| Library / Tipiṭaka / д̇ибидага • Tipiṭaka / махааваг̇г̇а-адтагат̇аа • Mahāvagga-aṭṭhakathā |
аж̇абаалагат̇аа
Ajapālakathā
4. ат̇а ко бхаг̇аваа сад̇д̇аахасса ажжаязна д̇амхаа самаад̇химхаа вудтахид̇ваа б̣од̇хиругкамуулаа язна аж̇абааланиг̇род̇хо д̇знубасан̇гамийд̇и зд̇т̇а на бхаг̇аваа д̇амхаа самаад̇химхаа вудтахид̇ваа ананд̇арамзва б̣од̇хиругкамуулаа язна аж̇абааланиг̇род̇хо д̇знубасан̇гами. яат̇аа бана ‘‘бхуд̇ваа саяад̇ий’’д̇и вуд̇д̇з на ‘‘хад̇т̇з ад̇ховид̇ваа мукам̣ авигкаалзд̇ваа саяанасамийбам̣ аг̇анд̇ваа ан̃н̃ам̣ гин̃жи аалаабасаллаабам̣ агад̇ваа саяад̇и’’жжзва вуд̇д̇ам̣ ход̇и, бхож̇анад̇о бана бажчаа саяад̇и, на насаяад̇ийд̇и ид̣̇амзвад̇т̇а д̣̇ийбид̇ам̣ ход̇и. звамид̇хааби ‘‘на д̇амхаа самаад̇химхаа вудтахид̇ваа ананд̇арамзва баггаамий’’д̇и вуд̇д̇ам̣ ход̇и, вудтаанад̇о жа бана бажчаа баггаами, на набаггаамийд̇и ид̣̇амзвзд̇т̇а д̣̇ийбид̇ам̣ ход̇и.
4.Athakho bhagavā sattāhassa accayena tamhā samādhimhā vuṭṭhahitvā bodhirukkhamūlā yena ajapālanigrodho tenupasaṅkamīti ettha na bhagavā tamhā samādhimhā vuṭṭhahitvā anantarameva bodhirukkhamūlā yena ajapālanigrodho tenupasaṅkami. Yathā pana ‘‘bhutvā sayatī’’ti vutte na ‘‘hatthe adhovitvā mukhaṃ avikkhāletvā sayanasamīpaṃ agantvā aññaṃ kiñci ālāpasallāpaṃ akatvā sayati’’cceva vuttaṃ hoti, bhojanato pana pacchā sayati, na nasayatīti idamevattha dīpitaṃ hoti. Evamidhāpi ‘‘na tamhā samādhimhā vuṭṭhahitvā anantarameva pakkāmī’’ti vuttaṃ hoti, vuṭṭhānato ca pana pacchā pakkāmi, na napakkāmīti idamevettha dīpitaṃ hoti.
ананд̇арам̣ бана абаггамид̇ваа бхаг̇аваа гим̣ агаасийд̇и? абарааниби д̇ийн̣и сад̇д̇аахаани б̣од̇хисамийбзязва вийд̇инаамзси. д̇ад̇рааяам̣ анубуб̣б̣игат̇аа – бхаг̇авад̇и гира б̣уд̣̇д̇хад̇д̇ам̣ бад̇ваа сад̇д̇аахам̣ згабаллан̇гзна нисиннз ‘‘на бхаг̇аваа вудтаад̇и; гим̣ ну ко ан̃н̃зби б̣уд̣̇д̇хад̇д̇агараа д̇хаммаа ад̇т̇ий’’д̇и згажжаанам̣ д̣̇звад̇аанам̣ ган̇каа уд̣̇абаад̣̇и. ат̇а бхаг̇аваа адтамз д̣̇ивасз самаабад̇д̇ид̇о вудтааяа д̣̇звад̇аанам̣ ган̇кам̣ н̃ад̇ваа ган̇каавид̇хаманад̇т̇ам̣ аагаасз уббад̇ид̇ваа яамагабаадихаарияам̣ д̣̇ассзд̇ваа д̇аасам̣ ган̇кам̣ вид̇хамид̇ваа баллан̇гад̇о ийсагам̣ баажийнаниссид̇з уд̇д̇арад̣̇исаабхааг̇з тад̇ваа жад̇д̇аари асан̇кязяяаани габбасад̇асахассан̃жа убажид̇аанам̣ баарамийнам̣ б̣алаад̇хиг̇аманадтаанам̣ баллан̇гам̣ б̣од̇хиругкан̃жа анимисзхи агкийхи ологаяамаано сад̇д̇аахам̣ вийд̇инаамзси, д̇ам̣ таанам̣ анимисажзд̇ияам̣ наама ж̇аад̇ам̣. ат̇а баллан̇гасса жа тид̇адтаанасса жа анд̇араа бурад̇т̇имад̇о жа бажчимад̇о жа ааяад̇з рад̇анажан̇гамз жан̇гаманд̇о сад̇д̇аахам̣ вийд̇инаамзси, д̇ам̣ таанам̣ рад̇анажан̇гамажзд̇ияам̣ наама ж̇аад̇ам̣. д̇ад̇о бажчимад̣̇исаабхааг̇з д̣̇звад̇аа рад̇анагхарам̣ маабаяим̣су. д̇ад̇т̇а баллан̇гзна нисийд̣̇ид̇ваа абхид̇хаммабидагам̣ висзсад̇о жзд̇т̇а ананд̇анаяам̣ саманд̇абадтаанам̣ вижинанд̇о сад̇д̇аахам̣ вийд̇инаамзси, д̇ам̣ таанам̣ рад̇анагхаражзд̇ияам̣ наама ж̇аад̇ам̣.
Anantaraṃ pana apakkamitvā bhagavā kiṃ akāsīti? Aparānipi tīṇi sattāhāni bodhisamīpeyeva vītināmesi. Tatrāyaṃ anupubbikathā – bhagavati kira buddhattaṃ patvā sattāhaṃ ekapallaṅkena nisinne ‘‘na bhagavā vuṭṭhāti; kiṃ nu kho aññepi buddhattakarā dhammā atthī’’ti ekaccānaṃ devatānaṃ kaṅkhā udapādi. Atha bhagavā aṭṭhame divase samāpattito vuṭṭhāya devatānaṃ kaṅkhaṃ ñatvā kaṅkhāvidhamanatthaṃ ākāse uppatitvā yamakapāṭihāriyaṃ dassetvā tāsaṃ kaṅkhaṃ vidhamitvā pallaṅkato īsakaṃ pācīnanissite uttaradisābhāge ṭhatvā cattāri asaṅkhyeyyāni kappasatasahassañca upacitānaṃ pāramīnaṃ balādhigamanaṭṭhānaṃ pallaṅkaṃ bodhirukkhañca animisehi akkhīhi olokayamāno sattāhaṃ vītināmesi, taṃ ṭhānaṃ animisacetiyaṃ nāma jātaṃ. Atha pallaṅkassa ca ṭhitaṭṭhānassa ca antarā puratthimato ca pacchimato ca āyate ratanacaṅkame caṅkamanto sattāhaṃ vītināmesi, taṃ ṭhānaṃ ratanacaṅkamacetiyaṃ nāma jātaṃ. Tato pacchimadisābhāge devatā ratanagharaṃ māpayiṃsu. Tattha pallaṅkena nisīditvā abhidhammapiṭakaṃ visesato cettha anantanayaṃ samantapaṭṭhānaṃ vicinanto sattāhaṃ vītināmesi, taṃ ṭhānaṃ ratanagharacetiyaṃ nāma jātaṃ.
звам̣ б̣од̇хисамийбзязва жад̇д̇аари сад̇д̇аахаани вийд̇инаамзд̇ваа бан̃жамз сад̇д̇аахз б̣од̇хиругкамуулаа язна аж̇абааланиг̇род̇хо д̇знубасан̇гами. д̇асса гира ниг̇род̇хасса чааяааяа аж̇абаалагаа г̇анд̇ваа нисийд̣̇анд̇и; д̇знасса аж̇абааланиг̇род̇ход̇взва наамам̣ уд̣̇абаад̣̇и. сад̇д̇аахам̣ вимуд̇д̇исукабадисам̣взд̣̇ийд̇и д̇ад̇рааби д̇хаммам̣ вижинанд̇оязва вимуд̇д̇исукам̣ бадисам̣взд̣̇знд̇о нисийд̣̇и. б̣од̇хид̇о бурад̇т̇имад̣̇исаабхааг̇з зса ругко ход̇и. звам̣ нисиннз жа банзд̇т̇а бхаг̇авад̇и зго б̣раахман̣о г̇анд̇ваа бан̃хам̣ бужчи. д̇зна вуд̇д̇ам̣ ‘‘ат̇а ко ан̃н̃ад̇аро’’д̇иаад̣̇и. д̇ад̇т̇а хум̣хун̇гаж̇аад̇игод̇и со гира д̣̇идтаман̇г̇алиго наама , маанавасзна год̇хавасзна жа ‘‘хум̣ху’’нд̇и гаронд̇о вижарад̇и, д̇асмаа ‘‘хум̣хун̇гаж̇аад̇иго’’д̇и вужжад̇и. ‘‘хухуггаж̇аад̇иго’’д̇иби батанд̇и.
Evaṃ bodhisamīpeyeva cattāri sattāhāni vītināmetvā pañcame sattāhe bodhirukkhamūlā yena ajapālanigrodho tenupasaṅkami. Tassa kira nigrodhassa chāyāya ajapālakā gantvā nisīdanti; tenassa ajapālanigrodhotveva nāmaṃ udapādi. Sattāhaṃ vimuttisukhapaṭisaṃvedīti tatrāpi dhammaṃ vicinantoyeva vimuttisukhaṃ paṭisaṃvedento nisīdi. Bodhito puratthimadisābhāge esa rukkho hoti. Evaṃ nisinne ca panettha bhagavati eko brāhmaṇo gantvā pañhaṃ pucchi. Tena vuttaṃ ‘‘atha kho aññataro’’tiādi. Tattha huṃhuṅkajātikoti so kira diṭṭhamaṅgaliko nāma , mānavasena kodhavasena ca ‘‘huṃhu’’nti karonto vicarati, tasmā ‘‘huṃhuṅkajātiko’’ti vuccati. ‘‘Huhukkajātiko’’tipi paṭhanti.
зд̇амад̇т̇ам̣ вид̣̇ид̇ваад̇и зд̇ам̣ д̇зна вуд̇д̇асса важанасса сикаабад̇д̇амад̇т̇ам̣ вид̣̇ид̇ваа д̇ааяам̣ взлааяам̣ имам̣ уд̣̇аанам̣ уд̣̇аанзси. д̇ассад̇т̇о – яо б̣аахид̇абаабад̇хаммад̇ааяа б̣раахман̣о на д̣̇идтаман̇г̇алигад̇ааяа, хум̣хун̇гаарагабхааваад̣̇ибаабад̇хаммаяуд̇д̇о худ̇ваа гзвалам̣ ж̇аад̇имад̇д̇агзна б̣рахман̃н̃ам̣ бадиж̇аанаад̇и, со б̣раахман̣о б̣аахид̇абаабад̇хаммад̇д̇аа хум̣хун̇гаараббахаанзна нихум̣хун̇го, рааг̇аад̣̇игасааваабхаавзна ниггасааво, бхааванаануяог̇аяуд̇д̇ажид̇д̇ад̇ааяа яад̇ад̇д̇о, сийласам̣варзна ваа сан̃н̃ад̇ажид̇д̇ад̇ааяа яад̇ад̇д̇о, жад̇умаг̇г̇ан̃аан̣асан̇каад̇зхи взд̣̇зхи анд̇ам̣, взд̣̇аанам̣ ваа анд̇ам̣ г̇ад̇ад̇д̇аа взд̣̇анд̇аг̇уу, маг̇г̇аб̣рахмажарияасса вусид̇ад̇д̇аа вусид̇аб̣рахмажарияо. д̇хаммзна б̣рахмаваад̣̇ам̣ вад̣̇зяяа, ‘‘б̣раахман̣о, аха’’нд̇и зд̇ам̣ ваад̣̇ам̣ д̇хаммзна вад̣̇зяяа, яасса сагалз логасанниваасз гухин̃жи згаарамман̣зби рааг̇уссад̣̇о д̣̇осуссад̣̇о мохуссад̣̇о маануссад̣̇о д̣̇идтуссад̣̇од̇и имз уссад̣̇аа над̇т̇ийд̇и.
Etamatthaṃ viditvāti etaṃ tena vuttassa vacanassa sikhāpattamatthaṃ viditvā tāyaṃ velāyaṃ imaṃ udānaṃ udānesi. Tassattho – yo bāhitapāpadhammatāya brāhmaṇo na diṭṭhamaṅgalikatāya, huṃhuṅkārakabhāvādipāpadhammayutto hutvā kevalaṃ jātimattakena brahmaññaṃ paṭijānāti, so brāhmaṇo bāhitapāpadhammattā huṃhuṅkārappahānena nihuṃhuṅko, rāgādikasāvābhāvena nikkasāvo, bhāvanānuyogayuttacittatāya yatatto, sīlasaṃvarena vā saññatacittatāya yatatto, catumaggañāṇasaṅkhātehi vedehi antaṃ, vedānaṃ vā antaṃ gatattā vedantagū, maggabrahmacariyassa vusitattā vusitabrahmacariyo. Dhammena brahmavādaṃ vadeyya, ‘‘brāhmaṇo, aha’’nti etaṃ vādaṃ dhammena vadeyya, yassa sakale lokasannivāse kuhiñci ekārammaṇepi rāgussado dosussado mohussado mānussado diṭṭhussadoti ime ussadā natthīti.
аж̇абаалагат̇аа нидтид̇аа.
Ajapālakathā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 2. аж̇абаалагат̇аа • 2. Ajapālakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / аж̇абаалагат̇ааван̣н̣анаа • Ajapālakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / аж̇абаалагат̇ааван̣н̣анаа • Ajapālakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / аж̇абаалагат̇ааван̣н̣анаа • Ajapālakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 2. аж̇абаалагат̇аа • 2. Ajapālakathā
