| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
ཨཛཱཏསཏྟུཀུམཱརཝཏྠུ
Ajātasattukumāravatthu
༣༣༩. ཨཐ ཁོ དེཝདཏྟོ ཡེན ཨཛཱཏསཏྟུ ཀུམཱརོ ཏེནུཔསངྐམི, ཨུཔསངྐམིཏྭཱ ཨཛཱཏསཏྟུཾ ཀུམཱརཾ ཨེཏདཝོཙ – ‘‘པུབྦེ ཁོ, ཀུམཱར, མནུསྶཱ དཱིགྷཱཡུཀཱ, ཨེཏརཧི ཨཔྤཱཡུཀཱ། ཋཱནཾ ཁོ པནེཏཾ ཝིཛྫཏི ཡཾ ཏྭཾ ཀུམཱརོཝ སམཱནོ ཀཱལཾ ཀརེཡྻཱསི། ཏེན ཧི ཏྭཾ, ཀུམཱར, པིཏརཾ ཧནྟྭཱ རཱཛཱ ཧོཧི། ཨཧཾ བྷགཝནྟཾ ཧནྟྭཱ བུདྡྷོ བྷཝིསྶཱམཱི’’ཏི།
339. Atha kho devadatto yena ajātasattu kumāro tenupasaṅkami, upasaṅkamitvā ajātasattuṃ kumāraṃ etadavoca – ‘‘pubbe kho, kumāra, manussā dīghāyukā, etarahi appāyukā. Ṭhānaṃ kho panetaṃ vijjati yaṃ tvaṃ kumārova samāno kālaṃ kareyyāsi. Tena hi tvaṃ, kumāra, pitaraṃ hantvā rājā hohi. Ahaṃ bhagavantaṃ hantvā buddho bhavissāmī’’ti.
ཨཐ ཁོ ཨཛཱཏསཏྟུ ཀུམཱརོ – ཨཡྻོ ཁོ དེཝདཏྟོ མཧིདྡྷིཀོ མཧཱནུབྷཱཝོ, ཛཱནེཡྻཱསི ཨཡྻོ དེཝདཏྟོཏི – ཨཱུརུཡཱ པོཏྠནིཀཾ བནྡྷིཏྭཱ དིཝཱ དིཝསྶ 1 བྷཱིཏོ ཨུབྦིགྒོ ཨུསྶངྐཱི ཨུཏྲསྟོ སཧསཱ ཨནྟེཔུརཾ པཱཝིསི། ཨདྡསཱསུཾ ཁོ ཨནྟེཔུརེ ཨུཔཙཱརཀཱ མཧཱམཏྟཱ ཨཛཱཏསཏྟུཾ ཀུམཱརཾ དིཝཱ དིཝསྶ བྷཱིཏཾ ཨུབྦིགྒཾ ཨུསྶངྐིཾ ཨུཏྲསྟཾ སཧསཱ ཨནྟེཔུརཾ པཝིསནྟཾ; དིསྭཱན ཨགྒཧེསུཾ། ཏེ ཝིཙིནནྟཱ ཨཱུརུཡཱ པོཏྠནིཀཾ བདྡྷཾ 2 དིསྭཱན ཨཛཱཏསཏྟུཾ ཀུམཱརཾ ཨེཏདཝོཙུཾ – ‘‘ཀིཾ ཏྭཾ, ཀུམཱར, ཀཏྟུཀཱམོསཱི’’ཏི? ‘‘པིཏརམྷི ཧནྟུཀཱམོ’’ཏི། ‘‘ཀེནཱསི ཨུསྶཱཧིཏོ’’ཏི? ‘‘ཨཡྻེན དེཝདཏྟེནཱ’’ཏི། ཨེཀཙྩེ མཧཱམཏྟཱ ཨེཝཾ མཏིཾ ཨཀཾསུ – ‘‘ཀུམཱརོ ཙ ཧནྟབྦོ, དེཝདཏྟོ ཙ, སབྦེ ཙ བྷིཀྑཱུ ཧནྟབྦཱ’’ཏི། ཨེཀཙྩེ མཧཱམཏྟཱ ཨེཝཾ མཏིཾ ཨཀཾསུ – ‘‘ན བྷིཀྑཱུ ཧནྟབྦཱ། ན བྷིཀྑཱུ ཀིཉྩི ཨཔརཛ྄ཛྷནྟི། ཀུམཱརོ ཙ ཧནྟབྦོ, དེཝདཏྟོ ཙཱ’’ཏི། ཨེཀཙྩེ མཧཱམཏྟཱ ཨེཝཾ མཏིཾ ཨཀཾསུ – ‘‘ན ཀུམཱརོ ཙ ཧནྟབྦོ, ན དེཝདཏྟོ། ན བྷིཀྑཱུ ཧནྟབྦཱ། རཉྙོ ཨཱརོཙེཏབྦཾ། ཡཐཱ རཱཛཱ ཝཀྑཏི ཏཐཱ ཀརིསྶཱམཱ’’ཏི།
Atha kho ajātasattu kumāro – ayyo kho devadatto mahiddhiko mahānubhāvo, jāneyyāsi ayyo devadattoti – ūruyā potthanikaṃ bandhitvā divā divassa 3 bhīto ubbiggo ussaṅkī utrasto sahasā antepuraṃ pāvisi. Addasāsuṃ kho antepure upacārakā mahāmattā ajātasattuṃ kumāraṃ divā divassa bhītaṃ ubbiggaṃ ussaṅkiṃ utrastaṃ sahasā antepuraṃ pavisantaṃ; disvāna aggahesuṃ. Te vicinantā ūruyā potthanikaṃ baddhaṃ 4 disvāna ajātasattuṃ kumāraṃ etadavocuṃ – ‘‘kiṃ tvaṃ, kumāra, kattukāmosī’’ti? ‘‘Pitaramhi hantukāmo’’ti. ‘‘Kenāsi ussāhito’’ti? ‘‘Ayyena devadattenā’’ti. Ekacce mahāmattā evaṃ matiṃ akaṃsu – ‘‘kumāro ca hantabbo, devadatto ca, sabbe ca bhikkhū hantabbā’’ti. Ekacce mahāmattā evaṃ matiṃ akaṃsu – ‘‘na bhikkhū hantabbā. Na bhikkhū kiñci aparajjhanti. Kumāro ca hantabbo, devadatto cā’’ti. Ekacce mahāmattā evaṃ matiṃ akaṃsu – ‘‘na kumāro ca hantabbo, na devadatto. Na bhikkhū hantabbā. Rañño ārocetabbaṃ. Yathā rājā vakkhati tathā karissāmā’’ti.
ཨཐ ཁོ ཏེ མཧཱམཏྟཱ ཨཛཱཏསཏྟུཾ ཀུམཱརཾ ཨཱདཱཡ ཡེན རཱཛཱ མཱགདྷོ སེནིཡོ བིམྦིསཱརོ ཏེནུཔསངྐམིཾསུ , ཨུཔསངྐམིཏྭཱ རཉྙོ མཱགདྷསྶ སེནིཡསྶ བིམྦིསཱརསྶ ཨེཏམཏྠཾ ཨཱརོཙེསུཾ ། ‘‘ཀཐཾ, བྷཎེ, མཧཱམཏྟེཧི མཏི ཀཏཱ’’ཏི? ‘‘ཨེཀཙྩེ, དེཝ, མཧཱམཏྟཱ ཨེཝཾ མཏིཾ ཨཀཾསུ – ‘ཀུམཱརོ ཙ ཧནྟབྦོ, དེཝདཏྟོ ཙ, སབྦེ ཙ བྷིཀྑཱུ ཧནྟབྦཱ’ཏི། ཨེཀཙྩེ མཧཱམཏྟཱ ཨེཝཾ མཏིཾ ཨཀཾསུ – ‘ན བྷིཀྑཱུ ཧནྟབྦཱ། ན བྷིཀྑཱུ ཀིཉྩི ཨཔརཛ྄ཛྷནྟི། ཀུམཱརོ ཙ ཧནྟབྦོ, དེཝདཏྟོ ཙཱ’ཏི། ཨེཀཙྩེ མཧཱམཏྟཱ ཨེཝཾ མཏིཾ ཨཀཾསུ – ‘ན ཀུམཱརོ ཙ ཧནྟབྦོ, ན དེཝདཏྟོ། ན བྷིཀྑཱུ ཧནྟབྦཱ། རཉྙོ ཨཱརོཙེཏབྦཾ། ཡཐཱ རཱཛཱ ཝཀྑཏི ཏཐཱ ཀརིསྶཱམཱ’’’ཏི། ‘‘ཀིཾ, བྷཎེ, ཀརིསྶཏི བུདྡྷོ ཝཱ དྷམྨོ ཝཱ སངྒྷོ ཝཱ? ནནུ བྷགཝཏཱ པཊིཀཙྩེཝ དེཝདཏྟོ རཱཛགཧེ པཀཱསཱཔིཏོ – ‘པུབྦེ དེཝདཏྟསྶ ཨཉྙཱ པཀཏི ཨཧོསི, ཨིདཱནི ཨཉྙཱ པཀཏི། ཡཾ དེཝདཏྟོ ཀརེཡྻ ཀཱཡེན ཝཱཙཱཡ, ན ཏེན བུདྡྷོ ཝཱ དྷམྨོ ཝཱ སངྒྷོ ཝཱ དཊྛབྦོ, དེཝདཏྟོཝ ཏེན དཊྛབྦོ’’ཏི? ཏཏྠ ཡེ ཏེ མཧཱམཏྟཱ ཨེཝཾ མཏིཾ ཨཀཾསུ – ‘ཀུམཱརོ ཙ ཧནྟབྦོ དེཝདཏྟོ ཙ; སབྦེ ཙ བྷིཀྑཱུ ཧནྟབྦཱ’ཏི; ཏེ ཨཊྛཱནེ ཨཀཱསི། ཡེ ཏེ མཧཱམཏྟཱ ཨེཝཾ མཏིཾ ཨཀཾསུ – ‘ན བྷིཀྑཱུ ཧནྟབྦཱ; ན བྷིཀྑཱུ ཀིཉྩི ཨཔརཛ྄ཛྷནྟི; ཀུམཱརོ ཙ ཧནྟབྦོ དེཝདཏྟོ ཙཱ’ཏི; ཏེ ནཱིཙེ ཋཱནེ ཋཔེསི། ཡེ ཏེ མཧཱམཏྟཱ ཨེཝཾ མཏིཾ ཨཀཾསུ – ‘ན ཀུམཱརོ ཙ ཧནྟབྦོ, ན དེཝདཏྟོ; ན བྷིཀྑཱུ ཧནྟབྦཱ; རཉྙོ ཨཱརོཙེཏབྦཾ; ཡཐཱ རཱཛཱ ཝཀྑཏི ཏཐཱ ཀརིསྶཱམཱ’ཏི; ཏེ ཨུཙྩེ ཋཱནེ ཋཔེསི། ཨཐ ཁོ རཱཛཱ མཱགདྷོ སེནིཡོ བིམྦིསཱརོ ཨཛཱཏསཏྟུཾ ཀུམཱརཾ ཨེཏདཝོཙ – ‘‘ཀིསྶ མཾ ཏྭཾ, ཀུམཱར, ཧནྟུཀཱམོསཱི’’ཏི? ‘‘རཛྫེནཱམྷི, དེཝ, ཨཏྠིཀོ’’ཏི། ‘‘སཙེ ཁོ ཏྭཾ, ཀུམཱར, རཛྫེན ཨཏྠིཀོ, ཨེཏཾ ཏེ རཛྫ’’ནྟི ཨཛཱཏསཏྟུསྶ ཀུམཱརསྶ རཛྫཾ ནིཡྻཱདེསི།
Atha kho te mahāmattā ajātasattuṃ kumāraṃ ādāya yena rājā māgadho seniyo bimbisāro tenupasaṅkamiṃsu , upasaṅkamitvā rañño māgadhassa seniyassa bimbisārassa etamatthaṃ ārocesuṃ . ‘‘Kathaṃ, bhaṇe, mahāmattehi mati katā’’ti? ‘‘Ekacce, deva, mahāmattā evaṃ matiṃ akaṃsu – ‘kumāro ca hantabbo, devadatto ca, sabbe ca bhikkhū hantabbā’ti. Ekacce mahāmattā evaṃ matiṃ akaṃsu – ‘na bhikkhū hantabbā. Na bhikkhū kiñci aparajjhanti. Kumāro ca hantabbo, devadatto cā’ti. Ekacce mahāmattā evaṃ matiṃ akaṃsu – ‘na kumāro ca hantabbo, na devadatto. Na bhikkhū hantabbā. Rañño ārocetabbaṃ. Yathā rājā vakkhati tathā karissāmā’’’ti. ‘‘Kiṃ, bhaṇe, karissati buddho vā dhammo vā saṅgho vā? Nanu bhagavatā paṭikacceva devadatto rājagahe pakāsāpito – ‘pubbe devadattassa aññā pakati ahosi, idāni aññā pakati. Yaṃ devadatto kareyya kāyena vācāya, na tena buddho vā dhammo vā saṅgho vā daṭṭhabbo, devadattova tena daṭṭhabbo’’ti? Tattha ye te mahāmattā evaṃ matiṃ akaṃsu – ‘kumāro ca hantabbo devadatto ca; sabbe ca bhikkhū hantabbā’ti; te aṭṭhāne akāsi. Ye te mahāmattā evaṃ matiṃ akaṃsu – ‘na bhikkhū hantabbā; na bhikkhū kiñci aparajjhanti; kumāro ca hantabbo devadatto cā’ti; te nīce ṭhāne ṭhapesi. Ye te mahāmattā evaṃ matiṃ akaṃsu – ‘na kumāro ca hantabbo, na devadatto; na bhikkhū hantabbā; rañño ārocetabbaṃ; yathā rājā vakkhati tathā karissāmā’ti; te ucce ṭhāne ṭhapesi. Atha kho rājā māgadho seniyo bimbisāro ajātasattuṃ kumāraṃ etadavoca – ‘‘kissa maṃ tvaṃ, kumāra, hantukāmosī’’ti? ‘‘Rajjenāmhi, deva, atthiko’’ti. ‘‘Sace kho tvaṃ, kumāra, rajjena atthiko, etaṃ te rajja’’nti ajātasattussa kumārassa rajjaṃ niyyādesi.
Footnotes:
Related texts:
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཉྩསཏྠུཀཐཱཝཎྞནཱ • Pañcasatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཚསཀྱཔབྦཛྫཱཀཐཱཝཎྞནཱ • Chasakyapabbajjākathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཚསཀྱཔབྦཛྫཱཀཐཱདིཝཎྞནཱ • Chasakyapabbajjākathādivaṇṇanā
