| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
ಅಜಪಾಲಕಥಾವಣ್ಣನಾ
Ajapālakathāvaṇṇanā
೪. ತಸ್ಸ ಸತ್ತಾಹಸ್ಸ ಅಚ್ಚಯೇನಾತಿ ಪಲ್ಲಙ್ಕಸತ್ತಾಹಸ್ಸ ಅಪಗಮನೇನ। ತಮ್ಹಾ ಸಮಾಧಿಮ್ಹಾತಿ ಅರಹತ್ತಫಲಸಮಾಪತ್ತಿಸಮಾಧಿಮ್ಹಾ। ಅನ್ತರನ್ತರಾ ಏವ ಹಿ ಪಚ್ಚಯಾಕಾರಮನಸಿಕಾರೋ। ಅವಸೇಸಕಾಲಂ ಪನ ಸಬ್ಬಂ ಭಗವಾ ಫಲಸಮಾಪತ್ತಿಯಾಪಿ ವೀತಿನಾಮೇಸಿ। ತಂ ಸನ್ಧಾಯ ‘‘ತಮ್ಹಾ ಸಮಾಧಿಮ್ಹಾ’’ತಿ ವುತ್ತಂ। ರತನಚಙ್ಕಮೇತಿ ಭಗವತೋ ಚಿರಂ ಠಿತಸ್ಸ ಚಙ್ಕಮನಾಧಿಪ್ಪಾಯಂ ಞತ್ವಾ ದೇವತಾಹಿ ಮಾಪಿತೇ ರತನಚಙ್ಕಮೇ। ರತನಘರನ್ತಿ ಭಗವತೋ ನಿಸೀದನಾಧಿಪ್ಪಾಯಂ ಞತ್ವಾ ದೇವತಾಹಿ ಮಾಪಿತಂ ರತನಮಯಂ ಗೇಹಂ।
4. Tassa sattāhassa accayenāti pallaṅkasattāhassa apagamanena. Tamhā samādhimhāti arahattaphalasamāpattisamādhimhā. Antarantarā eva hi paccayākāramanasikāro. Avasesakālaṃ pana sabbaṃ bhagavā phalasamāpattiyāpi vītināmesi. Taṃ sandhāya ‘‘tamhā samādhimhā’’ti vuttaṃ. Ratanacaṅkameti bhagavato ciraṃ ṭhitassa caṅkamanādhippāyaṃ ñatvā devatāhi māpite ratanacaṅkame. Ratanagharanti bhagavato nisīdanādhippāyaṃ ñatvā devatāhi māpitaṃ ratanamayaṃ gehaṃ.
ತತ್ರಾಪೀತಿ ನ ಕೇವಲಂ ರತನಘರೇಯೇವ। ತತ್ರಾಪಿ ಅಜಪಾಲನಿಗ್ರೋಧಮೂಲೇಪಿ ಅಭಿಧಮ್ಮಂ ವಿಚಿನನ್ತೋ ಏವ ಅನ್ತರನ್ತರಾ ವಿಮುತ್ತಿಸುಖಂ ಪಟಿಸಂವೇದೇನ್ತೋತಿ ಅತ್ಥೋ। ತತ್ಥಾಪಿ ಹಿ ಅನನ್ತನಯಸಮನ್ತಪಟ್ಠಾನಂ ಸಮ್ಮಸತೋ ಸಮ್ಮಾಸಮ್ಬುದ್ಧಸ್ಸ ಪೀತಿಸಮುಟ್ಠಿತಾ ಛಬ್ಬಣ್ಣಾ ಬುದ್ಧರಸ್ಮಿಯೋ ರತನಘರೇ ವಿಯ ನಿಚ್ಛರಿಂಸು ಏವ। ‘‘ಹುಂಹು’’ನ್ತಿ ಕರೋನ್ತೋತಿ ‘‘ಸಬ್ಬೇ ಹೀನಜಾತಿಕಾ ಮಂ ಮಾ ಉಪಗಚ್ಛನ್ತೂ’’ತಿ ಮಾನವಸೇನ, ಸಮೀಪಂ ಉಪಗತೇಸು ಕೋಧವಸೇನ ಚ ‘‘ಅಪೇಥಾ’’ತಿ ಅಧಿಪ್ಪಾಯನಿಚ್ಛಾರಿತಂ ಹುಂಹುಂಕಾರಂ ಕರೋನ್ತೋ।
Tatrāpīti na kevalaṃ ratanaghareyeva. Tatrāpi ajapālanigrodhamūlepi abhidhammaṃ vicinanto eva antarantarā vimuttisukhaṃ paṭisaṃvedentoti attho. Tatthāpi hi anantanayasamantapaṭṭhānaṃ sammasato sammāsambuddhassa pītisamuṭṭhitā chabbaṇṇā buddharasmiyo ratanaghare viya nicchariṃsu eva. ‘‘Huṃhu’’nti karontoti ‘‘sabbe hīnajātikā maṃ mā upagacchantū’’ti mānavasena, samīpaṃ upagatesu kodhavasena ca ‘‘apethā’’ti adhippāyanicchāritaṃ huṃhuṃkāraṃ karonto.
ಬ್ರಹ್ಮಞ್ಞನ್ತಿ ಬ್ರಾಹ್ಮಣತ್ತಂ। ಅನ್ತನ್ತಿ ನಿಬ್ಬಾನಂ। ದೇವಾನಂ ವಾ ಅನ್ತನ್ತಿ ಮಗ್ಗಞಾಣಾನಂ ವಾ ಅನ್ತಭೂತಂ ಅರಹತ್ತಫಲಂ।
Brahmaññanti brāhmaṇattaṃ. Antanti nibbānaṃ. Devānaṃ vā antanti maggañāṇānaṃ vā antabhūtaṃ arahattaphalaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೨. ಅಜಪಾಲಕಥಾ • 2. Ajapālakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಅಜಪಾಲಕಥಾ • Ajapālakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಅಜಪಾಲಕಥಾವಣ್ಣನಾ • Ajapālakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಅಜಪಾಲಕಥಾವಣ್ಣನಾ • Ajapālakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨. ಅಜಪಾಲಕಥಾ • 2. Ajapālakathā
