| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
10. අජගරඞ්‌ගපඤ්‌හො
10. Ajagaraṅgapañho
10. ‘‘භන්‌තෙ නාගසෙන, ‘අජගරස්‌ස එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, අජගරො මහතිමහාකායො බහූපි දිවසෙ ඌනූදරො දීනතරො කුච්‌ඡිපූරං ආහාරං න ලභති, අපරිපුණ්‌ණො යෙව යාවදෙව සරීරයාපනමත්‌තකෙන යාපෙති, එවමෙව ඛො, මහාරාජ, යොගිනො යොගාවචරස්‌ස භික්‌ඛාචරියප්‌පසුතස්‌ස පරපිණ්‌ඩමුපගතස්‌ස පරදින්‌නප්‌පාටිකඞ්‌ඛිස්‌ස සයංගාහප්‌පටිවිරතස්‌ස දුල්‌ලභං උදරපරිපූරං ආහාරං, අපි ච අත්‌ථවසිකෙන කුලපුත්‌තෙන චත්‌තාරො පඤ්‌ච ආලොපෙ අභුඤ්‌ජිත්‌වා අවසෙසං උදකෙන පරිපූරෙතබ්‌බං. ඉදං, මහාරාජ, අජගරස්‌ස එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සාරිපුත්‌තෙන ධම්‌මසෙනාපතිනා –
10. ‘‘Bhante nāgasena, ‘ajagarassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, ajagaro mahatimahākāyo bahūpi divase ūnūdaro dīnataro kucchipūraṃ āhāraṃ na labhati, aparipuṇṇo yeva yāvadeva sarīrayāpanamattakena yāpeti, evameva kho, mahārāja, yogino yogāvacarassa bhikkhācariyappasutassa parapiṇḍamupagatassa paradinnappāṭikaṅkhissa sayaṃgāhappaṭiviratassa dullabhaṃ udaraparipūraṃ āhāraṃ, api ca atthavasikena kulaputtena cattāro pañca ālope abhuñjitvā avasesaṃ udakena paripūretabbaṃ. Idaṃ, mahārāja, ajagarassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘අල්‌ලං සුක්‌ඛං වා භුඤ්‌ජන්‌තො, න බාළ්‌හං සුහිතො සියා;
‘‘‘Allaṃ sukkhaṃ vā bhuñjanto, na bāḷhaṃ suhito siyā;
ඌනූදරො මිතාහාරො, සතො භික්‌ඛු පරිබ්‌බජෙ.
Ūnūdaro mitāhāro, sato bhikkhu paribbaje.
‘‘‘චත්‌තාරො පඤ්‌ච ආලොපෙ, අභුත්‌වා උදකං පිවෙ;
‘‘‘Cattāro pañca ālope, abhutvā udakaṃ pive;
අලං ඵාසු විහාරාය, පහිතත්‌තස්‌ස භික්‌ඛුනො’’’ති.
Alaṃ phāsu vihārāya, pahitattassa bhikkhuno’’’ti.
අජගරඞ්‌ගපඤ්‌හො දසමො.
Ajagaraṅgapañho dasamo.
සීහවග්‌ගො පඤ්‌චමො.
Sīhavaggo pañcamo.
තස්‌සුද්‌දානං –
Tassuddānaṃ –
කෙසරී චක්‌කවාකො ච, පෙණාහි ඝරකපොතකො;
Kesarī cakkavāko ca, peṇāhi gharakapotako;
උලූකො සතපත්‌තො ච, වග්‌ගුලි ච ජලූපිකා;
Ulūko satapatto ca, vagguli ca jalūpikā;
සප්‌පො අජගරො චෙව, වග්‌ගො තෙන පවුච්‌චතීති.
Sappo ajagaro ceva, vaggo tena pavuccatīti.
