| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
37. අහිවාතකරොගවත්‌ථු
37. Ahivātakarogavatthu
100. තෙන ඛො පන සමයෙන අඤ්‌ඤතරං කුලං අහිවාතකරොගෙන කාලඞ්‌කතං හොති. තස්‌ස පිතාපුත්‌තකා සෙසා හොන්‌ති. තෙ භික්‌ඛූසු පබ්‌බජිත්‌වා එකතොව පිණ්‌ඩාය චරන්‌ති. අථ ඛො සො දාරකො පිතුනො භික්‌ඛාය දින්‌නාය උපධාවිත්‌වා එතදවොච – ‘‘මය්‌හම්‌පි, තාත, දෙහි; මය්‌හම්‌පි , තාත, දෙහී’’ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘අබ්‍රහ්‌මචාරිනො ඉමෙ සමණා සක්‍යපුත්‌තියා. අයම්‌පි දාරකො භික්‌ඛුනියා ජාතො’’ති. අස්‌සොසුං ඛො භික්‌ඛූ තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. අථ ඛො තෙ භික්‌ඛූ භගවතො එතමත්‌ථං ආරොචෙසුං. න, භික්‌ඛවෙ, ඌනපන්‌නරසවස්‌සො දාරකො පබ්‌බාජෙතබ්‌බො. යො පබ්‌බාජෙය්‍ය, ආපත්‌ති දුක්‌කටස්‌සාති.
100. Tena kho pana samayena aññataraṃ kulaṃ ahivātakarogena kālaṅkataṃ hoti. Tassa pitāputtakā sesā honti. Te bhikkhūsu pabbajitvā ekatova piṇḍāya caranti. Atha kho so dārako pituno bhikkhāya dinnāya upadhāvitvā etadavoca – ‘‘mayhampi, tāta, dehi; mayhampi , tāta, dehī’’ti. Manussā ujjhāyanti khiyyanti vipācenti – ‘‘abrahmacārino ime samaṇā sakyaputtiyā. Ayampi dārako bhikkhuniyā jāto’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Na, bhikkhave, ūnapannarasavasso dārako pabbājetabbo. Yo pabbājeyya, āpatti dukkaṭassāti.
තෙන ඛො පන සමයෙන ආයස්‌මතො ආනන්‌දස්‌ස උපට්‌ඨාකකුලං සද්‌ධං පසන්‌නං අහිවාතකරොගෙන කාලඞ්‌කතං හොති, ද්‌වෙ ච දාරකා සෙසා හොන්‌ති. තෙ පොරාණකෙන ආචිණ්‌ණකප්‌පෙන භික්‌ඛූ පස්‌සිත්‌වා උපධාවන්‌ති. භික්‌ඛූ අපසාදෙන්‌ති. තෙ භික්‌ඛූහි අපසාදියමානා රොදන්‌ති. අථ ඛො ආයස්‌මතො ආනන්‌දස්‌ස එතදහොසි – ‘‘භගවතා පඤ්‌ඤත්‌තං ‘න ඌනපන්‌නරසවස්‌සො දාරකො පබ්‌බාජෙතබ්‌බො’ති. ඉමෙ ච දාරකා ඌනපන්‌නරසවස්‌සා. කෙන නු ඛො උපායෙන ඉමෙ දාරකා න විනස්‌සෙය්‍යු’’න්‌ති? අථ ඛො ආයස්‌මා ආනන්‌දො භගවතො එතමත්‌ථං ආරොචෙසි. උස්‌සහන්‌ති පන තෙ, ආනන්‌ද, දාරකා කාකෙ උඩ්‌ඩාපෙතුන්‌ති? උස්‌සහන්‌ති, භගවාති. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘අනුජානාමි, භික්‌ඛවෙ, ඌනපන්‌නරසවස්‌සං දාරකං කාකුඩ්‌ඩෙපකං පබ්‌බාජෙතු’’න්‌ති.
Tena kho pana samayena āyasmato ānandassa upaṭṭhākakulaṃ saddhaṃ pasannaṃ ahivātakarogena kālaṅkataṃ hoti, dve ca dārakā sesā honti. Te porāṇakena āciṇṇakappena bhikkhū passitvā upadhāvanti. Bhikkhū apasādenti. Te bhikkhūhi apasādiyamānā rodanti. Atha kho āyasmato ānandassa etadahosi – ‘‘bhagavatā paññattaṃ ‘na ūnapannarasavasso dārako pabbājetabbo’ti. Ime ca dārakā ūnapannarasavassā. Kena nu kho upāyena ime dārakā na vinasseyyu’’nti? Atha kho āyasmā ānando bhagavato etamatthaṃ ārocesi. Ussahanti pana te, ānanda, dārakā kāke uḍḍāpetunti? Ussahanti, bhagavāti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ūnapannarasavassaṃ dārakaṃ kākuḍḍepakaṃ pabbājetu’’nti.
අහිවාතකරොගවත්‌ථු නිට්‌ඨිතං.
Ahivātakarogavatthu niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / කම්‌මාරභණ්‌ඩුවත්‌ථාදිකථා • Kammārabhaṇḍuvatthādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / කම්‌මාරභණ්‌ඩුවත්‌ථාදිකථාවණ්‌ණනා • Kammārabhaṇḍuvatthādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 35. කම්‌මාරභණ්‌ඩුවත්‌ථුආදිකථා • 35. Kammārabhaṇḍuvatthuādikathā
