| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
37. அஹிவாதகரோக³வத்து²
37. Ahivātakarogavatthu
100. தேன கோ² பன ஸமயேன அஞ்ஞதரங் குலங் அஹிவாதகரோகே³ன காலங்கதங் ஹோதி. தஸ்ஸ பிதாபுத்தகா ஸேஸா ஹொந்தி. தே பி⁴க்கூ²ஸு பப்³ப³ஜித்வா ஏகதோவ பிண்டா³ய சரந்தி. அத² கோ² ஸோ தா³ரகோ பிதுனோ பி⁴க்கா²ய தி³ன்னாய உபதா⁴வித்வா ஏதத³வோச – ‘‘மய்ஹம்பி, தாத, தே³ஹி; மய்ஹம்பி , தாத, தே³ஹீ’’தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘அப்³ரஹ்மசாரினோ இமே ஸமணா ஸக்யபுத்தியா. அயம்பி தா³ரகோ பி⁴க்கு²னியா ஜாதோ’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, ஊனபன்னரஸவஸ்ஸோ தா³ரகோ பப்³பா³ஜேதப்³போ³. யோ பப்³பா³ஜெய்ய, ஆபத்தி து³க்கடஸ்ஸாதி.
100. Tena kho pana samayena aññataraṃ kulaṃ ahivātakarogena kālaṅkataṃ hoti. Tassa pitāputtakā sesā honti. Te bhikkhūsu pabbajitvā ekatova piṇḍāya caranti. Atha kho so dārako pituno bhikkhāya dinnāya upadhāvitvā etadavoca – ‘‘mayhampi, tāta, dehi; mayhampi , tāta, dehī’’ti. Manussā ujjhāyanti khiyyanti vipācenti – ‘‘abrahmacārino ime samaṇā sakyaputtiyā. Ayampi dārako bhikkhuniyā jāto’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Na, bhikkhave, ūnapannarasavasso dārako pabbājetabbo. Yo pabbājeyya, āpatti dukkaṭassāti.
தேன கோ² பன ஸமயேன ஆயஸ்மதோ ஆனந்த³ஸ்ஸ உபட்டா²ககுலங் ஸத்³த⁴ங் பஸன்னங் அஹிவாதகரோகே³ன காலங்கதங் ஹோதி, த்³வே ச தா³ரகா ஸேஸா ஹொந்தி. தே போராணகேன ஆசிண்ணகப்பேன பி⁴க்கூ² பஸ்ஸித்வா உபதா⁴வந்தி. பி⁴க்கூ² அபஸாதெ³ந்தி. தே பி⁴க்கூ²ஹி அபஸாதி³யமானா ரோத³ந்தி. அத² கோ² ஆயஸ்மதோ ஆனந்த³ஸ்ஸ ஏதத³ஹோஸி – ‘‘ப⁴க³வதா பஞ்ஞத்தங் ‘ந ஊனபன்னரஸவஸ்ஸோ தா³ரகோ பப்³பா³ஜேதப்³போ³’தி. இமே ச தா³ரகா ஊனபன்னரஸவஸ்ஸா. கேன நு கோ² உபாயேன இமே தா³ரகா ந வினஸ்ஸெய்யு’’ந்தி? அத² கோ² ஆயஸ்மா ஆனந்தோ³ ப⁴க³வதோ ஏதமத்த²ங் ஆரோசேஸி. உஸ்ஸஹந்தி பன தே, ஆனந்த³, தா³ரகா காகே உட்³டா³பேதுந்தி? உஸ்ஸஹந்தி, ப⁴க³வாதி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, ஊனபன்னரஸவஸ்ஸங் தா³ரகங் காகுட்³டே³பகங் பப்³பா³ஜேது’’ந்தி.
Tena kho pana samayena āyasmato ānandassa upaṭṭhākakulaṃ saddhaṃ pasannaṃ ahivātakarogena kālaṅkataṃ hoti, dve ca dārakā sesā honti. Te porāṇakena āciṇṇakappena bhikkhū passitvā upadhāvanti. Bhikkhū apasādenti. Te bhikkhūhi apasādiyamānā rodanti. Atha kho āyasmato ānandassa etadahosi – ‘‘bhagavatā paññattaṃ ‘na ūnapannarasavasso dārako pabbājetabbo’ti. Ime ca dārakā ūnapannarasavassā. Kena nu kho upāyena ime dārakā na vinasseyyu’’nti? Atha kho āyasmā ānando bhagavato etamatthaṃ ārocesi. Ussahanti pana te, ānanda, dārakā kāke uḍḍāpetunti? Ussahanti, bhagavāti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ūnapannarasavassaṃ dārakaṃ kākuḍḍepakaṃ pabbājetu’’nti.
அஹிவாதகரோக³வத்து² நிட்டி²தங்.
Ahivātakarogavatthu niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / கம்மாரப⁴ண்டு³வத்தா²தி³கதா² • Kammārabhaṇḍuvatthādikathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / கம்மாரப⁴ண்டு³வத்தா²தி³கதா²வண்ணனா • Kammārabhaṇḍuvatthādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 35. கம்மாரப⁴ண்டு³வத்து²ஆதி³கதா² • 35. Kammārabhaṇḍuvatthuādikathā
