| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
аж̇абаалагат̇ааван̣н̣анаа
Ajapālakathāvaṇṇanā
4. д̇асса сад̇д̇аахасса ажжаязнаад̇и баллан̇гасад̇д̇аахасса абаг̇аманзна. д̇амхаа самаад̇химхаа вудтахид̇ваад̇и д̇ад̇о арахад̇д̇апаласамаабад̇д̇исамаад̇хид̇о яат̇аагаалабарижчзд̣̇ам̣ вудтахид̇ваа. ан̃н̃зби б̣уд̣̇д̇хад̇д̇агараад̇и висаакабун̣н̣амид̇о бадтааяа рад̇д̇инд̣̇ивам̣ звам̣ нижжасамаахид̇абхаавахзд̇убхууд̇аанам̣ б̣уд̣̇д̇хаг̇ун̣аанам̣ убари ан̃н̃зби б̣уд̣̇д̇хад̇д̇асаад̇хагаа. ‘‘аяам̣ б̣уд̣̇д̇хо’’д̇и б̣уд̣̇д̇хабхаавасса барзсам̣ вибхааванаа д̇хаммаа гим̣ ну ко санд̇ийд̇и яож̇анаа. згажжаанам̣ д̣̇звад̇аананд̇и яаа ад̇хиг̇ад̇амаг̇г̇аа сажчигад̇анирод̇хаа згабад̣̇зсзна б̣уд̣̇д̇хаг̇ун̣з ж̇аананд̇и, д̇аа табзд̇ваа д̇ад̣̇ан̃н̃аасам̣ д̣̇звад̇аанам̣. анимисзхийд̇и д̇хаммабийд̇ивибпааравасзна басаад̣̇авибхааванижжалад̣̇алад̇ааяа нимзсарахид̇зхи. рад̇анажан̇гамзд̇и д̣̇звад̇аахи маабид̇з рад̇анамаяажан̇гамз. ‘‘рад̇анабхууд̇аанам̣ сад̇д̇аннам̣ багаран̣аанам̣ д̇ад̇т̇а жа ануд̇д̇арасса д̇хаммарад̇анасса саммасанзна д̇ам̣ таанам̣ рад̇анагхаражзд̇ияам̣ наама ж̇аад̇а’’нд̇иби вад̣̇анд̇и. д̇знзва адтасаалинияам̣ (д̇ха. са. адта. нид̣̇аанагат̇аа) ‘‘рад̇анагхарам̣ наама на рад̇анамаяам̣ г̇зхам̣, сад̇д̇аннам̣ бана багаран̣аанам̣ саммасид̇адтаанам̣ рад̇анагхаранд̇и взд̣̇ид̇аб̣б̣а’’нд̇и вуд̇д̇ам̣.
4.Tassa sattāhassa accayenāti pallaṅkasattāhassa apagamanena. Tamhā samādhimhā vuṭṭhahitvāti tato arahattaphalasamāpattisamādhito yathākālaparicchedaṃ vuṭṭhahitvā. Aññepi buddhattakarāti visākhapuṇṇamito paṭṭhāya rattindivaṃ evaṃ niccasamāhitabhāvahetubhūtānaṃ buddhaguṇānaṃ upari aññepi buddhattasādhakā. ‘‘Ayaṃ buddho’’ti buddhabhāvassa paresaṃ vibhāvanā dhammā kiṃ nu kho santīti yojanā. Ekaccānaṃ devatānanti yā adhigatamaggā sacchikatanirodhā ekapadesena buddhaguṇe jānanti, tā ṭhapetvā tadaññāsaṃ devatānaṃ. Animisehīti dhammapītivipphāravasena pasādavibhāvaniccaladalatāya nimesarahitehi. Ratanacaṅkameti devatāhi māpite ratanamayacaṅkame. ‘‘Ratanabhūtānaṃ sattannaṃ pakaraṇānaṃ tattha ca anuttarassa dhammaratanassa sammasanena taṃ ṭhānaṃ ratanagharacetiyaṃ nāma jāta’’ntipi vadanti. Teneva aṭṭhasāliniyaṃ (dha. sa. aṭṭha. nidānakathā) ‘‘ratanagharaṃ nāma na ratanamayaṃ gehaṃ, sattannaṃ pana pakaraṇānaṃ sammasitaṭṭhānaṃ ratanagharanti veditabba’’nti vuttaṃ.
гасмаа банааяам̣ аж̇абааланиг̇род̇хо наама ж̇аад̇од̇и ааха ‘‘д̇асса гираа’’д̇иаад̣̇и. гзжи бана ‘‘яасмаа д̇ад̇т̇а взд̣̇з саж̇жхааяид̇ум̣ асамад̇т̇аа махаллагаб̣раахман̣аа баагаарабаригкзбаяуд̇д̇аани нивзсанаани гад̇ваа саб̣б̣з васим̣су, д̇асмаасса ‘аж̇абааланиг̇род̇хо’д̇и наамам̣ ж̇аад̇а’’нд̇и вад̣̇анд̇и. д̇ад̇рааяам̣ важанад̇т̇о – на ж̇абанд̇ийд̇и аж̇абаа, манд̇аанам̣ анаж̇жхааяагаад̇и ад̇т̇о. аж̇абаа ланд̇и аад̣̇ияанд̇и ниваасам̣ зд̇т̇аад̇и аж̇абаалод̇и. абарз бана вад̣̇анд̇и ‘‘яасмаа маж̇жханхигз самаяз анд̇о бавидтз аж̇з ад̇д̇ано чааяааяа баалзд̇и рагкад̇и, д̇асмаа ‘аж̇абаало’д̇исса наамам̣ рул̣ха’’нд̇и. саб̣б̣ат̇ааби наамамзд̇ам̣ д̇асса ругкасса.
Kasmā panāyaṃ ajapālanigrodho nāma jātoti āha ‘‘tassa kirā’’tiādi. Keci pana ‘‘yasmā tattha vede sajjhāyituṃ asamatthā mahallakabrāhmaṇā pākāraparikkhepayuttāni nivesanāni katvā sabbe vasiṃsu, tasmāssa ‘ajapālanigrodho’ti nāmaṃ jāta’’nti vadanti. Tatrāyaṃ vacanattho – na japantīti ajapā, mantānaṃ anajjhāyakāti attho. Ajapā lanti ādiyanti nivāsaṃ etthāti ajapāloti. Apare pana vadanti ‘‘yasmā majjhanhike samaye anto paviṭṭhe aje attano chāyāya pāleti rakkhati, tasmā ‘ajapālo’tissa nāmaṃ ruḷha’’nti. Sabbathāpi nāmametaṃ tassa rukkhassa.
вимуд̇д̇исукам̣ бадисам̣взд̣̇знд̇од̇и д̇хаммам̣ вижинанд̇оязва анд̇аранд̇араа вимуд̇д̇исукан̃жа бадисам̣взд̣̇знд̇о. ‘‘д̇хаммам̣ вижинанд̇о вимуд̇д̇исукан̃жа бадисам̣взд̣̇знд̇о’’д̇и звам̣ ваа зд̇т̇а баато г̇ахзд̇аб̣б̣о. уд̣̇аанадтагат̇ааяамби (уд̣̇аа. адта. 4) хи аяамзва баато. д̇хаммам̣ вижинанд̇о жзд̇т̇а звам̣ абхид̇хаммз наяамаг̇г̇ам̣ саммаси батамам̣ д̇хаммасан̇г̇ан̣ийбагаран̣ам̣ наама, д̇ад̇о вибхан̇г̇аббагаран̣ам̣, д̇хаад̇угат̇аабагаран̣ам̣, буг̇г̇алабан̃н̃ад̇д̇иббагаран̣ам̣, гат̇аавад̇т̇ум̣ наама, яамагам̣ наама, д̇ад̇о махаабагаран̣ам̣ бадтаанам̣ наамаад̇и. д̇ад̇т̇асса сан̣хасукумадтаанамхи жид̇д̇з од̇ин̣н̣з бийд̇и уббаж̇ж̇и, бийд̇ияаа уббаннааяа лохид̇ам̣ басийд̣̇и, лохид̇з басаннз чави басийд̣̇и, чавияаа басаннааяа бурад̇т̇имагааяад̇о гуудааг̇аараад̣̇иббамаан̣аа расмияо удтахид̇ваа аагаасз багканд̣̇ам̣ чад̣̇д̣̇анд̇анааг̇агулам̣ вияа баажийнад̣̇исааяа ананд̇аани жаггаваал̣аани багканд̣̇аа. бажчимагааяад̇о удтахид̇ваа бажчимад̣̇исааяа, д̣̇агкин̣ам̣сагуудад̇о удтахид̇ваа д̣̇агкин̣ад̣̇исааяа, ваамам̣сагуудад̇о удтахид̇ваа уд̇д̇арад̣̇исааяа ананд̇аани жаггаваал̣аани багканд̣̇аа. баад̣̇ад̇алзхи баваал̣ан̇гураван̣н̣аа расмияо нигкамид̇ваа махаабат̇авим̣ виниб̣б̣иж̇жха уд̣̇агам̣ д̣̇вид̇хаа бхинд̣̇ид̇ваа ваад̇агканд̇хам̣ бад̣̇аалзд̇ваа аж̇адаагаасам̣ багканд̣̇аа. сийсад̇о сам̣баривад̇д̇ияамаанам̣ ман̣ид̣̇аамам̣ вияа нийлаван̣н̣арасмивадди удтахид̇ваа ча д̣̇звалогз винивиж̇жхид̇ваа нава б̣рахмалогз ад̇иггамма аж̇адаагаасам̣ багканд̣̇аа. д̇асмим̣ д̣̇ивасз абаримаан̣зсу жаггаваал̣зсу абаримаан̣аа сад̇д̇аа саб̣б̣з суван̣н̣аван̣н̣аава ахзсум̣. д̇ам̣ д̣̇ивасан̃жа бана бхаг̇авад̇о сарийраа нигканд̇аа яааваж̇ж̇ад̣̇ивасааби гира д̇аа расмияо ананд̇алогад̇хаад̇уяо г̇ажчанд̇иязва. на гзвалан̃жа имасмим̣язва сад̇д̇аахз д̇хаммам̣ вижинанд̇асса сарийрад̇о расмияо нигкамим̣су, ат̇а ко рад̇анагхарасад̇д̇аахзби бадтаанам̣ саммасанд̇асса звамзва сарийрад̇о расмияо нигканд̇аа зваад̇и взд̣̇ид̇аб̣б̣ам̣.
Vimuttisukhaṃ paṭisaṃvedentoti dhammaṃ vicinantoyeva antarantarā vimuttisukhañca paṭisaṃvedento. ‘‘Dhammaṃ vicinanto vimuttisukhañca paṭisaṃvedento’’ti evaṃ vā ettha pāṭho gahetabbo. Udānaṭṭhakathāyampi (udā. aṭṭha. 4) hi ayameva pāṭho. Dhammaṃ vicinanto cettha evaṃ abhidhamme nayamaggaṃ sammasi paṭhamaṃ dhammasaṅgaṇīpakaraṇaṃ nāma, tato vibhaṅgappakaraṇaṃ, dhātukathāpakaraṇaṃ, puggalapaññattippakaraṇaṃ, kathāvatthuṃ nāma, yamakaṃ nāma, tato mahāpakaraṇaṃ paṭṭhānaṃ nāmāti. Tatthassa saṇhasukhumaṭṭhānamhi citte otiṇṇe pīti uppajji, pītiyā uppannāya lohitaṃ pasīdi, lohite pasanne chavi pasīdi, chaviyā pasannāya puratthimakāyato kūṭāgārādippamāṇā rasmiyo uṭṭhahitvā ākāse pakkhandaṃ chaddantanāgakulaṃ viya pācīnadisāya anantāni cakkavāḷāni pakkhandā. Pacchimakāyato uṭṭhahitvā pacchimadisāya, dakkhiṇaṃsakūṭato uṭṭhahitvā dakkhiṇadisāya, vāmaṃsakūṭato uṭṭhahitvā uttaradisāya anantāni cakkavāḷāni pakkhandā. Pādatalehi pavāḷaṅkuravaṇṇā rasmiyo nikkhamitvā mahāpathaviṃ vinibbijjha udakaṃ dvidhā bhinditvā vātakkhandhaṃ padāletvā ajaṭākāsaṃ pakkhandā. Sīsato saṃparivattiyamānaṃ maṇidāmaṃ viya nīlavaṇṇarasmivaṭṭi uṭṭhahitvā cha devaloke vinivijjhitvā nava brahmaloke atikkamma ajaṭākāsaṃ pakkhandā. Tasmiṃ divase aparimāṇesu cakkavāḷesu aparimāṇā sattā sabbe suvaṇṇavaṇṇāva ahesuṃ. Taṃ divasañca pana bhagavato sarīrā nikkhantā yāvajjadivasāpi kira tā rasmiyo anantalokadhātuyo gacchantiyeva. Na kevalañca imasmiṃyeva sattāhe dhammaṃ vicinantassa sarīrato rasmiyo nikkhamiṃsu, atha kho ratanagharasattāhepi paṭṭhānaṃ sammasantassa evameva sarīrato rasmiyo nikkhantā evāti veditabbaṃ.
вуд̇д̇ан̃хзд̇ам̣ адтасаалинияам̣ (д̇ха. са. адта. нид̣̇аанагат̇аа) –
Vuttañhetaṃ aṭṭhasāliniyaṃ (dha. sa. aṭṭha. nidānakathā) –
‘‘имзсу жа згавийсад̇ияаа д̣̇ивасзсу згад̣̇ивасзби сад̇т̇у сарийрад̇о расмияо на нигканд̇аа, жад̇уд̇т̇з бана сад̇д̇аахз бажчимуд̇д̇арааяа д̣̇исааяа рад̇анагхарз нисийд̣̇и. д̇ад̇т̇а д̇хаммасан̇г̇ан̣им̣ саммасанд̇ассаби сарийрад̇о расмияо на нигканд̇аа. вибхан̇г̇аббагаран̣ам̣, д̇хаад̇угат̇ам̣, буг̇г̇алабан̃н̃ад̇д̇им̣, гат̇аавад̇т̇уббагаран̣ам̣, яамагаббагаран̣ам̣ саммасанд̇ассаби расмияо на нигканд̇аа. яад̣̇аа бана махаабагаран̣ам̣ оруяха ‘хзд̇убажжаяо аарамман̣абажжаяо…бз… авиг̇ад̇абажжаяо’д̇и саммасанам̣ аарабхи, ат̇асса жад̇увийсад̇исаманд̇абадтаанам̣ саммасанд̇асса зганд̇ад̇о саб̣б̣ан̃н̃уд̇ан̃н̃аан̣ам̣ махаабагаран̣з огаасам̣ лабхи. яат̇аа хи д̇имирабин̇г̇аламахаамажчо жад̇ураасийд̇ияож̇анасахассаг̇амбхийрз махаасамуд̣̇д̣̇зязва огаасам̣ лабхад̇и, звамзва саб̣б̣ан̃н̃уд̇ан̃н̃аан̣ам̣ зганд̇ад̇о махаабагаран̣зязва огаасам̣ лабхи.
‘‘Imesu ca ekavīsatiyā divasesu ekadivasepi satthu sarīrato rasmiyo na nikkhantā, catutthe pana sattāhe pacchimuttarāya disāya ratanaghare nisīdi. Tattha dhammasaṅgaṇiṃ sammasantassapi sarīrato rasmiyo na nikkhantā. Vibhaṅgappakaraṇaṃ, dhātukathaṃ, puggalapaññattiṃ, kathāvatthuppakaraṇaṃ, yamakappakaraṇaṃ sammasantassapi rasmiyo na nikkhantā. Yadā pana mahāpakaraṇaṃ oruyha ‘hetupaccayo ārammaṇapaccayo…pe… avigatapaccayo’ti sammasanaṃ ārabhi, athassa catuvīsatisamantapaṭṭhānaṃ sammasantassa ekantato sabbaññutaññāṇaṃ mahāpakaraṇe okāsaṃ labhi. Yathā hi timirapiṅgalamahāmaccho caturāsītiyojanasahassagambhīre mahāsamuddeyeva okāsaṃ labhati, evameva sabbaññutaññāṇaṃ ekantato mahāpakaraṇeyeva okāsaṃ labhi.
‘‘сад̇т̇у звам̣ лад̣̇д̇хогаасзна саб̣б̣ан̃н̃уд̇ан̃н̃аан̣зна яат̇аасукам̣ сан̣хасукумад̇хаммам̣ саммасанд̇асса сарийрад̇о нийлабийд̇алохид̇од̣̇аад̇аман̃ж̇идтабабхассаравасзна чаб̣б̣ан̣н̣арасмияо нигкамим̣су. гзсамассуухи жзва агкийнан̃жа нийладтаанзхи нийларасмияо нигкамим̣су, яаасам̣ васзна г̇аг̇анад̇алам̣ ан̃ж̇анажун̣н̣асамогин̣н̣ам̣ вияа умаабубпанийлуббалад̣̇аласан̃чаннам̣ вияа вийд̇ибад̇анд̇аман̣ид̇аалаван̣дам̣ вияа самбасаарид̇амзжагабадам̣ вияа жа ахоси. чавид̇о жзва агкийнан̃жа бийд̇адтаанзхи бийд̇арасмияо нигкамим̣су, яаасам̣ васзна д̣̇исаабхааг̇аа суван̣н̣арасанисин̃жамаанаа вияа суван̣н̣абадабасаарид̇аа вияа гун̇гумажун̣н̣аган̣игаарабубпасамбаригин̣н̣аа вияа жа вирожим̣су. мам̣салохид̇зхи жзва агкийнан̃жа рад̇д̇адтаанзхи лохид̇арасмияо нигкамим̣су, яаасам̣ васзна д̣̇исаабхааг̇аа жийнабидтажун̣н̣аран̃ж̇ид̇аа вияа субаггалаакаарасанисин̃жамаанаа вияа рад̇д̇агамб̣алабаригкид̇д̇аа вияа ж̇аяасуманабаариб̣ад̣̇д̇хагаб̣анд̇хуж̇ийвагагусумасамбаригин̣н̣аа вияа жа вирожим̣су. адтийхи жзва д̣̇анд̇зхи жа агкийнан̃жа сзд̇адтаанзхи од̣̇аад̇арасмияо нигкамим̣су, яаасам̣ васзна д̣̇исаабхааг̇аа раж̇ад̇агудзхи аасин̃жамаанакийрад̇хаараасамбаригин̣н̣аа вияа басаарид̇араж̇ад̇абадавид̇аанаа вияа вийд̇ибад̇анд̇араж̇ад̇ад̇аалаван̣даа вияа гунд̣̇агумуд̣̇асинд̇хуваарасуманамаллигаад̣̇игусумасан̃чаннаа вияа жа вирожим̣су. ман̃ж̇идтабабхассараа бана д̇амхаа д̇амхаа сарийраббад̣̇зсаа нигкамим̣су. ид̇и д̇аа чаб̣б̣ан̣н̣арасмияо нигкамид̇ваа гханамахаабат̇авим̣ г̇ан̣хим̣су.
‘‘Satthu evaṃ laddhokāsena sabbaññutaññāṇena yathāsukhaṃ saṇhasukhumadhammaṃ sammasantassa sarīrato nīlapītalohitodātamañjiṭṭhapabhassaravasena chabbaṇṇarasmiyo nikkhamiṃsu. Kesamassūhi ceva akkhīnañca nīlaṭṭhānehi nīlarasmiyo nikkhamiṃsu, yāsaṃ vasena gaganatalaṃ añjanacuṇṇasamokiṇṇaṃ viya umāpupphanīluppaladalasañchannaṃ viya vītipatantamaṇitālavaṇṭaṃ viya sampasāritamecakapaṭaṃ viya ca ahosi. Chavito ceva akkhīnañca pītaṭṭhānehi pītarasmiyo nikkhamiṃsu, yāsaṃ vasena disābhāgā suvaṇṇarasanisiñcamānā viya suvaṇṇapaṭapasāritā viya kuṅkumacuṇṇakaṇikārapupphasamparikiṇṇā viya ca virociṃsu. Maṃsalohitehi ceva akkhīnañca rattaṭṭhānehi lohitarasmiyo nikkhamiṃsu, yāsaṃ vasena disābhāgā cīnapiṭṭhacuṇṇarañjitā viya supakkalākhārasanisiñcamānā viya rattakambalaparikkhittā viya jayasumanapāribaddhakabandhujīvakakusumasamparikiṇṇā viya ca virociṃsu. Aṭṭhīhi ceva dantehi ca akkhīnañca setaṭṭhānehi odātarasmiyo nikkhamiṃsu, yāsaṃ vasena disābhāgā rajatakuṭehi āsiñcamānakhīradhārāsamparikiṇṇā viya pasāritarajatapaṭavitānā viya vītipatantarajatatālavaṇṭā viya kundakumudasindhuvārasumanamallikādikusumasañchannā viya ca virociṃsu. Mañjiṭṭhapabhassarā pana tamhā tamhā sarīrappadesā nikkhamiṃsu. Iti tā chabbaṇṇarasmiyo nikkhamitvā ghanamahāpathaviṃ gaṇhiṃsu.
‘‘жад̇унахуд̇аад̇хигад̣̇вияож̇анасад̇асахассаб̣ахалаа махаабат̇авий нид̣̇д̇ханд̇асуван̣н̣абин̣д̣и вияа ахоси. бат̇авим̣ бхинд̣̇ид̇ваа хздтаа уд̣̇агам̣ г̇ан̣хим̣су. бат̇авийсанд̇хаарагам̣ адтанахуд̇аад̇хигажад̇уяож̇анасад̇асахассаб̣ахалам̣ уд̣̇агам̣ суван̣н̣агаласзхи аасин̃жамаанавилийнасуван̣н̣ам̣ вияа ахоси. уд̣̇агам̣ винивиж̇жхид̇ваа ваад̇ам̣ аг̇г̇ахзсум̣. чаннавуд̇аад̇хиганаваяож̇анасад̇асахассаб̣ахало ваад̇о самуссид̇асуван̣н̣агканд̇хо вияа ахоси. ваад̇ам̣ винивиж̇жхид̇ваа хздтаа аж̇адаагаасам̣ багканд̣̇им̣су. убарибхааг̇зна уг̇г̇анд̇вааби жад̇умахаарааж̇игз г̇ан̣хим̣су. д̇з винивиж̇жхид̇ваа д̇аавад̇им̣сз, д̇ад̇о яаамз, д̇ад̇о д̇усид̇з, д̇ад̇о ниммаанарад̇ий, д̇ад̇о бараниммид̇авасавад̇д̇ий, д̇ад̇о нава б̣рахмалогз, д̇ад̇о взхабпалз, д̇ад̇о бан̃жа суд̣̇д̇хааваасз винивиж̇жхид̇ваа жад̇д̇ааро ааруббз г̇ан̣хим̣су. жад̇д̇ааро жа ааруббз винивиж̇жхид̇ваа аж̇адаагаасам̣ багканд̣̇им̣су.
‘‘Catunahutādhikadviyojanasatasahassabahalā mahāpathavī niddhantasuvaṇṇapiṇḍi viya ahosi. Pathaviṃ bhinditvā heṭṭhā udakaṃ gaṇhiṃsu. Pathavīsandhārakaṃ aṭṭhanahutādhikacatuyojanasatasahassabahalaṃ udakaṃ suvaṇṇakalasehi āsiñcamānavilīnasuvaṇṇaṃ viya ahosi. Udakaṃ vinivijjhitvā vātaṃ aggahesuṃ. Channavutādhikanavayojanasatasahassabahalo vāto samussitasuvaṇṇakkhandho viya ahosi. Vātaṃ vinivijjhitvā heṭṭhā ajaṭākāsaṃ pakkhandiṃsu. Uparibhāgena uggantvāpi catumahārājike gaṇhiṃsu. Te vinivijjhitvā tāvatiṃse, tato yāme, tato tusite, tato nimmānaratī, tato paranimmitavasavattī, tato nava brahmaloke, tato vehapphale, tato pañca suddhāvāse vinivijjhitvā cattāro āruppe gaṇhiṃsu. Cattāro ca āruppe vinivijjhitvā ajaṭākāsaṃ pakkhandiṃsu.
‘‘д̇ирияабхааг̇зхи ананд̇аа логад̇хаад̇уяо багканд̣̇им̣су, зд̇д̇агз таанз жанд̣̇амхи жанд̣̇аббабхаа над̇т̇и, суурияз суурияаббабхаа над̇т̇и, д̇аарагаруубзсу д̇аарагаруубаббабхаа над̇т̇и, д̣̇звад̇аанам̣ уяяаанавимаанагаббаругкзсу сарийрз аабхаран̣зсууд̇и саб̣б̣ад̇т̇а бабхаа над̇т̇и. д̇исахассимахаасахассилогад̇хаад̇уяаа аалогапаран̣асамад̇т̇о махааб̣рахмааби суурияуг̇г̇аманз каж̇ж̇обанаго вияа ахоси, жанд̣̇асуурияад̇аарагаруубад̣̇звад̇уяяаанавимаанагаббаругкаанам̣ барижчзд̣̇амад̇д̇агамзва бан̃н̃ааяид̇т̇а. зд̇д̇агам̣ таанам̣ б̣уд̣̇д̇харасмийхиязва аж̇жход̇т̇адам̣ ахоси. аяан̃жа нзва б̣уд̣̇д̇хаанам̣ ад̇хидтаанид̣̇д̇хи, на бхааванаамаяид̣̇д̇хи. сан̣хасукумад̇хаммам̣ бана саммасад̇о логанаат̇асса лохид̇ам̣ басийд̣̇и, вад̇т̇уруубам̣ басийд̣̇и, чавиван̣н̣о басийд̣̇и. жид̇д̇асамудтаанаа ван̣н̣ад̇хаад̇у саманд̇аа асийд̇ихад̇т̇амад̇д̇з бад̣̇зсз нижжалаа адтаасий’’д̇и.
‘‘Tiriyabhāgehi anantā lokadhātuyo pakkhandiṃsu, ettake ṭhāne candamhi candappabhā natthi, sūriye sūriyappabhā natthi, tārakarūpesu tārakarūpappabhā natthi, devatānaṃ uyyānavimānakapparukkhesu sarīre ābharaṇesūti sabbattha pabhā natthi. Tisahassimahāsahassilokadhātuyā ālokapharaṇasamattho mahābrahmāpi sūriyuggamane khajjopanako viya ahosi, candasūriyatārakarūpadevatuyyānavimānakapparukkhānaṃ paricchedamattakameva paññāyittha. Ettakaṃ ṭhānaṃ buddharasmīhiyeva ajjhotthaṭaṃ ahosi. Ayañca neva buddhānaṃ adhiṭṭhāniddhi, na bhāvanāmayiddhi. Saṇhasukhumadhammaṃ pana sammasato lokanāthassa lohitaṃ pasīdi, vatthurūpaṃ pasīdi, chavivaṇṇo pasīdi. Cittasamuṭṭhānā vaṇṇadhātu samantā asītihatthamatte padese niccalā aṭṭhāsī’’ti.
звам̣ нисиннзд̇и д̇амхаа самаад̇химхаа вудтахид̇ваа нисиннз. зго б̣раахман̣од̇и наамаг̇од̇д̇авасзна анабхин̃н̃аад̇о абаагадо зго б̣раахман̣о. ‘‘хум̣ ху’’нд̇и гаронд̇о вижарад̇ийд̇и саб̣б̣ам̣ ажогкаж̇аад̇игам̣ бассид̇ваа ж̇иг̇ужчанд̇о ‘‘хум̣ ху’’нд̇и гаронд̇о вижарад̇и. зд̇ад̣̇авожаад̇и (уд̣̇аа. адта. 4) зд̇ам̣ ид̣̇аани вад̇д̇аб̣б̣ам̣ ‘‘гид̇д̇аавад̇аа ну ко’’д̇иаад̣̇иважанам̣ авожа. д̇ад̇т̇а гид̇д̇аавад̇аад̇и гид̇д̇агзна бамаан̣зна. ну-д̇и сам̣саяад̇т̇з нибаад̇о, ко-д̇и бад̣̇абууран̣з. бхо-д̇и б̣раахман̣аанам̣ ж̇аад̇исамуд̣̇ааг̇ад̇ам̣ аалабанам̣. д̇ат̇аа хи вуд̇д̇ам̣ ‘‘бховаад̣̇и наама со ход̇и, сажз ход̇и сагин̃жано’’д̇и (д̇ха. ба. 396; су. ни. 625). г̇од̇амаад̇и бхаг̇аванд̇ам̣ г̇од̇д̇зна аалабад̇и. гат̇ам̣ банааяам̣ б̣раахман̣о самбад̇и самааг̇ад̇о бхаг̇авад̇о г̇од̇д̇ам̣ ж̇аанаад̇ийд̇и? нааяам̣ самбад̇и самааг̇ад̇о, чаб̣б̣ассаани бад̇хаанагаран̣агаалз убадтаханд̇зхи бан̃жаваг̇г̇иязхи сад̣̇д̇хим̣ жарамаано абарабхааг̇з д̇ам̣ вад̇ам̣ чад̣д̣зд̇ваа урувзлааяам̣ сзнаниг̇амз зго ад̣̇уд̇ияо худ̇ваа бин̣д̣ааяа жарамааноби д̇зна б̣раахман̣зна д̣̇идтабуб̣б̣о жзва саллабид̇абуб̣б̣о жа, д̇зна со буб̣б̣з бан̃жаваг̇г̇иязхи г̇аяхамаанам̣ бхаг̇авад̇о г̇од̇д̇ам̣ ануссаранд̇о ‘‘бхо г̇од̇амаа’’д̇и бхаг̇аванд̇ам̣ г̇од̇д̇зна аалабад̇и. яад̇о бадтааяа ваа бхаг̇аваа махаабхинигкаманам̣ нигканд̇о аномаанад̣̇ийд̇ийрз баб̣б̣аж̇и, д̇ад̇о бабхуд̇и ‘‘саман̣о г̇од̇амо’’д̇и жанд̣̇о вияа суурияо вияа баагадо бан̃н̃аад̇о ход̇и, на жа д̇асса г̇од̇д̇аж̇аананз гааран̣ам̣ г̇авзсид̇аб̣б̣ам̣. б̣раахман̣агаран̣аад̇и б̣раахман̣ам̣ гаронд̇ийд̇и б̣раахман̣агаран̣аа, б̣раахман̣абхаавагараад̇и ад̇т̇о. зд̇т̇а жа ‘‘гид̇д̇аавад̇аа’’д̇и зд̇зна язхи д̇хаммзхи б̣раахман̣о ход̇и, д̇зсам̣ д̇хаммаанам̣ баримаан̣ам̣ бужчад̇и. ‘‘гад̇амз’’д̇и бана иминаа д̇зсам̣ саруубам̣ бужчад̇и.
Evaṃ nisinneti tamhā samādhimhā vuṭṭhahitvā nisinne. Eko brāhmaṇoti nāmagottavasena anabhiññāto apākaṭo eko brāhmaṇo. ‘‘Huṃ hu’’nti karonto vicaratīti sabbaṃ acokkhajātikaṃ passitvā jigucchanto ‘‘huṃ hu’’nti karonto vicarati. Etadavocāti (udā. aṭṭha. 4) etaṃ idāni vattabbaṃ ‘‘kittāvatā nu kho’’tiādivacanaṃ avoca. Tattha kittāvatāti kittakena pamāṇena. Nu-ti saṃsayatthe nipāto, kho-ti padapūraṇe. Bho-ti brāhmaṇānaṃ jātisamudāgataṃ ālapanaṃ. Tathā hi vuttaṃ ‘‘bhovādi nāma so hoti, sace hoti sakiñcano’’ti (dha. pa. 396; su. ni. 625). Gotamāti bhagavantaṃ gottena ālapati. Kathaṃ panāyaṃ brāhmaṇo sampati samāgato bhagavato gottaṃ jānātīti? Nāyaṃ sampati samāgato, chabbassāni padhānakaraṇakāle upaṭṭhahantehi pañcavaggiyehi saddhiṃ caramāno aparabhāge taṃ vataṃ chaḍḍetvā uruvelāyaṃ senanigame eko adutiyo hutvā piṇḍāya caramānopi tena brāhmaṇena diṭṭhapubbo ceva sallapitapubbo ca, tena so pubbe pañcavaggiyehi gayhamānaṃ bhagavato gottaṃ anussaranto ‘‘bho gotamā’’ti bhagavantaṃ gottena ālapati. Yato paṭṭhāya vā bhagavā mahābhinikkhamanaṃ nikkhanto anomānadītīre pabbaji, tato pabhuti ‘‘samaṇo gotamo’’ti cando viya sūriyo viya pākaṭo paññāto hoti, na ca tassa gottajānane kāraṇaṃ gavesitabbaṃ. Brāhmaṇakaraṇāti brāhmaṇaṃ karontīti brāhmaṇakaraṇā, brāhmaṇabhāvakarāti attho. Ettha ca ‘‘kittāvatā’’ti etena yehi dhammehi brāhmaṇo hoti, tesaṃ dhammānaṃ parimāṇaṃ pucchati. ‘‘Katame’’ti pana iminā tesaṃ sarūpaṃ pucchati.
уд̣̇аанам̣ уд̣̇аанзсийд̇и ‘‘яо б̣раахман̣о’’д̇иаад̣̇игам̣ уд̣̇аанам̣ уд̣̇аанзси, на бана д̇асса б̣раахман̣асса д̇хаммам̣ д̣̇зсзси. гасмаа? д̇хаммад̣̇зсанааяа абхааж̇анабхаавад̇о. д̇ат̇аа хи д̇асса б̣раахман̣асса имам̣ г̇аат̇ам̣ суд̇ваа на сажжаабхисамаяо ахоси. яат̇аа жа имасса, звам̣ убагасса ааж̇ийвагасса б̣уд̣̇д̇хаг̇ун̣аббагаасанам̣ суд̇ваа. д̇хаммажаггаббавад̇д̇анад̇о хи буб̣б̣абхааг̇з бхаг̇авад̇аа бхаасид̇ам̣ барзсам̣ сун̣анд̇аанамби д̇абуссабхаллигаанам̣ саран̣ад̣̇аанам̣ вияа ваасанаабхааг̇ияамзва ж̇аад̇ам̣, на асзгкабхааг̇ияам̣ ваа ниб̣б̣зд̇хабхааг̇ияам̣ ваа. зсаа хи д̇хаммад̇аад̇и. взд̣̇зхи ваа анд̇анд̇и зд̇т̇а анд̇ам̣ наама саб̣б̣асан̇каарабарияосаанам̣ ниб̣б̣аанам̣. имз уссад̣̇аа над̇т̇ийд̇и саб̣б̣асо имз бахийнад̇д̇аа на санд̇и.
Udānaṃ udānesīti ‘‘yo brāhmaṇo’’tiādikaṃ udānaṃ udānesi, na pana tassa brāhmaṇassa dhammaṃ desesi. Kasmā? Dhammadesanāya abhājanabhāvato. Tathā hi tassa brāhmaṇassa imaṃ gāthaṃ sutvā na saccābhisamayo ahosi. Yathā ca imassa, evaṃ upakassa ājīvakassa buddhaguṇappakāsanaṃ sutvā. Dhammacakkappavattanato hi pubbabhāge bhagavatā bhāsitaṃ paresaṃ suṇantānampi tapussabhallikānaṃ saraṇadānaṃ viya vāsanābhāgiyameva jātaṃ, na asekkhabhāgiyaṃ vā nibbedhabhāgiyaṃ vā. Esā hi dhammatāti. Vedehi vā antanti ettha antaṃ nāma sabbasaṅkhārapariyosānaṃ nibbānaṃ. Ime ussadā natthīti sabbaso ime pahīnattā na santi.
аж̇абаалагат̇ааван̣н̣анаа нидтид̇аа.
Ajapālakathāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махааваг̇г̇абаал̣и • Mahāvaggapāḷi / 2. аж̇абаалагат̇аа • 2. Ajapālakathā
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / аж̇абаалагат̇аа • Ajapālakathā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / аж̇абаалагат̇ааван̣н̣анаа • Ajapālakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / аж̇абаалагат̇ааван̣н̣анаа • Ajapālakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 2. аж̇абаалагат̇аа • 2. Ajapālakathā
