| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၃၉. အာဟုန္ဒရိကဝတ္ထု
39. Āhundarikavatthu
၁၀၂. တေန ခော ပန သမယေန ဘဂဝာ တတ္ထေဝ ရာဇဂဟေ ဝသ္သံ ဝသိ, တတ္ထ ဟေမန္တံ, တတ္ထ ဂိမ္ဟံ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘အာဟုန္ဒရိကာ သမဏာနံ သက္ယပုတ္တိယာနံ ဒိသာ အန္ဓကာရာ, န ဣမေသံ ဒိသာ ပက္ခာယန္တီ’’တိ။ အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ အာယသ္မန္တံ အာနန္ဒံ အာမန္တေသိ – ‘‘ဂစ္ဆာနန္ဒ, အဝာပုရဏံ 1 အာဒာယ အနုပရိဝေဏိယံ ဘိက္ခူနံ အာရောစေဟိ – ‘‘ဣစ္ဆတာဝုသော ဘဂဝာ ဒက္ခိဏာဂိရိံ စာရိကံ ပက္ကမိတုံ။ ယသ္သာယသ္မတော အတ္ထော, သော အာဂစ္ဆတူ’’တိ။ ဧဝံ, ဘန္တေ, တိ ခော အာယသ္မာ အာနန္ဒော ဘဂဝတော ပဋိသ္သုဏိတ္ဝာ အဝာပုရဏံ အာဒာယ အနုပရိဝေဏိယံ ဘိက္ခူနံ အာရောစေသိ – ‘ဣစ္ဆတာဝုသော ဘဂဝာ ဒက္ခိဏာဂိရိံ စာရိကံ ပက္ကမိတုံ။ ယသ္သာယသ္မတော အတ္ထော, သော အာဂစ္ဆတူ’’’တိ။ ဘိက္ခူ ဧဝမာဟံသု – ‘‘ဘဂဝတာ, အာဝုသော အာနန္ဒ, ပညတ္တံ ဒသဝသ္သာနိ နိသ္သာယ ဝတ္ထုံ, ဒသဝသ္သေန နိသ္သယံ ဒာတုံ။ တတ္ထ စ နော ဂန္တဗ္ဗံ ဘဝိသ္သတိ, နိသ္သယော စ ဂဟေတဗ္ဗော ဘဝိသ္သတိ, ဣတ္တရော စ ဝာသော ဘဝိသ္သတိ, ပုန စ ပစ္စာဂန္တဗ္ဗံ ဘဝိသ္သတိ, ပုန စ နိသ္သယော ဂဟေတဗ္ဗော ဘဝိသ္သတိ။ သစေ အမ္ဟာကံ အာစရိယုပဇ္ဈာယာ ဂမိသ္သန္တိ, မယမ္ပိ ဂမိသ္သာမ; နော စေ အမ္ဟာကံ အာစရိယုပဇ္ဈာယာ ဂမိသ္သန္တိ, မယမ္ပိ န ဂမိသ္သာမ။ လဟုစိတ္တကတာ နော, အာဝုသော အာနန္ဒ, ပညာယိသ္သတီ’’တိ။ အထ ခော ဘဂဝာ ဩဂဏေန ဘိက္ခုသင္ဃေန ဒက္ခိဏာဂိရိံ စာရိကံ ပက္ကာမိ။
102. Tena kho pana samayena bhagavā tattheva rājagahe vassaṃ vasi, tattha hemantaṃ, tattha gimhaṃ. Manussā ujjhāyanti khiyyanti vipācenti – ‘‘āhundarikā samaṇānaṃ sakyaputtiyānaṃ disā andhakārā, na imesaṃ disā pakkhāyantī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā āyasmantaṃ ānandaṃ āmantesi – ‘‘gacchānanda, avāpuraṇaṃ 2 ādāya anupariveṇiyaṃ bhikkhūnaṃ ārocehi – ‘‘icchatāvuso bhagavā dakkhiṇāgiriṃ cārikaṃ pakkamituṃ. Yassāyasmato attho, so āgacchatū’’ti. Evaṃ, bhante, ti kho āyasmā ānando bhagavato paṭissuṇitvā avāpuraṇaṃ ādāya anupariveṇiyaṃ bhikkhūnaṃ ārocesi – ‘icchatāvuso bhagavā dakkhiṇāgiriṃ cārikaṃ pakkamituṃ. Yassāyasmato attho, so āgacchatū’’’ti. Bhikkhū evamāhaṃsu – ‘‘bhagavatā, āvuso ānanda, paññattaṃ dasavassāni nissāya vatthuṃ, dasavassena nissayaṃ dātuṃ. Tattha ca no gantabbaṃ bhavissati, nissayo ca gahetabbo bhavissati, ittaro ca vāso bhavissati, puna ca paccāgantabbaṃ bhavissati, puna ca nissayo gahetabbo bhavissati. Sace amhākaṃ ācariyupajjhāyā gamissanti, mayampi gamissāma; no ce amhākaṃ ācariyupajjhāyā gamissanti, mayampi na gamissāma. Lahucittakatā no, āvuso ānanda, paññāyissatī’’ti. Atha kho bhagavā ogaṇena bhikkhusaṅghena dakkhiṇāgiriṃ cārikaṃ pakkāmi.
အာဟုန္ဒရိကဝတ္ထု နိဋ္ဌိတံ။
Āhundarikavatthu niṭṭhitaṃ.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ကမ္မာရဘဏ္ဍုဝတ္ထာဒိကထာ • Kammārabhaṇḍuvatthādikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ကမ္မာရဘဏ္ဍုဝတ္ထာဒိကထာဝဏ္ဏနာ • Kammārabhaṇḍuvatthādikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၃၅. ကမ္မာရဘဏ္ဍုဝတ္ထုအာဒိကထာ • 35. Kammārabhaṇḍuvatthuādikathā
