| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. अजातसुत्तं
6. Ajātasuttaṃ
४३. वुत्तञ्हेतं भगवता, वुत्तमरहताति मे सुतं –
43. Vuttañhetaṃ bhagavatā, vuttamarahatāti me sutaṃ –
‘‘अत्थि, भिक्खवे , अजातं अभूतं अकतं असङ्खतं। नो चेतं, भिक्खवे, अभविस्स अजातं अभूतं अकतं असङ्खतं, नयिध जातस्स भूतस्स कतस्स सङ्खतस्स निस्सरणं पञ्ञायेथ। यस्मा च खो, भिक्खवे, अत्थि अजातं अभूतं अकतं असङ्खतं, तस्मा जातस्स भूतस्स कतस्स सङ्खतस्स निस्सरणं पञ्ञायती’’ति। एतमत्थं भगवा अवोच। तत्थेतं इति वुच्चति –
‘‘Atthi, bhikkhave , ajātaṃ abhūtaṃ akataṃ asaṅkhataṃ. No cetaṃ, bhikkhave, abhavissa ajātaṃ abhūtaṃ akataṃ asaṅkhataṃ, nayidha jātassa bhūtassa katassa saṅkhatassa nissaraṇaṃ paññāyetha. Yasmā ca kho, bhikkhave, atthi ajātaṃ abhūtaṃ akataṃ asaṅkhataṃ, tasmā jātassa bhūtassa katassa saṅkhatassa nissaraṇaṃ paññāyatī’’ti. Etamatthaṃ bhagavā avoca. Tatthetaṃ iti vuccati –
‘‘जातं भूतं समुप्पन्नं, कतं सङ्खतमद्धुवं।
‘‘Jātaṃ bhūtaṃ samuppannaṃ, kataṃ saṅkhatamaddhuvaṃ;
‘‘आहारनेत्तिप्पभवं, नालं तदभिनन्दितुं।
‘‘Āhāranettippabhavaṃ, nālaṃ tadabhinandituṃ;
तस्स निस्सरणं सन्तं, अतक्कावचरं धुवं॥
Tassa nissaraṇaṃ santaṃ, atakkāvacaraṃ dhuvaṃ.
‘‘अजातं असमुप्पन्नं, असोकं विरजं पदं।
‘‘Ajātaṃ asamuppannaṃ, asokaṃ virajaṃ padaṃ;
निरोधो दुक्खधम्मानं, सङ्खारूपसमो सुखो’’ति॥
Nirodho dukkhadhammānaṃ, saṅkhārūpasamo sukho’’ti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. अजातसुत्तवण्णना • 6. Ajātasuttavaṇṇanā
