| Library / Tipiṭaka / తిపిటక • Tipiṭaka / విమతివినోదనీ-టీకా • Vimativinodanī-ṭīkā |
అజపాలకథావణ్ణనా
Ajapālakathāvaṇṇanā
౪. తస్స సత్తాహస్స అచ్చయేనాతి పల్లఙ్కసత్తాహస్స అపగమనేన. తమ్హా సమాధిమ్హాతి అరహత్తఫలసమాపత్తిసమాధిమ్హా. అన్తరన్తరా ఏవ హి పచ్చయాకారమనసికారో. అవసేసకాలం పన సబ్బం భగవా ఫలసమాపత్తియాపి వీతినామేసి. తం సన్ధాయ ‘‘తమ్హా సమాధిమ్హా’’తి వుత్తం. రతనచఙ్కమేతి భగవతో చిరం ఠితస్స చఙ్కమనాధిప్పాయం ఞత్వా దేవతాహి మాపితే రతనచఙ్కమే. రతనఘరన్తి భగవతో నిసీదనాధిప్పాయం ఞత్వా దేవతాహి మాపితం రతనమయం గేహం.
4. Tassa sattāhassa accayenāti pallaṅkasattāhassa apagamanena. Tamhā samādhimhāti arahattaphalasamāpattisamādhimhā. Antarantarā eva hi paccayākāramanasikāro. Avasesakālaṃ pana sabbaṃ bhagavā phalasamāpattiyāpi vītināmesi. Taṃ sandhāya ‘‘tamhā samādhimhā’’ti vuttaṃ. Ratanacaṅkameti bhagavato ciraṃ ṭhitassa caṅkamanādhippāyaṃ ñatvā devatāhi māpite ratanacaṅkame. Ratanagharanti bhagavato nisīdanādhippāyaṃ ñatvā devatāhi māpitaṃ ratanamayaṃ gehaṃ.
తత్రాపీతి న కేవలం రతనఘరేయేవ. తత్రాపి అజపాలనిగ్రోధమూలేపి అభిధమ్మం విచినన్తో ఏవ అన్తరన్తరా విముత్తిసుఖం పటిసంవేదేన్తోతి అత్థో. తత్థాపి హి అనన్తనయసమన్తపట్ఠానం సమ్మసతో సమ్మాసమ్బుద్ధస్స పీతిసముట్ఠితా ఛబ్బణ్ణా బుద్ధరస్మియో రతనఘరే వియ నిచ్ఛరింసు ఏవ. ‘‘హుంహు’’న్తి కరోన్తోతి ‘‘సబ్బే హీనజాతికా మం మా ఉపగచ్ఛన్తూ’’తి మానవసేన, సమీపం ఉపగతేసు కోధవసేన చ ‘‘అపేథా’’తి అధిప్పాయనిచ్ఛారితం హుంహుంకారం కరోన్తో.
Tatrāpīti na kevalaṃ ratanaghareyeva. Tatrāpi ajapālanigrodhamūlepi abhidhammaṃ vicinanto eva antarantarā vimuttisukhaṃ paṭisaṃvedentoti attho. Tatthāpi hi anantanayasamantapaṭṭhānaṃ sammasato sammāsambuddhassa pītisamuṭṭhitā chabbaṇṇā buddharasmiyo ratanaghare viya nicchariṃsu eva. ‘‘Huṃhu’’nti karontoti ‘‘sabbe hīnajātikā maṃ mā upagacchantū’’ti mānavasena, samīpaṃ upagatesu kodhavasena ca ‘‘apethā’’ti adhippāyanicchāritaṃ huṃhuṃkāraṃ karonto.
బ్రహ్మఞ్ఞన్తి బ్రాహ్మణత్తం. అన్తన్తి నిబ్బానం. దేవానం వా అన్తన్తి మగ్గఞాణానం వా అన్తభూతం అరహత్తఫలం.
Brahmaññanti brāhmaṇattaṃ. Antanti nibbānaṃ. Devānaṃ vā antanti maggañāṇānaṃ vā antabhūtaṃ arahattaphalaṃ.
Related texts:
తిపిటక (మూల) • Tipiṭaka (Mūla) / వినయపిటక • Vinayapiṭaka / మహావగ్గపాళి • Mahāvaggapāḷi / ౨. అజపాలకథా • 2. Ajapālakathā
అట్ఠకథా • Aṭṭhakathā / వినయపిటక (అట్ఠకథా) • Vinayapiṭaka (aṭṭhakathā) / మహావగ్గ-అట్ఠకథా • Mahāvagga-aṭṭhakathā / అజపాలకథా • Ajapālakathā
టీకా • Tīkā / వినయపిటక (టీకా) • Vinayapiṭaka (ṭīkā) / సారత్థదీపనీ-టీకా • Sāratthadīpanī-ṭīkā / అజపాలకథావణ్ణనా • Ajapālakathāvaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / వజిరబుద్ధి-టీకా • Vajirabuddhi-ṭīkā / అజపాలకథావణ్ణనా • Ajapālakathāvaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / పాచిత్యాదియోజనాపాళి • Pācityādiyojanāpāḷi / ౨. అజపాలకథా • 2. Ajapālakathā
