| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
අජපාලකථාවණ්‌ණනා
Ajapālakathāvaṇṇanā
4. තස්‌ස සත්‌තාහස්‌ස අච්‌චයෙනාති පල්‌ලඞ්‌කසත්‌තාහස්‌ස අපගමනෙන. තම්‌හා සමාධිම්‌හාති අරහත්‌තඵලසමාපත්‌තිසමාධිම්‌හා. අන්‌තරන්‌තරා එව හි පච්‌චයාකාරමනසිකාරො. අවසෙසකාලං පන සබ්‌බං භගවා ඵලසමාපත්‌තියාපි වීතිනාමෙසි. තං සන්‌ධාය ‘‘තම්‌හා සමාධිම්‌හා’’ති වුත්‌තං. රතනචඞ්‌කමෙති භගවතො චිරං ඨිතස්‌ස චඞ්‌කමනාධිප්‌පායං ඤත්‌වා දෙවතාහි මාපිතෙ රතනචඞ්‌කමෙ. රතනඝරන්‌ති භගවතො නිසීදනාධිප්‌පායං ඤත්‌වා දෙවතාහි මාපිතං රතනමයං ගෙහං.
4. Tassa sattāhassa accayenāti pallaṅkasattāhassa apagamanena. Tamhā samādhimhāti arahattaphalasamāpattisamādhimhā. Antarantarā eva hi paccayākāramanasikāro. Avasesakālaṃ pana sabbaṃ bhagavā phalasamāpattiyāpi vītināmesi. Taṃ sandhāya ‘‘tamhā samādhimhā’’ti vuttaṃ. Ratanacaṅkameti bhagavato ciraṃ ṭhitassa caṅkamanādhippāyaṃ ñatvā devatāhi māpite ratanacaṅkame. Ratanagharanti bhagavato nisīdanādhippāyaṃ ñatvā devatāhi māpitaṃ ratanamayaṃ gehaṃ.
තත්‍රාපීති න කෙවලං රතනඝරෙයෙව. තත්‍රාපි අජපාලනිග්‍රොධමූලෙපි අභිධම්‌මං විචිනන්‌තො එව අන්‌තරන්‌තරා විමුත්‌තිසුඛං පටිසංවෙදෙන්‌තොති අත්‌ථො. තත්‌ථාපි හි අනන්‌තනයසමන්‌තපට්‌ඨානං සම්‌මසතො සම්‌මාසම්‌බුද්‌ධස්‌ස පීතිසමුට්‌ඨිතා ඡබ්‌බණ්‌ණා බුද්‌ධරස්‌මියො රතනඝරෙ විය නිච්‌ඡරිංසු එව. ‘‘හුංහු’’න්‌ති කරොන්‌තොති ‘‘සබ්‌බෙ හීනජාතිකා මං මා උපගච්‌ඡන්‌තූ’’ති මානවසෙන, සමීපං උපගතෙසු කොධවසෙන ච ‘‘අපෙථා’’ති අධිප්‌පායනිච්‌ඡාරිතං හුංහුංකාරං කරොන්‌තො.
Tatrāpīti na kevalaṃ ratanaghareyeva. Tatrāpi ajapālanigrodhamūlepi abhidhammaṃ vicinanto eva antarantarā vimuttisukhaṃ paṭisaṃvedentoti attho. Tatthāpi hi anantanayasamantapaṭṭhānaṃ sammasato sammāsambuddhassa pītisamuṭṭhitā chabbaṇṇā buddharasmiyo ratanaghare viya nicchariṃsu eva. ‘‘Huṃhu’’nti karontoti ‘‘sabbe hīnajātikā maṃ mā upagacchantū’’ti mānavasena, samīpaṃ upagatesu kodhavasena ca ‘‘apethā’’ti adhippāyanicchāritaṃ huṃhuṃkāraṃ karonto.
බ්‍රහ්‌මඤ්‌ඤන්‌ති බ්‍රාහ්‌මණත්‌තං. අන්‌තන්‌ති නිබ්‌බානං. දෙවානං වා අන්‌තන්‌ති මග්‌ගඤාණානං වා අන්‌තභූතං අරහත්‌තඵලං.
Brahmaññanti brāhmaṇattaṃ. Antanti nibbānaṃ. Devānaṃ vā antanti maggañāṇānaṃ vā antabhūtaṃ arahattaphalaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 2. අජපාලකථා • 2. Ajapālakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / අජපාලකථා • Ajapālakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / අජපාලකථාවණ්‌ණනා • Ajapālakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අජපාලකථාවණ්‌ණනා • Ajapālakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. අජපාලකථා • 2. Ajapālakathā
