| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੧੦. ਅਜਗਰਙ੍ਗਪਞ੍ਹੋ
10. Ajagaraṅgapañho
੧੦. ‘‘ਭਨ੍ਤੇ ਨਾਗਸੇਨ, ‘ਅਜਗਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬ’ਨ੍ਤਿ ਯਂ વਦੇਸਿ, ਕਤਮਂ ਤਂ ਏਕਂ ਅਙ੍ਗਂ ਗਹੇਤਬ੍ਬ’’ਨ੍ਤਿ? ‘‘ਯਥਾ, ਮਹਾਰਾਜ, ਅਜਗਰੋ ਮਹਤਿਮਹਾਕਾਯੋ ਬਹੂਪਿ ਦਿવਸੇ ਊਨੂਦਰੋ ਦੀਨਤਰੋ ਕੁਚ੍ਛਿਪੂਰਂ ਆਹਾਰਂ ਨ ਲਭਤਿ, ਅਪਰਿਪੁਣ੍ਣੋ ਯੇવ ਯਾવਦੇવ ਸਰੀਰਯਾਪਨਮਤ੍ਤਕੇਨ ਯਾਪੇਤਿ, ਏવਮੇવ ਖੋ, ਮਹਾਰਾਜ, ਯੋਗਿਨੋ ਯੋਗਾવਚਰਸ੍ਸ ਭਿਕ੍ਖਾਚਰਿਯਪ੍ਪਸੁਤਸ੍ਸ ਪਰਪਿਣ੍ਡਮੁਪਗਤਸ੍ਸ ਪਰਦਿਨ੍ਨਪ੍ਪਾਟਿਕਙ੍ਖਿਸ੍ਸ ਸਯਂਗਾਹਪ੍ਪਟਿવਿਰਤਸ੍ਸ ਦੁਲ੍ਲਭਂ ਉਦਰਪਰਿਪੂਰਂ ਆਹਾਰਂ, ਅਪਿ ਚ ਅਤ੍ਥવਸਿਕੇਨ ਕੁਲਪੁਤ੍ਤੇਨ ਚਤ੍ਤਾਰੋ ਪਞ੍ਚ ਆਲੋਪੇ ਅਭੁਞ੍ਜਿਤ੍વਾ ਅવਸੇਸਂ ਉਦਕੇਨ ਪਰਿਪੂਰੇਤਬ੍ਬਂ। ਇਦਂ, ਮਹਾਰਾਜ, ਅਜਗਰਸ੍ਸ ਏਕਂ ਅਙ੍ਗਂ ਗਹੇਤਬ੍ਬਂ। ਭਾਸਿਤਮ੍ਪੇਤਂ, ਮਹਾਰਾਜ, ਥੇਰੇਨ ਸਾਰਿਪੁਤ੍ਤੇਨ ਧਮ੍ਮਸੇਨਾਪਤਿਨਾ –
10. ‘‘Bhante nāgasena, ‘ajagarassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, ajagaro mahatimahākāyo bahūpi divase ūnūdaro dīnataro kucchipūraṃ āhāraṃ na labhati, aparipuṇṇo yeva yāvadeva sarīrayāpanamattakena yāpeti, evameva kho, mahārāja, yogino yogāvacarassa bhikkhācariyappasutassa parapiṇḍamupagatassa paradinnappāṭikaṅkhissa sayaṃgāhappaṭiviratassa dullabhaṃ udaraparipūraṃ āhāraṃ, api ca atthavasikena kulaputtena cattāro pañca ālope abhuñjitvā avasesaṃ udakena paripūretabbaṃ. Idaṃ, mahārāja, ajagarassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘ਅਲ੍ਲਂ ਸੁਕ੍ਖਂ વਾ ਭੁਞ੍ਜਨ੍ਤੋ, ਨ ਬਾਲ਼੍ਹਂ ਸੁਹਿਤੋ ਸਿਯਾ।
‘‘‘Allaṃ sukkhaṃ vā bhuñjanto, na bāḷhaṃ suhito siyā;
ਊਨੂਦਰੋ ਮਿਤਾਹਾਰੋ, ਸਤੋ ਭਿਕ੍ਖੁ ਪਰਿਬ੍ਬਜੇ॥
Ūnūdaro mitāhāro, sato bhikkhu paribbaje.
‘‘‘ਚਤ੍ਤਾਰੋ ਪਞ੍ਚ ਆਲੋਪੇ, ਅਭੁਤ੍વਾ ਉਦਕਂ ਪਿવੇ।
‘‘‘Cattāro pañca ālope, abhutvā udakaṃ pive;
ਅਲਂ ਫਾਸੁ વਿਹਾਰਾਯ, ਪਹਿਤਤ੍ਤਸ੍ਸ ਭਿਕ੍ਖੁਨੋ’’’ਤਿ॥
Alaṃ phāsu vihārāya, pahitattassa bhikkhuno’’’ti.
ਅਜਗਰਙ੍ਗਪਞ੍ਹੋ ਦਸਮੋ।
Ajagaraṅgapañho dasamo.
ਸੀਹવਗ੍ਗੋ ਪਞ੍ਚਮੋ।
Sīhavaggo pañcamo.
ਤਸ੍ਸੁਦ੍ਦਾਨਂ –
Tassuddānaṃ –
ਕੇਸਰੀ ਚਕ੍ਕવਾਕੋ ਚ, ਪੇਣਾਹਿ ਘਰਕਪੋਤਕੋ।
Kesarī cakkavāko ca, peṇāhi gharakapotako;
ਉਲੂਕੋ ਸਤਪਤ੍ਤੋ ਚ, વਗ੍ਗੁਲਿ ਚ ਜਲੂਪਿਕਾ।
Ulūko satapatto ca, vagguli ca jalūpikā;
ਸਪ੍ਪੋ ਅਜਗਰੋ ਚੇવ, વਗ੍ਗੋ ਤੇਨ ਪવੁਚ੍ਚਤੀਤਿ॥
Sappo ajagaro ceva, vaggo tena pavuccatīti.
