| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๑๐. อชครงฺคปโญฺห
10. Ajagaraṅgapañho
๑๐. ‘‘ภเนฺต นาคเสน, ‘อชครสฺส เอกํ องฺคํ คเหตพฺพ’นฺติ ยํ วเทสิ, กตมํ ตํ เอกํ องฺคํ คเหตพฺพ’’นฺติ? ‘‘ยถา, มหาราช, อชคโร มหติมหากาโย พหูปิ ทิวเส อูนูทโร ทีนตโร กุจฺฉิปูรํ อาหารํ น ลภติ, อปริปุโณฺณ เยว ยาวเทว สรีรยาปนมตฺตเกน ยาเปติ, เอวเมว โข, มหาราช, โยคิโน โยคาวจรสฺส ภิกฺขาจริยปฺปสุตสฺส ปรปิณฺฑมุปคตสฺส ปรทินฺนปฺปาฎิกงฺขิสฺส สยํคาหปฺปฎิวิรตสฺส ทุลฺลภํ อุทรปริปูรํ อาหารํ, อปิ จ อตฺถวสิเกน กุลปุเตฺตน จตฺตาโร ปญฺจ อาโลเป อภุญฺชิตฺวา อวเสสํ อุทเกน ปริปูเรตพฺพํฯ อิทํ, มหาราช, อชครสฺส เอกํ องฺคํ คเหตพฺพํฯ ภาสิตเมฺปตํ, มหาราช, เถเรน สาริปุเตฺตน ธมฺมเสนาปตินา –
10. ‘‘Bhante nāgasena, ‘ajagarassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, ajagaro mahatimahākāyo bahūpi divase ūnūdaro dīnataro kucchipūraṃ āhāraṃ na labhati, aparipuṇṇo yeva yāvadeva sarīrayāpanamattakena yāpeti, evameva kho, mahārāja, yogino yogāvacarassa bhikkhācariyappasutassa parapiṇḍamupagatassa paradinnappāṭikaṅkhissa sayaṃgāhappaṭiviratassa dullabhaṃ udaraparipūraṃ āhāraṃ, api ca atthavasikena kulaputtena cattāro pañca ālope abhuñjitvā avasesaṃ udakena paripūretabbaṃ. Idaṃ, mahārāja, ajagarassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘อลฺลํ สุกฺขํ วา ภุญฺชโนฺต, น พาฬฺหํ สุหิโต สิยา;
‘‘‘Allaṃ sukkhaṃ vā bhuñjanto, na bāḷhaṃ suhito siyā;
อูนูทโร มิตาหาโร, สโต ภิกฺขุ ปริพฺพเชฯ
Ūnūdaro mitāhāro, sato bhikkhu paribbaje.
‘‘‘จตฺตาโร ปญฺจ อาโลเป, อภุตฺวา อุทกํ ปิเว;
‘‘‘Cattāro pañca ālope, abhutvā udakaṃ pive;
อลํ ผาสุ วิหาราย, ปหิตตฺตสฺส ภิกฺขุโน’’’ติฯ
Alaṃ phāsu vihārāya, pahitattassa bhikkhuno’’’ti.
อชครงฺคปโญฺห ทสโมฯ
Ajagaraṅgapañho dasamo.
สีหวโคฺค ปญฺจโมฯ
Sīhavaggo pañcamo.
ตสฺสุทฺทานํ –
Tassuddānaṃ –
เกสรี จกฺกวาโก จ, เปณาหิ ฆรกโปตโก;
Kesarī cakkavāko ca, peṇāhi gharakapotako;
อุลูโก สตปโตฺต จ, วคฺคุลิ จ ชลูปิกา;
Ulūko satapatto ca, vagguli ca jalūpikā;
สโปฺป อชคโร เจว, วโคฺค เตน ปวุจฺจตีติฯ
Sappo ajagaro ceva, vaggo tena pavuccatīti.
