| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৬. অজাতসুত্তং
6. Ajātasuttaṃ
৪৩. ৰুত্তঞ্হেতং ভগৰতা, ৰুত্তমরহতাতি মে সুতং –
43. Vuttañhetaṃ bhagavatā, vuttamarahatāti me sutaṃ –
‘‘অত্থি, ভিক্খৰে , অজাতং অভূতং অকতং অসঙ্খতং। নো চেতং, ভিক্খৰে, অভৰিস্স অজাতং অভূতং অকতং অসঙ্খতং, নযিধ জাতস্স ভূতস্স কতস্স সঙ্খতস্স নিস্সরণং পঞ্ঞাযেথ। যস্মা চ খো, ভিক্খৰে, অত্থি অজাতং অভূতং অকতং অসঙ্খতং, তস্মা জাতস্স ভূতস্স কতস্স সঙ্খতস্স নিস্সরণং পঞ্ঞাযতী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Atthi, bhikkhave , ajātaṃ abhūtaṃ akataṃ asaṅkhataṃ. No cetaṃ, bhikkhave, abhavissa ajātaṃ abhūtaṃ akataṃ asaṅkhataṃ, nayidha jātassa bhūtassa katassa saṅkhatassa nissaraṇaṃ paññāyetha. Yasmā ca kho, bhikkhave, atthi ajātaṃ abhūtaṃ akataṃ asaṅkhataṃ, tasmā jātassa bhūtassa katassa saṅkhatassa nissaraṇaṃ paññāyatī’’ti. Etamatthaṃ bhagavā avoca. Tatthetaṃ iti vuccati –
‘‘জাতং ভূতং সমুপ্পন্নং, কতং সঙ্খতমদ্ধুৰং।
‘‘Jātaṃ bhūtaṃ samuppannaṃ, kataṃ saṅkhatamaddhuvaṃ;
‘‘আহারনেত্তিপ্পভৰং, নালং তদভিনন্দিতুং।
‘‘Āhāranettippabhavaṃ, nālaṃ tadabhinandituṃ;
তস্স নিস্সরণং সন্তং, অতক্কাৰচরং ধুৰং॥
Tassa nissaraṇaṃ santaṃ, atakkāvacaraṃ dhuvaṃ.
‘‘অজাতং অসমুপ্পন্নং, অসোকং ৰিরজং পদং।
‘‘Ajātaṃ asamuppannaṃ, asokaṃ virajaṃ padaṃ;
নিরোধো দুক্খধম্মানং, সঙ্খারূপসমো সুখো’’তি॥
Nirodho dukkhadhammānaṃ, saṅkhārūpasamo sukho’’ti.
অযম্পি অত্থো ৰুত্তো ভগৰতা, ইতি মে সুতন্তি। ছট্ঠং।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৬. অজাতসুত্তৰণ্ণনা • 6. Ajātasuttavaṇṇanā
