| Library / Tipiṭaka / ติปิฎก • Tipiṭaka / อิติวุตฺตกปาฬิ • Itivuttakapāḷi |
๖. อชาตสุตฺตํ
6. Ajātasuttaṃ
๔๓. วุตฺตเญฺหตํ ภควตา, วุตฺตมรหตาติ เม สุตํ –
43. Vuttañhetaṃ bhagavatā, vuttamarahatāti me sutaṃ –
‘‘อตฺถิ, ภิกฺขเว , อชาตํ อภูตํ อกตํ อสงฺขตํฯ โน เจตํ, ภิกฺขเว, อภวิสฺส อชาตํ อภูตํ อกตํ อสงฺขตํ, นยิธ ชาตสฺส ภูตสฺส กตสฺส สงฺขตสฺส นิสฺสรณํ ปญฺญาเยถฯ ยสฺมา จ โข, ภิกฺขเว, อตฺถิ อชาตํ อภูตํ อกตํ อสงฺขตํ, ตสฺมา ชาตสฺส ภูตสฺส กตสฺส สงฺขตสฺส นิสฺสรณํ ปญฺญายตี’’ติฯ เอตมตฺถํ ภควา อโวจฯ ตเตฺถตํ อิติ วุจฺจติ –
‘‘Atthi, bhikkhave , ajātaṃ abhūtaṃ akataṃ asaṅkhataṃ. No cetaṃ, bhikkhave, abhavissa ajātaṃ abhūtaṃ akataṃ asaṅkhataṃ, nayidha jātassa bhūtassa katassa saṅkhatassa nissaraṇaṃ paññāyetha. Yasmā ca kho, bhikkhave, atthi ajātaṃ abhūtaṃ akataṃ asaṅkhataṃ, tasmā jātassa bhūtassa katassa saṅkhatassa nissaraṇaṃ paññāyatī’’ti. Etamatthaṃ bhagavā avoca. Tatthetaṃ iti vuccati –
‘‘ชาตํ ภูตํ สมุปฺปนฺนํ, กตํ สงฺขตมทฺธุวํ;
‘‘Jātaṃ bhūtaṃ samuppannaṃ, kataṃ saṅkhatamaddhuvaṃ;
‘‘อาหารเนตฺติปฺปภวํ, นาลํ ตทภินนฺทิตุํ;
‘‘Āhāranettippabhavaṃ, nālaṃ tadabhinandituṃ;
ตสฺส นิสฺสรณํ สนฺตํ, อตกฺกาวจรํ ธุวํฯ
Tassa nissaraṇaṃ santaṃ, atakkāvacaraṃ dhuvaṃ.
‘‘อชาตํ อสมุปฺปนฺนํ, อโสกํ วิรชํ ปทํ;
‘‘Ajātaṃ asamuppannaṃ, asokaṃ virajaṃ padaṃ;
นิโรโธ ทุกฺขธมฺมานํ, สงฺขารูปสโม สุโข’’ติฯ
Nirodho dukkhadhammānaṃ, saṅkhārūpasamo sukho’’ti.
อยมฺปิ อโตฺถ วุโตฺต ภควตา, อิติ เม สุตนฺติฯ ฉฎฺฐํฯ
Ayampi attho vutto bhagavatā, iti me sutanti. Chaṭṭhaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อิติวุตฺตก-อฎฺฐกถา • Itivuttaka-aṭṭhakathā / ๖. อชาตสุตฺตวณฺณนา • 6. Ajātasuttavaṇṇanā
