolikā. Katā me rakkhā, katā me parittāti mayā ettakassa janassa rakkhā ca parittāṇañca kataṃ. Paṭikkamantu bhūtānīti sabbepi me kataparittāṇā sattā apagacchantu, mā maṃ viheṭhayiṃsūti attho.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. அஹிராஜஸுத்தங் • 7. Ahirājasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. அஹிராஜஸுத்தவண்ணனா • 7. Ahirājasuttavaṇṇanā
