| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༣༩. ཨཱཧུནྡརིཀཝཏྠུ
39. Āhundarikavatthu
༡༠༢. ཏེན ཁོ པན སམཡེན བྷགཝཱ ཏཏྠེཝ རཱཛགཧེ ཝསྶཾ ཝསི, ཏཏྠ ཧེམནྟཾ, ཏཏྠ གིམྷཾ། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཨཱཧུནྡརིཀཱ སམཎཱནཾ སཀྱཔུཏྟིཡཱནཾ དིསཱ ཨནྡྷཀཱརཱ, ན ཨིམེསཾ དིསཱ པཀྑཱཡནྟཱི’’ཏི། ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨཱཡསྨནྟཾ ཨཱནནྡཾ ཨཱམནྟེསི – ‘‘གཙྪཱནནྡ, ཨཝཱཔུརཎཾ 1 ཨཱདཱཡ ཨནུཔརིཝེཎིཡཾ བྷིཀྑཱུནཾ ཨཱརོཙེཧི – ‘‘ཨིཙྪཏཱཝུསོ བྷགཝཱ དཀྑིཎཱགིརིཾ ཙཱརིཀཾ པཀྐམིཏུཾ། ཡསྶཱཡསྨཏོ ཨཏྠོ, སོ ཨཱགཙྪཏཱུ’’ཏི། ཨེཝཾ, བྷནྟེ, ཏི ཁོ ཨཱཡསྨཱ ཨཱནནྡོ བྷགཝཏོ པཊིསྶུཎིཏྭཱ ཨཝཱཔུརཎཾ ཨཱདཱཡ ཨནུཔརིཝེཎིཡཾ བྷིཀྑཱུནཾ ཨཱརོཙེསི – ‘ཨིཙྪཏཱཝུསོ བྷགཝཱ དཀྑིཎཱགིརིཾ ཙཱརིཀཾ པཀྐམིཏུཾ། ཡསྶཱཡསྨཏོ ཨཏྠོ, སོ ཨཱགཙྪཏཱུ’’’ཏི། བྷིཀྑཱུ ཨེཝམཱཧཾསུ – ‘‘བྷགཝཏཱ, ཨཱཝུསོ ཨཱནནྡ, པཉྙཏྟཾ དསཝསྶཱནི ནིསྶཱཡ ཝཏྠུཾ, དསཝསྶེན ནིསྶཡཾ དཱཏུཾ། ཏཏྠ ཙ ནོ གནྟབྦཾ བྷཝིསྶཏི, ནིསྶཡོ ཙ གཧེཏབྦོ བྷཝིསྶཏི, ཨིཏྟརོ ཙ ཝཱསོ བྷཝིསྶཏི, པུན ཙ པཙྩཱགནྟབྦཾ བྷཝིསྶཏི, པུན ཙ ནིསྶཡོ གཧེཏབྦོ བྷཝིསྶཏི། སཙེ ཨམྷཱཀཾ ཨཱཙརིཡུཔཛ྄ཛྷཱཡཱ གམིསྶནྟི, མཡམྤི གམིསྶཱམ; ནོ ཙེ ཨམྷཱཀཾ ཨཱཙརིཡུཔཛ྄ཛྷཱཡཱ གམིསྶནྟི, མཡམྤི ན གམིསྶཱམ། ལཧུཙིཏྟཀཏཱ ནོ, ཨཱཝུསོ ཨཱནནྡ, པཉྙཱཡིསྶཏཱི’’ཏི། ཨཐ ཁོ བྷགཝཱ ཨོགཎེན བྷིཀྑུསངྒྷེན དཀྑིཎཱགིརིཾ ཙཱརིཀཾ པཀྐཱམི།
102. Tena kho pana samayena bhagavā tattheva rājagahe vassaṃ vasi, tattha hemantaṃ, tattha gimhaṃ. Manussā ujjhāyanti khiyyanti vipācenti – ‘‘āhundarikā samaṇānaṃ sakyaputtiyānaṃ disā andhakārā, na imesaṃ disā pakkhāyantī’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā āyasmantaṃ ānandaṃ āmantesi – ‘‘gacchānanda, avāpuraṇaṃ 2 ādāya anupariveṇiyaṃ bhikkhūnaṃ ārocehi – ‘‘icchatāvuso bhagavā dakkhiṇāgiriṃ cārikaṃ pakkamituṃ. Yassāyasmato attho, so āgacchatū’’ti. Evaṃ, bhante, ti kho āyasmā ānando bhagavato paṭissuṇitvā avāpuraṇaṃ ādāya anupariveṇiyaṃ bhikkhūnaṃ ārocesi – ‘icchatāvuso bhagavā dakkhiṇāgiriṃ cārikaṃ pakkamituṃ. Yassāyasmato attho, so āgacchatū’’’ti. Bhikkhū evamāhaṃsu – ‘‘bhagavatā, āvuso ānanda, paññattaṃ dasavassāni nissāya vatthuṃ, dasavassena nissayaṃ dātuṃ. Tattha ca no gantabbaṃ bhavissati, nissayo ca gahetabbo bhavissati, ittaro ca vāso bhavissati, puna ca paccāgantabbaṃ bhavissati, puna ca nissayo gahetabbo bhavissati. Sace amhākaṃ ācariyupajjhāyā gamissanti, mayampi gamissāma; no ce amhākaṃ ācariyupajjhāyā gamissanti, mayampi na gamissāma. Lahucittakatā no, āvuso ānanda, paññāyissatī’’ti. Atha kho bhagavā ogaṇena bhikkhusaṅghena dakkhiṇāgiriṃ cārikaṃ pakkāmi.
ཨཱཧུནྡརིཀཝཏྠུ ནིཊྛིཏཾ།
Āhundarikavatthu niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཀམྨཱརབྷཎྜུཝཏྠཱདིཀཐཱ • Kammārabhaṇḍuvatthādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཀམྨཱརབྷཎྜུཝཏྠཱདིཀཐཱཝཎྞནཱ • Kammārabhaṇḍuvatthādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣༥. ཀམྨཱརབྷཎྜུཝཏྠུཨཱདིཀཐཱ • 35. Kammārabhaṇḍuvatthuādikathā
